1 କ୍ରିସ୍ଟାନ୍‌ ବିସ୍‌ବାସ୍‌ସିର୍‌ ପାଣିକିନିକାର୍‌ ମାଲିକାଙ୍ଗ୍‌ ନିୟମ୍‌ତାନ୍‌ ସନ୍‌ମାନ୍‌ ସିପିର୍‌ । ଆର୍‌ତିଙ୍ଗ୍‌, ମାପୁରୁଦି ବିରୁଦ୍‌ତାନ୍‌ ମାରି ମା ସିକିୟା ବିସୟ୍‌ତାନ୍‌ ଏନ୍‌ ଇନି ନିନ୍ଦା କିଦେଙ୍ଗ୍‌ ଆଟ୍‌ଏନ୍‌ । 2 ମାରି ଆମାୱାରି ମାଲିକ୍‌କୁ ବା କ୍ରିସ୍ତବିସ୍‌ବାସ୍‌ସିର୍‌, ୱାର୍‌ ମାଲିକାଙ୍ଗ୍‌ ତଡ଼ାନ୍‌କୁ ନି ତାଙ୍ଗିଁକି ଇଜି ଅଡ଼୍‍ବିଜି ୱାରିଙ୍ଗ୍‌ ନେଗେନ୍‌ତାନ୍‌ ସନ୍‌ମାନ୍‌ ସିଦେଙ୍ଗ୍‌ ଗାଡ଼ିଆ ଆମାକିର୍‌ ମାରି ନାଣ୍ତ୍‌ ଜାତୁନ୍‌ଦାନ୍‌ ୱାରି ସେବା କିପିର୍‌, ଇରିଙ୍ଗ୍‌ ଆମାକାର୍‌ ସେବାଦାନ୍‌ ଲାଡ୍‍ ପୟ୍‌ନାର୍‌, ୱାର୍‌ ବିସ୍‌ବାସ୍‌ସିର୍‌ ମାରି ନାଣ୍ତ୍‌ ୱେଡ଼ିକା ଲୋକୁ । ଇୟାୱିଜୁ ବିସୟ୍‌ ମିର୍‌ ସିକିୟା ସିଜି ପ୍ରଚାର୍‌ କିନିଦେର୍‌ ।

3 ଆମାକାର୍‌ ପ୍ରବୁ ଜିସୁ କ୍ରିସ୍ତଦି ସିକିୟାଦି ୱାଲେ ଅରତ୍‌ ସିଲିକା ମାରି ମା ଦାର୍ମୁ ସିକିୟାଦି ବିରଦ୍‌ କିଜିମାନି ଆଇଜାତିଦି ବାକ୍ୟ ପ୍ରଚାର୍‌ କିନାର୍‌, 4 ୱାର୍‌ କେବଲ୍‌ ପଟାଦୁ କେଇନିକା ଡ଼ିସ୍‌ତିଙ୍ଗ୍‌ ମାରି ଇନିକା ସିଲେଏର୍‌ । ୱାର୍‌ ସାସ୍ତ୍ରଦି ଅରତ୍‌କୁ ଅସି ଆଉଲି କିନାର୍‌; ଆବେଣୁକୁ କେବଲ୍‌ ଆକାର୍‍, ନାମ୍‌ଇକା, ସୁରିୱାର୍‌ଗିନିକା ମାରି ଗଣ୍ତ୍‌ଗଲ୍‌ କିନିକା ଆନାତ୍‌ । 5 ୱାର୍‌ ବିସାର୍‌ସିଲିକା ଆଜି ବେକାର୍‌ ଆସାନି ମାଣ୍‌କୁ ସତ୍‌ତି ବିରୁଦ୍‌ କିନାର୍‌ । ଦାର୍ମୁବିସ୍‌ବାସ୍‌ତିଙ୍ଗ୍‌ କେବଲ୍‌ ଦନି ଆନିକା ଉଣ୍ତ୍ରି ଉପାୟ୍‌ ଇଜି ୱାର୍‌ ଅଡ଼୍‌ବିନାର୍‌ ।

6 ଦର୍ମକିନି ଲୋକୁ ସତ୍‌ତାନ୍‌ ଦନି, ଇରିଙ୍ଗ୍‌ ୱାନିନ୍ଦି ଏସ ମାନାତ୍‌, ନାସ୍‌ଦାନ୍‌ନେ ୱାନ୍‌ ୱେଡ଼ିକା ମାନିନ୍‌ । 7 ଇରିଙ୍ଗ୍‌ ମାଡ୍‌ ଇୟା ଦୁନିଆଦୁ ଇନିକା ଆସ୍‌ସି ୱାତିମାନିକା ? ଇନିକା ସିଲେ । ମାରି ଇବେଣ୍‌କୁ ଅର୍‌ସେ ଇନିକା ଆସ୍‌ସି ଡ଼େସିସନିକା ? ଇନିକା ସିଲେ । 8 ଆର୍‌ତିଙ୍ଗ୍‌, ମାଙ୍ଗିଁ ଉଣିକା ନି ଆରାନିକା ନିଜେଦିବାଡି ଆଦେଙ୍ଗ୍‌ଆଟ୍‌ତିଙ୍ଗ୍‌, ଇକା ମା ଉଣ୍ତିଙ୍ଗ୍‌ ନାଣ୍ତ୍‌ ସିଲେ ନୋ ? 9 ମାତର୍‌ ଦନ୍‌ସମ୍ପତିଦିଙ୍ଗ୍‌ ଆସା ଲୋକ୍‌ତିଙ୍ଗ୍‌ ଗାଦି ପରିକା ମାରି ଉରି ଲଇ ରେନାଅନାତ୍‌; ୱାନି ମୋନ୍‌ତୁ ଗାଦି ତାଗ୍‌ଇ ମାଟେଙ୍ଗ୍‌ ଆସା କିଜି ୱାନିଙ୍ଗ୍‌ ଦଂସ୍‌ ମାରି ସାନି ତରିନ୍‌ ତର୍‌ସି ଅନାତ୍‌ । 10 ଡାବୁଙ୍ଗୁଁ ଲୋବ୍‌ ୱିଜୁ ୱିଜ୍‌ନି ମୁଲ୍‌ । ଆମାକାର୍‌ ୱିଜୁଦିନ୍ କେବଲ୍‌ ଡାବୁଙ୍ଗ୍‌ଣି ଉପାୟ୍‌ ପୟ୍‌ଜି ମାନାର୍‌, ୱାର୍‌ ଦାର୍ମୁ ବିସ୍‌ବାସ୍‌ତିଙ୍ଗ୍‌ ହାରାକିଦେଙ୍ଗ୍‌ ବାସ୍‌ନାର୍‌ ସାରାସାରିୱେନ୍‌କା କେବଲ୍‌ ଦୁଃକ୍‌ବୋଗ୍‌ତାନ୍‌ ୱାରି ଜିବନ୍‌ ରୁଙ୍ଗୁଁନା ମାନାତ୍‌ ।

11 ମାତର୍‌ ଏ ତିମତି ମାପୁରୁଦି ଲୋକୁ, ଇୟା ୱିଜୁମାଣାନ୍‌ ନିନ୍‍ ଆକ ମାନ୍‌ଆ । ଦାର୍ମୁପାଣି, ମାପୁରୁ ଦାର୍ମୁ ଜିବନ୍‌ ବିସ୍‌ବାସ୍‌, ଜିବନ୍‍ନୋନିକା, ସାନ୍ତି ମାରି ସାସ୍‌ ୱିଜୁଦୁ ପୁରାଗୁଣୁତାନ୍‌ ପୁରାପୁରି ଆଦେଙ୍ଗ୍‌ ସେସ୍ଟା କିଦୁ । 12 ବିସ୍‌ବାସ୍‌ତି ନେଗି ଜୁଦ୍‌ କିଜି ଏସ୍‌କାଙ୍ଗ୍‌ୱିଜ୍‌ଇ ଜିବନ୍‌ ପୟ୍‌ଦୁ । ଇୟା ପାଣିଦୁ ଇନି ଉଣ୍ତିଙ୍ଗ୍‌ ମିର୍‌ ବାସେଆତିମାନି ମାରି ଗାଦିଲୋକା ସାକିଙ୍ଗାଁ ଲୋଇ ଇକା ମାନାତିମାନି । 13 ✝ୱିଜେରି ଜିବନ୍‌ସିନି ମାପୁରୁଦି ଆଗ୍‌ଡ଼ି, ମାରି ପନ୍ତିୟ୍‌ ପିଲାତ୍‌ଦି ଆଗ୍‌ଡ଼ି ଡାଟ୍‌ ବିସ୍‌ବାସ୍‌ତାନ୍‌ ସାକିୟ୍‌ ସିତିମାନି ପ୍ରବୁ ଜିସୁ କ୍ରିସ୍ତଦି ଦର୍‌ତାନ୍‌ ନିଙ୍ଗିଁ ଆଦେସ୍‌ ସିଜି ୱେର୍‌ସିନା : 14 ପ୍ରବୁ ଜିସୁ କ୍ରିସ୍ତଦି ମାରିଡ଼େସିୱାନି ସାନ୍ଦି ନିଙ୍ଗିଁ ସିଆୟ୍‌ଆତିମାନି ମାଟେଙ୍ଗ୍‌ୱିଜୁ ବିସ୍‌ବାସ୍‌ତାନ୍‌ ମାନାଜି ନେଗେନ୍‍ ମାରି ନିନ୍ଦା ଆଏନ୍‍ଣ୍ତା ତେବାଦୁ । 15 ୱାନି ମାରିଡ଼େସିୱାନିକା ନେଗି ସମୟ୍‌ ଆସ୍‌ କିନାନ୍‌ ନିଜେ ମାପୁରୁ ଦନ୍ୟ, ରାଜାରି ରାଜା ମାରି ପ୍ରବୁରି ପ୍ରବୁ, ମାରି ଅରେନ୍‌ ସାସନ୍‌ କିନିକାନ୍‌; 16 ୱାନ୍‌ କେବଲ୍‌ ସାଏନ୍‌; ଲୋକାଦି ନେସ୍‍ଇ ଜାୟ୍‌ ରାଜିଦୁ ୱାନ୍‌ ବାସା କିନାନ୍‌; ଏନ୍‌ ୱାନିଙ୍ଗ୍‌ ସୁଡ଼ୁଏନ୍‌; ଏନ୍‌ ଏସ୍‌କାଙ୍ଗ୍‌ ସୁଡ଼ୁଦେଙ୍ଗ୍‌ ଆଟ୍‌ଏନ୍‌ । ୱାନି ଗୌରବ୍‌ ମାରି ରାଜି ଜୁଗ୍‍ ଜୁଗ୍‌ ସାନ୍ଦି ମାନିତ୍‌ ।

17 ଇୟା ଦୁନିଆଦୁ ବିସୟ୍‌ତାନ୍‌ ଆମାକାର୍‌ ଦନି, ୱାରିଙ୍ଗ୍‌ ଆକାର୍‍ ଆଇଉଣ୍ତିଙ୍ଗ୍‌ ଜାଗାର୍‌ତା କିଦୁ । ୱାରିଙ୍ଗ୍‌ ଆଦେସ୍‌ ସିଜି ୱେର୍‌ତୁ, ବେକାର୍‌ ଦନ୍‍ସମ୍ପତି ମୁସ୍‌କୁ ଆସା ଇଡ୍‌ମାଟ୍‌, ୱାର୍‌ ୱିଜୁଦିନ୍‌ ମାପୁରୁଦି ମୁସ୍‌କୁ ଆସା ଇଡ୍‌ଦୁ । ତାନି ୱେନ୍‌କା ଜିଦେଙ୍ଗ୍‌ ଇଜି ମା ୱିଜୁ ଦରକାର୍‍ତି ବିସୟ୍‌ ୱାନ୍‍ ମାଙ୍ଗିଁ ସିନାନ୍‍ । 18 ସତ୍‌ପାଣିଦୁ ଜାତୁନ୍‍ ଆଜି ନେଗିଦନ୍‌ ଉଣ୍ତା କିଦୁ; ଦାନ୍‌ସିଜି ନିଜେଦି ପାଣିଦୁ ଆଇୱାରିଙ୍ଗ୍‌ ମିସା କିଦୁ । 19 ଆର୍‌ତିଙ୍ଗ୍‌ ଇୟାୱାଜା କିତିଙ୍ଗ୍‌ ୱାର୍‌ ୱାଜିନିଦିନ୍‌ତି ଉଣ୍ତିଙ୍ଗ୍‌ ମୁଲ୍‌ଦନ୍‌ ନିଜେ ନିଜେଦି ଉଣ୍ତିଙ୍ଗ୍‌ ଉଣ୍ତା କିନାର୍‌ ମାରି ସାରାସାରିୱେନ୍‌କା ୱାର୍‌ ସତ୍‌ତି ଜିବନ୍‌ ପୟ୍‌ନାର୍‌ ।

20 ଏ ତିମତି, ନି ମୁସ୍‌କୁ ସିଆୟ୍‌ ଆତିମାନି ଦାଇତ୍‌ ବିସ୍‌ବାସ୍‌ତାନ୍‌ ମାନେଆଆ । ଏନ୍‌ ଏନ୍‌ ଦାର୍ମୁସିଲି ନିର୍ବୁଦି କାବାଦିଙ୍ଗ୍‌ "ବୁଦି" ଇଜି ଅଡ଼୍‍ବିଜି ସତ୍‌ତି ଦାର୍ମୁ ବିସ୍‌ବାସ୍‌ତାନ୍‌ ୱେର୍‌ଏ ଆଜିନାର୍‌ ଇୟା ୱିଜୁମାଣାନ୍‌ ନିନ୍‍ ଆକ ମାନ୍‌ଆ 21 ଏନ୍‌ ଏନ୍‌ ୱେଡ଼ା କିଜି ବିସ୍‌ବାସ୍‌ ବିସୟ୍‌ତାନ୍‌ ସାରିବାଣାତା ମାନାର୍‌ । ମାପୁରୁ ମି ୱିଜେରିଙ୍ଗ୍‌ ୱାନି ଦୟା ସିପିନ୍‌ ।