1 ସାରାସାରିୱେନ୍‌କା, ତଡ଼ାନ୍‌କୁ ନି ତାଙ୍ଗିଁକି, ମାପୁରୁଙ୍ଗୁଁ ୱେଡ଼ିକା କିନି ଉଣ୍ତିଙ୍ଗ୍‌ ଏଣ୍ତେସ୍‌ ଜିଜି ମାଡ଼ିଜିଦେଙ୍ଗ୍‌ ଆନାତ୍‌, ଆୟା ମାଣାନ୍‌ ଅଜାତିମାନିଦେର୍‌ । ଏଣ୍ତେସ୍‌ବା ଆୟାୱାଜା ଦାନ୍‌ ମିର୍‌ ଜିଜି ମାଡ଼ିଜି ୱାଜିନିଦେର୍‌, ମାତର୍‌ ଇୟାମାଣାନ୍‍ ଅଡ଼ପ୍‍ ନାଣ୍ତ୍‌ କିଦେଙ୍ଗ୍‌ ମିଙ୍ଗିଁ ମାପ୍‌ ଇଲେଇ ପ୍ରବୁ ଜିସୁଦି ଦର୍‌ତାନ୍‌ ୱେଡ଼ିକା ନି ଅନୁରୋଦ୍‌ କିଜିନାପ୍‍ । 2 ମାପ୍‌ ପ୍ରବୁ ଜିସୁଦି ମାଣାନ୍‌ ଅଦିକାର୍‌ ପୟ୍‌ତାପ୍ ମିଙ୍ଗିଁ ଆମା ଆମା ଆଦେସ୍‌ ସିତାମାର୍‌ର୍ହାପ୍‌, ଆକା ମିର୍‌ ନେସ୍‌ନିଦେର୍‌ । 3 ମିର୍‌ ଏଣ୍ତେସ୍‌ ପବିତ୍ର ଆନିଦେର୍‌, ଇକାନେ ମାପୁରୁଦି ବଦା, ଅର୍ତାତ୍‍ ମିର୍‌ ଏଣ୍ତେସ୍‌ ଦାରିପାଣିଦାନ୍‌ ଆକ ତେବାନିଦେର୍‌ । 4 ୱିଜେରେ ଲୋକ୍‌ ନେସ୍‌ନିକା ମାନାତ୍‌ ଜେ ଏଣ୍ତେସ୍‌ ନିଜେ ନିଜେଦି ଆଡ଼୍‌ସିକା ୱାଲେ ପବିତ୍ର ନି ସନ୍‌ମାନ୍‌ତାନ୍‌ ଜିନିକା ମାନାତ୍‌ । 5 ମାପୁରୁଙ୍ଗ୍‍ଁ ନେସ୍‌ଇମାନି ଦୁନିଆଦି ଅଣଜିହୁଦି ଲୋକା ୱାଜା ଲାଲାୟ୍‌ ଆମାଟ୍‌ । 6 ଏମେ କ୍ରିସ୍ତ ବିସ୍‌ବାସ୍‌ତି ତଡ଼ାନ୍‌ ଉଣ୍ତିଙ୍ଗ୍‌ ଅନ୍ୟାୟ୍‌ପାଣି କିମାଟ୍‌, ମାରି ୱାନିଙ୍ଗ୍‌ ବାଣ୍ତିସ୍‍ କିମାଟ୍‌ । ଇୟା ମାଟା ମାପ୍‌ ଆଗ୍‍ଡ଼ିରାନ୍‍ନେ ୱେର୍‌ତାମାନାପ୍‌ ମାରି ଡାଟ୍‌ତାନ୍‌ ଜାଗାର୍‌ତା କିତାମାନାପ୍‌, ଆମାକାର୍‌ ଆୟାୱାଜା କିନାର୍‌, ପ୍ରବୁ ୱାରିଙ୍ଗ୍ ସାସ୍ତି ସିନାନ୍‌ । 7 ମାପୁରୁ ମାଙ୍ଗିଁ ତାଗ୍‍ଇକାର୍‍ ଆଜି ଜିନିମାଡ଼ିନି ଉଣ୍ତିଙ୍ଗ୍‌ କୁକ୍‌ଏନ୍‌, ମାତର୍‌ ପବିତ୍ର ଆଜି ମାନ୍‌ଡ୍ରେଙ୍ଗ୍‌ କୁକ୍‌ତାମାନାନ୍‌ । 8 ମାରି, ଏନ୍‌ ମା ଇୟା ମାଟାଦିଙ୍ଗ୍‌ ମାନାଏନ୍‌, ୱାନ୍‌ ଲୋକ୍‌ତିଙ୍ଗ୍‌ ମାନାଏନ୍‌, ମାତର୍‌ ଆମା ମାପୁରୁ ମିଙ୍ଗିଁ ମନ୍‌ତୁ ନିଜେଦି ପବିତ୍ରଆତ୍ମା ସିନାନ୍‌, ୱାନିଙ୍ଗ୍‌ ମାନାଏନ୍‌ ।

9 ଇଲେଇ କ୍ରିସ୍ତବିସ୍‌ବାସ୍‌ସିର୍‌ ମି ଜିବନ୍‌ନୋନି ବିସୟ୍‌ତାନ୍‌ ମାପ୍‌ ମାରି ନାଣ୍ତ୍‌ ରାସ୍‌ନିକା ଦର୍‌କାର୍‌ ସିଲେ । ନିଜେନିଜେଦିଙ୍ଗ୍‌ ଏଣ୍ତେସ୍‌ ଜିବନ୍‍ନୋନିକା ମାନାତ୍‌, ଇକା ନିଜେ ମାପୁରୁମାଣାନ୍‌ ଅଜାତିମାନିଦେର୍‌ । 10 ସତ୍‌ତାନ୍‌ ୱିଜୁ ମାସିଦୋନିଆଦୁ ମାନି କ୍ରିସ୍ତଦି ବିସ୍‌ବାସ୍‌ସିର୍‌ ତଡ଼ାନ୍‌କା ଉଣ୍ତିଙ୍ଗ୍‌ ମିର୍‌ ଆୟାୱାଜା ପାଣି କିତିମାନିଦେର୍‌ । ଆତିଙ୍ଗ୍‌ବା ମାରି ନାଣ୍ତ୍‌ଦାନ୍‌ ଆକା କିଦୁ, ମିଙ୍ଗିଁ ନିସନେ କେବଲ ଅନୁରୋଦ୍‌ କିଜିନାପ୍‍ । 11 ଆଗ୍‍ଡ଼ିରାନ୍‍ ଏଣ୍ତେସ୍‌ ୱେର୍‌ତାମାର୍ହାପ୍‌, ସାନ୍ତିଦାନ୍‌ ଜିନିମାଡ଼ିନିକା, ନିଜେଦି ପାଣିଦୁ ମୋନ୍‌ ସିଜି ମାରି ନିଜେ ନିଜେଦି ଜିନିକା ଉଣ୍ତାକିନିକା ମିଦି ପୁରା ଆପିତ୍‌ । 12 ଇୟାୱାଜା କିନି ମାଣ୍‌କୁ ମିର୍‌ ଅବିସ୍‍ବାସିରି ୱାରିମାଣାନ୍‌ ବା ସନ୍‌ମାନ୍‌ ପୟ୍‌ନିଦେର୍‌ ମାରି ମି ୱିଜୁ ଦର୍‌କାର୍‌ତି ଉଣ୍ତିଙ୍ଗ୍‌ ଏ ମୁସ୍‌କୁ ଆସା ଇଡ୍‌ନି ଦର୍‍କାର୍‍ ସିଲେତ୍‍ ।

13 ଏ ତଡ଼ାନ୍‌କୁ ନି ତାଙ୍ଗିଁକି, ଆସାସିଲି ଆଇ ୱିଜେରିଲୋକା ୱାଜା ମିର୍‌ ଏଣ୍ତେସ୍‌ ଦୁକ୍‍ସିନ୍ତାକିମାଟ୍‍, ଇୟାଉଣ୍ତିଙ୍ଗ୍‌ ସାତିମାନି ଲୋକା ବିସୟତାନ୍‍ ମିର୍‌ ଜେ ସତ୍‍ ନେସ୍‍ମାଟ୍‍, ଇକା ମା ବଦା ସିଲେତ୍‍ । 14 ଆୟାଉଣ୍ତିଙ୍ଗ୍‌ ମାଡ୍‌ ବିସ୍‌ବାସ୍‌ କିନାଟ୍‍ ଜେ, ଜିସୁ ସାଜି ମାରିଡ଼େସି ନିଙ୍ଗିଁତାନ୍‌, ଆଦେଙ୍ଗ୍‌ ମାପ୍‌ ଆଟ୍‌ୱା ବିସ୍‍ବାସ୍‍ ଜେ, ଜିସୁଦିମାନୁ ବିସ୍‌ବାସ୍‌ କିଜି ଆମାକାର୍‌ ସାନାର୍‌, ଜିସୁଦି ମାରିଡ଼େସି ୱାନିୱାଲେ ମାପୁରୁ ୱାରିଙ୍ଗ୍ ଜିସୁଦି ୱାଲେଅନାନ୍‌ ।

15 ମାପ୍‌ ଇଲେଇ ମିଙ୍ଗିଁ ଆମା ସିକିୟା ସିଜିନାପ୍‌, ଆକା ପ୍ରବୁଦି ସିକିୟା । ପ୍ରବୁଦି ୱାନିଦିନ୍‌ତୁ ମାଡ୍‌ ଆମାକାର୍‌ ଜିବନ୍‌ମାନିକା, ପୁର୍ବେଦାନ୍‍ ସାତିମାନି ଲୋକାମାଣ୍‌କୁ ଆଗ୍‌ଡ଼ି ଆଜି ସଲ୍‌ଇକା । 16 ନାସ୍ତିୱାଲେ ପେରି ବଲ୍‌ତାନ୍‌ ଉନ୍‌ଡ୍ରି ଆଦେସ୍‌ ଆନାତ୍‌, ପେରି ମୁସ୍‌କୁପୁର୍‌ତି ଦୁତ୍‌ତି ବଲୁ ୱେନିଦେର୍‌, ମାପୁରୁଦି ମରିବାଜା ଆଉଲି ୱେନିଦେର୍‌ ମାରି ପ୍ରବୁ ମୁସ୍‌କୁପୁର୍‌ତାନ୍‌ ରେସିୱାନାନ୍‌ । କ୍ରିସ୍ତମାନୁ ବିସ୍‌ବାସ୍‌ କିଜି ଆମାକାର୍‌ ସାତାମାନାର୍‌, ୱାର୍‌ ଆଗ୍‌ଡ଼ି ଜିବନ୍‌ଆଜି ନିଙ୍ଗିଁନାର୍‌; 17 ତାନେୱେନ୍‌କା ମାଡ୍‌ ଆମାକାର୍‌ ଆୟା ସମୟ୍‌ତୁ ଜିବନ୍‌ ତେବାନାମାନାପ୍‌, ବାଦ୍‌ଡ଼ତୁ ୱାରି ୱାଲେ ନିଙ୍ଗିଁଜି ୱାର୍‌ ବାଦଡ଼୍‍ତି ଦୁରିଦୁ ପ୍ରବୁଦି ୱାଲେ ବେଟ୍‌ଆନାର୍‌, ତାନେୱେନ୍‌କା ମାଡ୍‌ ୱିଜୁଦିନ୍‌ତିଙ୍ଗ୍‌ ପ୍ରବୁଦି ୱାଲେ ମାନିକା । 18 ମାରି, ଇୟାୱିଜୁ ମାଟା ୱେର୍‍ସି ମିର୍‌ ନିଜେନିଜେଦିଙ୍ଗ୍‌ ୱେଡ଼ିକା କିଦୁ ।