12 ଆବେଟ୍ ପିଲାତ୍ ୱାନିଙ୍ଗ୍ ଡ଼ିସ୍ତେଙ୍ଗ୍ ସେସ୍ଟା କିତାନ୍, ମାତର୍ ଜିହୁଦିଲୋକ୍ ଆଉଲି ଆଜି ଇର୍ହାର୍, "ଜଦି ନିନ୍ ଇୟା ଲୋକତିଙ୍ଗ୍ ଡ଼ିସ୍ନି, ଆର୍ତିଙ୍ଗ୍ ନିନ୍ ସମ୍ରାଟ୍ତି ସଙ୍ଗ୍ ଆଇ; ଏନ୍ ନିଜେଦିଙ୍ଗ୍ ରାଜା ଇଜି ଇନାନ୍, ୱାନ୍ ସମ୍ରାଟ୍ତି ତରିନ୍ ମାଟା ଇନାନ୍ ।"
13 ମାରି, ପିଲାତ୍ ଇୟାୱିଜୁ ମାଟା ୱେର୍ଆନ୍ନୋ ଜିସୁଙ୍ଗୁଁ ଆତେରେ ତାତ୍ତାନ୍ନୋ "ଗୁଡିକାଲୁ" ଦର୍ତି ବାଡିଦୁ ତାତାର୍, ଏବ୍ରି ବାସାଦାନ୍ ଇୟାତାନି ଦର୍ "ଗବ୍ବତା" ଇଜି ଇନାର୍, ଆୟା ବିଚାର୍କିନି ବାଡିଦୁ ବାସ୍ତାନ୍ । 14 ଆୟାନାଣ୍ତିଙ୍ଗ୍ ନିସ୍ତାର୍ ପଣ୍ତ୍ୟ ତିଆର୍ଆନି ଦିନ୍, ମାରି ନାସ୍ତିୱାଲେ ୱେଡ଼େ ଆତାମାର୍ହାତ୍ । ମାରି, ୱାନ୍ ଜିହୁଦିରିଙ୍ଗ୍ ଇର୍ହାନ୍, "ସୁଡ଼ୁଦୁ ମି ରାଜା ।"
15 ଆବେଟ୍ ୱାର୍ ଆଉଲି ଆତାର୍, "ୱାନିଙ୍ଗ୍ ଡାକ୍ତୁ, ଡାକ୍ତୁ, କ୍ରୁସକାଟ୍ତୁ ଏକିସ୍କିଦୁ ।"
ପିଲାତ୍ ୱାରିଙ୍ଗ୍ ଇର୍ହାନ୍, "ନାନ୍ ଇନିକା ମି ରାଜେଙ୍ଗ୍ କ୍ରୁସକାଟ୍ତୁ ଏକିସ୍କିନା ?"
ପେରି ଜାଜକର୍ ଇର୍ହାର୍, "କେବଲ୍ ସମ୍ରାଟ୍ତିଙ୍ଗ୍ ଡ଼ିସ୍ତିଙ୍ଗ୍ ମାଙ୍ଗିଁ ମାରି ରାଜା ସିଲେନ୍ ।"
16 ଆବେଟ୍ ଜିସୁ ଏଣ୍ତେସ୍ କ୍ରୁସ୍କାଟ୍ତୁ ଏକାନାନ୍, ଇୟାଉଣ୍ତିଙ୍ଗ୍, ପିଲାତ୍ ୱାନିଙ୍ଗ୍ ୱାରି ବଦାଦାନ୍ ସର୍ପେ କିତାନ୍, ତାନେୱେନ୍କା ୱାର୍ ଜିସୁଙ୍ଗୁଁ ଅତାର୍ ।
ଜିସୁଙ୍ଗୁଁ କ୍ରୁସ୍କାଟ୍ତୁ ଏକିସ୍ତାର୍
(ମାତିଉ ୨୭:୩୨-୪୪; ମାର୍କ ୧୫:୨୧-୩୨; ଲୁକ ୨୩:୨୬-୪୩)