1 ମିର୍‌ ମାପୁରୁଦି ଲାଡ୍‍ତି କଡ଼ର୍‍, ମାରି ୱାନି ୱାଜା ଆଦେଙ୍ଗ୍‍ଁ ଇଜି ବଦା କିଦୁ । 2 କ୍ରିସ୍ତ ଏଣ୍ତେସ୍‌ ମାଙ୍ଗିଁ ଜିବନ୍‌ନୋତାନ୍‍ ମାରି ମାପୁରୁଦି ୱେଡ଼ିକାଦି ଉଣ୍ତିଙ୍ଗ୍‍ଁ ନିଜେଦି ଜିବନ୍‍ତିଙ୍ଗ୍‍ ମା ଉଣ୍ତିଙ୍ଗ୍‌ ବାସ୍‍ନାଦି ଦୁପ୍‍ଣି ମାରି ପୁଜା ୱାଜା ଆତାନ୍‌, ମି ଜିବନ୍‌ ବା ଆୟାୱାଜା ଜିବନ୍‍ନୋନି ମାଣାନ୍‌ ସାଲାପିତ୍‍ ।

3 ମାପୁରୁଦି ଲୋକୁ ଆତିମାନିଙ୍ଗ୍‌ ମି ଲୋଇ ଦାରିପାଣି, ୱିଜୁ ରକମ୍‍ତି ତାଗ୍‍ଇକା ମାରି ଲୋବ୍ରାଆନିକା, ଇୟାୱିଜୁ ତେବାମାକିତ୍‍ । ଆକା ମାପୁରୁଲୋକା ଉଣ୍ତିଙ୍ଗ୍‌ ନେଗେନ୍‌ ସିଲେ, 4 ମି ଉଣ୍ତିଙ୍ଗ୍‍ଁ ତାଗ୍‍ଇ ବାସା, ୱାର୍‍ଇ ମାଟା ନି ବାଣ୍ତିସ୍‍ ମାଟା ୱାର୍‍ଗିନିକା ବା ନେଗେତ୍‍ ସିଲେ । ମାତର୍‌ ମି ୱାର୍‍ଗିମାନୁ ମାପୁରୁଙ୍ଗ୍‍ଁ ଦନ୍ୟବାଦ ସିଦୁ । 5 ଇକା ସତ୍‍ ଇଜି ନେସ୍‍ସୋ ମାନ୍‍ଡ୍ରୁ, ଏମେକାର୍‌ ଦାରିଏନ୍‍, ତାଗ୍‍ଇକାନ୍‍ ମାରି ଲୋବ୍ରା, ନାଣ୍ତ ଲୋବ୍ରା ଆନିକାନ୍‍ ବମା ପୁଜା କିନି ସାମାନ୍‍, ୱାନ୍‌ ଏସାଙ୍ଗ୍‍ବା କ୍ରିସ୍ତଦି ନି ମାପୁରୁଦି ରାଜିଦି ଅଦିକାରି ଆଏନ୍‍ ।

6 ପୁଲାପୁଲି ମାଟେଙ୍ଗ୍‌ ୱେର୍‌ସି ଆମାକାନ୍‍ ମିଙ୍ଗିଁ ବାଣ୍ତିସ୍‍ କିମାକିନ୍‌ । ଇୟାୱିଜୁ ତାଗ୍‍ଇ ପାଣିଦାନ୍‍ ଏମେକାର୍‌ ମାପୁରୁଦି ମାଟା ଅମାନ୍ୟ କିନାର୍‌, ୱାରି ଉଣ୍ତିଙ୍ଗ୍‌ ୱାନି ରିସା ନାଣ୍ତ ଆନାତ୍‌ । 7 ଇୟାନାନି ଲୋକାୱାଲେ ମିସାମାଟ୍‍ । 8 ମିର୍‌ ନିଜେ ଅର୍‍ଲେନ୍‍ ସିକାଟିଦୁ ମାର୍ହିଦେର୍‍ । ମାତର୍‌ ଇଲେଇ ପ୍ରବୁଦି ଲୋକୁ ଆତିମାନିଙ୍ଗ୍‌ ମିର୍‌ ଜାୟ୍‌ତୁ ମାନିଦେର୍‍ । ଆଦେଙ୍ଗ୍‌ ମିର୍‌ ଜାୟ୍‌ତି କଡ଼ରି ୱାଜା ସାଲାବୁଲା ଆଦୁ । 9 ମାତର ଜାୟ୍‌ ନେ ୱିଜୁ ରକମ୍‍ତି ନେଗିଗୁଣୁ, ଦାର୍ମୁତିକା ମାରି ସତ୍‍ନାନି ପଲ୍‌ ଆସ୍‌ନାତ୍‌ । 10 ପ୍ରବୁଦି ୱେଡ଼ିକାଦିକାନ୍‌ ଆଦେଙ୍ଗ୍‌ ଇଜି ଅଜାଦୁ । 11 ଲୋକୁ ସିକାଟିଦୁ ଏମେ ୱିଜୁ ଟକେକିନି ପାଣି କିନାର୍‌, ଆୟାୱିଜୁ ମାଣ୍‌କୁ ଆକ ମାନ୍‍ଡ୍ରୁ । ମାରି ୱାରି ପାଣିୱିଜୁ ଜାୟ୍‍ତୁ ତର୍‍ସି ସିଦୁ । 12 ସତ୍‌ତାନ୍‌ ୱାର୍‌ ମାର୍‍ଗିଜି ଆମା ପାଣି ୱିଜୁ କିନାର୍‌, ଆୟା ବିସୟ୍‍ ୱେର୍‍ତେଙ୍ଗ୍‍ ସେମାର୍‍ତି ମାଟା । 13 ଏସ୍ତିୱାଲେ ୱିଜୁ ବିସୟ୍‍ ଜାୟ୍‍ତୁ ତାନାର୍‍, ନାସ୍ତିୱାଲେ ଆୟାୱିଜୁଦି ସତ୍‍ ମାଟା ତର୍‍ନାତ୍‍ । 14 ମାତର ଜାୟ୍‍ତି ୱିଜୁ ବିସୟ୍‍ତି ତର୍‍ନାନ୍‌ । ଆୟାଉଣ୍ତିଙ୍ଗ୍‌ ଇୟାୱାଜା ରାସାତାମାନାତ୍‌ :

"ଏ ସୁଜ୍‍ତି ଲୋକୁ ନିଙ୍ଗ୍‍ଦୁ

ମାରି ସାତି ଲୋକାମାଣାନ୍‌ ଜିବନ୍‌ଆଜି ନିଙ୍ଗ୍‍ଁଦୁ !

କ୍ରିସ୍ତଦି ଜାୟ୍‍ତୁ ଜାୟ୍‍ଆଦୁ ।"

15 ଆଦେଙ୍ଗ୍‌ ମିର୍‌ ଏଣ୍ତେସ୍‌ ସାଲାବୁଲା କିନିଦେର୍‍, ଆୟା ବିସୟତାନ୍ ଜାଗାର୍‌ତା ମାନ୍‍ଡ୍ରୁ । ବୁଦିସିଲିଲୋକା ୱାଜା ଆଏଣ୍ତା ବୁଦି ମାନି ଲୋକା ୱାଜା ସାଲାବୁଲା କିଦୁ । 16 ✝ୱିଜୁ ଦିନ୍‍ତିଙ୍ଗ୍‍ ନେଗେନ୍‍ତାନ୍‍ ବ୍ୟବ୍‌ହାର୍‌ କିଦୁ, ଇରିଙ୍ଗ୍‌ ତାଗ୍‍ଇ ଦିନ୍‍ ଇଗା ୱାଜିନାତ୍ । 17 ବୁଦିସିଲି ୱାଜା ଆମାଟ୍‌, ମାତର୍‌ ପ୍ରବୁଦି ବଦାଦିଙ୍ଗ୍‍ ବୁଜାଦେଙ୍ଗ୍‍ ସେସ୍ଟା କିଦୁ ।

18 କାଡ଼ୁ ଉଣିମାନୁ ସସ୍‍ମାଟ୍‍, ଇରିଙ୍ଗ୍‌ ଆକା କେବଲ ମିଙ୍ଗିଁ ସାପିସ୍‍ କିନାତ୍‍, ମାତର୍‌ ପବିତ୍ର ଆତ୍ମାଦୁ ପୁରାଆଦୁ । 19 ✝ୱେଡ଼ିକାଦି ପାଟା, ଦନ୍ୟବାଦ ପାଟା ମାରି ପ୍ରସଂସା ପାଟା ଦାନ୍‍ ନିଜେ ନିଜେଦିଙ୍ଗ୍‍ ୱେଡ଼ିକା କିଦୁ । ଜିବନ୍‍ତି ଦନ୍ୟବାଦ ତାନ୍‍ ପ୍ରବୁଦି ଉଦେସ୍‍ତାନ୍‍ ପାଟା ମାରି ୱେଡ଼ିକାଦି ପାଟା ପାର୍‍ଦୁ । 20 ୱିଜୁଦିନ୍‍ ୱିଜୁ ବିସୟ୍‍ ଉଣ୍ତିଙ୍ଗ୍‌ ପ୍ରବୁ ଜିସୁ କ୍ରିସ୍ତଦି ଦର୍‍ତାନ୍‍ ବୁବା ମାପୁରୁଙ୍ଗୁଁ ଦନ୍ୟବାଦ୍‍ ସିଦୁ ।

21 କ୍ରିସ୍ତଦି ଉଣ୍ତିଙ୍ଗ୍‌ ମି ମାନାନିକା ମାନିଙ୍ଗ୍‍ ମିର୍‌ ନିଜେ ନିଜେଦିଙ୍ଗ୍‍ ମାନାଜି ସାଦୁ ।

22 ✝ଆଇମେକ୍‍ ! ମିର୍‌ ଏଣ୍ତେସ୍‌ ପ୍ରବୁଙ୍ଗ୍‍ଁ ମାନାନିଦେର୍‍, ଆୟାୱାଜା ନିଜେ ନିଜେଦି କନ୍‌ଲିରିଙ୍ଗ୍‌ ମାନାଦୁ । 23 ମଣ୍ତଲି ମୁସ୍‌କୁ କ୍ରିସ୍ତଦି ଅଦିକାର୍‍ ୱାଜା ଆଡ଼୍‍ସିକା ମୁସ୍‌କୁ କନ୍‍ଲିସିରି ଅଦିକାର୍‌ ମାନାତ୍‌; ମାରି କ୍ରିସ୍ତନେ ୱାନି ମେନ୍ଧଲ୍‍ ୱାଜା ମଣ୍ତଲିଦି ରକିୟାକିନିକାନ୍‍ । 24 ମଣ୍ତଲି ଏଣ୍ତେସ୍‌ କ୍ରିସ୍ତମାନୁ ମାନାନାତ୍‍, ଆଡ଼୍‍ସିକ୍‍ ଟିକ୍‍ ଆୟାୱାଜା ନିଜେ ନିଜେଦି କନ୍‍ଲିସିରି ଲାକ୍‍ତୁ ପୁରାଦାନ୍‌ ମାନାପିଉ ।

25 କନ୍‌ଲିର୍‌, କ୍ରିସ୍ତଦିଙ୍ଗ୍ ଏଣ୍ତେସ୍‌ ମଣ୍ତଲିଦିଙ୍ଗ୍‍ ଜିବନ୍‍ନୋଜି, ତାନି ଉଣ୍ତିଙ୍ଗ୍‌ ନିଜେଦି ଜିବନ୍‌ ସିତାନ୍‌, ମିର୍‌ ଟିକ୍‍ ଆୟାୱାଜା ନିଜେ ନିଜେଦି ଆଡ଼ିକାଙ୍ଗ୍‍ଁ ଜିବନ୍‍ନୋଦୁ । 26 କ୍ରିସ୍ତ ମଣ୍ତଲିଦିଙ୍ଗ୍‍ ଏରୁଦୁ ନୋର୍‍ଜି ମାପୁରୁଦି ଉଦେସ୍‍ତାନ୍‍ ପବିତ୍ର କିନାନ୍‌, 27 ମାରି ମଣ୍ତଲିଦିଙ୍ଗ୍‍ ପବିତ୍ର, ଦସ୍‍ସିଲିକା, ପାପ୍‌ସିଲିକା ମାରି ୱିଜୁ ସୁନ୍ଦର୍‌ କିଜି ନିଜେ ଆସ୍‌ତାନ୍‌ । 28 କନ୍‍ଲିସିର୍‍ ନିଜେଦି ମେନ୍ଧଲ୍‍ ୱାଜା ଅଡ଼୍‍ବିଜି ନିଜେଦି ଆଡ଼ିଦିଙ୍ଗ୍‍ ଜିବନ୍‌ନୋନିକା ମାନାତ୍‌ । ଏନ୍‌ ନିଜେ ଆଡିଦିଙ୍ଗ୍ ଜିବନ୍‌ନୋନାନ୍‌, ୱାନ୍‌ ନିଜେଦିଙ୍ଗ୍ ଜିବନ୍‌ନୋନାନ୍‌ । 29 ଏନ୍‌ ଏସାଙ୍ଗ୍‍ ନିଜେଦି ମେନ୍ଦଲ୍‌ତିଙ୍ଗ୍‌ କାଡ଼୍‍ଏନ୍‍ । ମାତର୍‌ ମେନ୍ଦଲ୍‍ତି ଉଣିକାତିନିକା କିନାନ୍‍ ମାରି ତାନି ଜାତୁନ୍‍ ଅନାନ୍‍ କ୍ରିସ୍ତ ଏଣ୍ତେସ୍‌ ମଣ୍ତଲିଦି ଜାତୁନ୍‍ କିନାନ୍‍ । 30 ଇରିଙ୍ଗ୍‌ ମାଡ୍‌ ୱାନି ମେନ୍ଦଲ୍‌ତି ମେନ୍ଦଲକାନ୍ଦଲ୍‍ । 31 ଦାର୍ମୁସାସ୍ତ୍ରଦୁ ରାସାତାମାନାତ୍‌, "ଇୟାଉଣ୍ତିଙ୍ଗ୍‌ ଅରେନ୍‌ ମେମାର୍‌ଏନ୍‌ ନିଜେଦି ବୁବାୟାୟେଙ୍ଗ୍‌ ଡ଼ିସ୍‌ସି ନିଜେଦି ଆଡ଼୍‌ସି ୱାଲେ ତେବାନାନ୍‌ ମାରି ଆୟା ରିଏର୍‌ ଅରେନ୍‌ଆନାର୍‍ ।" 32 ସାସ୍ତ୍ରଦି ଇୟା ବାଗ୍‍ତୁ ଉନ୍‌ଡ୍ରି ମାର୍‍ଗିତି ସତ୍‍ ୱେଙ୍ଗିଁତା ମାନାତ୍‌ : ଇକା କ୍ରିସ୍ତ ନି ମଣ୍ତଲି ଉଣ୍ତିଙ୍ଗ୍‌ ବ୍ୟବହାର୍‌ କିଜିନା ଇଜି ନାନୁ ବୁଜାତାମାନା । 33 ୱିଜୁ କନ୍‌ଲିର୍‌ ଆଡ଼ିଦିଙ୍ଗ୍‍ ନିଜେଦି ଜିବନ୍‌ନୋନି ୱାଜା ଜିବନ୍‌ନୋପିନ୍‍ ମାରି ୱିଜୁ ଆଡ଼ି ନିଜେଦି କନ୍‍ଲିଙ୍ଗ୍‍ ମାନାପିଉ ।