1 ଏ ତଡ଼ାନ୍‌କୁ ନି ତାଙ୍ଗିଁକି, ଇୟାୱିଜୁ ବିସୟ୍‌ତାନ୍‌ ଏସ୍‌କାଙ୍ଗ୍‌ ମାରି ଆମା ବେଡ଼ାଦୁ ଗଟାନାତ୍‌, ଆୟା ବିସୟ୍‌ତାନ୍‌ ମି ଲାକ୍‌ତୁ ନାଣ୍ତ ରାସ୍‌ନିକା ଲୋଡ଼ା ସିଲେତ୍‍, 2 ✝ଇରିଙ୍ଗ୍‌ ନାଡ଼ା ଡଙ୍ଗାଁରେଏନ୍‌ ୱାନି ୱାଜା ପ୍ରବୁଦି ଦିନ୍‌ ଜେ ୱାନାତ୍, ଇକା ମିର୍‌ ନେଗେନ୍‌ତାନ୍‌ ନେସ୍‌ନିଦେର୍‌ । 3 ଏସ୍ତିୱାଲେ ଲୋକୁ ସାନ୍ତି ମାରି ନେଗିବାଡି ଇଜି ୱେର୍‍ସି ମାନି ୱେଡ଼ାଦୁ ଆୟାଦାପ୍ରେ ୱାରି ମୁସ୍‌କୁ ସାନିକା ତିଗ୍‌ଜି ୱାନାତ୍ । ପଟାଦୁମାନି ଆଇମାଦି ଜନମ୍‌କିନି କାସ୍ଟୁ ୱାଜା ଆକା ନେସ୍‌ଇୱାଜା ଦାପ୍ରେ ଇଗା ୱାନାତ୍ ମାରି ଏନ୍‌ ଆୟା ଆଗ୍‍ଡ଼ିରାନ୍‍ ଉର୍‌କୁତେଙ୍ଗ୍‌ ଆଟ୍‍ଏନ୍‍ । 4 ମାତର୍‌ ତଡ଼ାନ୍‌କୁ ନି ତାଙ୍ଗିଁକି, ମିର୍‌ ସିକାଟିଦୁ ବାସା କିଇଦେର୍‌, ଆଦେଙ୍ଗ୍‌ ଆୟା ନାଣ୍ତିଙ୍ଗ୍‌ ଡଙ୍ଗାଁର୍‌ଏନ୍‌ ୱାଜା ନେସ୍‌ଇୱାଜା ମି ଲାକ୍‌ତୁ ୱାନାନ୍ । 5 ଇରିଙ୍ଗ୍‌ ମିର୍‌ ୱିଜୁ ଜାୟ୍‌ ନି ୱେଡ଼େରି କଡ଼ର୍‌ । ମାଡ୍‌ ନାଡ଼ା ନି ସିକାଟିଦି କଡ଼ର୍‌ ଆଏପ୍‌ । 6 ମାରି ରାଦୁ, ମାଡ୍‌ ଆଇ ଲୋକା ୱାଜା ସୁଜ୍‌ଏଣ୍‌ଗା, ଜାଗାର୍‌ତା ଆଜି ସେତା ତେବାନାଟ୍‍ । 7 ଲୋକୁ ନାଡ଼ା ବେଡ଼ାଦୁ ସୁଜ୍‌ନାମାନାର୍‌, ନାଡ଼ା ୱାର୍‌ ଅଙ୍ଗୁର୍‍ରସ୍‍ ଉଣୁଜି ସୋସ୍‌ନାର୍‌ । 8 ✝ମାତର୍‌ ମାଡ୍‌ ୱେଡ଼େରି କଡ଼ର୍‌ ମାରି ୱିଜୁଦିନ୍ ଜାଗ୍‌ରାତା ମାନ୍‍ଜି । ରାଦୁ, ବିସ୍‌ବାସ୍‌ ମାରି ଜିବନ୍‌ନୋନି ନାନି ବକାଦିସାଜୁ ଆରାଜି ମାରି ରକିୟାଦି ଆସା ଇଡ୍‌ଜି ଟପି ତାଲାଦୁ ଆରାନାଟ୍‍ । 9 ଇରିଙ୍ଗ୍‌ ମାପୁରୁ ମାଙ୍ଗିଁ ୱାନି ରିସାଦି ଲୋକ୍‍ ଆଦେଙ୍ଗ୍‌ ଆସ୍‌କିଏନ୍‌, ପ୍ରବୁ ଜିସୁ କ୍ରିସ୍ତଦି ମାଣ୍‌କୁ ମାଙ୍ଗିଁ ରକିୟା କିନି ଉଣ୍ତିଙ୍ଗ୍‌ ତିର୍‌ କିତାମାନାନ୍‌ । 10 କ୍ରିସ୍ତଦି ମାରିଡ଼େସି ୱାନିୱାଲେ ମାଡ୍‌ ଜିବନ୍‌ ମାନାଟ୍‍ ନୋ ସିଲେଟ୍‍, ୱାନି ୱାଲେ ଏଣ୍ତେସ୍‌ ମିସାନା ତେବାନାଟ୍‍, ଆୟାଉଣ୍ତିଙ୍ଗ୍‌ ୱାନ୍‌ ମା ଉଣ୍ତିଙ୍ଗ୍‌ ସାତାନ୍‌ । 11 ଆର୍‌ତିଙ୍ଗ୍‌ ଇଲେଇ ଏଣ୍ତେସ୍‌ କିଜିନିଦେର୍‌, ଟିକ୍‌ ଆୟାୱାଜା ନିଜେଦିଙ୍ଗ୍‌ ନି ଆଇୱାରିଙ୍ଗ୍‌ ୱେଡ଼ିକା ନି ସାହାଜ୍ୟ କିଜିମାନ୍‌ଡ୍ରୁ ।

12 ଏ ତଡ଼ାନ୍‌କୁ ନି ତାଙ୍ଗିଁକି, ଆମାକାର୍‌ ମି ଲଇ ୱାନ୍‍ଜିପାଣି କିଜିନାର୍‌ ମାରି କ୍ରିସ୍ଟାନ୍‌ ଜିବନ୍‌ତୁ ମିଙ୍ଗିଁ ସାହାଜ୍ୟ କିଜିନାର୍‌ ମାରି ପ୍ରବୁଦି ନେଗିମାଟା ୱେର୍‍ସିନାର୍‍, ୱାରିଙ୍ଗ୍ ମାନାଦେଙ୍ଗ୍‌ ମାପ୍‌ ମିଙ୍ଗିଁ ବାତିଙ୍ଗ୍‌ମାଲ୍‍ଜିନାପ୍‌ । 13 ମାରି, ୱାରି ପାଣି ଉଣ୍ତିଙ୍ଗ୍‌ ୱାରିଙ୍ଗ୍ ଜିବନ୍‌ତାନ୍‌ ନାଣ୍ତ ଜିବନ୍‍ନୋଦୁ । ନିଜେନିଜେଦି ୱାଲେ ସାନ୍ତିଦାନ୍‌ ତେବାଦୁ ।

14 ଏ ତଡ଼ାନ୍‌କୁ ନି ତାଙ୍ଗିଁକି, ମାପ୍‌ ମିଙ୍ଗିଁ ମାଡ଼ିସ୍‌ କିଜିନାପ୍‌, ଗାଡ଼୍‍ୟା ପାଣି କିଜିମାନି ଲୋକାଙ୍ଗ୍‌ ଜାଗାର୍‌ତା କିଦୁ, ତିଲାନିୱାରିଙ୍ଗ୍‌ ସାହାସ୍‍ ସିଦୁ, ବପୁସିଲିୱାରିଙ୍ଗ୍‌ ଜାତୁନ୍‍ କିଦୁ ମାରି ୱିଜେରି ଉଣ୍ତିଙ୍ଗ୍‌ ସାହାସ୍‍ ଆଦୁ । 15 ଏନ୍‌ ଏନ୍ଧି ଅନ୍ୟାୟ୍‌ ବାଦ୍‌ଲୁ ଅନ୍ୟାୟ୍‌ କିମାକିନ୍‌, ମାରି ୱିଜୁଦିନ୍ ୱିଜେରି ନେଗିକା ସେସ୍ଟା କିପିନ୍‍ ।

16 ୱିଜୁଦିନ୍ ୱେଡ଼ିକା ଆଜି ମାନ୍‌ଡ୍ରୁ । 17 ରମ୍‍ଏଣ୍ତା ପାର୍‌ତାନା କିଦୁ । 18 ୱିଜୁ ଅବସ୍ତାଦୁ ଦନ୍ୟବାଦ୍‌ ସିଦୁ । କ୍ରିସ୍ତ ଜିସୁଦି ୱାଲେ ମିସାଜି ଜିଜି ମାଡ଼ିଜି, ମିମାଣୁକୁ ମାପୁରୁ ଇକାନେ ବଦା କିନାନ୍‍ ।

19 ପବିତ୍ରଆତ୍ମାଦିଙ୍ଗ୍‌ ବାଦାସିମାଟ୍‌ । 20 ପବିତ୍ର ଆତ୍ମାଦି ବାକ୍ୟଦିଙ୍ଗ୍‌ କାଡ଼୍‍ମାଟ୍‍ । 21 ୱିଜୁ ବିସୟ୍‌ତିଙ୍ଗ୍‌ ପରିକା କିଜ ସୁଡ଼୍‍ଦୁ : ଆମାକା ୱିଜୁ ସତ୍‍, ତାନିଙ୍ଗ୍‌ ମାନାଦୁ; 22 ୱିଜୁ ରକମ୍‍ତି ତାଗ୍‌ଇପାଣିଦାନ୍‌ ଆକତେବାଦୁ ।

23 ଆମା ମାପୁରୁ ମାଙ୍ଗିଁ ସାନ୍ତି ସିନାନ୍‌, ୱାନ୍‌ ମିଙ୍ଗିଁ ପୁରାପୁରି ପବିତ୍ର କିପିନ୍‌ ମାରି ମା ପ୍ରବୁ ଜିସୁ କ୍ରିସ୍ତଦି ୱାନିଦିନ୍‌ତି ସମୟ୍‌ତୁ ମି ଆତ୍ମା, ପୁଣ୍ତା, ମେନ୍ଦଲ୍‌ତିଙ୍ଗ୍ ପୁରାପୁରି ଦସ୍‌ ସିଲେଣ୍‌ଗା ଇଡ୍‌ଦୁ । 24 ଏନ୍‌ ମିଙ୍ଗିଁ କୁକ୍‌ତାମାନାନ୍‌, ୱାନ୍‌ ଆକା କିନାନ୍‌, ଇରିଙ୍ଗ୍‌ ୱାନ୍‌ ବିସ୍‍ବାସ୍‍ତିକାନ୍‌ ।

25 ତଡ଼ାନ୍‌କୁ ନି ତାଙ୍ଗିଁକି, ମା ଉଣ୍ତିଙ୍ଗ୍‌ ବା ପାର୍‌ତାନା କିଦୁ ।

26 ୱିଜୁ ବିସ୍‌ବାସ୍‌ଲୋକାଙ୍ଗ୍‌ ପବିତ୍ର ଚୁମାଦାନ୍‌ ମାଡ଼ିସ୍‍ କିଦୁ ।

27 ପ୍ରବୁଦିମାଣ୍‍କୁ ଅଦିକାର୍‌ ପୟ୍‌ଆୟ୍‍ ଆତିମାନି ଉଣ୍ତିଙ୍ଗ୍‌ ନାନ୍‌ ମିଙ୍ଗିଁ ବାତିଙ୍ଗ୍‍ମାଲ୍‍ଜିନା, ୱିଜୁ ବିସ୍‌ବାସ୍‌ଲୋକା ଲାକ୍‌ତୁ ଇୟା ଆକୁ ପଡ଼ାଦୁ । 28 ମା ପ୍ରବୁ ଜିସୁ କ୍ରିସ୍ତଦି ଦୟା ୱିଜେରି ସାକା ଆପିତ୍‌ ।