1 ପ୍ରବୁଦି ସେବା କିଜିମାର୍‌ଇ ଉଣ୍ତିଙ୍ଗ୍‌ ଜେଲ୍‌ତୁ ତେବାତିମାନି ନାନ୍‌ ପାଉଲ ମିଙ୍ଗିଁ ଅନୁରଦ୍‌ କିଜିନା, ଏଣ୍ତେସ୍‌ ଜିନି ମାଡ଼ିନି ଉଣ୍ତିଙ୍ଗ୍‌ ମାପୁରୁ ମିଙ୍ଗିଁ କୁକ୍‌ତାମାନାନ୍‌, ଆୟାୱାଜା ସାଲାବୁଲା କିଦୁ । 2 ✝ୱିଜୁୱାଲେ ନମ୍ରତା, ସାନ୍ତି ମାରି ସାସ୍‌ ଆଦୁ । ଜିବନ୍‌ନୋନିମାନୁ ନିଜେନିଜେଦି ଉଣ୍ତିଙ୍ଗ୍‌ ମିସାଜି ତେବାଦୁ । 3 ପବିତ୍ରଆତ୍ମାଦି ସାହାଜ୍ୟଦାନ୍‌ ସାନ୍ତିଦାନ୍‌ ବାସାନି ଉଣ୍ତିଙ୍ଗ୍‌ ମି ମାନୁ ଆମାକା ଉନ୍‌ଡ୍ରେ ତିଆର୍‌ ଆତାମାନାତ୍‌, ତାନିଙ୍ଗ୍‌ ରକ୍‌ୟା କିନି ଉଣ୍ତିଙ୍ଗ୍‌ ଜାତୁନ୍‍ ଆଦୁ । 4 ମା ମେନ୍ଦଲ୍‌ ଉନ୍‌ଡ୍ରେ, ଆତ୍ମା ବା ଉନ୍‌ଡ୍ରେ ମାରି ଉନ୍‌ଡ୍ରେ ଆସା ସିଜି ମାପୁରୁ ମାଙ୍ଗିଁ କୁକ୍‌ତାମାନାନ୍‌ । 5 ଅରେନ୍‍ ପ୍ରବୁ, ଉନ୍‌ଡ୍ରେ ବିସ୍‌ବାସ୍‌, ଉନ୍‌ଡ୍ରେ ଡୁବନ୍‌; 6 ୱିଜେରି ଲୋକା ଜାତିଦୁ ମାପୁରୁ ନି ବୁବା ଅରେନ୍‍; ୱାନ୍‌ ୱିଜେରି ପ୍ରବୁ, ୱିଜେରି ମାନୁ ମାରି ୱିଜେରି ଜିବନ୍‌ତୁ ମାନାନ୍‌ ।

7 କ୍ରିସ୍ତସିତିମାନି ଅଡି ଇସାବ୍‌ତାନ୍‌ ମାଡୁ ୱିଜେରିଙ୍ଗ୍‌ ଉନ୍‌ଡ୍ରି ଉନ୍‌ଡ୍ରି ଦୟା ଦାନ୍‌ ପୟ୍‌ତିମାନିକା । 8 ଦର୍ମସାସ୍ତ୍ରଦୁ ଇୟା ବିସୟ୍‌ତାନ୍‌ ରାସ୍‌ତାମାନାତ୍‌,

"ଏସ୍ତିୱାଲେ ୱାନ୍‌ ମୁସ୍‌କୁ ସର୍ହାନ୍‌,

ୱାନି ୱାଲେ ନାଣ୍ତ ଜଇଲ୍‌ତୁ ମାର୍‌ଇୱାରିଙ୍ଗ୍‌ ୱାନ୍‌ ଅତାନ୍‍,

ମାରି ଲୋକାଙ୍ଗ୍‌ ନାଣ୍ତ ବର୍‌ ସିତାନ୍‌ ।"

9 ୱାନ୍‌ ମୁସ୍‌କୁ ସର୍ହାନ୍‌ ଇଜି ୱେର୍‌ନି ଅର୍ତ ଇନିକା ? ଇୟାତାନି ଅର୍ତ ଆଜିନାତ୍‍, ଆଗ୍‌ଡ଼ି ୱାନ୍‌ ଦୁନିଆଦି ଇସ୍ରି ବାଡିଆଙ୍ଗାଁ ୱାତା ମାର୍ହାନ୍‌ । 10 ଏନ୍‌ ୱାତା ମାର୍ହାନ୍‌, ୱାନ୍‌ ଏଣ୍ତେସ୍‌ ସାରା ପୃତିବିଦିଙ୍ଗ୍‌ ୱାନି ମାନିମାନୁ ପୁରାବର୍ତି କିନାନ୍‌, ଆୟାଉଣ୍ତିଙ୍ଗ୍‌ ୱାନ୍‌ ବା ମୁସ୍‌କୁପୁର୍‌ତି ମୁସ୍‌କୁ ସର୍ହାନ୍‌ । 11 ୱାନ୍‌ ନେ ଲୋକାଙ୍ଗ୍‌ ନାଣ୍ତ ବର୍‌ ଦାନ୍‌ ସିଜି ସର୍‌ଆମାନାନ୍‌ । ଏସ ଲୋକାଙ୍ଗ୍‌ ପ୍ରେରିତ ସିସୁ, ମାରି ଏସ ଲୋକାଙ୍ଗ୍‌ ବାବବାଦି, ଏସ ଲୋକାଙ୍ଗ୍‌ ସୁସମାଚାର୍‌ ପ୍ରଚାର୍‌କିନିକାନ୍‌, ମାରି ଏସ ଲୋକାଙ୍ଗ୍‌ ପାଲକ ମାରି ମାସ୍‌ଟର୍‌ ୱାଜା ଆସ୍‌କିତାମାନାନ୍‌ । 12 କ୍ରିସ୍ତଦି ଆୟା ମେନ୍ଦଲ୍‌ ରସ୍‌ନି ଉଦେସ୍‌ତାନ୍‌ କ୍ରିସ୍ଟିୟାନ୍‌ ସେବା ପାଣି ଉଣ୍ତିଙ୍ଗ୍‌ ମାପୁରୁଦି ଲୋକାଙ୍ଗ୍‌ ତିଆର୍‌ କିଦେଙ୍ଗ୍‌ ୱାନ୍‌ ଇକା କିତାମାନାନ୍‌ । 13 ଆୟାଉଣ୍ତିଙ୍ଗ୍‌ ମାଡୁ ୱିଜୁଲୋକୁ ମା ବିସ୍‌ବାସ୍‌ତୁ ମାରି ମାପୁରୁଦି ମାରିନ୍‌ ବିସୟ୍‌ତି ବୁଦିଦୁ ଉନ୍‌ଡ୍ରେମାନୁ ଆନାପ୍‌, କ୍ରିସ୍ତଦି ପୁରାବର୍ତି ଆଜି ମାପୁ ପୁରାବୟସ୍‌ ଆନାପ୍‌ । 14 ଗାଲିଦି ସନିକା ମାରି ଉଲୁକାଏରୁ ଆତ୍‌ଡ଼ାତିଙ୍ଗ୍‌ ଇନିଙ୍ଗାଁ ଆନିଙ୍ଗାଁ ଆଜିମାନି ଇସ୍ରିକଡ଼ରି ୱାଜା ମାଡୁ ମାରି ତିର୍‌ ଆଇକା । ଆଇୱାରିଙ୍ଗ୍‌ ସେଇସାରିଦୁ ପୋକ୍‌ସିମାନି ବେମ୍‌ରିକିନିୱାରି ବାୟାନାନି ସିକିୟାଦୁ ମାଡୁ ଇନିଙ୍ଗାଁ ଆନିଙ୍ଗାଁ ଆଇକା । 15 ତାନିବାଦ୍‌ଲୁ ଜିବନ୍‌ନୋନି ସତ୍‍ ୱେର୍‍ସି ୱିଜୁ ବିସୟ୍‌ତୁ ତାଲା ୱାଜା କ୍ରିସ୍ତଦି ୱାଜା ଆନାଟ୍‌ । 16 ✝ୱାନିମାଣୁକୁ ମେନ୍ଦଲତି ଆଇଆଇ କିକୁକାଲ୍‌କୁ ଉନ୍‌ଡ୍ରେମାନୁ ମିସାନେ ମାରି ଆବେନୁ ମାନି ସିରେଙ୍ଗ୍‌ ସାହାଜ୍ୟଦାନ୍‌ ୱିଜୁ ମେନ୍ଦଲ ତିଆର୍‌ ଆନାତ୍‌ । ଆଦେଙ୍ଗ୍‌ ମେନ୍ଦଲ୍‌ତିକେଙ୍ଗ୍‌ ୱିଜୁ ନିଜେଦି ପାଣି କିନି ୱାଜା ବ୍ୟବ୍‌ହାର୍‌ କିନିମାଣୁକୁ ୱିଜୁ ମେନ୍ଦଲ ପିରିଜି ତିଆର୍‌ ଆନାତ୍‌ ।

17 ମାରି, ପ୍ରବୁଦି ଦର୍‌ତାନ୍‌ ନାନ୍‌ ମିଙ୍ଗିଁ ଜାଗାର୍‌ତା କିଜି ସିଜିନା, ଅଣଜିହୁଦିରି ୱାଜା ମାରି ସାଲାବୁଲା କିମାଟ୍‌ । ୱାରି ସିନ୍ତା ପେରିକା 18 ମାରି ୱାରି ମନ୍‍ ସିକାଟି । ମାପୁରୁ ସିତିମାନି ଜିବନ୍‌ତୁ ୱାରିନ୍ଦି ଇନିକା ମିସାଏତ୍‌ । ଇରିଙ୍ଗ୍‌ ୱାର୍‌ ପୁରା ବୁଦିସିଲିକାର୍‌ ମାରି ମାନାଇକାର୍‌ । 19 ୱାର୍‌ ସେମାର୍‌ସିଲିକାର୍‌, ତାଗ୍‍ଇ ପାଣିକିନିକାର୍‌ ମାରି ଲୋବ୍‌ଦାନ୍‍ ୱିଜୁଜାତିଦି ନେଗେନ୍‌ତର୍‌ଇ ପାଣିଦୁ ମାନାର୍‌ ।

20 ଇୟାୱିଜୁ ମିର୍‌ କ୍ରିସ୍ତଦି ବିସୟ୍‌ତାନ୍‌ ସିକିୟା କିତିମାନି ବିସୟ୍‌ ଆଏତ୍‍ । 21 ମିର୍‌ ୱାନି ବିସୟ୍‌ ୱେର୍‌ଇମାନିଦେର୍‌, ମାରି ୱାନି ୱେନ୍‌କାସନି ୱାଜା ଜିସୁଦି ବିସୟ୍‌ତାନ୍‌ ସତ୍‍ ସିକିୟା ପୟ୍‌ତିମାନିଦେର୍‌ । 22 ✝ମିର୍‌ ଆମା ପାଡ଼ିଇ ସାଲାବୁଲାଦାନ୍‌ ଜିବନ୍‍ ଜିଜି ମାର୍‌ଇଦେର୍‌, ଆକା ୱିଜୁ ଡ଼ିସ୍‌ତୁ, ଇରିଙ୍ଗ୍‌ ଆୟାତାନି ସାଲାକି ପାଣିଦାନ୍‌ ମି ଆତ୍ମା ନାସ୍ଟୁ ଆଜିମାର୍ହାତ୍‌ । 23 ମାରି ମି ଜିବନ୍‌ ମାରି ମୋନ୍‌ ପୁରା ପୁନିକା ଆନିକା ମାନାତ୍‌ । 24 ✝ଆମା ପୁନି ସାଲାବୁଲାନିକା ମାପୁରୁଦି ୱାଜା ତିଆର୍‌ଆତି ପୁନି ଆତ୍ମା ଆରାଦୁ । ଆକା ମି ପବିତ୍ର ମାରି ଦାର୍ମୁଦାନ୍‌ ଜିବନ୍‌ତୁ ୱେଙ୍ଗିଁତି ।

25 ମାରି ମିଚ୍‌ ୱେର୍‌ମାଟ୍‌ । କ୍ରିସ୍ତବିସ୍‌ବାସ୍‌ସିର୍‌ ନିଜେନିଜେଦିଙ୍ଗ୍‌ ସତ୍‍ ୱେର୍‌ନିକା ମାନାତ୍‌; ଇରିଙ୍ଗ୍‌ ମାପୁ କ୍ରିସ୍ତଦି ମେନ୍ଦଲତି ମେନ୍ଦଲୱିଜୁ । 26 ମିର୍‌ ରିସା ଆଜି ପାପ୍‌ କିମାଟ୍‌, ୱେଡ଼ା ଆର୍‌ଏଣ୍‌ଗା ମି ରିସା ତିର୍‌ ଆପିତ୍‌ । 27 ମାରି ସୟତାନ୍‌ତିଙ୍ଗ୍‌ ବାଡି ସିମାଟ୍‌ । 28 ଡଙ୍ଗାଁର୍‌ଏନ୍‌ ମାରି ଡଙ୍ଗାଁ କିମାକିନ୍‌ । ମାରି ସିଲିସାତିୱାରିଙ୍ଗ୍‌ ଦାନ୍‌ କିନି ଉଣ୍ତିଙ୍ଗ୍‌ ଏଣ୍ତେସ୍‌ ୱାନି ଲାକ୍‌ତୁ ଇନିକା ତେବାଦେଙ୍ଗ୍‌ ଆଟ୍‍ନାତ୍‍, ଇୟାଉଣ୍ତିଙ୍ଗ୍‌ ନିଜେଦି କିୟୁଦାନ୍‌ ନେଗେନ୍‌ ପାଣି କିଜି କାସ୍ଟୁପାଣି କିପିନ୍‌ । 29 ମି ୱେୟୁଦାନ୍‌ ଇନି ତାଗ୍‌ଇମାଟା ସୋମାକିତ୍‌, ମି ମାଟା ନେଗିକା, ପିରିସ୍‌କିନିକା ମାରି ପାଣିଦୁଲାଗେ ଆପିତ୍‌ । ଆର୍‌ତିଙ୍ଗ୍‌ ଆମାକାର୍‌ ମି ମାଟା ୱେନାର୍‌, ୱାରି ଉଣ୍ତିଙ୍ଗ୍‌ ଆକା ନେଗିକା ଆନାତ୍‌ । 30 ମାପୁରୁଦି ପବିତ୍ର ଆତ୍ମାଦିଙ୍ଗ୍‌ ଦୁଃକ୍‌ ସିମାଟ୍‌ । ଇରିଙ୍ଗ୍‌ ପବିତ୍ର ଆତ୍ମା ମି ମୁସ୍‌କୁ ମାପୁରୁଦି ନିଜେଦି ଅଦିକାର୍‌ତି ସିନାଦି ୱାଜା ମାରି ମାପୁରୁ ଜେ ଅର୍‍ଲେନ୍‍ ମିଙ୍ଗିଁ ରକିୟା କିନାନ୍‌, ଇୟାକା ଆନାତ୍‌ଆକା । 31 ୱିଜୁଜାତିଦି ସୁରିମାଟେଙ୍ଗ୍‌, ଗିଦିର୍‌ ମାରି ରିସା ଡ଼ିସ୍‌ତୁ । ଜାଟିଜଗଡ଼ା ନି ଆଇୱାରିଙ୍ଗ୍‌ ନିନ୍ଦା କିମାଟ୍‌ । ଏ ଉଣ୍ତିଙ୍ଗ୍‌ କାଡ଼ାମାଟ୍‌ । 32 ✝ମାରି, ନିଜେନିଜେଦି ଉଣ୍ତିଙ୍ଗ୍‌ ସାକା ଆଦୁ ମାରି ନେଗି ଜିବନ୍‌ ଆଦୁ, ମାରି ମାପୁରୁ କ୍ରିସ୍ତଦିମାନୁ ମିଙ୍ଗିଁ ଏଣ୍ତେସ୍‌ କେମା କିତାନ୍‌, ଆୟାୱାଜା ମିର୍‌ ନିଜେନିଜେଦିଙ୍ଗ୍‌ କେମା କିଦୁ ।