1 ଲାଡ୍‍ତି ତଡ଼ାନ୍‌କୁ ନି ତାଙ୍ଗିଁକ୍‍, ମିଙ୍ଗିଁ ସୁଡ଼ୁନି ଉଣ୍ତିଙ୍ଗ୍‌ ନା ଏସ ବଦା, ମିଙ୍ଗିଁ ଅସିନା ଏସା ୱେଡ଼ିକା, ମି ଉଣ୍ତିଙ୍ଗ୍‌ ନା ଏସା ଗର୍ବ । ତଡ଼ାନ୍‌କୁ ନି ତାଙ୍ଗିଁକି, ନା ସିକିୟା ଇସାବ୍‌ତାନ୍‌ ପ୍ରବୁଦିମାନୁ ତିର୍‌ ତେବାଜି ଜିଜିମାଡ଼ିଦୁ ।

2 ଇୟଦିଆ ମାରି ସୁନ୍ତୁଖୀ ରୁଣ୍ତିୱାନିକାଙ୍ଗ୍‌ ନା ଅନୁରୋଦ୍‌ ୱାକ୍‌ ପ୍ରବୁଦିମାନୁ ତାଙ୍ଗିଁ ୱାଜା ମିସାବିଡ଼ାଜି ମାନିୱି । 3 ମାରି, ଏ ନା ବିସ୍‌ବାସ୍‌ତି ଅର୍‌ସେପାଣିକିନିକାନ୍‌, ଇୟା ତାଙ୍ଗିଁକାଙ୍ଗ୍‍ଁ ସାହାଜ୍ୟ କିନି ଉଣ୍ତିଙ୍ଗ୍‌ ନିଙ୍ଗିଁ ବା ନା ବାତିଙ୍ଗ୍‌ମାଲ୍‌ଜିନା, ଇରିଙ୍ଗ୍‌ ଇୟାକେଙ୍ଗ୍‌ କ୍ଲେମେନ୍‌ସ୍‌ ମାରି ନା ଆଇ ପାଣିକିନିୱାନିକା ୱାଲେ ସୁସମାଚାର୍‌ ପାଣିଦୁ ନା ୱାଲେ ପାଣି କିତେମାନେ; ଆୟା ପାଣିକିନିୱାନିକା ଦରୁ ମାପୁରୁଦି "ଜିବନ୍‌ ପୁସ୍ତକଦୁ" ରାସ୍‌ତାମାନାତ୍‌ । 4 ପ୍ରବୁଦି ୱାଲେ ମିସାତି ମାନିଙ୍ଗ୍‌ ୱିଜୁୱାଲେ ୱେଡ଼ିକା କିଦୁ, ମାରିଡ଼େସି ୱେର୍‌ସିନା, "ୱେଡ଼ିକା କିଦୁ ।"

5 ମି ନେଗି ବ୍ୟବ୍‌ହାର୍‌ ୱିଜୁ ଲୋକା ଲାକ୍‌ତୁ ତରାପିତ୍‌ । ପ୍ରବୁଦି ୱାନିଦିନ୍‌ ଲାକ୍‌ତୁ ଆତାତ୍‌ନି । 6 ଇନି ବିସୟ୍‌ତାନ୍‌ ସିନ୍ତା କିମାଟ୍‌, ମାତର୍‌ ମିଙ୍ଗିଁ ଆମାକା ଦର୍‌କାର୍‌, ଆକା ପାର୍‌ତନାଦୁ ମାପୁରୁଙ୍ଗୁଁ ଲସ୍‌ତୁ । ମାରି ପାର୍‌ତନା କିନିୱାଲେ ୱିଜୁୱାଲେ ଜିବନ୍‌ତି ଦନ୍ୟବାଦ୍‌ତି ୱାଲେ ମି ପାର୍‌ତନା ୱିଜୁ ମାପୁରୁଦିମାନୁ ୱେର୍‌ତୁ; 7 ଆର୍‌ତିଙ୍ଗ୍‌ ଲୋକ୍‌ତି ବୁଜାଦେଙ୍ଗ୍‌ ଆଟ୍‌ଇକା ମାପୁରୁଦି ସାନ୍ତି କ୍ରିସ୍ତ ଜିସୁଦି ସାକାଦାନ୍‌ ମି ଜିବନ୍‌ ମାରି ମୋନ୍‌ତିଙ୍ଗ୍‌ ନେଗେନ୍‌କିଜି ଇଡିନାତ୍‌ ।

8 ସାରାସାରିୱେନ୍‌କା, ଏ ତଡ଼ାନ୍‌କୁ ନି ତାଙ୍ଗିଁକି, ଆମା ୱିଜୁ ନେଗିକା ମାରି ୱେଡ଼ିକାଦି ବିସୟ୍‌ ମାନାତ୍‌, ଆମା ଆମାକା ସତ୍‌, ଆମା ଆମାକା ପେରିକା, ଆମା ଆମାକା ଟିକ୍‌, ଆମା ଆମାକା ପୁରାନେଗିକା, ଆମା ଆମାକା ଲୋକ୍‌ତିଙ୍ଗ୍‌ ନେଗିକା, ଆମା ଆମାକା ମାନାନିକା, ଆୟାୱିଜୁ ବିସୟ୍‌ ସିନ୍ତା କିଦୁ । 9 ମିର୍‌ ଆମାୱିଜୁ ବିସୟ୍‌ ନା ମାଣ୍‌କୁ ଅଜାତିମାନିଦେର୍‌, ପୟ୍‌ତିମାନିଦେର୍‌, ୱେର୍‌ଇମାନିଦେର୍‌ ମାରି ନା ମାନୁ ସୁଡ଼ୁତିମାନିଦେର୍‌, ଆୟାୱିଜୁ କିଦୁ; ଆବେନ୍‌ ସାନ୍ତିଦାତା ମାପୁରୁ ମି ସାକା ଆନାନ୍‌ ।

10 ପ୍ରବୁଦି ୱାଲେ ମିସାଜି ଜିଜି ମାଡ଼ିନି ୱାଲେ ନା ୱେଡ଼ିକା ଜେ, ମିର୍‌ ନା ଉଣ୍ତିଙ୍ଗ୍‌ ମନ୍‍ ସିଦୁ । ନାଣ୍ତ୍‌ ଦିନ୍‌ ୱେନ୍‌କା ମାରିଡ଼େସି ବାଦେଲ୍‌ଆନିକା ତର୍‌ତିମାନି । ନାନ୍‌ ଇନ୍‌ଏ ଜେ, ମିର୍‌ ଇୟାଦାପ୍ରେ ନା ଉଣ୍ତିଙ୍ଗ୍‌ ମାରି ମୋନସିଇ ମାର୍‌ଇଦେର୍‌, କେବଲ୍‌ ଆକା ୱେର୍‌ତେଙ୍ଗ୍‌ ସୁଜୋଗ୍‌ ପୋଇତିମାର୍‌ଇ । 11 ନାନ୍‌ ନିଜେଦିଙ୍ଗ୍‌ ୱେଡ଼ାଆଜିନାତ୍‌ ଏତ୍‌କିଜି ଇୟା ମାଟା ଇନ୍‌ଏ, ଇରିଙ୍ଗ୍‌ ନାନ୍‌ ଏଣ୍ତେସ୍‌ ନାନି ଅବସ୍ଥାଦାନ୍‌ ମାନା, ନାନ୍‌ ନାସଦାନ୍‌ନେ ତିର୍‌ ତେବାଦେଙ୍ଗ୍‌ ସିକିୟା କିତାମାନା । 12 ଉଣା ଆପିତ୍‌ ମାରି ନାଣ୍ତ ଆପିତ୍‌, ଏଣ୍ତେସ୍‌ ତାନି ସାମାନା କିଦେଙ୍ଗ୍‌ ଆନାତ୍‌, ଆକା ନାନ୍‌ ନେସ୍‌ତାମାନା । ଆଦେଙ୍ଗ୍‌ ଆମା ଇନି ବେଡ଼ାଦୁ, ଆମା ଇନି ଅବସ୍ଥାଦାନ୍‌ ମାରି ବାଙ୍ଗାଁଦୁ ତେବାତି ୱାଲେ ଏଣ୍ତେସ୍‌, ପଟାପାଜିତି ୱେନ୍‌କା ବା ଆୟାୱାଜା, କାକୁର୍ତି ଆନି ବେଡ଼ାଦୁ ମାରି ନାଣ୍ତ ମାଜନ୍‌ ନାନ୍‌ ୱିଜୁଦିନ୍‌ ସାମାନ୍‌ । 13 ନା ସକ୍ତିଦାତା କ୍ରିସ୍ତଦି ସାହାଜ୍ୟଦାନ୍‌ ନାନ୍‌ ୱିଜୁ କିଦେଙ୍ଗ୍‌ ଆଟ୍‌ସିନା ।

14 ମାରିବା ମିର୍‌ ନା ଦୁଃକ୍‌ବୋଗ୍‌ତି ବେଡ଼ାଦୁ ମିସାଜି ପେରି ପାଣି କିତିମାନିଦେର୍‌ । 15 ଏ ପିଲିପ୍‌ପିୟଦି, ତଡ଼ାନ୍ ନି ତାଙ୍ଗିଁକ୍‌ ମିର୍‌ ବା ନିଜେ ନେସ୍‌ନିଦେର୍‌ ଜେ, ସୁସମାଚାର୍‌ ପ୍ରଚାର୍‌ କିନି ଆରାମ୍‌ ବେଡ଼ାଦୁ, ଏସ୍ତିୱାଲେ ନାନ୍‌ ମାସିଦୋନିଆଦାନ୍‌ ଡ଼ିସ୍‌ତା ସର୍‌ଆ, ନାସ୍ତିୱାଲେ ମିଙ୍ଗିଁ ଡ଼ିସ୍‌ତିଙ୍ଗ୍‌ ମାରି ଆମା ମଣ୍ତଲି ନା ୱାଲେଅର୍‌ସେ ଆଜି ନା ୱାଲେ ସିନିକା ଅନିକା ଇସାବ୍‌ ଇଡ୍‌ଏର୍‌ ମାର୍ହାର୍‌ । 16 ✝✝ଇରିଙ୍ଗ୍‌ ତେସଲନିକିୟାଦୁ ନାନ୍‌ ମାନି ବେଡ଼ାଦୁ ମିର୍‌ ଅର୍‍ସୁ ନି ନାଣ୍ତ୍‌ ଦେବେଙ୍ଗ୍‌ ନା ଲାକ୍‌ତୁ ଦରକାର୍‌ତି ସାହାଜ୍ୟ ପୋକ୍‌ତାତି ମାର୍‌ଇଦେର୍‌ । 17 ମିମାଣ୍‌କୁ କେବଲ ଦାନ୍‌ ଅତେଙ୍ଗ୍‌ ନାନ୍‌ ଅଡ଼୍‌ବିଏ; ଇୟାତାନି ବାଦ୍‌ଲୁ ମିର୍‌ ଏଣ୍ତେସ୍‌ ନାଣ୍ତଦାନ୍‌ ନାଣ୍ତ ପୟ୍‌ଦୁ, ଇକା ନା ବଦା । 18 ମିମାଣ୍‌କୁ ନାନ୍‌ ପୟ୍‌ତିମାନି ୱିଜୁ ଦାନ୍‌ ଉଣ୍ତିଙ୍ଗ୍‌ ପୋୟ୍‌ତିକା ମାନାଜି ଜାଣେକିଜିନା । ଆକା ନା ଉଣ୍ତିଙ୍ଗ୍‌ ନାଣ୍ତଦାନ୍‌ ନାଣ୍ତ ଆତାମାନାତ୍‌, ଏପାଫ୍ରଦିତ୍‌ଦି କିୟୁଦୁ ମିର୍‌ ପୋକ୍‌ତାତିମାନି ଦାନ୍‌ ନା ୱିଜୁ ସିଲିମାନୁ ପୁରା କିତାମାନାତ୍‌ । ଆକା ମାପୁରୁଦି ଉଦେସ୍‌ତାନ୍‌ ସିତିମାନି ବାସ୍‌ନାଆନି ଦୁପୁଣି ମାରି ୱାନି ମାନାନିନାନିକା ମାରି ୱେଡ଼ିକାଦି ବଲିପୁଜାସିନି ୱାଜା । 19 ମାରି, ନା ମାପୁରୁ କ୍ରିସ୍ତ ଜିସୁଦିମାନୁ ୱାନି ଗୌରବ୍‌ମୟ୍‌ ପାଣିଦି ଇସାବ୍‌ତାନ୍‌ ମି ୱିଜୁ ଅଭାବ୍‌ ପୁରା କିନାତ୍‌ । 20 ମା ମାପୁରୁ ମାରି ବୁବାଦି ଉଣ୍ତିଙ୍ଗ୍‌ ଜୁଗ୍‌ ଜୁଗ୍‌ ଗୌରବ୍‍ ଆପିତ୍‌ । ଆମେନ୍‍ ।

21 କ୍ରିସ୍ତ ଜିସୁଦି ଦର୍‌ତାନ୍‌ ୱିଜୁ ସାଦୁରିଙ୍ଗ୍‌ ନମସ୍କାର୍‌ ଜାଣେକିଦୁ । ନା ୱାଲେ ମାନି ତଡ଼ାନ୍‌କୁ ନି ତାଙ୍ଗିଁକି ମିଙ୍ଗିଁ ନମସ୍କାର୍‌ ଜାଣେକିଜିନାର୍‌ । 22 ଇବେନୁ ମାନି ମାପୁରୁଦି ଲୋକୁ, ବିସେସ୍‌ତାନ୍‌ ଆମାକାର୍‌ କାଇସର୍‍ତି ମେଡ଼୍‌ଇଲୁଦୁ ମାନାର୍‌, ୱାର୍‌ ମିଙ୍ଗିଁ ନମସ୍କାର୍‌ ଜାଣେକିଜିନାର୍‌ । 23 ପ୍ରବୁ ଜିସୁ କ୍ରିସ୍ତଦି ଦୟା ମି ଆତ୍ମାଦି ୱାଲେରାନ୍‌ ତେବାପିତ୍‌ ।