1 ସାରାସାରିୱେନ୍‌କା, ଏ ତଡ଼ାନ୍‌କୁ ନି ତାଙ୍ଗିଁକି, ମା ଉଣ୍ତିଙ୍ଗ୍‌ ପାର୍‌ତାନା କିଦୁ, ଏଣ୍ତେସ୍‌ ପ୍ରବୁଦି ବାକ୍ୟ ଦାପ୍ରେ ୱେଙ୍ଗିଁତା ମାର୍ହାତ୍‌, ଆକା ଏଣ୍ତେସ୍‌ ମି ଲୋଇ ଆୟାୱାଜା ଦନ୍ୟବାଦ ଲାବ୍‌ କିନାତ୍‌ । 2 ମାରି ବା ପାର୍‌ତାନା କିଦୁ, ମାପୁରୁ ଏଣ୍ତେସ୍‌ ମାଙ୍ଗିଁ ତାଗ୍‌ଇଲୋକୁ ମାରି ସୁରି ଲୋକାମାଣାନ୍‍କୁ ରକିୟା କିନାନ୍‌, ଇରିଙ୍ଗ୍‌ ୱିଜେରେ ସୁସମାଚାର୍‌ତୁ ବିସ୍‌ବାସ୍‌ କିଏର୍‌ । 3 ମାତର୍‌ ପ୍ରବୁ ବିସ୍‌ବାସ୍‌ତିକାନ୍‌ ! ୱାନ୍‌ ମିଙ୍ଗିଁ ସାକ୍ତି କିନାନ୍‌ ମାରି ତାଗ୍‌ଇ ଆତ୍ମାଦାନ୍‌ ରକ୍‌ୟା କିନାନ୍‌ । 4 ମି ମୁସ୍‌କୁ ଆସା ଇଡ୍‌ଦେଙ୍ଗ୍‌ ପ୍ରବୁ ମାଙ୍ଗିଁ ଆସା ସିତାମାନାନ୍‌ ମାରି ମାପ୍‌ ଆମାକା ୱେର୍‌ସିନାପ୍‌, ଆକା ମିର୍‌ ଜେ କିଜିନିଦେର୍‌ ମାରି କିଜିମାନିଦେର୍‌, ଇୟା ବିସୟ୍‌ତାନ୍‌ ମାପ୍‌ ଜେ ନେସ୍‌ନାପ୍‌ । 5 ମାପୁରୁଦି ଜିବନ୍‌ନୋନିକା ମାରି କ୍ରିସ୍ତସିତିମାନି ସାସ୍‌ଆସ୍‌ନି ନାଣ୍ତଦାନ୍‌ ନାଣ୍ତ୍‌ ନେସ୍‌ନି ଉଣ୍ତିଙ୍ଗ୍‌ ପ୍ରବୁ ମିଙ୍ଗିଁ ସାକା ଆପିନ୍‌ ।

6 ଏ ତଡ଼ାନ୍‌କୁ ନି ତାଙ୍ଗିଁକି, ଆମାକାର୍‌ ଗାଡ଼ିଆ ଜିବନ୍‌ତାନ୍‌ ଜିଜିନାନ୍‌ ମାରି ମା ମାଣ୍‌କୁ ପୟ୍‌ତି ସିକିୟା ଇସାବ୍‌ତାନ୍‌ ପାଣି କିଏନ୍‌; ପ୍ରବୁ ଜିସୁ କ୍ରିସ୍ତଦି ଦର୍‌ତାନ୍‌ ମିଙ୍ଗିଁ ଇୟା ମାଟା ୱେର୍‌ସିନାପ୍‌, ଆୟା ତଡ଼ାନ୍‌କାମାଣୁକୁ ଆକ ମାନ୍‌ଡ୍ରୁ । 7 ଏଣ୍ତେସ୍‌ବା ମିର୍‌ ନେସ୍‌ତିମାନିଦେର୍‌, ମି ପାଣିକିତି ୱେନ୍‌କା ମାଙ୍ଗିଁ ଏତ୍‌ କିନିକା ମାନାତ୍‌ । ମି ୱାଲେ ତେବାତିମାର୍‌ଇ ୱାଲେ ମାପ୍‌ ଗାଡ଼ିଆ ଆଏପ୍‌ ମାର୍ହାପ୍‌ । 8 ମାରି ଇନିକା ସିଲେଣେଗା ମାପ୍‌ ଏମାଣାନ୍‌ ଜାୱା ଉଣୁଏପ୍‌ ମାର୍ହାପ୍‌, ମାରି ଏ ମୁସ୍‌କୁ ବୋଜୁ ଆଇ ଉଣ୍ତିଙ୍ଗ୍‌ ମାପ୍‌ କାସ୍ଟୁ ପୟ୍‌ଜି ୱେଡ଼େନାଡ଼ା ପାଣି କିତାମାର୍ହାପ୍‌ । 9 ମିମାଣୁକୁ ଇନିକା ଲସ୍‌ତେଙ୍ଗ୍‌ ଜେ ମା ଅଦିକାର୍‌ ସିଲେତ୍‌, ଆକା ସିଲେ, ମାତର୍‌ ଏଣ୍ତେସ୍‌ ମିର୍‌ ମାଙ୍ଗିଁ ଏତ୍‌ କିଦୁ; ଇୟାଉଣ୍ତିଙ୍ଗ୍‌ ମାପ୍‌ ମି ଲାକ୍‌ତୁ ନିଜେ ନିଜେଦିଙ୍ଗ୍‌ ନେଗିକାନ୍‌ ୱାଜା ତର୍‌ତେଙ୍ଗ୍‍ଁ ଇଜି ଆୟାୱାଜା କିତାପ୍‌ । 10 ମି ୱାଲେ ମାର୍‌ଇବେଡ଼ାଦୁ ମାପ୍‌ ମିଙ୍ଗିଁ ୱେର୍‌ତାମାର୍ହାପ୍‌, "ଆମା ଲୋକ୍‌ ପାଣି କିଦେଙ୍ଗ୍‌ ବଦା କିଏନ୍‌, ୱାନ୍‌ ଉଣୁମାକିନ୍‌ ।"

11 ଇୟା ମାଟା ମାରି ୱେର୍‌ସିନାପ୍‌, ଇରିଙ୍ଗ୍‌ ମାପ୍‌ କାବୁର୍‌ ୱେର୍‌ଆମାନାପ୍‌ ଜେ, ମି ଲୋଇରାନ୍‌ ଏସଲୋକ୍‌ ଗାଡ଼ିଆ ଜିବନ୍‌ତାନ୍‌ ଜିଜିନାର୍‌ ମାରି ଆଇ ଲୋକା ପାଣିଦୁ ଆର୍‍ଏ ତେବାନିକା ଡ଼ିସ୍‌ସି ଆଇକା ଇନିକା କିଏର୍‌ । 12 ପ୍ରବୁ ଜିସୁ କ୍ରିସ୍ତଦି ଦର୍‌ତାନ୍‌ ମାପ୍‌ ଆୟା ଲୋକାଙ୍ଗ୍‌ ଜାଗାର୍‌ତା କିଜି ଆଦେସ୍‌ ସିଜିନାପ୍‌, ୱାରି ଜିବନ୍‌ତୁ ମାରି ଅଡ଼ପ୍‍ ସେତା ଆଜି ନିଜେଦି ଜିନିକା ତିଆର୍‌ କିଦୁ ।

13 ମାତର୍‌ ତଡ଼ାନ୍‌କୁ ନି ତାଙ୍ଗିଁକି, ମିର୍‌ ନେଗିପାଣି କିଦେଙ୍ଗ୍‌ ୱାନ୍ଦ୍‍ମାଟ୍‌ । 14 ଇୟା ଆକୁଦୁ ମିଙ୍ଗିଁ ଆମାକାବୁରୁ ପୋକ୍‌ତାଜିନାପ୍‌, ଆତିଙ୍ଗ୍‌ ମି ଲୋଇରାନ୍ ଏନ୍‌ ଆକା ମାନାଦେ‍ଙ୍ଗ୍ ବଦା କିଏନ୍‌ । ଆୟାୱାଜା ଲୋକ୍‌ତିଙ୍ଗ୍‍ ଚିନିସ୍‌କିଜ ଇଡ୍‍ଦୁ ମାରି ୱାନି ୱାଲେ ମି ମିସାବିଡ଼ା ଡ଼ିସ୍‍ସସିଦୁ । ଆର୍‌ତିଙ୍ଗ୍‌, ୱାନ୍‌ ସେମାର୍ ଆନାନ୍‌ । 15 ମାତର୍‌ ୱାନି ଉଣ୍ତିଙ୍ଗ୍‌ ସାତ୍ରୁ ଇଜି ଅଡ଼ବିମାଟ୍, ତଡ଼ାନ୍‌ ୱାଜା ୱାନିଙ୍ଗ୍‌ ଜାଗାର୍‌ତା କିଦୁ ।

16 ଆମା ପ୍ରବୁ ମା ସାନ୍ତି ସିନାନ୍‍, ୱାନ୍‌ ମିଙ୍ଗିଁ ୱିଜୁଦିନ୍ ସାନ୍ତି ସିପିନ୍‌ । ପ୍ରବୁ ମି ୱିଜେରି ଲାକ୍‌ତୁ ମାନିନ୍ । 17 ନାନ୍‌ ନିଜେଦି କିୟୁଦାନ୍‌ ଇକା ରାସ୍‌ସିନା "ପାଉଲଦିମାଣାନ୍‌ ମାଡ଼ିସ୍‍କିନିକା" ନା ୱିଜୁ ଆକୁଦୁ ଇକା ସିନାଦି ୱାଜା, ନାନ୍‌ ଇୟାୱାଜା ରାସ୍‌ନା ।

18 ମା ପ୍ରବୁ ଜିସୁ କ୍ରିସ୍ତଦି ଦୟା ମିର୍‌ ୱିଜିଦେର୍‌ ଜିବନ୍‌ତୁ ଅଡ଼୍‌ବିଦୁ ।