1 ଜିସୁ ଇୟାୱିଜୁ ମାଟା ଇନ୍‌ଜି ମୁସ୍‌କୁପୁର୍‌ତରିନ୍‌ ସୁଡ଼ୁଜି ଇର୍ହାନ୍‌, ବୁବା, ବେଡ଼ା ଇଗା ୱାତାତ୍‌ନି; ନି ମାରିନ୍‌ତିଙ୍ଗ୍‌ ଗୌରବ୍‍ କିଆ, ଏଣ୍ତେସ୍‌ ମାରିନ୍‌ ବା ନିଙ୍ଗିଁ ଦନ୍ୟବାଦ୍‌ କିନ୍‌ନାନ୍‌, 2 ଏଣ୍ତେସ୍‌ୱାଜା ନିନ୍‌ ୱାନିଙ୍ଗ୍‌ ଆମା ଲୋକାଙ୍ଗ୍‌ ୱାନି କିୟୁଦୁ ସିତିମାନି, ୱାରିଙ୍ଗ୍‌ ଏସ୍‌କାଙ୍ଗ୍‌ୱିଜ୍‌ଇ ଜିବନ୍‌ ସିନି ଉଣ୍ତିଙ୍ଗ୍‌ ୱାନିଙ୍ଗ୍‌ ୱିଜୁ ଦୁନିଆଦି ମୁସ୍‌କୁ ଅଦିକାର୍‌ ସିତି । 3 ମାରି, ନିନ୍‌ ଜେ ଅରେନ୍‌ମାତର୍‌ ସତ୍‌ତି ମାପୁରୁ, ନିଙ୍ଗିଁ ମାରି ଆମାୱାନିଙ୍ଗ୍‌ ନିନ୍‌ ପୋକ୍‌ତାତିମାନି, ଆୟା ଜିସୁ କ୍ରିସ୍ତଙ୍ଗ୍‌ ନେସ୍‌ନିକାନେ ଏସ୍‌କାଙ୍ଗ୍‌ୱିଜିଇ ଜିବନ୍‌ । 4 ନିନ୍‌ ନାଙ୍ଗିଁ ଏମେ ପାଣି କିଦେଙ୍ଗ୍‌ ସିତିମାନି, ଆକା ନାନ୍ ୱିସ୍‌ତାନୋ ଦୁନିଆଦୁ ମିଙ୍ଗିଁ ଦନ୍ୟବାଦ୍‌ କିତାମାନା । 5 ମାରି ଇଲେଇ, ଏ ବୁବା, ଦୁନିଆ ତିଆର୍‌ଆତି ପୁର୍ବେନେ ନି ୱାଲେ ନା ଏମେ ମହିମା ମାର୍ହାତ୍‌, ଇଲେଇ ନିନ୍‌ ମାନିମାନୁ ଆୟା ମହିମା ନାଙ୍ଗିଁ ସିଦା ।

6 ନିନ୍‌ ନାଙ୍ଗିଁ ଦୁନିଆଦି ମାଣ୍‌କୁ ଆମା ଲୋକାଙ୍ଗ୍‌ ଦାନ୍‌ କିତିମାନି, ନାନ୍ ୱାରି ଲାକ୍‌ତୁ ନି ଦର୍‌ ୱେର୍‌ତାମାନା; ୱାର୍‌ ନି ଲୋକ୍‌ ମାରି ନିନ୍‌ ୱାରିଙ୍ଗ୍‌ ନାଙ୍ଗିଁ ଦାନ୍‌ କିତିମାନି, ୱାର୍‌ ନି ବାକ୍ୟ ମାନାତାମାନାର୍‌ । 7 ନିନ୍‌ ନାଙ୍ଗିଁ ଆମା ଆମାକା ଦାନ୍‌ କିତିମାନି, ଆୟାୱିଜୁ ଜେ ନିମାଣୁକୁ ୱାତାମାନାତ୍‌, ଇକା ୱାର୍‌ ଇଲେଇ ବୁଜାତାମାନାର୍‌; 8 ଇରିଙ୍ଗ୍‌ ନିନ୍‌ ନାଙ୍ଗିଁ ଆମାୱିଜୁ ମାଟା ଦାନ୍‌ କିତିମାନି, ନାନ୍ ୱାରିଙ୍ଗ୍‌ ଆୟାୱିଜୁ ଦାନ୍‌ କିତାମାନା, ମାରି ୱାର୍‌ ମାନାତାମାନାର୍‌, ମାରି ନାନ୍ ଜେ ନି ଲାକ୍‌ତୁରାନ୍‌ ୱାତାମାନା, ଆକା ସତ୍‌ତାନ୍‌ ନେସ୍‌ତାମାନାର୍‌ ମାରି ନିନ୍‌ ନାଙ୍ଗିଁ ପୋକ୍‌ତାତିମାନି ଇଜି ବିସ୍‌ବାସ୍‌ କିତାମାନାର୍‌ ।

9 ନାନ୍ ୱାରି ଉଣ୍ତିଙ୍ଗ୍‌ ପାର୍‌ତନା କିଜିନା, ଜଗତ୍‌ଦି ଉଣ୍ତିଙ୍ଗ୍‌ ପାର୍‌ତନା କିଏ, ମାତର୍‌ ନିନ୍‌ ନାଙ୍ଗିଁ ଆମାୱାରିଙ୍ଗ୍‌ ସିତିମାନି, ୱାରି ଉଣ୍ତିଙ୍ଗ୍‌ ପାର୍‌ତନା କିଜିନା, ଇରିଙ୍ଗ୍‌ ୱାର୍‌ ନି ଲୋକ୍‌; 10 ଆମା ଆମାକା ନାଦି, ଆୟାୱିଜୁ ନିଦି, ମାରି ଆମା ଆମାକା ନିଦି, ଆୟାୱିଜୁ ନାଦି, ମାରି, ନାନ୍ ୱାରିମାଣାନ୍‌ ଦନ୍ୟବାଦ୍‌ ଆତାମାନା । 11 ନାନ୍ ମାରି ଇୟା ଜଗତ୍‌ଦୁ ମାନ୍‌ଏ, ମାତର୍‌ ଇୟାକାର୍‌ ଜଗତ୍‌ଦୁ ମାନ୍‌ଜିନାର୍‌; ମାରି, ନାନ୍ ନି ଲାକ୍‌ତୁ ସୋଲ୍‌ସିନା । ପବିତ୍ର ବୁବା, ନିନ୍‌ ସିତିମାନି ଦର୍‌ତି ସକ୍ତିଦାନ୍‌ ୱାରିଙ୍ଗ୍‌ ରକିୟା କିଆ, ଏଣ୍ତେସ୍‌ ନିନ୍‌ ମାରି ନାନ୍ ଅରେନ୍‌ନେ, ୱାର୍‌ ଆୟାୱାଜା ଉନ୍‌ଡ୍ରେମାନୁ ଆଦେଙ୍ଗ୍‌ ଆଟ୍‍ନାର୍‍ । 12 ✝ୱାରି ୱାଲେ ମାନ୍‌ଜିମାର୍‌ଇ ୱାଲେ ନାନ୍ ୱାରିଙ୍ଗ୍‌ ନି ଦର୍‌ତି ସାକ୍ତିଦାନ୍ ରକ୍‌ୟା କିଜି ୱାଜିନା, ମାରି ନାନ୍ ୱାରିଙ୍ଗ୍‌ ନେଗ୍‌ନେତାନ୍‌ ରକିୟା କିତାମାନା ମାରି ଦାର୍ମୁସାସ୍ତ୍ରଦି ବାକ୍ୟ ଏଣ୍ତେସ୍‌ ପୁରା ଆନାତ୍‌, ଇୟାଉଣ୍ତିଙ୍ଗ୍‌ ସାନି ମାରିନ୍‌ତିଙ୍ଗ୍‌ ଡ଼ିସ୍‌ସି ୱାରି ମାଣ୍‌କୁ ଅରେନ୍‍ ଏନ୍‌ବା ନାସ୍ଟୁ ଆଏର୍‌ । 13 ମାତର୍‌ ନାନ୍ ଇଲେଇ ନି ଲାକ୍‌ତୁ ୱାଜିନା, ମାରି ୱାରି ଜିବନ୍‌ତୁ ନା ୱେଡ଼ିକା ଏଣ୍ତେସ୍‌ ପୁରା ଆନାତ୍‌, ଆୟାଉଣ୍ତିଙ୍ଗ୍‌ ଦୁନିଆଦୁ ମାନ୍‌ଜି ନାନ୍ ଇୟାୱିଜୁ ୱେର୍‌ସିନା । 14 ନାନ୍ ୱାରିଙ୍ଗ୍‌ ନି ବାକ୍ୟ ସିତାମାନା, ମାରି ଇୟା ଦୁନିଆ ୱାରିଙ୍ଗ୍‌ କାଡ଼ିତା ମାନାତ୍‌, ଇରିଙ୍ଗ୍‌ ନାନ୍ ଏଣ୍ତେସ୍‌ ଇୟା ଦୁନିଆଦାନ୍‌ ସିଲେ, ଆୟାୱାଜା ୱାନ୍‌ ବା ଇୟା ଦୁନିଆଦାନ୍‌ ସିଲେର୍‌ । 15 ନିନ୍‌ ୱାରିଙ୍ଗ୍‌ ଦୁନିଆଦାନ୍‌ ଅନିଉଣ୍ତିଙ୍ଗ୍‌ ପାର୍‌ତନା କିଏ, ମାତର୍‌ ୱାରିଙ୍ଗ୍‌ ତାଗ୍‌ଇ ପାଣିଦାନ୍‌ ରକ୍‌ୟା କିଦୁ ଇଜି ପାର୍‌ତନା କିଜିନା । 16 ନାନ୍ ଏଣ୍ତେସ୍‌ ଦୁନିଆଦିକିନ୍ଦା ସିଲେ, ୱାର୍‌ ଆୟାୱାଜା ଇୟା ଦୁନିଆଦିକାର୍‌ ଆଏର୍‌ । 17 ସତ୍‌ତାନ୍‌ ୱାରିଙ୍ଗ୍‌ ପବିତ୍ର କିଦୁ; ନି ବାକ୍ୟନେ ତୋ ସତ୍‌ । 18 ନିନ୍‌ ନାଙ୍ଗିଁ ଏଣ୍ତେସ୍‌ ଦୁନିଆଦୁ ପୋକ୍‌ତାତିମାନି, ନାନ୍ ବା ୱାରିଙ୍ଗ୍‌ ଆୟାୱାଜା ଦୁନିଆଦୁ ପୋକ୍‌ତାତାମାନା । 19 ମାରି, ୱାନ୍‌ ବା ଏଣ୍ତେସ୍‌ ସତ୍‌ତାନ୍‌ ପବିତ୍ର ଆନାର୍‌, ଇୟାଉଣ୍ତିଙ୍ଗ୍‌ ନାନ୍ ୱାରି ଉଣ୍ତିଙ୍ଗ୍‌ ନିଜେଦିଙ୍ଗ୍‌ ପବିତ୍ର କିଜିନା ।

20 ନାନ୍ କେବଲ୍‌ ଇୟାୱାରି ଉଣ୍ତିଙ୍ଗ୍‌ ପାର୍‌ତନା କିଏଜିନା, ମାତର୍‌ ଇୟାୱାରି ବାକ୍ୟଦାନ୍‌ ଆମାକାର୍‌ ନା ମାନୁ ବିସ୍‌ବାସ୍‌ କିନାର୍‌, ୱାରି ଉଣ୍ତିଙ୍ଗ୍‌ ବା ପାର୍‌ତନା କିଜିନା, 21 ୱିଜେରି ଉଣ୍ତିଙ୍ଗ୍‌ ପାର୍‍ତନା କିଜିନା, ଏଣ୍ତେସ୍‌ ୱାର୍‌ ୱିଜେରେ ଉନ୍‌ଡ୍ରେମାନୁ ଆନାର୍‌; ଏ ବୁବା, ନିନ୍‌ ଏଣ୍ତେସ୍‌ ନା ମାନୁ ମାନି ମାରି ନାନ୍ ନି ମାନୁ ମାନା, ୱାନ୍‌ ବା ଆୟାୱାଜା ମାମାନୁ ମାନିର୍‌, ଏଣ୍ତେସ୍‌ ନିନ୍‌ ନାଙ୍ଗିଁ ପୋକ୍‌ତାତିମାନି ଇଜି ଦୁନିଆ ବିସ୍‌ବାସ୍‌ କିନାତ୍‌ । 22 ମାରି, ନିନ୍‌ ନାଙ୍ଗିଁ ଆମା ମହିମା ସିତିମାନି, ନାନ୍ ୱାରିଙ୍ଗ୍‌ ଆକା ସିତାମାନା, ଏଣ୍ତେସ୍‌ ନିନ୍‌ ମାରି ନାନ୍ ଅରେନ୍‌ନେ, ଆୟାୱାଜା ୱାନ୍‌ ବା ଉନ୍‌ଡ୍ରେମାନୁ ଆଦେଙ୍ଗ୍‌ ଆଟ୍‍ନାର୍‍ । 23 ନାନ୍ ୱାରିମାନୁ, ମାରି ନିନ୍‌ ନା ମାନୁ, ଏଣ୍ତେସ୍‌ ୱାର୍‌ ପୁରାଦାନ୍‌ ଉନ୍‌ଡ୍ରେମାନୁ ଆଦେଙ୍ଗ୍‌ ଆଟ୍‍ନାର୍‍, ଆରିଙ୍ଗ୍‌ ଇୟା ଜଗତ୍‌ ନେସ୍‌ନାତ୍‌ ଜେ, ନିନ୍‌ ନାଙ୍ଗିଁ ପୋକ୍‌ତାତିମାନି, ମାରି ନାଙ୍ଗିଁ ଏଣ୍ତେସ୍‌ୱାଜା ଜିବନ୍‌ନୋତିମାନି, ୱାରିଙ୍ଗ୍‌ ବା ଆୟାୱାଜା ଜିବନ୍‌ନୋତି ।

24 "ଏ ବୁବା, ନିନ୍‌ ନାଙ୍ଗିଁ ଏମେ ଲୋକାଙ୍ଗ୍‌ ସିତିମାନି, ନାନ୍ ଏମେମାନୁ ମାନା, ୱାନ୍‌ ବା ଏଣ୍ତେସ୍‌ ଆବେନ୍‌ ନା ୱାଲେ ମାନାର୍‌ ମାରି ଦୁନିଆ ତିଆର୍‌ଆତି ଆଗ୍‍ଡ଼ିରାନ୍‍ନେ ନିନ୍‌ ନାଙ୍ଗିଁ ଜିବନ୍‌ ନୋତିମାନିଙ୍ଗ୍‌ ନାଙ୍ଗିଁ ଆମା ଗୌରବ୍‌ ସିତିମାନି, ନା ଆୟା ଗୌରବ୍‌ ୱାର୍‌ ଏଣ୍ତେସ୍‌ ସୁଡ଼ୁନାଟ୍‌, ଇକା ନା ବଦା । 25 ଏ ଦାର୍ମୁଦି ବୁବା, ଜଗତ୍‌ ନିଙ୍ଗିଁ ନେସ୍‌ଏତ୍‌, ମାତର୍‌ ନାନ୍ ନିଙ୍ଗିଁ ନେସ୍‌ତାମାନା; ମାରି, ନିନ୍‌ ଜେ ନାଙ୍ଗିଁ ପୋକ୍‌ତାତିମାନି, ଇକା ଇୟାକାର୍‌ ନେସ୍‌ତାମାନାର୍‌; 26 ମାରି, ନିନ୍‌ ନାଙ୍ଗିଁ ଆମା ଜିବନ୍‌ନୋତିମାନୁ ଜିବନ୍‌ନୋତିମାନି, ଆକା ଏଣ୍ତେସ୍‌ ୱାରି ମାନୁ ତେବାନାତ୍‍ ମାରି ନାନ୍ ୱାରିମାନୁ ତେବାନା, ଇୟାଉଣ୍ତିଙ୍ଗ୍‌ ନାନ୍ ୱାରିଙ୍ଗ୍‌ ନି ଦର୍‌ ୱେର୍‌ତାମାନା ମାରି ୱେର୍‌ନା ।"