1 ✝ ୧:୧ ପ୍ରେରିତ ୧୯:୨୯; ରୋମିୟ ୧୬:୨୩; ୧ କରିନ୍ତିୟ ୧:୧୪. ପ୍ରାଚିନ୍ ଜୋହନ ଯେ ନାନୁ,

ନା ଲାଡ୍‍ତି ତଡ଼୍‍ ଗାୟ୍‌ଦି ଲାକ୍‌ତୁ ଇୟା ଆକୁ ରାସ୍‌ସିନା; ୱାନିଙ୍ଗ୍‌ ନାନୁ ସତ୍‌ତାନ୍‌ ଜିବନ୍‌ନୋନା ।

2 ନା ଲାଡ୍‍ତି ତଡ଼୍‍, ମି ଆତ୍ମା ମାରି ୱିଜୁନେଗି ପାଣି କିଜିନାନ୍‌ ମାପୁରୁଙ୍ଗୁଁ ପାର୍‍ତାନା କିଜିନା, ନାନ୍‌ ନେସ୍‌ନା, ଇଲେଇତି ଜିବନ୍‌ତୁ ମିରୁ ନେଗେନ୍‌ ମାନିଦେର୍‌ । 3 ଇରିଙ୍ଗ୍‌ ତଡ଼ାନ୍‌କୁ ୱାଜି ଏସ୍ତିୱାଲେ ସତ୍‌ତି ଉଣ୍ତିଙ୍ଗ୍‌ ବିସ୍‌ବାସ୍‌ସି ତେବାତା ମାନାର୍‌ ମାରି ଜିବନ୍‌ତୁ ୱିଜୁଦିନ୍ ସତ୍‌ତାନ୍‌ ବୁଲାସାଲା ଆନି ବିସୟ୍‌ତାନ୍‌ ସାକ୍ଷ୍ୟ ୱେର୍‌ସିନାର୍‌, ନାସ୍ତିୱାଲେ ନାନୁ ଇୟା ମାଟା ୱେନ୍‌ଜି ୱେଡ଼ିକା ଆତା । 4 ନା କଡ଼ର୍‌ ଜେ ସତ୍‌ତିଙ୍ଗ୍‌ ଆସ୍‌ସି ବୁଲାସାଲା କିଜିନାର୍‌, ଇକା ୱେନିଙ୍ଗ୍‌ ନାନୁ ୱେଡ଼ିକା ଆନା ।

5 ଲାଡ୍‍ତି ତଡ଼୍‍, ଆଇଦେସ୍‌ତି କ୍ରିସ୍ତ ସିକ୍‌ୟା ସିନିକାର୍‌, ଇୟାୱାଜା ନୋ ୱାର୍‌ ସିନାପରିଚୟ୍‌ ଆଏତିମାରିଙ୍ଗ୍‍ ବା, ୱାରି ଉଣ୍ତିଙ୍ଗ୍‌ ନିନୁ ବିସ୍‌ବାସ୍‌ତାନ୍‌ କିଜିନି । 6 ୱାର୍‌ ମଣ୍ତଲିଦୁ ମି ଜିବନ୍‌ନୋନି ବିସୟ୍‌ତାନ୍‌ ସାକ୍ୟ ୱେର୍‌ତାମାନାର୍‌; ମିର୍‌ ୱାରି ସନି ଉଣ୍ତିଙ୍ଗ୍‌ ସାହାଜ୍ୟ କିଦୁ । ଇୟାଉଣ୍ତିଙ୍ଗ୍‌ ମାପୁରୁ ୱେଡ଼ିକା ଆନାନ୍‌ । 7 ଇରିଙ୍ଗ୍‌ ୱାର୍‌ ଅବିସ୍‍ବାସ୍‍ରି ମାଣୁକୁ ଇନି ସାହାଜ୍ୟ ଅଏଣ୍‌ଗା କ୍ରିସ୍ତଦି ସେବା ଉଣ୍ତିଙ୍ଗ୍‌ ସତା ମାନାର୍‌ । 8 ମାରି, ମାଡୁ କ୍ରିସ୍ତବିସ୍‌ବାସ୍‌ସିର୍‌ ୱାରିଙ୍ଗ୍‌ ସାହାଜ୍ୟ କିଜି ସତ୍‌ତି ଉଣ୍ତିଙ୍ଗ୍‌ ୱାରି ପାଣିଦୁ ମିସାନିକା ନେଗେତ୍‌ ।

9 ନାନ୍‌ ମି ମଣ୍ତଲିଦୁ ଉନ୍‌ଡ୍ରି ଇସ୍ରି ଆକୁ ରାସ୍‌ତା ମାର୍ହା, ମାତର୍‌ ଡାୟୋଟ୍ରେଫିସ୍ ମଣ୍ତଲିଦି ପେରିକାନ୍‌ ଆଦେଙ୍ଗ୍‌ ବଦା କିଜି ମା ମାଟାଦିଙ୍ଗ୍‌ ଡ଼ିସ୍‌ନାନ୍‌ । 10 ନାନ୍‌ ଆବେନୁ ୱାତିଙ୍ଗ୍‌, ୱାନ୍‌ ଆମାକା କିଜିନାନ୍‌, ୱିଜୁ ୱିକ୍‌ନାସିନା ମା ବିରୁଦ୍‌ତାନ୍‌ ତାଗ୍‌ଇ ମାଟା ଇନ୍‌ଜି ମାଙ୍ଗିଁ ନିନ୍ଦା କିଜିନାନ୍‌, ମାରି ୱାନ୍‌ କ୍ରିସ୍ତବିସ୍‌ବାସ୍‌ସି ତଡ଼ାନ୍‌କାଙ୍ଗ୍‌ ସନ୍‌ମାନ୍‌ କିଏନ୍‌, ମାରି ଆଇକାର୍‌ ଆକା କିଦେଙ୍ଗ୍‌ ବଦା କିତିଙ୍ଗ୍‌ ୱାରିଙ୍ଗ୍‌ ମନା କିନାନ୍‌, ମାରି ମଣ୍ତଲିଦାନ୍‌ ୱାରିଙ୍ଗ୍‌ ସପ୍‌ନାନ୍‌ ।

11 ନା ଲାଡ୍‍ତି ତଡ଼୍‍କୁ, ମିରୁ ତାଗ୍‍ଇପାଣିଦୁ ସଲଏଣ୍‌ଗା ସତ୍‍ପାଣିଦି ତରିନ୍‌ ସାନ୍‌ଡ୍ରୁ । ଏନ୍‌ ସତ୍‌ପାଣି କିନାନ୍‌, ୱାନ୍‌ ମାପୁରୁଦି ଲୋକୁ; ଏନ୍‌ ତାଗ୍‌ଇପାଣି କିନାନ୍‌, ୱାନ୍‌ ମାପୁରୁଙ୍ଗୁଁ ନେସ୍‌ଏନ୍‌ ।

12 ଡିମିଟ୍ରିଅସ୍‌ଦିଙ୍ଗ୍‌ ୱିଜେରେ ପ୍ରସଂସା କିଜିନାର୍‌; ସତ୍‌ ନିଜେ ବା ସାକ୍ୟ ସିତାମାନାନ୍‌; ମାପ୍‌ ବା ୱାନିଙ୍ଗ୍‌ ସାକ୍ୟ ସିଜିନାପ୍‌, ମା ସାକ୍ୟ ଜେ ସତ୍‌, ଇକା ନିନୁ ନେସ୍‌ତିମାନି ।

13 ମି ଲାକ୍‌ତୁ ନା ଗାଦି ବିସୟ୍‌ ୱେର୍‌ନିକା ମାନାତ୍‌, ମାତର୍‌ ଆୟାୱିଜୁ ନାନ୍‌ ଇଲେଇ ସିରା ନି ପେନ୍‌ତାନ୍‌ ରାସ୍‌ତେଙ୍ଗ୍‌ ବଦା କିଏଜିନା । 14 ମି ୱାଲେ ବେଟ୍‌ ଆନା ଇଜିନା ଆସା ନାସ୍ତିୱାଲେ ମାଡୁ ସାମ୍‌ନାସାମ୍‌ନି ଆଜି ୱାର୍‌ଗିଜିସାନାଟ୍‌ ।

15 ମି ଉଣ୍ତିଙ୍ଗ୍‌ ସାନ୍ତି ଆପିତ୍‌,

ସାଙ୍ଗର୍‌ ୱିଜେରେ ମିଙ୍ଗିଁ ନମସ୍କାର୍‌ ଜାଣେ କିଜିନାର୍‌ । ମା ୱିଜୁ ସାଙ୍ଗରିଙ୍ଗ୍‌ ନମସ୍କାର୍‌ ଜାଣେ କିଦୁ ।