1 କ୍ରିସ୍ତଦି ୱାଲେ ମିସାନି ଉଣ୍ତିଙ୍ଗ୍‌ ମିର୍‌ ଜିବନ୍‌ତୁ ବପୁ ଆତିମାନିଦେର୍‌ । ମାରି ୱାନି ଜିବନ୍‌ନୋନିକା ମିଙ୍ଗିଁ ୱେଡ଼ିକା ସିଜିନାତ୍‌ । ମିର୍‌ ପବିତ୍ରଆତ୍ମାଦି ସାକାଦାନ୍‌ ୱେଡ଼ିକା କିଜିନିଦେର୍‌ ମାରି ନିଜେନିଜେଦି ଉଣ୍ତିଙ୍ଗ୍‌ ମିଙ୍ଗିଁ ଜିବନ୍‍ନୋନିକା ମାରି ଦୟା ମାନାତ୍‌ । 2 ଆଦେଙ୍ଗ୍‌ ନାନ୍‌ ମିଙ୍ଗିଁ ଅନୁରଦ୍‌ କିଜିନା, ଉନ୍‌ଡ୍ରେ ମନ୍‌ତାନ୍‌, ଉନ୍‌ଡ୍ରେ ଜିବନ୍‌ନୋନିମାନୁ ମିସାନିକା ମାରି ଉନ୍‌ଡ୍ରେମୋନ୍‌ ମାରି ଆତ୍ମାଦୁ ଅର୍‌ସେ ଆଜି ମିର୍‌ ନାଙ୍ଗିଁ ପୁରା ୱେଡ଼ିକା କିଦୁ । 3 ଆକାର୍‍ ମାରି ନାଣ୍ତ ଗର୍ବ ତରାନି ଉଣ୍ତିଙ୍ଗ୍‌ ଇନି ପାଣି କିମାଟ୍‌, ମାତର୍‌ ନମ୍ର ଆଜି ୱିଜେରେ ଆଇୱାରିଙ୍ଗ୍‌ ନିଜେଦିମାଣ୍‌କୁ ପେରିକାନ୍‌ ଅଡ଼୍‌ବିଦୁ । 4 କେବଲ ନିଜେଦି ବିସୟ୍‌ତୁ ମୋନ୍‌ ସିଏଣ୍‌ଗା ଆଇୱାରି ବିସୟ୍‌ତୁ ବା ମୋନ୍‌ସିଦୁ । 5 କ୍ରିସ୍ତ ଜିସୁଦି ଏଣ୍ତେସ୍‌ ନାନି ମନ୍‌ ମାରାତ୍‌, ମିଦି ଆୟାୱାଜା ମୋନ୍‌ ଆପିତ୍‌ :

6 ୱାନ୍‌ ମାପୁରୁୱାଜା ଆତିଙ୍ଗ୍‌ବା

ମାପୁରୁଦି ୱାଲେ ସାମାନ୍‌ ଆଜି ତେବାଦେଙ୍ଗ୍‌ ନିଜେଦି ଉଣ୍ତିଙ୍ଗ୍‌ ଆସ୍‌ସୋ ଇଡ୍‌ନି ବିସୟ୍‌ ଏତ୍‌ କିଏତାନ୍‌ ।

7 ବରଂ ନିଜେଦି ଇଚ୍ଛାଦାନ୍‌ ୱାନି ୱିଜୁ ଡ଼ିସ୍‌ତାନ୍‌ନୋ ସାକର୍‌ ମୁର୍ତି ଆସ୍‌ତା ୱାତାନ୍‌ ।

ଲୋକା ୱାଜା ଆଜି ଲୋକା ୱାଜାତର୍‌ଜି ୱାତାନ୍‌ ।

8 ମାରି, ୱାନ୍‌ ସାନ୍ତି ମାରି ସାନ୍ତିଦିକାନ୍‌ ଆଜି ସାନି ସାନ୍ଦି,

କ୍ରୁସଦୁ ସାନି ସାନ୍ଦି ମାନାତାନ୍‌ ।

9 ଇୟାଉଣ୍ତିଙ୍ଗ୍‌ ମାପୁରୁ ୱାନିଙ୍ଗ୍‌ ପୁରାନାଣ୍ତ ମୁସ୍‌କୁ ପେର୍‌ତା ମାନାନ୍‌,

ମାରି ୱିଜେରି ଦର୍‌କା ବାଦ୍‌ଲୁ ପେରି ଦରୁ ୱାନିଙ୍ଗ୍‌ ସିତାମାନାନ୍‌ ।

10 ଏଣ୍ତେସ୍‌ ମୁସ୍‌କୁପୁର୍‌, ଦୁନିଆ ମାରି ପାତାଲ୍‍ତୁ ମାନି

ୱିଜୁ ଲୋକୁ ଜିସୁଦି ଦର୍‌ତିଙ୍ଗ୍‌ ମେଣ୍ତେଙ୍ଗ୍‌ ଗଟ୍‌କିଜି ମାଡ଼ିସ୍‌ କିନାର୍‌ ।

11 ମାରି, ବୁବା ମାପୁରୁଦି ଗୌରବ୍‍ତି ଉଣ୍ତିଙ୍ଗ୍‌

ୱିଜେରି ୱେତଲ୍‌ ଜିସୁ କ୍ରିସ୍ତ ପ୍ରବୁ ଇଜି ମାନାନାର୍‌ ।

12 ମାରି, ଏ ନା ଲାଡ୍‍ତି ତଡ଼୍‍କୁ, ଏଣ୍ତେସ୍‌ ନାନ୍‌ ମି ୱାଲେ ମାର୍‌ଇ ବେଡ଼ାଦୁ ମିର୍‌ ଏଣ୍ତେସ୍‌ ୱିଜୁୱାଲେ ନା ମାଟାଦାନ୍‌ ମାର୍‌ଇଦେର୍‌, ମାତର୍‌ ଇଲେଇ ନାନ୍‌ ସିଲିୱାଲେ ମାରି ନାଣ୍ତଦାନ୍‌ ତିଲାଜି ମାରି ତିର୍‌ଜି ନିଜେ ନିଜେଦି ପରିତ୍ରାଣ୍‌ ପାଣି ଏଣ୍ତେସ୍‌ ପୁରା ଆନାତ୍‌ । 13 ଇରିଙ୍ଗ୍‌ ଇଚ୍ଛା କିଦେଙ୍ଗ୍‌ ମାରି ପାଣି କିଦେଙ୍ଗ୍‌ ମାପୁରୁ ନିଜେଦି ନେଗି ଉଦେସ୍‌ଦିଙ୍ଗ୍‌ ପୁରା କିନି ଉଣ୍ତିଙ୍ଗ୍‌ ମି ଜିବନ୍‌ତୁ ପାଣି କିନାନ୍‌ । 14 ଆସ୍‌କିଏଣ୍‌ଗା ମାରି ୱାର୍‌ଗିଜିସାଏଣ୍‌ଗା ୱିଜୁ ପାଣି କିଦୁ । 15 ଆର୍‌ତିଙ୍ଗ୍‌, ଇୟା କାକୁର୍ତି ମାରି ପାପ୍‌ମାନି ଦୁନିଆଦୁ ମିର୍‌ ମାପୁରୁଦି ଦାର୍ମୁ କଡ଼କକ୍‌ରା ୱାଜା ଦସ୍‍ସିଲିକା ମାରି ଦାର୍ମୁଦାନ୍‌ ଜିଜି ମାଡ଼ିଦେଙ୍ଗ୍‌ ଆଟ୍‌ନିଦେର୍‌ । 16 ଆଇୱାରି ଲାକ୍‌ତୁ ଜିବନ୍‌ମାନି କାବୁର୍‌ ପ୍ରଚାର୍‌ କିନିୱାଲେ ମିର୍‌ ବାଦଡ଼୍‌ତିଙ୍ଗ୍‌ ଜାୟ୍‌ କିଜିମାନି ସୁକେଙ୍ଗ୍‌ ୱାଜା ଜାୟ୍‌ ଆନିକା ମାନାତ୍‌ । ମିର୍‌ ଜଦି ଇୟାୱାଜା ଆନିଦେର୍‌, "କ୍ରିସ୍ତଦି ଦିନ୍‌ତୁ" ମି ବିସୟ୍‌ତୁ ନାନ୍‌ ଗର୍ବ କିଦେଙ୍ଗ୍‌ ଆଟ୍‍ନା, ଇରିଙ୍ଗ୍‌ ଇବେଣ୍‌କୁ ପାର୍‌ମାଣ୍‌ ଆନାତ୍‌ ଜେ, ନା ୱିଜୁ ଜୋଜନା ମାରି ପାଣି ଆରେଏ ଆଏତ୍‍ । 17 ମାପୁରୁଦି ଉଦେସ୍‌ତାନ୍‌ ମି ବିସ୍‌ବାସ୍‌ୱାଜା ବଲିଦାନ୍‌ତୁ ଆନାତ୍‌ସୁଗି ନା ଜିବନ୍‌ତି ନେତେର୍‌ ୱାକ୍‌ସୋ ସିଦେଙ୍ଗ୍‌ ପଡ଼ାନାତ୍‌, ଆର୍‌ତିଙ୍ଗ୍‌ ନାନ୍‌ ୱେଡ଼ିକା କିଜିନା ମାରି ନା ଇୟା ୱେଡ଼ିକାଦୁ ମିଙ୍ଗିଁ ମିସା କିଦେଙ୍ଗ୍‌ ଅଡ଼୍‌ବିଜିନା । 18 ମାରି, ଆୟାୱାଜା ମିର୍‌ ବା ୱେଡ଼ିକା କିଦୁ ମାରି ଆୟା ୱେଡ଼ିକାଦୁ ନାଙ୍ଗିଁ ବା ମିସାକିଦୁ ।

19 ମାତର୍‌ ନାନ୍‌ ମି ଲାକ୍‌ତୁ ତିମତିଦିଙ୍ଗ୍‌ ବେଗି ପୋକ୍‌ନା ଇଜି ପ୍ରବୁ ଜିସୁଦିମାନୁ ଆସା କିଜିନା, ଏଣ୍ତେସ୍‌ ମି କାବୁର୍‌ ନେସ୍‌ସି ନାନ୍‌ ବା ୱେଡ଼ିକା ଆନା । 20 ଇରିଙ୍ଗ୍‌ ୱାନ୍‌ ମି ବିସୟ୍‌ତୁ ସତ୍‌ତାନ୍‌ ମୋନ୍‌ଦିୟାନ୍‌ କିନାନ୍‌, ଇୟାୱାଜା ଅଡ଼୍‌ବିନି ଲୋକ୍‌ ୱାନିଙ୍ଗ୍‌ ଡ଼ିସ୍‌ତିଙ୍ଗ୍‌ ନା ଲାକ୍‌ତୁ ଏନ୍‌ ସିଲେନ୍‌ । 21 ଆଇକାର୍‌ ୱିଜେରେ ଜିସୁ କ୍ରିସ୍ତଦି ଉଣ୍ତିଙ୍ଗ୍‌ ମୋନ୍‌ଦିୟାନ୍‌ କିଏଣ୍‌ଗା କେବଲ ନିଜେଦି ପାଣିଦି ଉଣ୍ତିଙ୍ଗ୍‌ ଦାନ୍ଧା ଆନାର୍‌ । 22 ତିମତି ଜେ ପରିକାଦୁ ଜିଣାତି ଲୋକ୍‌, ଇକା ମିର୍‌ ନେସ୍‌ତିମାନିଦେର୍‌; ମାରିନ୍‌ ବୁବାଦି ସେବା କିତି ୱାଜା ୱାନ୍‌ ତୋ ସୁସମାଚାର୍‌ ପ୍ରଚାର୍‌ ପାଣିଦୁ ନା ୱାଲେ ସେବା କିତାମାର୍ହାନ୍‌ । 23 ମାରି, ନା ଉଣ୍ତିଙ୍ଗ୍‌ ଇନିକା ଗଟାନାତ୍‌, ଆକା ନେସ୍‌ନି ଉଣ୍ତିଙ୍ଗ୍‌ ନାନ୍‌ ୱାନିଙ୍ଗ୍‌ ମି ଲାକ୍‌ତୁ ପୋକ୍‌ତାନା ଇଜି ଆସା କିଜିନା । 24 ମାତର୍‌ ନାନ୍‌ ପ୍ରବୁଦିମାନୁ ବିସ୍‌ବାସ୍‌ କିଜିନା ଜେ, ନାନ୍‌ ନିଜେ ବା ଦାପ୍ରେ ମି ଲାକ୍‌ତୁ ୱାଦେଙ୍ଗ୍ ଆଟ୍‍ନା ।

25 ମାତର୍‌ ନାନ୍‌ ନା ତଡ଼ାନ୍‌, ଅର୍‍ସେପାଣିକିନାପ୍‌, ଜୁଦ୍‌ ମାରି ନା ଅବାବ୍‌ ପୁରା କିନି ଉଣ୍ତିଙ୍ଗ୍‌ ମି କାବୁର୍‌ ଅନିକାନ୍‍ ମାରି ସେବାକିନି ଏପାଫ୍ରଦିତ୍‌ତିଙ୍ଗ୍‌ ମି ଲାକ୍‌ତୁ ପୋକ୍‌ନି ଉଣ୍ତିଙ୍ଗ୍‌ ଦର୍‌କାର୍‌ ଇଜି ଏତ୍‌ କିତା । 26 ଇରିଙ୍ଗ୍‌ ୱାନ୍‌ ମିଙ୍ଗିଁ ସୁଡ଼ୁନି ଉଣ୍ତିଙ୍ଗ୍‌ ଇଚ୍ଛା କିଜିନାନ୍‌, ମାରି ୱାନ୍‌ ନବ୍‌ଆତାମାନାନ୍‌ ଇଜି ମିର୍‌ ୱେର୍‌ଇମାନିଙ୍ଗ୍‌ ୱାନ୍‌ ଦୁଃକ୍‌କିଜିନାନ୍‌ । 27 ସତ୍‌ତାନ୍‌ ୱାନ୍‌ ନବ୍‌ଆଜି ସାତିୱାଜା ଆତାମାର୍‌ର୍ହାନ୍‌, ମାତର୍‌ ମାପୁରୁ ୱାନିଙ୍ଗ୍‌ ଦୟା କିତାନ୍‌, ମାରି କେବଲ ୱାନିଙ୍ଗ୍‌ ସିଲେ, ମାତର୍‌ ଏଣ୍ତେସ୍‌ ନା ଉଣ୍ତିଙ୍ଗ୍‌ ଦୁଃକ୍‌ ମୁସ୍‌କୁ ଦୁଃକ୍‌ ଗଟାଏତ୍‌, ଇୟାଉଣ୍ତିଙ୍ଗ୍‌ ନା ମୁସ୍‌କୁ ବା ଦୟା କିତାନ୍‌ । 28 ଇୟାଉଣ୍ତିଙ୍ଗ୍‌ ନାନ୍‌ ୱାନିଙ୍ଗ୍‌ ମି ଲାକ୍‌ତୁ ପୋକ୍‌ତାନି ଉଣ୍ତିଙ୍ଗ୍‌ ଇଚ୍ଛା, ଇରିଙ୍ଗ୍‌ ମିର୍‌ ଏଣ୍ତେସ୍‌ ୱାନିଙ୍ଗ୍‌ ମାରିଡ଼େସି ସୁଡ଼ୁଜି ୱେଡ଼ିକା ଆନିଦେର୍‌ ମାରି ନା ଦୁଃକ୍‌ ବା ଉଣା ଆନାତ୍‌ । 29 ଆଦେଙ୍ଗ୍‌ ଅରେନ୍‌ କ୍ରିସ୍ତବିସ୍‌ବାସ୍‌ସି ତଡ଼ାନ୍‌ ୱାଜା ମିର୍‌ ୱାନିଙ୍ଗ୍‌ ମାନାଦୁ ମାରି ୱାନି ୱାଜା ୱିଜୁ ଗୁଣୁମାନି ଲୋକ୍‌ତିଙ୍ଗ୍‌ ସନ୍‌ମାନ୍‌ କିଦୁ । 30 ଇରିଙ୍ଗ୍‌ ମିର୍‌ ନାଙ୍ଗିଁ ଆମା ସେବା ସିଦେଙ୍ଗ୍‌ ଆଟ୍‌ଇତିଦେର୍‌, କ୍ରିସ୍ତଦି ପାଣି ପୁରା କିନି ଉଣ୍ତିଙ୍ଗ୍‌ ୱାନ୍‌ ଆକା ନା ଉଣ୍ତିଙ୍ଗ୍‌ କିଦେଙ୍ଗ୍‌ ସର୍‌ର୍ହାନ୍‌ନୋ ନିଜେଦି ଜିବନ୍‌ତିଙ୍ଗ୍‌ ନାସ୍ଟୁକିଜି ସାନି ଆଗ୍‌ଡ଼ିସାମାନା କିତାମାର୍ହାନ୍‌ ।