1 ଆଗ୍‌ଡ଼ି ଏଣ୍ତେସ୍‌ ଲୋକା ମାନୁ ବଣ୍ତ ବାବବାଦିରି ତରିତା ମାର୍ହାର୍‌, ଟିକ୍‌ ଆୟାୱାଜା ମି ମାନୁ କାବାକିନି ଗୁରୁର୍‍ ସନାର୍‌ । ୱାର୍‌ ସାନିନାନି ବାୟାନି ମାଟା ସିକିୟା ସିନାର୍‌ ମାରି ଆମା ପ୍ରବୁ ୱାରିଙ୍ଗ୍‌ ମୁକ୍‍ଡ଼ା କିତାମାନାନ୍‌, ୱାନିଙ୍ଗ୍‌ ମାନାଏର୍‌ । ଆଦେଙ୍ଗ୍‌ ଦାପ୍ରେନେ ୱାରିଦି ସାନିକା ଗଟାନାତ୍‌ । 2 ମାରି, ଗାଦିଲୋକୁ ୱାରି ଅଦାର୍ମୁ ସାରିଦୁ ସନାର୍‌, ଆଇକାର୍‌ ୱାରି ପାଣିକିନିକା ସୁଡ଼ୁଜି ସତ୍‌ ସାରି ବିରୁଦ୍‌ତାନ୍‌ ନିଦା ମାଟା ଇନାର୍‌ । 3 ଇୟା କାବାକିନି ଗୁରୁର୍‍ ଦନ୍‌ଲୋବ୍‌ତୁ ମନ୍‍ତୁ ତିଆର୍‍କିତି କାତେଙ୍ଗ୍‍ ୱେର୍‍ସି ଲାବ୍‍ ନିକ୍‍ନାର୍‍ । ମାତର୍‌ ନାଣ୍ତ ଦିନ୍‌ତାନ୍‌ ମାପୁରୁ ଇୟାକାର୍‌ ବିସାର୍‌ ଆଜି ୱାତାମାନାର୍‌ ମାରି ୱାରି ସାନି ଦିନ୍‌ ଲାକ୍‌ତୁ ୱାତାତ୍‌ନି ।

4 ଇରିଙ୍ଗ୍‌ ମାପୁରୁ ପାପ୍‌ତି ଦୁତ୍‌କାଙ୍ଗ୍‌ କେମା କିଏଣ୍‌ଗା ନର୍କଦୁ ପୋକ୍‌ତା ମାର୍ହାନ୍‌ । ଆବେନୁ ୱାକୁ ପେରି ବିଚାର୍‍ ଦିନ୍‌ ସାନ୍ଦି ସିକାଟିଦୁ ତର୍‍ତା ଇଟ୍‌ତାମାନାନ୍‌ । 5 ମାପୁରୁ ପାଡ଼ିଇ ଦୁନିଆଦିଙ୍ଗ୍‌ ବା ଡ଼ିସ୍‌ଏତାନ୍‌, ଅଦାର୍ମୁଦି ଦୁନିଆଦୁ ଦଣ୍ତ୍‌ ଗଟେକିତାନ୍‌ । ୱାନ୍‌ କେବଲ୍‌ ଦାର୍ମୁ ପ୍ରଚାର୍‍ କିଜିମାନି ନୋହଙ୍ଗ୍‌ ମାରି ଆଇୱାରିଙ୍ଗ୍‌ ସାତ୍‌ଲୋକାଙ୍ଗ୍‌ ରକିୟା କିତାନ୍‌ । 6 ତାନି ୱେନେକା ମାପୁରୁ ସଦମ୍‍ ମାରି ଗମୋରା ଗାଡ଼୍‌କାଙ୍ଗ୍‌ ଦଣ୍ତ୍‌ ସିଜି ସିସୁଦାନ୍‌ ଦ୍ୱଂସ କିତାନ୍‌ ମାରି ଅଦାର୍ମୁଦିୱାରି ଉଣ୍ତିଙ୍ଗ୍‌ ଇନିକା ଗଟେଆନାତ୍‌, ଇୟା ରୁଣ୍ତି ଗାଡ଼୍‌କାଙ୍ଗ୍‌ ୱାନି କାତା ୱାଜା କିତାନ୍‌ । 7 ତାଗ୍‌ଇୱାରି ଅଦାର୍ମୁଦି ପାଣି ଉଣ୍ତିଙ୍ଗ୍‌ ତର୍‍ବର୍‍ ଆତିମାର୍‍ଇ ଦାର୍ମୁଦି ଲୋଟଙ୍ଗ୍‌ ରକିୟା କିତାନ୍‌ । 8 ଆୟା ଦାର୍ମୁଦି ଲୋଟ ୱାରି ୱାଲେ ବାସାଜି ୱାରି ତାଗ୍‌ଇ ପାଣି ସୁଡ଼ୁଜି ମାରି ଆୟା ବିସୟ୍‌ ୱେନ୍‌ଞ୍ଜି ଦିନ୍‌କେ ନିଜେଦି ଜିବନ୍‌ତୁ କାସ୍ଟୁ ବୋଗ୍‌ ପୟ୍‍ତା ମାର୍ହାନ୍‌ । 9 ପ୍ରବୁ ନେସ୍‌ନାନ୍‌, ଏଣ୍ତେସ୍‌ ଦାର୍ମୁଦି ଲୋକାଙ୍ଗ୍‌ ୱାରି ପରିକାଦାନ୍‌ ରକିୟା କିଦେଙ୍ଗ୍‌ ଆନାତ୍‌, ମାରି ଅଦାର୍ମୁଦିୱାରିଙ୍ଗ୍‌, 10 ବିସେସ୍‍କିଜି ଆମାକାର୍‌ ମାପୁରୁଦି ମାଟାଦିଙ୍ଗ୍‌ ଡ଼ିସ୍‌ସି ନିଜେଦି ମେନ୍ଦଲ୍‌ତିଙ୍ଗ୍‌ ଲାଲାୟ୍‌ଆନି ଆସା ପାଣି କିଜିମାନାର୍‌, ୱାରିଙ୍ଗ୍‌ ପେରିବିସାର୍‌ ଦିନ୍‌ ସାନ୍ଧି ଏଣ୍ତେସ୍‌ ଦଣ୍ତ୍‌ ସିଜି ଇଡ୍‌ଦେଙ୍ଗ୍‌ ଆନାତ୍‌ ଆକା ୱାନ୍‌ ନେସ୍‌ନାନ୍‌ । ଆୟା କାବାକିନି ଗୁରୁର୍‍ ସାସ୍‌ ମାରି ପେରିକାର୍‌ । ୱାର୍‌ ନାଣ୍ତଲୋକାଦି ଗୌରବ୍‌ମୟ୍‌ ଲୋକା ଉଣ୍ତିଙ୍ଗ୍‌ ସନ୍‌ମାନ୍‌ କିଏଣ୍‌ଗା ୱାର୍‌ ଅପମାନ୍‌ କିଜିନାର୍‌ । 11 ୱାରି ବାଦ୍‌ଲୁ ନାଣ୍ତ ସାକ୍ତି ମାରି ବପୁମାନି ଦୁତ୍‌କୁ ବା ପ୍ରବୁଦି ଲାକ୍‌ତୁ ଆୟାୱାରି ନିନ୍ଦା କିଜି ୱାରି ଦସ୍‍ କିଏର୍‌ । 12 ମାତର୍‌ ଇୟାକାର୍‌ ବୁଦିସିଲି ଜାତୁ ୱାଜା ନେସ୍‌ନିୱାଜା ଆସାଜି ମାରି ନାସ୍ଟୁ ଆନି ଉଣ୍ତିଙ୍ଗ୍‌ ଜନମ୍‌, ୱାନିକା ୱାଜା ଇୟା ଟକେକିନି ମାସ୍ଟର୍‌ଙ୍ଗୁଁ କେବଲ୍‌ ୱିଜୁଦାନ୍‌ ସାଲାଜି । ଆମା ବିସୟ୍‌ ବୁଜାଏର୍‌, ତାନିଙ୍ଗ୍‌ ୱାର୍‌ ନିନ୍ଦା କିନାର୍‌ । ମାତର ବନ୍‌ତି ଜାତୁ ୱାଜା ନାସ୍ଟୁ ଆନାର୍‌ 13 ଆଇୱାରିଙ୍ଗ୍‌ ଏଣ୍ତେସ୍‌ କାସ୍ଟୁ ସିତାମାନାର୍‌, ନିଜେ ୱାର୍‌ ଦୁଃକ୍‌କାସ୍ଟୁ ପୟ୍‍ନାର୍‌ । ଆମାକା ଇନିକା ୱାରି ମେନ୍ଦଲ୍‍ତି ଆସା କିନାତ୍‌, ଆକା ୱେଡ଼େରିବେଡ଼ାଦୁ ୱେଡ଼ିକା କିନିତାନିଙ୍ଗ୍‌ ସୁକ୍‌ ପୟ୍‌ନାର୍‌ । ୱାର୍‌ ନିଜେଦି ସାଲାକିଦି ପାଣିଦୁ ୱେଡ଼ିକା କିଦୁ ମି ୱାଲେ ଅର୍‌ସେ ଉଣାର୍‌ । ୱାର୍‌ ମି ସେମାର୍‌ ମାରି କିଟିଙ୍ଗ୍‌ ୱାଜା । 14 ୱାରି କାଣୁକୁ ଦାରିପାଣିଦୁ ପୁରାତେବାଜି ପାପ୍‌ତି ବାଙ୍ଗାଁ ଏସ୍‌କାଙ୍ଗ୍‌ ପୁରା ଆଏତ୍‌ । ୱାର୍‌ ସାକିସିଲି ଲୋକାଙ୍ଗ୍‌ ଉରିଦୁ ଆରାପ୍‌ନାର୍‌, ୱାରି ଜିବନ୍‌ ଦନ୍‌ଲୋବ୍‌ତିଙ୍ଗ୍‌ ଦାନ୍ଦା, ୱାର୍‌ ମାପୁରୁଦି ଆନାଦୁରିଆଦି କଡ଼ର୍‌ । 15 ୱାର୍‌ ନେଗି ସାରି ଡ଼ିସ୍‌ସି ତାଗ୍‌ଇସାରି ତରିନ୍‌ ସୋଲ୍‌ସିନାର୍‌ । ବିୟୋରଦି ମାରିନ୍‌ ବାଲାମଦି ସାରିତରିନ୍‌ ୱାର୍‌ ୱେନ୍‌କା ସୋଲ୍‌ସିନାର୍‌ । ୱାନ୍‌ ଅନ୍ୟାୟ୍‌ପାଣି କିଜି ଡାବୁଙ୍ଗୁଁ ପୟ୍‌ଦେଙ୍ଗ୍‌ ଆସା ଆନିଙ୍ଗ୍‌, 16 ୱାନ୍‌ ନିଜେଦି ପାପ୍‌ତି ଉଣ୍ତିଙ୍ଗ୍‌ ପେରାୟ୍‌ଆତା ମାର୍ହାନ୍‌ । ଲୋକ୍‌ତିବୋଲ୍‌ତାନ୍‌ ୱାନି ଗଦ ମାଟା ଇନ୍‌ଞ୍ଜି ବାବବାଦିଦି କିଜିମାନି ପାଣିଦାନ୍‌ ତେବା କିତାତ୍‌ ।

17 ଇୟା କାବାକିନି ଗୁରୁର୍‍ ନିକ୍‌ତି ଜଲା ମାରି ଗାଲିଦୁ ଇମ୍‌ଜିମାନି ବାଦ୍‌ଡ଼ ୱାଜା, ମାପୁରୁ ୱାରି ଉଣ୍ତିଙ୍ଗ୍‌ ନାଣ୍ତସିକାଟି ଇଟ୍‌ତାମାନାନ୍‌ । 18 ଇରିଙ୍ଗ୍‌ ୱାର୍‌ ଆକାର୍‌ତୁ ବର୍ତିତେବାଜି ତାଗ୍‌ଇ ମାଟେଙ୍ଗ୍‌ ୱେର୍‌ସିମାନାର୍‌; ତାଗ୍‌ଇପାଣିକିଜି ଜିଜି ମାନିୱାରି ମାଣୁକୁ ରକିୟା ପୟ୍‌ଜି ୱାଜିମାନି ଲୋକାଙ୍ଗ୍‌ ଇସ୍ରି ମେନ୍ଦଲ୍‍ତି ତାଗ୍‌ଇ ପାଣିଦି ସାରି ତର୍‌ସି ଉରିଦୁ ଆରାପ୍‌ନାର୍‌ । 19 ୱାରିଙ୍ଗ୍‌ ଆୟା କାବାକିନି ଗୁରୁର୍‍ ମୁକ୍‍ଡ଼ାତି ପାର୍‌ମାଣ୍‌ ସିନାର୍‌, ମାତର୍‌ ନିଜେନେ ସାପିସ୍‌କିନି ଦାସ୍‍; ଇରିଙ୍ଗ୍‌ ଲୋକୁ ଆମା ବିସୟ୍‌ତି ଆଡ୍‌ଗିମାନାର୍‌; ୱାନ୍‌ ଆବେଣି ପାଣିକିନିସାକର୍‌ । 20 ମା ପ୍ରବୁ ମାରି ରକିୟାକର୍ତ୍ତା ଜିସୁ କ୍ରିସ୍ତଦିମାଣୁକୁ ବୁଦି ପୟ୍‌ଜି ଆମାକାର୍‌ ଦୁନିଆଦି ସାପିସ୍‌କିନି ସାକ୍ତିଦି ମାଣୁକୁ ରକିୟା ପୟ୍‌ତି ୱେନ୍‌କା ମାରିଡ଼େସି ଆୟାୱିଜୁଦୁ ମିସାନାର୍‌, ଆର୍‌ତିଙ୍ଗ୍‌ ୱାରି ଆଗ୍‌ଡ଼ିରି ଦଣ୍ତ୍‌ ବାଦ୍‌ଲୁ ସାରାସାରିୱେନ୍‌କାରି ଦଣ୍ତ୍‌ ନାଣ୍ତ୍‌ ତାଗ୍‌ଇକା ଆନାତ୍‌ । 21 ଇରିଙ୍ଗ୍‌ ଦାର୍ମୁଦି ସାରି ନେସ୍‌ସି ମି ଲାକ୍‌ତୁ ସର୍‌ପେଆନି ପବିତ୍ର ମାଟାଦାନ୍‌ ୱେର୍‍ଏ ଆନି ବାଦ୍‌ଲୁ ଆୟା ସାରି ନେସ୍‌ଇକା ୱାରି ଉଣ୍ତିଙ୍ଗ୍‌ ନେଗେନ୍‌ ଆତାତ୍‌ମାନ୍ଧି । 22 ଇୟା ସତ୍‌ତି କାତାଦିବାକ୍ୟ ୱାରି ଉଣ୍ତିଙ୍ଗ୍‌ ଗଟାତାମାନାତ୍‌ : "ନୁକୁଡ଼ି ଆମାକା କାକ୍‌ନାତ୍‌, ତାନିଙ୍ଗ୍‌ ମାରିଡ଼େସି ତିନ୍‌ନାତ୍‌," ମାରି "ପାଡ୍ରିଦିଙ୍ଗ୍‌ ନର୍‌ତି ୱେନ୍‌କା ବା ମାରିଡ଼େସି ଲାଦିଦୁ ତେରେବ୍‌ଦେଙ୍ଗ୍‌ ସୋନାତ୍‌ ।"