1 ମିର୍‌ ଏଣ୍ତେସ୍‌ ନିଜେଦି ବିସ୍‌ବାସ୍‌ ଆରାକିମାଟ୍‍, ଇୟାଉଣ୍ତିଙ୍ଗ୍‌ ନାନ୍ ମିଙ୍ଗିଁ ଇୟାୱିଜୁ ମାଟା ୱେର୍‌ସିନା । 2 ମିଙ୍ଗିଁ ଲୋକୁ ୱାରି କୁଟୁମ୍‌ତାନ୍‌ ସପ୍‍ନାର୍‍ ମାରି ଇୟାୱାଜା ଦିନ୍‌ ୱାଜିନାତ୍‍, ଏସ୍ତିୱାଲେ ଏନ୍‌ ମିଙ୍ଗିଁ ଡାକ୍‍ନାନ୍‍, ୱାନ୍‌ ମାପୁରୁଦି ଇସାବ୍‌ତାନ୍‌ ଇଜି ଏତ୍‌ କିନ୍‌ନାନ୍‌ । 3 ମାରି, ୱାର୍‌ ଇୟାୱିଜୁ କିନାର୍‌, ଇରିଙ୍ଗ୍‌ ୱାର୍‌ ବୁବେଙ୍ଗ୍‌ ମାରି ନାଙ୍ଗିଁ ନେସ୍‌ଏର୍‌ । 4 ମାତର୍‌ ଏସ୍ତିୱାଲେ ଇୟାୱିଜୁ ଗଟାନି ବେଡ଼ା ଇଗାୱାନାତ୍‌, ନାନ୍ ମିଙ୍ଗିଁ ୱେର୍‌ତାମାର୍‌ଆ, ଇକା ଏଣ୍ତେସ୍‌ ମିର୍‌ ଏତ୍‌କିଦୁ, ଇୟାଉଣ୍ତିଙ୍ଗ୍‌ ନାନ୍ ଇୟାୱିଜୁ ମାଟା ମିଙ୍ଗିଁ ୱେର୍‌ତାମାନା । ନାନ୍ ମି ୱାଲେ ମାନିଙ୍ଗ୍‌ ଆରାମ୍‌ତାନ୍‌ ଇୟାୱିଜୁ ମାଟା ମିଙ୍ଗିଁ ୱେର୍‌ଏତା ମାର୍‌ଆ ।

5 ମାତର୍‌ ଇଲେଇ ନାନ୍ ନା ପୋକ୍‌ତାତିମାନି ମାଲିକ୍‌ତି ଲାକ୍‌ତୁ ସୋଲ୍‌ସିନା, ମାତର୍‌ ମି ଲୋଇରାନ୍‌ ନାଙ୍ଗିଁ ଏନ୍‌ ୱେନ୍‍ବାଇଜିନିଦେର୍‌, ନିନ୍‌ ଏମେ ବାଡିଦୁ ସୋଲ୍‌ସିନି । 6 ମାରି ନାନ୍ ମିଙ୍ଗିଁ ଇୟାୱିଜୁ ମାଟା ୱେର୍‌ତିମାନିଙ୍ଗ୍‌ ମି ଜିବନ୍‌ ଦୁଃକ୍‌ତାନ୍‌ ପୁରା ଆତାମାନାତ୍‌ 7 ମାତର୍‌ ନାନ୍ ମିଙ୍ଗିଁ ସତ୍‌ ୱେର୍‌ସିନା, ନାନ୍ ସନିକା ମି ଉଣ୍ତିଙ୍ଗ୍‌ ନେଗେତ୍‌, ଇରିଙ୍ଗ୍‌ ନାନ୍ ସଲ୍‌ଏତିଙ୍ଗ୍‌ ଆୟା ସାହାଜ୍ୟକିନିକାନ୍‌ ମି ଲାକ୍‌ତୁ ରେଏନ୍‌, ମାତର୍‌ ନାନ୍ ସରିଇୱେନ୍‌କା ୱାନିଙ୍ଗ୍‌ ମି ଲାକ୍‌ତୁ ପୋକ୍‌ତାନା । 8 ୱାନ୍‌ ୱାଜି ପାପ୍‌, ଦାର୍ମୁ ମାରି ମାପୁରୁଦି ନ୍ୟାୟ୍‍ବିସାର୍‌କିନି ବିସୟ୍‌ତାନ୍‌ ଜଗତ୍‌ତିଙ୍ଗ୍‌ ପାରାମାଣ୍‌ ସିନାତ୍‌; 9 ପାପ୍‌ ବିସୟ୍‌ତାନ୍‌ ୱାର୍‌ ବୁଲ୍‌ ଇରିଙ୍ଗ୍‌ ୱାନ୍‌ ତର୍‌ନା ସିନାନ୍‌ ଜେ, ନା ମାନୁ ବିସ୍‌ବାସ୍‌ କିଏର୍‌ । 10 ଦାର୍ମୁଦି ବିସୟ୍‌ତାନ୍‌ ୱାର୍‌ ବୁଲ୍‌ ଇରିଙ୍ଗ୍‌ ନାନ୍ ବୁବାଦି ଲାକ୍‌ତୁ ସୋଲ୍‌ସିନା ମାରି ମିର୍‌ ନାଙ୍ଗିଁ ମାରି ସୁଡ଼ୁଇଦେର୍‌; 11 ବିସାର୍‌ ବିସୟ୍‌ତାନ୍‌ ୱାର୍‌ ବୁଲ୍‌ ଇରିଙ୍ଗ୍‌ ଇୟା ଜଗତ୍‌ତି ପେରିକାନ୍‌ ବିସାର୍‌ ଆତାମାନାତ୍‌ ।

12 ନାନ୍ ମିଙ୍ଗିଁ ମାରି ଗାଦି ମାଟେଙ୍ଗ୍‌ ଇନିକା ମାନାତ୍‌, ମାତର୍‌ ମିର୍‌ ଇଲେଇ ଆୟାୱିଜୁ ମାନାଦେଙ୍ଗ୍‌ ଆଟ୍‍ଇଦେର୍‍ । 13 ମାତର୍‌ ଏସ୍ତିୱାଲେ ସତ୍‌ତି ଆତ୍ମା ୱାତିଙ୍ଗ୍‍, ନାସ୍ତିୱାଲେ ୱାଦ୍‌ ୱିଜୁ ସତ୍‌ ବୁଜାଦେଙ୍ଗ୍‌ ସାକ୍ତି ସିନାତ୍‌ । ୱାଦ୍‌ ନିଜେଦି ଅଦିକାର୍‌ତାନ୍‌ ଇନିକା ଇନ୍‌ଏତ୍‌ । ମାପୁରୁଦି ମାଣାନ୍‌ ୱାଦ୍‌ ଆମାକା ୱେର୍‌ଆ ମାନାତ୍‌, କେବଲ୍ ନାସନେ ୱାଦ୍‌ ୱେର୍‌ନାତ୍‌ । ଆମା ୱିଜୁ ଗଟାଦେଙ୍ଗ୍‌ ସୋଲ୍‌ସିନାତ୍‌ ୱାଦ୍‌ ମିଙ୍ଗିଁ ୱେର୍‌ନାତ୍‌ । 14 ୱାନ୍‌ ନାଙ୍ଗିଁ ଦନ୍ୟବାଦ୍‌ କିନ୍‌ନାନ୍‌, ଇରିଙ୍ଗ୍‌ ନାନ୍ ଆମାକା ଇନା ୱାନ୍‌ ନାମାଣ୍‌କୁ ୱିଜୁ ସତ୍‌ତି ବିସୟ୍‌କୁ ଅସି ମିଙ୍ଗିଁ ୱେର୍‌ନାନ୍‌ । 15 ଆମା ଆମାକା ବୁବାଦି, ଆୟାୱିଜୁ ନାଦି; ଇୟାଉଣ୍ତିଙ୍ଗ୍‌ ନାନ୍ ଇର୍ହା, ପବିତ୍ର ଆତ୍ମା ନାମାଣ୍‌କୁ ୱିଜୁ ବିସୟ୍‌ ଅସି ମିଙ୍ଗିଁ ୱେର୍‌ନାନ୍‌ ।

16 "କାଣ୍ତେକ୍‍ ବେଡ଼ା ମାନାତ୍‌, ମିର୍‌ ନାଙ୍ଗିଁ ମାରି ସୁଡ଼ୁଦେଙ୍ଗ୍‌ ଆଟ୍‍ଇଦେର୍‍, ମାରିଡ଼େସି ସାଣେକ୍‌ ୱେନ୍‌କା ମିର୍‌ ନାଙ୍ଗିଁ ସୁଡ଼ୁନିଦେର୍‌ ।"

17 ଆବେଟ୍‌ ୱାନି ସିସୁରି ଲୋଇରାନ୍‌ ଏନ୍‌ ଏନ୍‌ ନିଜେନିଜେ ଇର୍ହାର୍‌, କାଣ୍ତେକ୍‌ ବେଡ଼ା ମାନାତ୍‌, ମିର୍‌ ନାଙ୍ଗିଁ ସୁଡ଼ୁଇଦେର୍‌, ମାରିଡ଼େସି ସାଣେକ୍‌ ୱେନ୍‌କା ମିର୍‌ ନାଙ୍ଗିଁ ସୁଡ଼ୁନିଦେର୍‌ ମାରି ନାନ୍ ବୁବାଦି ଲାକ୍‌ତୁ ସୋଲ୍‌ସିନା, ଇୟା ଏମେ ମାଟା ୱାନ୍‌ ମାଙ୍ଗିଁ ୱେର୍‌ସିନାନ୍‌, ଇକା ଇନିକା ? 18 ୱାର୍‌ ଇର୍ହାର୍‌, "କାଣ୍ତେକ୍‌ ବେଡ଼ା ଇଜି ଇକାନ୍‌ ଇନିକା ଇଜିନି ?" ୱାନ୍‌ ଇନିକା ୱେର୍‌ସିନାନ୍‌, ମାପ୍‌ ବୁଜାଦେଙ୍ଗ୍‌ ଆଟ୍‌ଏଜିନାପ୍‌ ।

19 ସିସୁର୍‍ ୱାନିଙ୍ଗ୍‌ ୱେନ୍‌ବାଦେଙ୍ଗ୍‌ ବଦା କିଜିନାର୍‌ ଇଜି ନେସ୍‌ତାନ୍‌ନୋ ଜିସୁ ୱାରିଙ୍ଗ୍‌ ଇର୍ହାନ୍‌, କାଣ୍ତେକ୍‌ନେ ବେଡ଼ା ମାନାତ୍‌, ମିର୍‌ ନାଙ୍ଗିଁ ସୁଡ଼ୁଇଦେର୍‌, ମାରିଡ଼େସି ସାଣେକ୍‌ ମାର୍‌ଇ ୱେନ୍‌କା ମିର୍‌ ନାଙ୍ଗିଁ ସୁଡ଼ୁନିଦେର୍‌, ନାନ୍ ଏମେ ଇୟା ମାଟା ୱେର୍‌ତା, ଆୟା ବିସୟ୍‌ତାନ୍‌ ଅସି ମିର୍‌ ଇନିକା ନିଜେନିଜେଦିମାନୁ ୱାର୍‌ଗିଜି ସାଜିନିଦେର୍‌ ? 20 ସତ୍‌ ସତ୍‍ନେ ନାନ୍ ମିଙ୍ଗିଁ ୱେର୍‌ସିନା, ମିର୍‌ ଆଡ଼ାବାନିଦେର୍‌ ମାରି ଏତ୍‌କିଜି କିଜି ଆଡ଼୍‌ବାନିଦେର୍‌, ମାତର୍‌ ଜଗତ୍‌ ୱେଡ଼ିକା ଆନାତ୍‌; ମିର୍‌ ଦୁଃକ୍‌ଆନିଦେର୍‌, ମାତର୍‌ ମି ଦୁଃକ୍‌ ୱେଡ଼ିକାଦୁ ମିସାନାତ୍‌ । 21 ଜନମ୍‌କିନି ବେଡ଼ା ଇଗା ୱାତିଙ୍ଗ୍‍ ଆଇମା ଦୁଃକ୍‌ ପୟ୍‌ନାତ୍‌, ମାତର୍‌ ୱାନି କଡ଼ ଜନମ୍‌ ଆତି ୱେନ୍‌କା ଦୁନିଆଦୁ ଅରେନ୍‍ ଲୋକୁ ଜନମ୍‌ ଆତାନ୍‌, ଇୟା ୱେଡ଼ିକା ଉଣ୍ତିଙ୍ଗ୍‌ ମାରି କାସ୍ଟୁ ଏତ୍‌ କିଏତ୍‍ । 22 ଆୟାୱାଜା ମିର୍‌ ଇଲେଇ ଦୁଃକ୍‌ ପୟ୍‌ଜିନିଦେର୍‌, ମାତର୍‌ ନାନ୍ ମାରିଡ଼େସି ମିଙ୍ଗିଁ ତରାୟାଆନା, ମାରି ମି ଜିବନ୍‌ ୱେଡ଼ିକା ଆନାତ୍‌ ମାରି ଏନ୍‌ ମିମାଣୁକୁ ମି ୱେଡ଼ିକା ଡଙ୍ଗାଁକିଜ ଅଏନ୍‌ ।

23 ଆୟାନାଣ୍ତିଙ୍ଗ୍‌ ୱାତିଙ୍ଗ୍‍, ନାମାଣାନ୍‌ ମିଙ୍ଗିଁ ମାରି ଇନିକା ଲସ୍‌ତେଙ୍ଗ୍‌ ପଡ଼ାଏତ୍‌ । ସତ୍‌ ଇଜିନା, ନା ଦର୍‌ତାନ୍‌ ବୁବା ମାପୁରୁଙ୍ଗୁଁ ଆମାକା ଲସ୍‌ନିଦେର୍‌, ୱାନ୍‌ ଆକା ସିନାନ୍‌ । 24 ଇୟାସାନ୍ଦି ମିର୍‌ ନା ଦର୍‌ତାନ୍‌ ଇନିକା ଲସ୍‌ଇଦେର୍‌; ଇଲେଇ ଲସ୍‌ତୁ, ମାରି ମି ୱେଡ଼ିକା ଏଣ୍ତେସ୍‌ ପୁରୁନ୍‌ ଆନାତ୍‌, ଆୟାଉଣ୍ତିଙ୍ଗ୍‌ ମିର୍‌ ଆକା ପୟ୍‌ନିଦେର୍‌ ।

25 ନାନ୍ ମିଙ୍ଗିଁ କାତାଦାନ୍‌ ଇୟାୱିଜୁ ମାଟା ୱେର୍‌ତାମାନା; ବେଡ଼ା ୱାଜିନାତ୍‍, ଏସ୍ତିୱାଲେ ନାନ୍ ମାରି କାତାଦାନ୍‌ ମିଙ୍ଗିଁ ୱେର୍‌ଏ, ମାତର୍‌ ବୁବାଦି ବିସୟ୍‌ ବୁଜାନିୱାଜା ମିଙ୍ଗିଁ ୱେର୍‌ନା । 26 ଆୟାନାଣ୍ତିଙ୍ଗ୍‌ ମିର୍‌ ନା ଦର୍‌ତାନ୍‌ ୱାନିଙ୍ଗ୍‌ ଲସ୍‌ନିଦେର୍‌; ମାରି, ନାନ୍ ଜେ ମି ତରିଟାନ୍‌ ବୁବେଙ୍ଗ୍‌ ୱେର୍‌ନା, ଇକା ନାନ୍ ମିଙ୍ଗିଁ ଇନ୍‌ଏ; 27 ଇରିଙ୍ଗ୍‌ ବୁବା ନିଜେ ମିଙ୍ଗିଁ ଜିବନ୍‌ନୋନାନ୍‌, ଆଦେଙ୍ଗ୍‌ ମିର୍‌ ନାଙ୍ଗିଁ ଜିବନ୍‌ନୋତିମାନିଦେର୍‌ ମାରି ନାନ୍ ଜେ ମାପୁରୁଦି ଲାକ୍‌ତୁରାନ୍‌ ୱାତାମାନା, ଆକା ମିର୍‌ ବିସ୍‌ବାସ୍‌ କିତିମାନିଦେର୍‌ । 28 ନାନ୍ ବୁବାଦି ଲାକ୍‌ତୁରାନ୍‌ ଦୁନିଆଦୁ ୱାତାମାନା; ମାରିଡ଼େସି ନାନ୍ ଦୁନିଆ ଡ଼ିସ୍‌ସି ବୁବାଦି ଲାକ୍‌ତୁ ସୋଲ୍‌ସିନା ।

29 ଇୟା ମାଟା ୱେନ୍‌ଞ୍ଜି ସିସୁର୍‍ ଇର୍ହାର୍‌, ସୁଡ଼ୁଦୁ, ଇଲେଇ ନିନ୍‌ ବୁଜାନିୱାଜା ୱେର୍‌ସିନି ମାରି କାତାଦାନ୍‍ ମାଟା ମାରି ୱେର୍‌ଇ । 30 ଇଲେଇ ମାପ୍‌ ନେସ୍‌ନାପ୍‌; ନିନ୍‌ ୱିଜୁ ବିସୟ୍‌ ନେସ୍‌ନି ମାରି ନିନ୍‌ ଏଙ୍ଗ୍‌ ଇନି ବିସୟ୍‌ ୱେନ୍‍ବାଦେଙ୍ଗ୍‌ ଦର୍‌କାର୍‌ ସିଲେତ୍‌ । ମାପୁରୁଦି ଲାକ୍‌ତୁରାନ୍‌ ନିନ୍‌ ୱାତିମାନି ଇଜି ମାପ୍‌ ଇୟାମାଣୁକୁ ବିସ୍‌ବାସ୍‌ କିଜିନାପ୍‌ ।

31 ଜିସୁ ୱାରିଙ୍ଗ୍‌ ୱେର୍‌ତାନ୍‌, ମିର୍‌ ଇନିକା ଇଲେଇ ବିସ୍‌ବାସ୍‌ କିଜିନିଦେର୍‌ ? 32 ସୁଡ଼ୁଦୁ, ବେଡ଼ା ୱାଜିନାତ୍‍, ହୁଁ, ୱାତାତ୍‌ନି, ଏସ୍ତିୱାଲେ ମିର୍‌ ଇନିଙ୍ଗାଁ ଆନିଙ୍ଗାଁ ଆଜି ୱିଜେରେ ନିଜେ ନିଜେଦି ଇଲ୍‌କାଙ୍ଗ୍‌ ସନିଦେର୍‌, ମାରି ନାଙ୍ଗିଁ ଅରେନ୍‍ୱାନିଙ୍ଗ୍‍ ଡ଼ିସ୍‌ନିସନିଦେର୍‌; ଆରିଙ୍ଗ୍‍ବା ନାନ୍ ଅରେନ୍‌ନେ ସିଲେ, ଇରିଙ୍ଗ୍‌ ବୁବା ନା ୱାଲେ ମାନ୍‌ନାନ୍‌ । 33 ମିର୍‌ ଏଣ୍ତେସ୍‌ ନା ୱାଲେ ମାନ୍‌ଞ୍ଜି ସାନ୍ତି ପୟ୍‌ନିଦେର୍‌, ଇୟାଉଣ୍ତିଙ୍ଗ୍‌ ନାନ୍ ମିଙ୍ଗିଁ ଇୟାୱିଜୁ ବିସୟ୍‌ ୱେର୍‌ତାମାନା । ଜଗତ୍‌ଦୁ ମି ଉଣ୍ତିଙ୍ଗ୍‌ କାସ୍ଟୁ ମାନାତ୍‌, ମାତର୍‌ ସାସ୍‌ ଆସ୍‌ତୁ, ନାନ୍ ଜଗତ୍‌ତିଙ୍ଗ୍‌ ଜିଣାକିତାମାନା ।