1 ଇୟାଉଣ୍ତିଙ୍ଗ୍‌ ମି ୱାଜା ଅଣଜିହୁଦିରି ଉଣ୍ତିଙ୍ଗ୍‌ କ୍ରିସ୍ତ ଜିସୁଦି ଉଣ୍ତିଙ୍ଗ୍‌ ଜଇଲ୍‌ତୁ ମାନି ନାନୁ ପାଉଲ, ମାପୁରୁଦି ଲାକ୍‌ତୁ ପାର୍‌ତାନା କିଜିନା । 2 ମି ନେଗି ଉଣ୍ତିଙ୍ଗ୍‌ ମାପୁରୁ ୱାନି ଦୟାଦାନ୍‌ ନାଙ୍ଗିଁ ଜେ ଇୟା ପାଣି କିଦେଙ୍ଗ୍‌ ସିତାମାନାନ୍‌, ଇକା ପୁରା ୱେର୍‌ଇମାନି । 3 ମାପୁରୁ ୱାନି ଆୟା ମାର୍‌ଗିତିମାନି ମାଟା ୱେର୍‍ସି ନାଙ୍ଗିଁ ଜାଣେକିତାନ୍‌ । ଇୟା ବିସୟ୍‌ତାନ୍‌ ନାନ୍‌ ଇସ୍ରିକାକିଜି ରାସ୍‌ସିନା । 4 ✝୩:୪ କଲସିୟ ୧:୨୬,୨୭.ଆକା ପଡ଼ାତିଙ୍ଗ୍‌, କ୍ରିସ୍ତଦି ମାର୍‌ଗିତିମାନି ମାଟା ବିସୟ୍‌ତାନ୍‌ ନାନ୍‌ ଆମାକା ବୁଜାତାମାନା, ଆକା ମିର୍‌ ନେସ୍‌ତେଙ୍ଗ୍‌ ଆଟ୍‌ନିଦେର୍‌ । 5 ପୁର୍ବେକାଡ଼ାଦି ଲୋକା ଲାକ୍‌ତୁ ଇୟା ମାର୍‌ଗିତିମାନି ମାଟା ବିସୟ୍‌ତାନ୍‌ ୱେର୍‌ଏର୍‌ ମାର୍ହାର୍‌ । ମାତର୍‌ ମାପୁରୁ ଇଲେଇ ୱାନି ପବିତ୍ର ପ୍ରେରିତ ସିସୁ ମାରି ବାବବାଦିରିଙ୍ଗ୍‌ ଆତ୍ମାଦାନ୍‌ ଇକା ୱେର୍‌ତାମାନାନ୍‌ । 6 ଆୟା ମାର୍‌ଗିତିମାନି ମାଟା ଆଜିନାତ୍‍, ସୁସମାଚାର୍‌ତି ଉଣ୍ତିଙ୍ଗ୍‌ ଜିହୁଦିରି ୱାଲେ ଅଣଜିହୁଦିରି ବା ମାପୁରୁଦି ଆସିର୍ବାଦ୍‌ତୁ ମିସାତାମାନାର୍‌ । ୱାର୍‌ ଆୟା ଉନ୍‌ଡ୍ରେ ମେନ୍ଦଲତି ମେନ୍ଦଲୱିଜୁ ମାରି ଜିସୁ କ୍ରିସ୍ତଦି ସାହାଜ୍ୟଦାନ୍‌ ମାପୁରୁ ସିତିମାନି ପାର୍‌ମାଣ୍‌ତୁ ମିସାତାମାନାର୍‌ ।

7 ମାପୁରୁଦି ପାଣିକିନି ସାକ୍ତି ଇସାବ୍‌ତାନ୍‌ ନାଙ୍ଗିଁ ଆମା ଅନୁଗ୍ରହଦି ଦାନ୍‌ ସିତାମାନାନ୍‌, ଆୟାଉଣ୍ତିଙ୍ଗ୍‌ ଆୟା ସୁସମାଚାର୍‌ତି ନାନ୍‌ ଅରେନ୍‍ ସେବାକିନିକିନ୍ଦା ଆତାମାନା । 8 ନାନ୍‌ ମାପୁରୁଦି ଲୋକା ଲୋଇ ୱିଜେରିମାଣୁକୁ ଇସ୍ରିକିନ୍ଧା, ମାରିବା ଅଣଜିହୁଦିରି ଲାକ୍‌ତୁ କ୍ରିସ୍ତଦି ୱିଜ୍‌ଇ ସମ୍ପତିଦି ବାକ୍ୟ ଆସ୍‌ସି ସନି ଉଣ୍ତିଙ୍ଗ୍‌ ନାଙ୍ଗିଁ ମାପୁରୁ ଦୟା ସିତାମାନାନ୍‌ । 9 ମାରି ମାପୁରୁଦି ଆୟା ମାର୍‌ଗିତିମାନି ମାଟା ଏଣ୍ତେସ୍‌ ପାଣି ସିଦେଙ୍ଗ୍‌ ଆଟ୍‍ନାତ୍‍, ଆକା ୱିଜେରିଙ୍ଗ୍‌ ନେସ୍‌ସି କିନି ଉଣ୍ତିଙ୍ଗ୍ ବାଗ୍ୟ ନାନ୍‌ ପୟ୍‌ତାମାନା । ୱିଜୁ ବିସୟ୍‌ତି ତିଆର୍‌କିତିକାନ୍‌ ମାପୁରୁ ପୁର୍ବେ ୱିଜୁ ଜୁଗ୍‌ତୁ ୱାନି ମାର୍‌ଗିତିମାନି ମାଟାଦିଙ୍ଗ୍‌ ଆଡାକ୍‌ତା ଇଟ୍‌ତା ମାର୍‌ର୍ହାନ୍‌, 10 ଏଣ୍ତେସ୍‌ ଇଲେଇତି ବେଡ଼ାଦୁ କ୍ରିସ୍ଟିୟାନ୍‌ ମଣ୍ତଲିଦି ପାଣିଦାନ୍‌ ମୁସ୍‌କୁପୁର୍‌ତି ସାସନ୍‍ କିନି ମାରି ସାକ୍ତିଙ୍ଗ୍‌ଁ ମାପୁରୁଦି ନାଣ୍ତ ବୁଦି ବିସୟ୍‌ତାନ୍‌ ଅଜାଜ ବୁଜାଦେଙ୍ଗ୍‌ ଆଟ୍‍ନାର୍‍ । 11 ମାପୁରୁ ୱାନି ପୁର୍ବେଦି ଉଦେସ୍‌ତି ଇସାବ୍‌ତାନ୍‌ ମା ପ୍ରବୁ କ୍ରିସ୍ତ ଜିସୁଦିମାଣୁକୁ ଇକା ପାଣି କିତାମାନାନ୍‌ । 12 ଆୟା କ୍ରିସ୍ତଦି ୱାଲେ ମିସାତି ମାନିଙ୍ଗ୍‌ ୱାନିମାନୁ ବିସ୍‌ବାସ୍‌ କିତିମାନିଙ୍ଗ୍‌ ଆସାଦାନ୍‍ ମାପୁରୁଦି ଆଗ୍‌ଡ଼ି ସନି ଉଣ୍ତିଙ୍ଗ୍‌ ମା ସାହାସ୍‌ ମାନାତ୍‌ । 13 ଆୟାଉଣ୍ତିଙ୍ଗ୍‌ ନା ବାତିଙ୍ଗ୍‌ମାଲ୍‌ନିକା, ମି ଉଣ୍ତିଙ୍ଗ୍‌ ନା ଆମା ଦୁଃକ୍‌କାସ୍ଟୁଦି ଉଣ୍ତିଙ୍ଗ୍‌ ନିରାସ୍‌ ଆମାଟ୍‌, ଇରିଙ୍ଗ୍‌ ଇୟାୱିଜୁ ମି ନେଗି ଉଣ୍ତିଙ୍ଗ୍‌ ଆତାମାନାତ୍‌ ।

14 ଆୟା ବୁବା ମାପୁରୁଦି ଆଗ୍‌ଡ଼ି ନାନ୍‌ ମେଣ୍ତେଙ୍ଗ୍‌ ଗଟ୍‌କିଜି ପାର୍‌ତାନା କିଜିନା । 15 ଇୟାଉଣ୍ତିଙ୍ଗ୍‌ ଆମା ବୁବାଦିମାଣୁକୁ ମୁସ୍‌କୁପୁର୍‌ ମାରି ଦୁନିଆଦି ୱିଜୁ ଇଲୁକୁପରିବାର୍‌ ୱାନି ସତ୍‍ ଦରୁ ପୟ୍‌ଆ ଆତାମାନାତ୍‌, 16 ଏଣ୍ତେସ୍‌ ନାନ୍‌ ପାର୍‌ତାନା କିନା ୱାନ୍‌ ୱାନି ଆତ୍ମାଦି ଅଦିକାର୍‌ ୱାନି ଗୌରବ୍‌ତି ଉଣ୍ତାକିତିମାନିମାଣୁକୁ ମି ଜିବନ୍‌ତି ଆତ୍ମାଦିଙ୍ଗ୍‌ ବପୁ କିନି ଉଣ୍ତିଙ୍ଗ୍‌ ସାକ୍ତି ସିନାନ୍‌ । 17 ନାନ୍‌ ପାର୍‌ତାନା କିନା, ଏଣ୍ତେସ୍‌ ମି ବିସ୍‌ବାସ୍‌ତି ବପୁଦାନ୍‌ କ୍ରିସ୍ତ ମି ଜିବନ୍‌ତୁ ବାସା କିନାନ୍‌ । ନାନ୍‌ ପାର୍‌ତାନା କିନା, ଏଣ୍ତେସ୍‌ ମି ମୁଲ୍‌କୁନାଦିକାଲୁ ଜିବନ୍‌ନୋନିମାଣୁକୁ ତିଆର୍‌ ମାରି ଡାଟ୍‌ ଆନାତ୍‌ । 18 ଆର୍‌ତିଙ୍ଗ୍‌, କ୍ରିସ୍ତଦି ଜିବନ୍‌ନୋନିକା ଜେ ଏସା ନିର୍‌ଇକା ନି ଅସାର୍, ଏସ ନିରିକା ନି ନିର୍‌ଇଗୁଟା, ମିର୍‌ ମାପୁରୁଦି ଆଇଆଇ ଲୋକା ୱାଲେ ଇକା ନେସ୍‌ତେଙ୍ଗ୍‌ ଆଟ୍‌ନିଦେର୍‌ । 19 ହୁଁ, ମିର୍‌ ୱାନି ଜିବନ୍‌ନୋନି ବାକ୍ୟ ନେସ୍‌ତେଙ୍ଗ୍‌ ଆଟ୍‌ନିଦେର୍‌, ମାରିବା ଇକା ଏସ୍‌କାଙ୍ଗ୍‌ବା ପୁରାୱିଜୁ ନେସ୍‌ତେଙ୍ଗ୍‌ ଆଟ୍‌ଇକା । ଇୟାୱାଜା ମିର୍‌ ମାପୁରୁଦି ୱାଜା ବର୍ତିଦୁ ପୁରାବର୍ତି ଆଦେଙ୍ଗ୍‌ ଆଟ୍‌ନିଦେର୍‌ ।

20 ମାପୁରୁ ମା ଲୋଇ ପାଣି ପୁରା କିଜିମାନି ନିଜେଦି ସାକ୍ତି ଇସାବ୍‌ତାନ୍‌ ମା ଲସ୍‌ନିକା ମାରି ଅଡ଼୍‌ବିନିମାଣୁକୁ ନାଣ୍ତ ସିଦେଙ୍ଗ୍‌ ଆଟ୍‍ନାନ୍‍; 21 ମଣ୍ତଲିଦାନ୍‌ ମାରି କ୍ରିସ୍ତ ଜିସୁଦିମାଣୁକୁ ଜୁଗ୍‌ ଜୁଗ୍‌ ୱିଜୁ ଦିନ୍‌ ସାନ୍ଦି ଆୟା ମାପୁରୁଦି ଗୌରବ୍‍ ଆପିତ୍‌ ! ଆମେନ୍‍ ।