1 ତାନେୱେନ୍‌କା ପିଲାତ୍‌ ଜିସୁଙ୍ଗୁଁ ଅସି କୋର୍‌ଡାଦାନ୍‌ ଡାକ୍‌ସି କିତାନ୍‌ । 2 ମାରି, ସନ୍ୟର୍‌ ସାମ୍‌କାଣି ଟପି ତିଆର୍‌ କିତାର୍‌ରୋ ଜିସୁଦି ତାଲାଦୁ ଆରିସ୍‌କିତାର୍‌ ମାରି ୱାନିଙ୍ଗ୍‌ ନିଡ଼ିଦି ଆଙ୍ଗିଁ ଆରିସ୍‌କିତାର୍‌; 3 ୱାର୍‌ ୱାନି ଲାକ୍‌ତୁ ୱାଜି ଇର୍ହାର୍‌, ଏ ଜିହୁଦିର୍‌ ରାଜା, ୱିଜୁଦିନ୍‌ତି ଉଣ୍ତିଙ୍ଗ୍‌ ରାଜା ଆଜି ମା ମୁସ୍‌କୁ ସାସନ୍‌ କିଆ; ମାରି ୱାର୍‌ ୱାନିଙ୍ଗ୍‌ ସାପ୍‌ଡ଼ା ଡାକ୍‌ତେଙ୍ଗ୍‍ଁ ଆସ୍‌ତାର୍‌ ।

4 ପିଲାତ୍‌ ମାରିଡ଼େସି ଆତେରେ ସର୍ହାନ୍‌ନୋ ୱାରିଙ୍ଗ୍‌ ଇର୍ହାନ୍‌, "ସୁଡ଼ୁଦୁ, ନାନ୍ ୱାନିମାନୁ ଇନି ଦସୋ ପୟ୍‌ଏଜିନା, ଇକା ଏଣ୍ତେସ୍‌ ମିର୍‌ ନେସ୍‌ନିଦେର୍‌, ଇୟାଉଣ୍ତିଙ୍ଗ୍‌ ନାନ୍ ୱାନିଙ୍ଗ୍‌ ମି ଲାକ୍‌ତୁ ସୋପ୍‌ତା ତାସିନା ।" 5 ଆବେଟ୍‌ ଜିସୁ ଆୟା ସାମ୍‍କାଣି ଟପି ମାରି ନିଡ଼ି କୋଲର୍‌ତି ଆଙ୍ଗିଁ ଆରାତାନ୍‌ନୋ ଆତେରେ ୱାତାନ୍‌ । ପିଲାତ୍‌ ୱାରିଙ୍ଗ୍‌ ଇର୍ହାନ୍‌, "ସୁଡ଼ୁଦୁ, ଆୟା ଲୋକୁ !"

6 ଆବେଟ୍‌ ପେରି ଜାଜକର୍‌ ମାରି ମନ୍ଦିର୍‌ କାପ୍‍କିନିକାର୍‌ ଜିସୁଙ୍ଗୁଁ ସୁଡ଼ୁଜି ଆଉଲି ଆଜି ଇର୍ହାର୍‌, କ୍ରୁସକାଟ୍‌ତୁ ଏକିସ୍‌କିଦୁ, କ୍ରୁସକାଟ୍‌ତୁ ଏକିସ୍‌କିଦୁ । ପିଲାତ୍‌ ୱାରିଙ୍ଗ୍‌ ଇର୍ହାନ୍‌, ମିର୍‌ ୱାନିଙ୍ଗ୍‌ ଅସି କ୍ରୁସକାଟ୍‌ତୁ ଏକିସ୍‌କିଦୁ, ଇରିଙ୍ଗ୍‌ ନାନ୍ ସାନିଦଣ୍ତ୍‌ ସିଦେଙ୍ଗ୍‍ ୱାନିମାନୁ ଇନି ଦସୋ ପୟ୍‌ଏଜିନା ।

7 ଜିହୁଦିଲୋକ୍‌ ୱାନିଙ୍ଗ୍‌ ଇର୍ହାର୍‌, "ମାଦି ଉନ୍‌ଡ୍ରି ନିୟମ୍‌ ମାନାତ୍‌ ମାରି ଆୟା ନିୟମ୍‌ତି ଇସାବ୍‌ତାନ୍‌ ୱାନ୍‌ ସାନିଦଣ୍ତତି ଜଗ୍‌, ଇରିଙ୍ଗ୍‌ ୱାନ୍‌ ନିଜେଦିଙ୍ଗ୍‌ ମାପୁରୁଦି ମାରିନ୍‌ ଇଜି ୱେର୍‌ସିନାନ୍‌ ।"

8 ଆବେଟ୍‌ ପିଲାତ୍‌ ଇୟା ମାଟା ୱେନ୍‌ଜି ନାଣ୍ତ ତିଲାତାନ୍‌; 9 ମାରି, ୱାନ୍‌ ମାରିଡ଼େସି ମେଡ଼୍‍ଇଲୁ ଲୋଇ ଡ଼ୁଗିତାନ୍‌ନୋ ଜିସୁଙ୍ଗୁଁ ୱେନ୍‌ବାତାନ୍‌, "ନିନ୍‌ ଏମେମାଣ୍‌କୁ ୱାତିମାନି ?"

ମାତର୍‌ ଜିସୁ ୱାନିଙ୍ଗ୍‌ ଇନିକା ଇନ୍‌ଏତାନ୍‌ । 10 ଆବେଟ୍‌ ପିଲାତ୍‌ ୱାନିଙ୍ଗ୍‌ ଇର୍ହାନ୍‌, "ନିନ୍‌ ଇନିକା ନା ୱାଲେ ୱାର୍‌ଗିଇ ? ନିଙ୍ଗିଁ ଡ଼ିସ୍‌ତେଙ୍ଗ୍‌ ନା ଅଦିକାର୍‌ ମାନାତ୍‌ ମାରି ନିଙ୍ଗିଁ କ୍ରୁସକାଟ୍‌ତୁ ଏକିସ୍‌ତେଙ୍ଗ୍‌ ନା ଅଦିକାର୍‌ ମାନାତ୍‌, ଇକା ଇନିକା ନିନ୍‌ ନେସ୍‌ଏଜିନି ?"

11 ଜିସୁ ଇର୍ହାନ୍‌, "ଜଦି ମାପୁରୁଦିମାଣାନ୍‌ ନିଙ୍ଗିଁ ଅଦିକାର୍‌ ରେଏତିଙ୍ଗ୍‌ ମାନ୍ଦି, ଆର୍‌ତିଙ୍ଗ୍‌ ନା ବିରଦ୍‌ତାନ୍‌ ନିଦି ଇନି ଅଦିକାର୍‌ ସିଲେତାତ୍‍ ମାନ୍ଦି; ଏନ୍‌ ନାଙ୍ଗିଁ ନି କିୟୁଦୁ ସର୍‌ପେ କିତାମାନାନ୍‌, ୱାନି ପାପ୍‌ ନାଣ୍ତୋସାନିୱାଜା ।"

12 ଆବେଟ୍‌ ପିଲାତ୍‌ ୱାନିଙ୍ଗ୍‌ ଡ଼ିସ୍‌ତେଙ୍ଗ୍‌ ସେସ୍ଟା କିତାନ୍‌, ମାତର୍‌ ଜିହୁଦିଲୋକ୍‌ ଆଉଲି ଆଜି ଇର୍ହାର୍‌, "ଜଦି ନିନ୍‌ ଇୟା ଲୋକତିଙ୍ଗ୍‌ ଡ଼ିସ୍‌ନି, ଆର୍‌ତିଙ୍ଗ୍‌ ନିନ୍‌ ସମ୍ରାଟ୍‌ତି ସଙ୍ଗ୍‍ ଆଇ; ଏନ୍‌ ନିଜେଦିଙ୍ଗ୍‌ ରାଜା ଇଜି ଇନାନ୍‌, ୱାନ୍‌ ସମ୍ରାଟ୍‌ତି ତରିନ୍‌ ମାଟା ଇନାନ୍‌ ।"

13 ମାରି, ପିଲାତ୍‌ ଇୟାୱିଜୁ ମାଟା ୱେର୍‌ଆନ୍‌ନୋ ଜିସୁଙ୍ଗୁଁ ଆତେରେ ତାତ୍‌ତାନ୍‌ନୋ "ଗୁଡିକାଲୁ" ଦର୍‌ତି ବାଡିଦୁ ତାତାର୍‌, ଏବ୍ରି ବାସାଦାନ୍‌ ଇୟାତାନି ଦର୍‌ "ଗବ୍‌ବତା" ଇଜି ଇନାର୍‌, ଆୟା ବିଚାର୍‍କିନି ବାଡିଦୁ ବାସ୍‌ତାନ୍‌ । 14 ଆୟାନାଣ୍ତିଙ୍ଗ୍‌ ନିସ୍ତାର୍‌ ପଣ୍ତ୍‌ୟ ତିଆର୍‌ଆନି ଦିନ୍‌, ମାରି ନାସ୍ତିୱାଲେ ୱେଡ଼େ ଆତାମାର୍ହାତ୍‌ । ମାରି, ୱାନ୍‌ ଜିହୁଦିରିଙ୍ଗ୍‌ ଇର୍ହାନ୍‌, "ସୁଡ଼ୁଦୁ ମି ରାଜା ।"

15 ଆବେଟ୍‌ ୱାର୍‌ ଆଉଲି ଆତାର୍‌, "ୱାନିଙ୍ଗ୍‌ ଡାକ୍‌ତୁ, ଡାକ୍‌ତୁ, କ୍ରୁସକାଟ୍‌ତୁ ଏକିସ୍‌କିଦୁ ।"

ପିଲାତ୍‌ ୱାରିଙ୍ଗ୍‌ ଇର୍ହାନ୍‌, "ନାନ୍ ଇନିକା ମି ରାଜେଙ୍ଗ୍‌ କ୍ରୁସକାଟ୍‌ତୁ ଏକିସ୍‌କିନା ?"

ପେରି ଜାଜକର୍‌ ଇର୍ହାର୍‌, "କେବଲ୍ ସମ୍ରାଟ୍‌ତିଙ୍ଗ୍‌ ଡ଼ିସ୍‌ତିଙ୍ଗ୍‌ ମାଙ୍ଗିଁ ମାରି ରାଜା ସିଲେନ୍‌ ।"

16 ଆବେଟ୍‌ ଜିସୁ ଏଣ୍ତେସ୍‌ କ୍ରୁସ୍‌କାଟ୍‌ତୁ ଏକାନାନ୍‌, ଇୟାଉଣ୍ତିଙ୍ଗ୍‌, ପିଲାତ୍‌ ୱାନିଙ୍ଗ୍‌ ୱାରି ବଦାଦାନ୍ ସର୍‌ପେ କିତାନ୍‌, ତାନେୱେନ୍‌କା ୱାର୍‌ ଜିସୁଙ୍ଗୁଁ ଅତାର୍‍ ।

17 ମାରି, ଜିସୁ ନିଜେ କ୍ରୁସ୍‌କାଟ୍‌ ପିଡିତାନ୍‌ନୋ "ତାଲାଦି କାପାଲ୍‌ ନାନି" ଦର୍‌ତି ବାଡିଦୁ ସୋର୍ହାନ୍‌, ଏବ୍ରି ବାସାଦାନ୍‌ ଆୟାବାଡିଦିଙ୍ଗ୍‌ "ଗଲ୍‌ଗଥା" ଇଜି ଇନାର୍‌ । 18 ଆବେନୁ ୱାର୍‌ ୱାନିଙ୍ଗ୍‌ କ୍ରୁସ୍‌କାଟ୍‌ତୁ ଏକିସ୍‌କିତାର୍‌ ମାରି ୱାନି ୱାଲେ ମାରି ରିଏରିଙ୍ଗ୍‌ ଏକିସ୍‌କିତାର୍‌, ରିଆଙ୍ଗାଁ ରିଏରିଙ୍ଗ୍‌ ମାରି ନାଡ଼୍‌ମି ଜିସୁଙ୍ଗୁଁ । 19 ମାରି, ପିଲାତ୍‌ ଉନ୍‌ଡ୍ରି ନଟିସ୍‌ ଆକୁ ରାସ୍‌ସି କ୍ରୁସ୍‌କାଟ୍‌ତି ମୁସ୍‌କୁ ଡ଼ତାର୍‌ । ଆବେନୁ ରାସ୍‌ତା ମାର୍ହାତ୍‌, "ନାଜରିୟତିୟ ଜିସୁ, ଜିହୁଦିର୍‌ ରାଜା ।" 20 ଜିହୁଦିର୍‌ ଲୋଇରାନ୍‌ ଏସୋଲୋକ୍‌ ଇୟା ରାସ୍‌ତିମାନିକା ପଡ଼ାତାର୍‌, ଇରିଙ୍ଗ୍‌ ଏମେ ବାଡିଦୁ ଜିସୁଙ୍ଗୁଁ କ୍ରୁସ୍‌କାଟ୍‌ତୁ ଏକିସ୍‌କିତାମାର୍ହାର୍‌, ଆକା ଗାଡ଼୍‌ ଲାକ୍‌ତୁ ମାର୍ହାତ୍‌, ମାରି ଆୟା ରାସ୍‌ତିକା ଏବ୍ରି, ଲାଟିନ୍‌ ମାରି ଗ୍ରିକ୍‌ ବାସାଦାନ୍‌ ରାସ୍‌ତା ମାର୍ହାତ୍‌ । 21 ଜିହୁଦିରି ପେରି ଜାଜକର୍‌ ପିଲାତ୍‌ତିଙ୍ଗ୍‌ ଇର୍ହାର୍‌, "ଜିହୁଦିରି ରାଜା" ଇଜି ରାସ୍‌ଏଣ୍‌ଗା ମାରି "ନାନ୍ ଜିହୁଦିରି ରାଜା ଇଜି ୱାନ୍‌ ଇର୍ହାନ୍‌, ଇକା ରାସ୍‌ଆଁ ।"

22 ପିଲାତ୍‌ ଇର୍ହାନ୍‌, "ନାନ୍ ଆମାକା ରାସ୍‌ତାମାନା, ଆକା ବାଦେଲ୍‌କିଦେଙ୍ଗ୍‌ ଆଟ୍‍ଏ ।"

23 ସନ୍ୟର୍‌ ଜିସୁଙ୍ଗୁଁ କ୍ରୁସ୍‌କାଟ୍‌ତୁ ଏକିସ୍‌କିତି ୱେନ୍‌କା ନାଲ୍‌ଏର୍‌ ସନ୍ୟର୍‌ ୱାନି ଆଙ୍ଗିଁ ନାଲ୍‌ଗି ବାଗ୍‌କୁ କିଜି ୱିଜେରେ ଉଣ୍ତିଙ୍ଗ୍‌ ଉନ୍‌ଡ୍ରି ଉନ୍‌ଡ୍ରି ବାଗ୍, ମାରି ୱାର୍‌ ୱାନି ଆଙ୍ଗିଁ ବା ଅତାର୍‍ । ଆୟା ଆଙ୍ଗିଁ ସିଲାଇ କିଏଣ୍‌ଗା ମୁସ୍‌କୁରାନ୍‌ ଆଡ୍‍ଗି ସାନ୍ଦି ୱିଜୁ ଗୁତ୍‌ତା ମାର୍ହାର୍‌ । 24 ଆଦେଙ୍ଗ୍‌ ସନ୍ୟର୍‌ ଲୋଇ ଲୋଇ ଇର୍ହାର୍‌, ତେନେଙ୍ଗ୍‌ କିସ୍‌ତେଙ୍ଗ୍‌ କେଏଟ୍‌, ମାତର୍‌ ଇକା ଏନ୍ଦି ଆନାତ୍‌, ଆୟାଉଣ୍ତିଙ୍ଗ୍‌ କୁଡ଼ୁକୁଡ଼ି କିନାଟ୍‌, ଏଣ୍ତେସ୍‌ ଦାର୍ମୁସାସ୍ତ୍ରଦୁ ଇୟା ବାକ୍ୟ ପୁରା ଆନାତ୍‌,

ୱାର୍‌ ନିଜେ ନିଜେଦି ମାନୁ ନା ଆଙ୍ଗିଁଦିଙ୍ଗ୍‌ ବାଗ୍ କିତାର୍‌,

ମାରି ନା ଆରାନି ଆଙ୍ଗିଁ ଉଣ୍ତିଙ୍ଗ୍‌ କୁଡ଼ୁକୁଡ଼ି କିତାର୍‌ ।

ଆଦେଙ୍ଗ୍‌ ସନ୍ୟର୍‌ ଇୟାୱିଜୁ କିତାର୍‌ ।

25 ମାତର୍‌ ଜିସୁଦି କ୍ରୁସ୍‌କାଟ୍‌ତି ଲାକ୍‌ତୁ ୱାନି ଆଇସି ମରିୟମ୍‌, ୱାନି ଆଇସିକା ତାଙ୍ଗିଁସି, କ୍ଳୋପାଦି ଆଡ଼୍‌ସି, ମରିୟମ୍‌ ମାରି ମଗ୍‌ଦଲିନି ମରିୟମ୍‌ ନିର୍‌ଏ ମାର୍‌ଏ । 26 ଜିସୁ ନିଜେଦି ଆଇସିଙ୍ଗ୍‍ ମାରି ଏମେ ସିସୁଙ୍ଗୁଁ ଜିବନ୍‌ନୋଜି ମାର୍ହାନ୍‌, ତାନିଙ୍ଗ୍‌ ଲାକ୍‌ତୁ ନିର୍‌ଇମାରିକା ସୁଡ଼ୁତାନ୍‌ନୋ ଆଇସିଙ୍ଗ୍‍ ଇର୍ହାନ୍‌, "ସୁଡ଼ୁଆ, ନି ମାରିନ୍‌ତିଙ୍ଗ୍‌ !"

27 ତାନେୱେନ୍‌କା ଜିସୁ ଆୟା ସିସୁଙ୍ଗୁଁ ଇର୍ହାନ୍‌, "ସୁଡ଼ୁଆ, ମି ୟାୟା !" ମାରି ଆୟା ସମୟ୍‌ତାନ୍‌ ଆୟା ସିସୁ ତାନିଙ୍ଗ୍‌ ନିଜେଦି ଇଲୁତୁ ଅତାନ୍‍ ।

28 ତାନେୱେନ୍‌କା ଜିସୁ ଦାର୍ମୁସାସ୍ତ୍ରଦି ବାକ୍ୟ ଏଣ୍ତେସ୍‌ ପୁରା ଆନାତ୍‌, ଇୟାଉଣ୍ତିଙ୍ଗ୍‌ ୱିଜୁ ବିସୟ୍‌ ଇଲେଇ ୱିଜିତାମାନାତ୍‌ ଇଜି ନେସ୍‌ସି ଇର୍ହାନ୍‌, "ନାଙ୍ଗିଁ ଏର୍‌କିକାଟ୍‌ସିନାତ୍‌ ।"

29 ଆବେନୁ ସୟ୍‌ନିରସ୍‌ ପୁରାପୁରିମାନି ଉନ୍‌ଡ୍ରି ସାଟି ମାର୍ହାତ୍‌; ୱାର୍‌ ସୟ୍‌ନିରସ୍‌ ପୁରାମାନି ଉନ୍‌ଡ୍ରି ତୁଲାଦୁ କାଣ୍ତେକ୍‌ ବାଡିଗାଦିଟିପୁଦୁ ଲାଗିସ୍‌କିଜି ୱାନି ୱେୟୁ ଲାକ୍‌ତୁ ସିତାର୍‍ । 30 ଆବେଟ୍‌ ଜିସୁ ଆୟା ସୟ୍‌ନିରସ୍‌ ଉଟାନ୍‌ନୋ ଇର୍ହାନ୍‌, "ୱିଜିତାତ୍‌" ମାରି ୱାନ୍‌ ତାଲା ଆଡ୍‍ଗି କିଜି ସାତାନ୍‌ ।

31 ଆୟାନାଣ୍ତିଙ୍ଗ୍‌ ନେଗିଦିନ୍‌ ମାନିଙ୍ଗ୍‌, ମେନ୍ଦଲ୍‌ୱିଜୁ ଏଣ୍ତେସ୍‌ ରମ୍‌ନିନାଣ୍ତିଙ୍ଗ୍‌ କ୍ରୁସ୍‌କାଟ୍‌ ମୁସ୍‌କୁ ତେବାଏତ୍‌, ଇରିଙ୍ଗ୍‌ ଆୟା ରମ୍‌ନିନାଣ୍ତିଙ୍ଗ୍‌ ପବିତ୍ର ଦିନ୍‌ ମାର୍ହାତ୍‌, ଆରିଙ୍ଗ୍‌ ୱାରି କାଲ୍‌କୁ ରୁକିର୍‌ ମାରି ତାନେୱେନ୍‌କା ୱାରିଙ୍ଗ୍‌ କୁସ୍ରକାଟ୍‌ତାନ୍‌ ରେପ୍‌ତେଙ୍ଗ୍‌ ଇଜି ଜିହୁଦି ନେତାର୍‌ ପିଲାତ୍‌ତିଙ୍ଗ୍‌ ମାଡ଼ିସ୍‌କିତାର୍‌ । 32 ତାନେୱେନ୍‌କା ସନ୍ୟର୍‌ ୱାଜି ଆଗ୍‌ଡ଼ି ଅରେନ୍‍ୱାନି କାଲ୍‌କୁ ମାରି ଜିସୁଦି ୱେଲେ ଆମା ଅରେନ୍‍ୱାନିଙ୍ଗ୍‍ କ୍ରୁସ୍‌କାଟ୍‌ତୁ ଏକିସ୍‌କିତାମାର୍ହାର୍‌, ୱାନି କାଲୁ ବା ରୁକ୍‌ତାର୍‌ । 33 ମାତର୍‌ ୱାର୍‌ ଜିସୁ ଲାକ୍‌ତୁ ୱାଜି ୱାନ୍‌ ସାତାନ୍‌ ଇଜି ସୁଡ଼ୁଜି ୱାନି କାଲୁ ରୁକ୍‌ଏତାର୍‌, 34 ମାଣ୍‌କୁ ଅରେନ୍‍ ଇଟାଦାନ୍‌ ୱାନି ପାଡ଼୍‌କାଦୁ ଗୁତ୍‌ତାନ୍‌, ମାରି ଆୟାଦାପ୍ରେ ନେତେର୍‌ ନି ଏରୁ ୱାଙ୍ଗ୍‍ଜି ୱାତେ । 35 ଏନ୍‌ ସୁଡ଼ୁତା ମାନାନ୍‌, ୱାନ୍‌ ସାକିୟ ସିତାମାନାନ୍‌, ଏଣ୍ତେସ୍‌ ମିର୍‌ ବା ବିସ୍‌ବାସ୍‌ କିନିଦେର୍‌; ମାରି, ୱାନି ସାକ୍ୟ ସତ୍‌, ମାରି ୱାନ୍‌ ଜେ ସତ୍‌ ୱେର୍‌ସିନାନ୍‌, ଇକା ୱାନ୍‌ ନେସ୍‌ନାନ୍‌ । 36 ଇରିଙ୍ଗ୍‌ ଦାର୍ମୁସାସ୍ତ୍ରଦି ଇୟା ବାକ୍ୟ ପୁରା ଆନି ଉଣ୍ତିଙ୍ଗ୍‌ ଇୟାୱିଜୁ ବିସୟ୍‌ ଗଟାତାତ୍‌, "ୱାନି ଉନ୍‌ଡ୍ରି ପେଡ଼େନ୍‌ ବା ରୁଙ୍ଗ୍‌ଏତ୍‌ ।" 37 ✝୧୯:୩୭ ପ୍ରକାଶିତ ୧:୭.ଦାର୍ମୁସାସ୍ତ୍ରଦୁ ମାରି ଉନ୍‌ଡ୍ରି ବାକ୍ୟ ରାସ୍‌ତାମାନାତ୍‌, "ୱାର୍‌ ଆମାୱାନିଙ୍ଗ୍‌ ଇଟାଦାନ୍‌ ଗୁତ୍‌ତାର୍‌, ୱାନି ଲୋକୁ ସୁଡ଼ୁନାଟ୍‌ ।"

38 ଇୟାୱିଜୁ ଗଟ୍‌ନେଙ୍ଗ୍‌ ୱେନ୍‌କା, ଆମା ହାରାମାତିୟାଦି ଜୋସେପ୍‌ ଜିସୁଦି ଅରେନ୍‍ ସିସୁ ମାର୍ହାନ୍‌, ମାତର୍‌ ଜିହୁଦି ନେତାରିଙ୍ଗ୍‌ ତିଲାଜି ନେସେଇ ୱାଜା ମାର୍ହାନ୍‌, ଜୋସେପ ଜିସୁଦି ମେନ୍ଧଲ୍‍ ଅତେଙ୍ଗ୍‌ ଇଜି ପିଲାତ୍‌ତିଙ୍ଗ୍‌ ମାଡ଼ିସ୍‌ତାନ୍‌ । ଆବେଟ୍‌ ପିଲାତ୍‌ ଡ଼ିସ୍‌ତାସିତାନ୍‌ । ଆଦେଙ୍ଗ୍‌ ୱାନ୍‌ ୱାତାନ୍‌ନୋ ୱାନି ମେନ୍ଦଲ୍ ଅତାନ୍‍ । 39 ✝୧୯:୩୯ ଜୋହନ ୩:୧,୨.ଆମା ନିକଦିମ ଆଗ୍‌ଡ଼ି ନାଡ଼ା ୱାନି ଲାକ୍‌ତୁ ୱାତାମାର୍ହାନ୍‌, ୱାନ୍‌ ବା ପୁରା ତିରିସ୍‌ କେଜି ବାସ୍‌ନାଦୁମିସାତି ନିୟୁ ଆସ୍‌ସି ୱାତାନ୍‌ । 40 ୱାର୍‌ ଜିସୁଦି ମେନ୍ଦଲ୍‌ତିଙ୍ଗ୍‌ ଅତାରୋ ଜିହୁଦିର୍‌ ମୁସ୍‌ନି ରିତିଦାନ୍‌ ଆକା ବାସ୍‌ନାନିୟୁଦି ୱାଲେ କାଣ୍ତେକ୍‌ ପାସିଆଦୁ ତେରେପ୍‌ତାର୍‌ । 41 ଜିସୁଙ୍ଗୁଁ ଏମେ ବାଡିଦୁ କ୍ରୁସ୍‌କାଟ୍‌ତୁ ଏକିସ୍‌କିତାମାର୍ହାର୍‌, ଆୟାବାଡିଦୁ ଉନ୍‌ଡ୍ରି ଡଡି ମାର୍ହାତ୍‌, ମାରି ଆୟା ଡଡିଦୁ ଉନ୍‌ଡ୍ରି ପୁନି ମୁସ୍‌ନି ଗୁଟା ମାର୍ହାତ୍‌, ଆବେନୁ ଏନ୍‌ ଆଗ୍‍ଡ଼ିରାନ୍‍ ଏଙ୍ଗ୍‌ବା ମୁସ୍‌ଏର୍‌ ମାର୍ହାର୍‌ । 42 ମାରି, ଜିହୁଦିରି ନେଗିଦିନ୍‌ତି ଉଣ୍ତିଙ୍ଗ୍‌ ଆୟା ବାଡିଦୁ ୱାର୍‌ ଜିସୁଙ୍ଗୁଁ ଇଟ୍‌ତାର୍‌, ଇରିଙ୍ଗ୍‌ ଆୟା ମୁସ୍‌ନିବାଡି ଲାକ୍‌ତୁ ମାର୍ହାତ୍‌ ।