1 ✝ 2:1 Im. 23:15-21; Kap. 16:9-11. Wakutuuna akawa raraeana Pentakosta,*2:1 Pentakosta: Maʼanana i nuncana pogau Yunani 'lima pulu.' Eona Pentakosta satotuuna o eona raraeana agama Yahudi kangengena lima pulu eo sapadhana Eona Paska to araraeaaka Eona Raraeana Timpuana Gandum i bulaana timpua. (Limb. 23:16; 34:22.) bhari-bharia mia moparacaeana tee Isa aporomusaka i saangu bhanua. 2 Saanampuu atorangomo minaaka i laiana o nduu momakaa mboomo soona ngalu. Nduuna atorango i saangua bhanua i tampana manga incia aporomusaka. 3 Kasiimpo manga incia akamatamo mboomo manga rorena waa apekapolapolaka tee asampa i bhaana manga incia samia-samia. 4 Manga incia bhari-bharia akuasaia Rohina Aulataʼala, kasiimpo manga incia apepuu apogau i nuncana manga pogauna lipu mosagaanana, mboomo opea mopadhana idhawuakana Rohina Aulataʼala i manga incia to apogauakea.

5 Wakutuuna incia sumai dhaangia manga miana Yahudi mosaalihi minaaka i bhari-bharia lipu i saangua dunia momboorena i Yerusalem.*2:5 manga miana Yahudi mosaalihi: Miana Yahudi aziara minaaka i lipu mbooresana to araraeaaka Eona Pentakosta i Yerusalem, roonamo Baitulla iwe sumai.