1 ✝ ୨:୧ ପ୍ରେରିତ ୧୧:୩୦; ୧୫:୨. ସଉଦ ବାର୍ସେକ୍‍ ୱେନ୍‍କା ବର୍ଣ୍ଣବାଦି ୱାଲେ ନାନୁ ଜିରୁସାଲାମ୍‍ତୁ ଡ଼େସିସର୍ହାପ୍‌; ନା ୱାଲେ ତିତସ୍‍ତିଙ୍ଗ୍‍ଁ ବା ଅତା ମାର୍ହାପ୍‌ । 2 ଆବେ ସନ୍‍ଡ୍ରେଙ୍ଗ୍‍ଁ ଆନାତ୍‍ ଇଜି ମାପୁରୁମାଣାନ୍‍ ଦର୍ସନ୍‍ ପୟ୍‍ଜି ନାନୁ ସର୍ହାମାର୍ହା । ଅଣଜିହୁଦି ଲୋକା ଲାକ୍‍ତୁ ନାନୁ ଏମେ ସୁସମାଚାର୍‌ ପ୍ରଚାର୍‌ କିତାମାନା, ଜିରୁସାଲାମ୍‍ତି ନେତାରିଙ୍ଗ୍‍ଁ ଉନ୍‍ଣ୍ତ୍ରି ଇଲୁ ମିଟିଙ୍ଗ୍‍ଁତୁ ଆକା ବୁଜାକିତା ସିତାମାର୍ହା । ନା ଆଗ୍‍ଡ଼ିରି ମାରି ଇଲେଇତି ୱେଡ଼ାଦି ପାଣି ଏଣ୍ତେସ୍‍ ଆରେଏ ଆଏତ୍‍, ଆୟାଉଣ୍ତିଙ୍ଗ୍‌ ନାନୁ ସୁଡ଼ୁଜି ମାର୍‌ର୍ହା । 3 ନା ତଡ଼୍‍ ତିତସ୍‍ ଅରେନ୍‍ ଗ୍ରିକ୍‌ ଲୋକ୍‍ ଆତିମାରିଙ୍ଗ୍‌ବା, ୱାନିଙ୍ଗ୍‍ଁ ସୁନ୍ନତ ଆନି ଉଣ୍ତିଙ୍ଗ୍‍ଁ ଜବର୍‍ଦସ୍ତ କିଆୟ୍‍ ଆଏତ୍‍ମାର୍ହାତ୍‍ । 4 ମାତର୍‍ ଏସ ଲୋକୁ ୱାନିଙ୍ଗ୍‍ଁ ସୁନ୍ନତ କିବିସ୍‍କିଦେଙ୍ଗ୍‍ଁ ଇଜି ବଦାକିଜିମାର୍ହାର୍‍ । ୱାର୍‍ ବିସ୍‍ବାସିରି ତଡ଼ାନ୍‍କୁ ଇଜି ସାଲାକି କିଜି ନେସ୍‌ଇ ୱାଜା ଦଲ୍‍ତୁ ମିସାତାମାର୍ହାର୍‍ । କ୍ରିସ୍ତ ଜିସୁଦି ୱାଲେ ମିସାନି ମାଣାନ୍‍କୁ ମାପ୍‍ ଏମେ ଜିଣାନିକା ଲାବ୍‍ କିତାମାନାପ୍‍, ତାନିଙ୍ଗ୍‍ଁ ପୟ୍‍ଜ ଅତେଙ୍ଗ୍‍ ଇଜି ୱାରି ଉଦେସ୍‍ ମାର୍ହାତ୍‍ । ମାଙ୍ଗିଁ ମାରିଡ଼େସି ନିୟମ୍‍ତି ଦାସ କିଦେଙ୍ଗ୍‍ଁ ୱାର୍‍ ବଦା କିଜିମାର୍ହାର୍‍ । 5 ମାତର୍‍ ମି ଉଣ୍ତିଙ୍ଗ୍‍ ସୁସମାଚାର୍‍ତି ସତ୍‍ତିଙ୍ଗ୍‍ ଜିପିସ୍‍କିଜି ଇଡ୍‍ଦେଙ୍ଗ୍‍ ମାପ୍‍ ଆୟା ଟକେକିନିୱାରିଙ୍ଗ୍‍ ସାଣେକ୍‍ ବା ମାଟା ଇନ୍‌ଡ୍ରେଙ୍ଗ୍‌ ସାରି ସିଏପ୍‍ ମାର୍ହାପ୍‍ । 6 ମାତର୍‍ ଏମେକାର୍‍ ନେତା ଇଜି ୱେଙ୍ଗିଁଜି ମାର୍ହାର୍‍, ୱାର୍‍ ଜେ ଏର୍‍ ଆପିର୍‍, ଆବେ ଇନିକା ନା ସଲ୍‍ଏତ୍‍ ରେଏତ୍‍; ଇରିଙ୍ଗ୍‌ ଆତ୍‍ରେରି ବୁଲାସାଲା ସୁଡ଼୍‍ଜି ମାପୁରୁ ଏମେୱାନି ବିଚାର୍‍ କିଏନ୍‍, ଆୟା ନେତାର୍‍ ନାଙ୍ଗିଁ ଇନି ପୁନି ମାଟା ସିଏର୍‍ ମାର୍ହାର୍‍ । 7 ମାରି ଉନ୍‍ଣ୍ତ୍ରି ତରିନ୍‍, ୱାର୍‍ ସୁଡ଼ୁତାମାର୍ହାର୍‍ ଜେ, ମାପୁରୁ ଏଣ୍ତେସ୍‍ ଜିହୁଦିଲୋକା ଲାକ୍‍ତୁ ସୁସମାଚାର୍‍ ପ୍ରଚାର୍‍ କିନି ଦାୟିତ ପିତର୍‍ତିଙ୍ଗ୍‍ଁ ସିତାମାର୍ହାନ୍‍, ଆୟାୱାଜା ଅଣଜିହୁଦି ଲୋକା ଲାକ୍‍ତୁ ସୁସମାଚାର୍‍ ପ୍ରଚାର୍‍ କିନି ଦାୟିତ ନାଙ୍ଗିଁ ସିତାମାନାନ୍‌, 8 ଇରିଙ୍ଗ୍‌ ପିତର ଏଣ୍ତେସ୍‍ ମାପୁରୁଦି ସାକ୍ତିଦାନ୍‌ ଜିହୁଦିଲୋକା ଉଣ୍ତିଙ୍ଗ୍‍ ପେରିତ ସିସୁ ୱାଜା ବାସେ କିଆୟ୍‍ଆତାମାର୍ହାନ୍‍, ନାନୁ ବା ଟିକ୍‍ ଆୟାୱାଜା ମାପୁରୁଦି ସାକ୍ତିଦାନ୍‍ ଅଣଜିହୁଦି ଲୋକା ଉଣ୍ତିଙ୍ଗ୍‍ ପେରିତ ସିସୁ ୱାଜା ବାସେ କିଆୟ୍‍ଆତାମାନା । 9 ନାସ୍ତିୱାଲେ ମୁଣ୍ତା ୱାଜା ୱେଙ୍ଗିଁଜିମାନି ଜାକୁବ, ପିତର୍‍ ନି ଜୋହନ ମାନାତା ମାର୍ହାର୍‍ ଜେ, ମାପୁରୁ ନାଙ୍ଗିଁ ଇୟା ଦୟା ପାଣିଦି ଦାୟିତ୍ ସିତାମାନାନ୍‌ । ଆଦେଙ୍ଗ୍‌ ୱାର୍‍ ନାଙ୍ଗିଁ ନି ବର୍ଣ୍ଣବାଦିଙ୍ଗ୍‍ ଅର୍‌ସେମାନିକା ୱାଜା ୱେଡ଼ିକାଦାନ୍‍ ମାନାତାମାନାର୍‍ । ବର୍ଣ୍ଣବା ନି ନାନୁ ଅଣଜିହୁଦି ଲୋକା ଲାକ୍‍ତୁ ମାରି ୱାର୍‍ ଜିହୁଦିଲୋକା ଲାକ୍‍ତୁ ପାଣି କିନାପ୍‌ ଇଜି ମାପ୍‍ ଉନ୍‍ଣ୍ତ୍ରେମନ୍‍ ଆତାମାର୍ହାପ୍‍ । 10 ୱାର୍‍ କେବଲ ନିସନେ ଅନୁରୋଦ କିତାମାର୍ହାର୍‍ ଜେ, ମାପ୍‍ ୱାରି ଦଲ୍‍ତୁ ମାନି କାକୁର୍ତି ଲୋକାଙ୍ଗ୍‍ଁ ଏତ୍‌ ଇଡ୍‍ନାପ୍‍ । ଆୟା ବିସୟ୍‍ ଉଣ୍ତିଙ୍ଗ୍‍ ନେ ନା ଆସା ମାର୍‌ର୍ହାତ୍‍ ।

11 ପିତର୍‍ ଆଣ୍ଟିୟକଦୁ ୱାତିମାର୍‌ଇୱାଲେ ନାନୁ ୱିଜେରି ଆଗ୍‍ଡ଼ି ୱାନିଙ୍ଗ୍‌ ଜାଟି କିତାମାର୍‌ଆ, ଇରିଙ୍ଗ୍‌ ୱାନ୍‍ ସତେନେ ବୁଲ୍‍ ପାଣି କିଜିମାର୍ହାନ୍‍ । 12 ଜାକୁବଦି ମାଣାନ୍‍ ପେରିତ ଏସଲୋକ୍‍ ଆବେନୁ ୱାନି ଆଗ୍‍ଡ଼ି, ପିତର ଅଣଜିହୁଦି ତଡ଼ାନ୍‍କୁ ନି ତାଙ୍ଗିଁକା ୱାଲେ ଉଣୁଜି ମାର୍ହାନ୍‌ । ମାତର୍‍ ଆୟା ଲୋକୁ ୱାତି ୱେନ୍‍କା, ୱାନ୍‍ ଇବେଟ୍‌ତାନ୍‌ ନିଙ୍ଗିଁତା ସର୍ହାନ୍‍ ମାରି ୱାରି ୱାଲେ ୱାନ୍‍ ମାରି ଉଣୁଏତାନ୍‍, ଇରିଙ୍ଗ୍‌ ଅଣଜିହୁଦି ଲୋକୁ ସୁନ୍ନତ ଆନିକା ଦରକାର୍‍ ଇଜି ଏମେକାର୍‍ ଇଜିମାର୍ହାର୍‍, ୱାନ୍‍ ୱାରିଙ୍ଗ୍‍ ତିଲାଜି ମାର୍ହାନ୍‍ । 13 ଆଇ ଜିହୁଦି ତଡ଼ାନ୍‍କୁ ପିତରତି ୱାଲେ ମିସାଜି ଟକେକିନି ଲୋକା ୱାଜା ବ୍ୟବ୍‌ହାର୍‌ କିଜିମାର୍‌ର୍ହାର୍‍, ଇୟାୱାଜାକି ବର୍ଣ୍ଣବା ବା ୱାରି ସାଲାକିଦୁ ଆର୍‍ତାନ୍‍ । 14 ନାନୁ ଏସ୍ତିୱାଲେ ସୁଡ଼ୁତା ଜେ, ସୁସମାଚାର୍‍ତି ସତ୍‍ ଇସାବ୍‍ତାନ୍‍ ୱାର୍‍ ନେଗେନ୍‍ ବ୍ୟବ୍‌ହାର୍‌ କିଏଜିନାର୍‍, ନାନୁ ୱାରି ଆଗ୍‍ଡ଼ି ପିତର୍‍ତିଙ୍ଗ୍‍ ଇର୍‌ଆମାର୍ହା, "ଜଦି ନିନୁ ଜିହୁଦିଲୋକୁ ଆଜି ଅଣଜିହୁଦି ଲୋକା ୱାଜା ଜିଜି ମାଡ଼ିଜିନି, ଆର୍‍ତିଙ୍ଗ୍‍ଁ ଜିହୁଦିଲୋକା ୱାଜା ଜିଦେଙ୍ଗ୍‍ଁ ନିନୁ ଅଣଜିହୁଦି ଲୋକାଙ୍ଗ୍‌ ଏଣ୍ତେସ୍‍ ଜବର୍‍ଦସ୍ତ୍‍ କିଦେଙ୍ଗ୍‍ଆଟ୍‍ନି ।"

15 ସତ୍‍ତାନ୍‍ ମାପୁ ଜନମ୍‍ତାନ୍‍ ଜିହୁଦି ଲୋକୁ; ୱାର୍‌ଗିଜିସାନି ଇସାବ୍‌ତାନ୍‌ "ପାପି ଅଣଜିହୁଦି ଲୋକୁ" ସିଲେ । 16 ✝୨:୧୬ ରୋମିୟ ୩:୨୦ ରୋମିୟ ୩:୨୨.ମାପୁ ନେସ୍‍ନାପ୍‍, ନିୟମ୍‍ତି ଦାବିୱିଜୁ ପୁରା କିନି ମାଣାନ୍‍ ସିଲେ, ମାତର୍‍ କେବଲ ଜିସୁ କ୍ରିସ୍ତଦିମାନୁ ବିସ୍‍ବାସ୍‍ କିନି ମାଣାନ୍‍ ଅରେନ୍‍ ମାପୁରୁଦି ଆଗ୍‍ଡ଼ି ଦସ୍‍ସିଲେଣ୍‌ଗା ମିସାଦେଙ୍ଗ୍‌ ଆଟ୍‌ନାପ୍‌ । ମାପୁରୁଦି ଆଗ୍‍ଡ଼ି ଦାର୍ମୁ ଲୋକ୍‍ ଆଦେଙ୍ଗ୍‍ଁ ଇଜି ମାପ୍‍ ମାରି ନିୟମ୍‍ତି ମୁସ୍‍କୁ ଆସା ଇଡ୍‍ଏନ୍‍ଣ୍ତା ଜିସୁ କ୍ରିସ୍ତମାନୁ ବିସ୍‍ବାସ୍‍ କିଜିନାପ୍‍, ଇରିଙ୍ଗ୍‍ଁ କେବଲ ନିୟମ୍‍ ମାନାନି ମାଣାନ୍‍ ଏନ୍‍ ମାପୁରୁ ଆଗ୍‍ଡ଼ି ଦାର୍ମୁ ଲୋକ୍‍ ଆଦେଙ୍ଗ୍‍ଁ ଆଟ୍‍ଏନ୍‍ । 17 ମାତର୍‍ କ୍ରିସ୍ତଦି ୱାଲେ ମିସାଜି ମାପୁରୁଦି ଆଗ୍‍ଡ଼ି ସେବାକିନି ଦାର୍ମୁ ଲୋକ୍‍ ଆଦେଙ୍ଗ୍‍ଁ ଇଜି ସେସ୍ଟା କିତିୱାଲେ, ଜଦି ମାପ୍‍ ବା ଅଣଜିହୁଦି ଲୋକା ୱାଜା "ପାପି" ଆଜି ତେବାତିମାନିକା, ଇୟାଉଣ୍ତିଙ୍ଗ୍‌ ଇନିକା କ୍ରିସ୍ତ ଦାୟି ? ସିଲେ, ଇକା ଏସାଙ୍ଗ୍‍ ସିଲେ । 18 ମାତର୍‍ ଏମେ ନିୟମ୍‍ତି ଗାଟିଦିଙ୍ଗ୍‍ଁ ନାନୁ ସିନା କିତାମାନା, ତାନି ମାରିଡ଼େସି ତିଆର୍‌ କିଦେଙ୍ଗ୍‌ ସରିଙ୍ଗ୍‍ ନାନୁ ଦସି ଆନା । 19 "ନିୟମ୍‍ତି ଉଣ୍ତିଙ୍ଗ୍‍ ନାନୁ ପୁରା ସାତାମାନା ଆୟା ନିୟମ୍‍ତାନ୍‍ ନେ ନାନୁ ସାତାମାନା । ମାତର୍‌ ନାନୁ ଇଲେଇ ମାପୁରୁଦି ଉଣ୍ତିଙ୍ଗ୍‌ ଜିତାମାନା । କ୍ରିସ୍ତଦି ୱାଲେ ୱାନି କ୍ରୁସ୍‌କାଟ୍‌ ମୁସ୍‌କୁ ନାନ୍‌ ବା ସାତାମାନା । 20 ଆଦେଙ୍ଗ୍‌ ଇଲେଇ ସତ୍‌ତାନ୍‍ ନାନୁ ମାରି ଜିଏ, ନା ବାନୁ କ୍ରିସ୍ତ ଜିବନ୍‌ ମାନାନ୍‌ । ନାନୁ ଇଲେଇ ଆମା ଜିଜି ମାଡ଼ିଜିନା, ଆକା କେବଲ ମାପୁରୁଦି ମାରିନ୍‌ତି ମୁସ୍‍କୁ ନା ବିସ୍‍ବାସ୍‍ତାନ୍ ଆତାମାନାତ୍‍, ଏନ୍‍ ନାଙ୍ଗିଁ ଜିବନ୍‌ନୋଜି ନା ଉଣ୍ତିଙ୍ଗ୍‍ଁ ୱାନି ଜିବନ୍‌ ସିତାମାନାନ୍‌ । 21 ଇୟାଉଣ୍ତିଙ୍ଗ୍‌ ମାପୁରୁଦି ଦୟାଦିଙ୍ଗ୍‍ ନାନୁ ଏସାଙ୍ଗ୍‍ ଅମାନ୍ୟ କିଏ । ଇରିଙ୍ଗ୍‍ଁ କେବଲ ନିୟମ୍‍ ମାନାନି ମାଣାନ୍ ଜଦି ଅରେନ୍‍ ମାପୁରୁଦି ଆଗ୍‍ଡ଼ି ଦାର୍ମୁ ଆଦେଙ୍ଗ୍‌ ଆଟ୍‍ନାନ୍‍, ଆର୍‍ତିଙ୍ଗ୍‍ଁ କ୍ରିସ୍ତଦି ସାନିକା ଇନିକା ସିଲେ ଇଜି ଇନ୍‌ଡ୍ରେଙ୍ଗ୍‌ ଆନାତ୍‍ ।"