1 ଇୟା ମାଟା ସତ୍‌, ପାର୍‌ତନା କିନି ମଣ୍ତ୍‌ଲିଦୁ ନେତା ଆନି ଉଣ୍ତିଙ୍ଗ୍‌ ଆମା ଲୋକ୍‌ ବଦା କିନାନ୍‌, ୱାନ୍‌ ସତ୍‌ ଉଣ୍ତ୍ରି ନେଗି ପାଣି କିଦେଙ୍ଗ୍‌ ବଦା କିନାନ୍‍ । 2 ✝ମାତର୍‌ ମଣ୍ତ୍‌ଲିଦିଙ୍ଗ୍‌ ସୁଡ଼ୁନିକାନ୍‌ ଇନିଦୋସ୍‌ସିଲି ଲୋକୁ ଆନିକାମାନାତ୍‌, ଅରେତ୍‍ ଆଇମାଦି କନ୍‍ଲି, ମିଚ୍‌ ଇନ୍‍ଇକା, ନେଗିବୁଦି ମାରି ସେବାକିନିକା ଆନି ଦର୍‌କାର୍‌ । ୱାନ୍‌ କୁଡ଼ାଆଙ୍ଗ୍‌ ସନ୍‌ମାନ୍‌କିନିକା ଆନିମାନିକା ମାରି ସିକିୟାଦାନ୍‌ କିଦେଙ୍ଗ୍‌ ୱାନି ବପୁ ମାନିକାମାନାତ୍‌ । 3 ୱାନ୍‌ କାଡ଼ୁଉଣିକାନ୍‌ ନି ରିସାଦି ଲୋକ୍‌ ଆଇକା ମାନାତ୍‍, ତିର୍‌ ମାରି ସାନ୍ତିଦି ଲୋକ୍‍ ଆନିକା ମାନାତ୍‍ । ୱାନ୍‍ ଦନ୍‌ତିଙ୍ଗ୍‌ ଆସାଇକା ମାନାତ୍‍ । 4 ନିଜେଦି ଇଲୁପରିବାର୍‌ତିଙ୍ଗ୍‌ ୱାନ୍‌ ନେଗେନ୍‌ତାନ୍‌ ସାଲାକିଦେଙ୍ଗ୍‌ ଆଟ୍‌ସିମାନାନ୍‌ ମାରି ୱାନିଙ୍ଗ୍‌ ସନ୍‌ମାନ୍‌ ସିଜି ୱାନି ରାଜି ଆନି ଉଣ୍ତିଙ୍ଗ୍‌ ୱାନି କଡ଼ର୍‌ ସିକିୟା ସିନାନ୍‍ । 5 ଆମା ଲୋକ୍‌ ନିଜେଦି ଇଲୁପରିବାର୍‌ତିଙ୍ଗ୍‌ ସାଲାକିଦେଙ୍ଗ୍‌ ଆଟ୍‌ଏନ୍‌, ୱାନ୍‌ ମାପୁରୁଦି ଉପାସକ୍‌ ମଣ୍ତଲିଦିଙ୍ଗ୍‌ ଜାତୁନ୍‍ ଅନାନ୍‌ ଏଣ୍ତେସ୍‌ ? 6 ୱାନ୍‌ ବିସ୍‌ବାସ୍‌ତୁ ପୁରା ତେବାନିକା ମାନାତ୍‌; ଆଇତିଙ୍ଗ୍‍ ସୟତାନ୍‌ ୱାଜା ଗର୍ବ କିଜି ଦଣ୍ତ୍‌ ପୟ୍‌ନି ମାଟା ମାନାତ୍‌ । 7 ମଣ୍ତ୍‌ଲି ଆତେରେ ଲୋକାମାନୁବା ୱାନ୍‌ ଅରେନ୍‌ ସନ୍‌ମାନ୍‌ ପଇନି ଲୋକ୍‌ ଆନିକା ମାନାତ୍‍, ଉସାସ୍‌ତାନ୍‌ ସୟତାନ୍‌ତି ଉରିଦୁ ଆର୍‌ଜି ୱାନ୍‌ ଏଣ୍ତେସ୍‌ ଅପ୍‌ମାନ୍‌ ଆନାନ୍‌ ।

8 ମଣ୍ତ୍‌ଲିଦି ସେବାକିନିକାର୍‌ ବା ନେଗିଗୁଣୁ ମାରି ନେଗିପାଣିକିଦେଙ୍ଗ୍‌ ଆନି ଦର୍‌କାର୍‌ । ୱାର୍‌ କାଡ଼ୁଉଣିକାର୍‌ ନି ଦନ୍‌ତିଙ୍ଗ୍‌ ଆସାନିକାର୍‍ ଆଏର୍‌ ମାନାର୍‌ । 9 ମା ଦାର୍ମୁ ବିସ୍‌ବାସ୍‌ତି ୱେର୍‌ଆୟ୍‌ଆତିମାନି ମାଟେଙ୍ଗ୍‌ୱିଜୁ ୱାର୍‌ ନେଗି ବୁଦିଦାନ୍‌ ଡାଟ୍‌ତାନ୍‌ ବିସ୍‌ବାସ୍‌ କିଜିମାନାର୍‌ । 10 ମଣ୍ତ୍‌ଲିଦି ପାଣି କିଦେଙ୍ଗ୍‌ ଅଦିକାର୍‌ ପୟ୍‌ନି ଆଗ୍‍ଡ଼ିନେ ୱାରିଙ୍ଗ୍‌ ବା ପରିକା କିପିର୍‌ । ଇୟା ପରିକାଦୁ ନିନ୍ଦା ସିଲିକାନ୍‍ ଇଜି ତରିତିଙ୍ଗ୍‍ନେ ୱାର୍‌ ସେବା ପାଣିକିଦେଙ୍ଗ୍‌ ଅଦିକାର୍‍ ପୟ୍‌ନାର୍‌ । 11 ୱାରି ଆଡ଼୍‍ସିକ୍‍ ବା ନେଗିଗୁଣୁ ଆନେମାନେ ମାରି ଆଇ ଲୋକା ସୁରି ମାଟା ୱେର୍‌ଇକା ମାନାତ୍ । ୱାକୁ ମିଚ୍‌ୱେର୍‌ନିକା ମାରି ୱିଜୁ ବିସୟ୍‌ତୁ ବିସ୍‌ବାସ୍‌ ଆନିକା ଦର୍‌କାର୍‌ । 12 ସେବାକିନିକାର୍‌ ଅରେତ୍‌ ଆଇମାଦି କନ୍‌ଲି ଆପିନ୍‌, ମାରି ନିଜେଦି ଇଲୁପରିବାର୍‌ତିଙ୍ଗ୍‌ ମାରି କଡ଼ରିଙ୍ଗ୍‌ ନେଗେନ୍‌ତାନ୍‌ ସାଲାକିଦେଙ୍ଗ୍‌ ଆଟ୍‌ସିନିକା ମାନାନ୍‌ । 13 ସେବାକିନି ଇସାବ୍‌ତାନ୍‌ ଆମାକାର୍‌ ନେଗିପାଣି ତର୍‌ନାର୍‌, ୱାର୍‌ ମଣ୍ତ୍‌ଲିଦୁ ସନ୍‌ମାନ୍‌ କିନାର୍‌ ମାରି କ୍ରିସ୍ତ ଜିସୁଦି ବିସ୍‌ବାସ୍‌ ବିସୟ୍‌ତାନ୍‌ ତିଲାଏଣ୍‌ଗା ନିଜେଦି ମାଟା ୱେର୍‌ତେଙ୍ଗ୍‌ ଆଟ୍‌ନାର୍‌ ।

14 ଇୟା ଆକୁ ରାସ୍‌ନି ୱାଲେ, ଦାପ୍ରେ ମିଙ୍ଗିଁ ସୁଡ଼ୁଜ ୱାନି ଉଣ୍ତିଙ୍ଗ୍‌ ନାନ୍‌ ଆସା କିଜିନା, 15 ମାତର୍‌ ଜଦି ନାନ୍‌ ୱାନିକା ୱେଡ଼ା ଆନାତ୍‌, ଜିବନ୍‌ମାନି ମାପୁରୁଦି ଇଲୁୱାଜା ଇୟା ପାର୍‍ତନାକିନି ମଣ୍ତଲିଦୁ ମାଙ୍ଗିଁ ଏଣ୍ତେସ୍‌ ଜିଦେଙ୍ଗ୍‌ ଆନାତ୍‌, ଇୟା ଆକୁ ଦାନ୍‌ ଆକା ମିର୍‌ ନେସ୍‌ତେଙ୍ଗ୍‌ ଆଟ୍‌ନିଦେର୍‌ । ଇୟା ମାପୁରୁଦି ମଣ୍ତଲି ନେ ୱିଜୁଦିନ୍‌ତି ସତ୍‌ତି ମୁଣ୍ତା ନି କୁନାଦି ରାସ୍‌ତିକା । 16 ମା ଦାର୍ମୁବିସ୍‌ବାସ୍‌ତି ଇୟା ପେରିବିସୟ୍‌ ଏନ୍‌ ମାନାଦେଙ୍ଗ୍‌ ଆଟ୍‌ଏନ୍‌ :

କ୍ରିସ୍ତ ଲୋକା ମେନ୍ଦଲ୍‌ ଆସ୍‌ସି ରେତାତାନ୍‌,

ମୁସ୍‌କୁପୁର୍‌ତି ଦୁତ୍‌କୁ ମାଣୁକୁ ତରାୟ୍‌ଆତାନ୍‌,

ଆତ୍ମାଦୁ ଦାର୍ମିକ ଇଜି ପାର୍‌ମାଣ୍‌ କିଆୟାଆତାନ୍‌,

ୱିଜୁଜାତିଦି ଲଇ ୱାନି ନେଗିକାବୁର୍‌ ପ୍ରଚାର୍‌ ଆତାତ୍‌,

ସାରାଦୁନିଆଦି ୱିଜୁତରିନ୍‌ ୱାନ୍‌ ବିସ୍‌ବାସ୍‌ ଆଜି

ଗୌରବ୍‌ତାନ୍‌ ମୁସ୍‌କୁପୁର୍‌ତୁ ମୁସ୍‌କୁ ସର୍ହାନ୍‌ ।