Kaudhaniakana Isa Mamudhaakana Tapengkaanaka tee Manga Ahalii Hukumu Taurati tee Manga Mia minaaka i Rombongana Farisi
1 Kasiimpo Isa apogaumo i manga mia bhari tee manga murina, 2 "Manga ahalii Hukumu Taurati tee manga mia minaaka i rombongana Farisi apotibhaakamo kuasa to amaʼanaiaka tee aadhariaka hukumuna Nabii Musa. 3 Sababuna sumai, taʼatia tee osea bhari-bharia giu kaadharina manga incia. Maka bholi uose pewauna roonamo inda apewau opea iadhariakana manga incia. 4 Manga incia abhoke bhawa momatamo, kasiimpo apasodhaakea i awaana manga mia, sainamo karona samia amendeu asodha. 5 Bhari-bharia ipewauna manga incia tangkanamo to pokamatana mia. Manga incia aporadhamii apake talina ibaadati momaewa tee apekaaratea manga jubana!23:5 Manga incia apake talina ibaadati tee juba maarate mpuu to katandaina ataʼati i Aulataʼala. Tali ibaadati sumai akoantoaka manga aeati minaaka i Kitabi Momangkilona, tee tali ibaadati sumai abhokea i bhawona rouna tee i limana manga. 6 Manga incia peeluana auncura i tampa momalape i tampana kariaa atawa i nuncana tampana ibaadati. 7 Wakutuuna alalo i dhaoa, manga incia apeelua ahoromatia manga mia tee agoraakea 'Guru.'