1 ନାସ୍ତିୱାଲେ ଆବେ ମାର୍‍ଇ ଏସୋ ଲୋକୁ ଜିସୁଙ୍ଗୁଁ ଇର୍ହାର୍‌ଜେ, ଗାଲିଲିଦିକାର୍‍ ମାପୁରୁମାନୁ ପୁଜାସିନି ୱାଲେ ପିଲାତ୍‌ ୱାରିଙ୍ଗ୍‌ ଡାକ୍‍ତା ମାର୍‌ଆନ୍‌ । 2 ଆବେଟ୍‌ ଜିସୁ ୱାରିଙ୍ଗ୍‌ ଇର୍ହାନ୍‌, "ମିର୍‌ ଇନିକା ଅଡ଼୍‍ବିଜିନିଦେର୍‍ ଜେ ଇୟା ଲୋକୁ ଗାଲିଲିଦି ୱିଜେରିଙ୍ଗ୍‍ ନାଣ୍ତ ପାପି ମାର୍ହାର୍‍ ଇଜି ୱାରିଙ୍ଗ୍‌ ମିର୍‌ ଅଡ଼୍‍ବିଜିନିଦେର୍‍ ନୋ ? 3 ନାନ୍ ମିଙ୍ଗିଁ ଇଜିନା, ସିଲେ, ମାତର୍‌ ପାପ୍‌ତାନ୍‌ ମନ୍‍ତିଙ୍ଗ୍‍ ଡ଼େପ୍‍ଇତିଙ୍ଗ୍‍ ମିର୍‌ ୱିଜେରେ ଆୟାୱାଜା ନାସ୍ଟୁ ଆନିଦେର୍‌ । 4 ବା ସିଲୋହଦୁ ଆୟା ଆମା ଅଟ୍ର ଲୋକା ମୁସ୍‌କୁ କାପ୍‍କିନି ଇଲୁ ଆର୍‍ଜି ୱାରି ଜିବନ୍‌ ସର୍‌ଆତ୍‌, ୱାରି ବିସୟ୍‌ତାନ୍‌ ମିର୍‌ ଇନିକା ଅଡ଼୍‍ବିଜିନିଦେର୍‍ ? ୱାର୍‌ ୱିଜେରେ ଜିରୁସାଲାମ୍‍ତିଲୋକା ବାଦ୍‌ଲୁ ନାଣ୍ତ ଦୋସ୍‍କିତିକାର୍‍ ଇଜି ନୋ ମିର୍‌ ଅଡ଼୍‍ବିଜିନିଦେର୍‍ ? 5 ନାନ୍ ମିଙ୍ଗିଁ ଇଜିନା, ସିଲେ, ମାତର୍‌ ପାପ୍‌ତାନ୍‌ ମନ୍‍ତିଙ୍ଗ୍‍ ଡ଼େପ୍‍ଏତିଙ୍ଗ୍‍ ମିର୍‌ ୱିଜେରେ ଆୟାୱାଜା ନାସ୍ଟୁ ଆନିଦେର୍‌ ।"

6 ମାରି, ଜିସୁ ଇୟା କାତା ୱେର୍‌ତାନ୍‌, "ଅରେନ୍‍ୱାନି ଅଙ୍ଗୁର୍‍ କିଡ଼ିଇ ଉଣ୍ତ୍ରି ତଗା ମାରାନ୍‌ ଉର୍‍ତା ମାର୍ହାର୍‍ । ମାଲିକ୍‌ ୱାଜି ପଲ୍‌ ପ‍ଇତାନ୍‌, ମାତର୍‌ ପୟ୍‍ଏତାନ୍‍ । 7 ଆବେଟ୍‌ ୱାନ୍‌ ଅଙ୍ଗୁର୍‍ କିଡ଼ିଇ କାପ୍‍କିନିୱାନିଙ୍ଗ୍‌ ଇର୍‌ଆନ୍‌, ସୁଡ଼ୁଆ, ଇୟା ମୁଣ୍ତ୍ରି ବାର୍‍ସେକ୍‍ ଆତାତ୍‌ ନାନ୍ ୱାଜି ଇୟା ତଗା ମାରାନ୍‌ତୁ ପଲ୍‌ ପୟ୍‍ଜିନା, ମାତର୍‌ ପୟ୍‌ଏଜିନା; ତେନିଙ୍ଗ୍‍ କାତ୍‍ସୋ ପୋକ୍‌ଆ, ଇକା ଇନ୍‍ଦାନିଙ୍ଗ୍‍ ବୁମିଦିଙ୍ଗ୍‌ ବା ତାଗ୍‌ଇକା କିଜିନାତ୍‍ ? 8 ମାତର୍‌ କାପ୍‍କିନିକାନ୍‍ ମାଲିକ୍‌ତିଙ୍ଗ୍‌ ଇର୍‌ଆନ୍‌, ପ୍ରବୁ, ତେନିଙ୍ଗ୍‍ ଇୟା ଉଣ୍ତ୍ରି ବାର୍ସେକ୍‍ ବା ଡ଼ିସ୍‍ସୋସିଆ, ନାନ୍ ଇଲେ ତେନି ସାରିବେଡ଼୍‍ତି କାର୍‍ଜି ଗାତାମ୍‍ ସିନା, 9 ୱାନି ବାର୍‍ସେକ୍‍ ପଲ୍‌ ଆସ୍‌ତିଙ୍ଗ୍‌ ତୋ ନେଗି ମାଟା, ଆଏତିଙ୍ଗ୍‍ ତାନିଙ୍ଗ୍‌ କାତ୍‍ସପୋକ୍‍ଆ ।"

10 ଅର୍‍ଲେନ୍‍ ଜିସୁ ରମ୍‌ନିନାଣ୍ତିଙ୍ଗ୍‌ ଉଣ୍ତ୍ରି ପାର୍‌ତନା ଇଲୁଦୁ ସିକିୟା ସିଜିମାର୍ହାନ୍‍ । 11 ମାରି ସୁଡ଼ୁଦୁ, ଅଟ୍ର ବାର୍ସେକ୍‍ ଆତାତ୍‌ ଉନ୍‍ଣ୍ତ୍ରି ତାଗ୍‍ଇଆତ୍ମା ଆସ୍‌ସି ଅରେତ୍‌ ଆଇମାଦିଙ୍ଗ୍‍ ସାକିସିଲିୱାଜା କିତାମାର୍‍ଆତ୍‍, ୱାଦ୍‌ କୁବ୍‍ଡ଼ି ଆଜି ଏଣ୍ତେସ୍‌ବା ନିଜେଦିଙ୍ଗ୍‍ ସିଦା କିଜି ବୁଲାଦେଙ୍ଗ୍‌ ଆଟ୍‍ଏଜିମାର୍ହାତ୍‍ । 12 ଜିସୁ ତାନିଙ୍ଗ୍‌ ସୁଡ଼ୁଜି ଲାକ୍‌ତୁ କୁକ୍‌ସି ଇର୍‌ଆନ୍‌, ଏ ଆଇମା, ନି ରୋଗ୍‍ଜିବନ୍‍ତାନ୍‌ ନେଗେଣ୍ତ୍‍ ଆତି । 13 ମାରି, ୱାନ୍‌ ତାନି ମୁସ୍‌କୁ କିୟୁ ଇଟ୍‌ତାନ୍‌, ଆବେଟ୍‌ ୱାଦ୍‌ ଆୟାଦାପ୍ରେ ସାଡ଼୍‌କୁ ଆଜି ମାପୁରୁଦି ଦନ୍ୟବାଦ୍‌ କିଦେଙ୍ଗ୍‌ ଆସ୍‌ତାତ୍‌ ।

14 ମାତର୍‌ ଜିସୁ ରମ୍‌ନିନାଣ୍ତିଙ୍ଗ୍‌ ନେଗେଣ୍ତ୍‌ କିତାନ୍‍ଆକା ପାର୍‌ତନା ଇଲୁଦି ପେରିକାନ୍‌ ରିସା ଆଜି ଲୋକାଙ୍ଗ୍‌ ଇର୍ହାନ୍‌, "ପାଣି କିନି ଉଣ୍ତିଙ୍ଗ୍‌ ସଅଦିନ୍‍ ମାନାତ୍‌, ଆଦେଙ୍ଗ୍‌ ଆୟାୱିଜୁ ଦିନ୍‌ ୱାଜି ନେଗେଣ୍ତ୍‍ ଆଦୁ, ରମ୍‌ନିନାଣ୍ତିଙ୍ଗ୍‌ ରାମାଟ୍‍ ।"

15 ମାତର୍‌ ପ୍ରବୁ ୱାନିଙ୍ଗ୍‌ ଇର୍‌ଆନ୍‌, "ରେ କପଟିର୍‍, ମିର୍‌ ୱିଜେରେ ଇନିକା ରମ୍‌ନିନାଣ୍ତିଙ୍ଗ୍‌ ନିଜେ ନିଜେଦି ଡ଼ାନ୍‍ ମାରି ଗଦ ସାଡ଼ାଦାନ୍‍ କୁତ୍‌ସିଅସି ଏରୁ ଉଟ୍‍ପିସ୍‍ କିଇଦେର୍‍ ? 16 ମାରି ସୁଡ଼ୁଦୁ ଅଟ୍ର ବାର୍‍ସେକ୍‍ ଆତାତ୍‌ ସୟତାନ୍ ମାଣ୍‌କୁ ତରାଜି ଅବ୍ରାହାମତି ଗାଡ଼୍‌ସି ଇୟା ଆଇମାଲୋକ୍‍ ଇନିକା ରମ୍‌ନିନାଣ୍ତିଙ୍ଗ୍‌ ନିଜେଦି ରୋଗ୍‍ତି ଗାଟିଦାନ୍‍ କୁଦାଦେଙ୍ଗ୍‍ ଦର୍‌କାର୍‌ ସିଲେତାତ୍‍ ନୋ ?" 17 ମାରି, ୱାନ୍‌ ଇୟା ମାଟା ୱିଜୁ ଇର୍ହାନ୍‍ଆକା, ୱାନି ବିରୁଦ୍‍ତିକାର୍‌ ୱିଜେରେ ସେମାର୍‌ ଆତାର୍‌, ମାତର୍‌ ଲୋକୁ ୱିଜେରେ ୱାନି କିତି ୱିଜୁ ପେରି ପାଣି ଉଣ୍ତିଙ୍ଗ୍‌ ୱେଡ଼ିକା କିଦେଙ୍ଗ୍‌ ଆସ୍‌ତାର୍‌ ।

18 ଆବେଟ୍‌ ଜିସୁ ଇର୍ହାନ୍‌, "ମାପୁରୁଦି ରାଜି ଆମାତାନି ୱାଜା ? ମାରି, ଆମାତାନିୱାଲେ ନାନ୍ ତାନିଙ୍ଗ୍‌ ତୁସ୍‍ନା ? 19 ଆକା ଇୟାୱାଜା ଉଣ୍ତ୍ରି ସାର୍‍ସୁ ପାଡ଼ୁ ୱାଜା, ଆମାକା ଅସି ଅରେନ୍‍ ଲୋକୁ ନିଜେଦି ଡଡିଦୁ ୱିତ୍‍ତାନ୍‍, ମାରି ଆକା ପିର୍‌ଜି ମାରାନ୍‌ ଆତାତ୍‌, ବାଦଡ଼୍‌ତି ପଟିଙ୍ଗ୍‌ ୱାଜି ତାନି କମେଆଙ୍ଗ୍‍ଁ ଜାଲୁ ତର୍‌ସି ବାସାନେ ।"

20 ଜିସୁ ମାରି ୱେର୍‌ତାନ୍‌, "ନା‍ନ୍‌ ଆମାତାନି ୱାଲେ ମାପୁରୁଦି ରାଜିଦିଙ୍ଗ୍‍ ତୁସ୍‍ନା ? 21 ଆକା କମିର୍‍ତି ୱାଜା, ଅରେତ୍‌ ଆଇମା କମିର୍‌ ଅସି ଆଡା ଅଟାଗୁଣ୍ତାଦି ଲୋଇ ମିସାକିଜି ପିଡ଼ିକ୍‍ସି ଇଟ୍‍ତାତ୍‍, ମାରି ସାରାସାରି କମିର୍‌ ୱିଜୁ ଗୁଣ୍ତାଦିଙ୍ଗ୍‍ ଉଦିସ୍‍କିତାତ୍‍ ।"

22 ଇୟା ୱେନ୍‌କା ଜିସୁ ଗାଡ଼୍‌କାଙ୍ଗ୍‌ ଗାଡ଼୍‌କାଙ୍ଗ୍‌ ମାରି ନାର୍‍କାଙ୍ଗ୍‍ଁ ନାର୍‍କାଙ୍ଗ୍‍ଁ ବୁଲାଜି ସିକିୟା ସିବୁ ସିବୁ ଜିରୁସାଲାମ୍‍ ତରିନ୍‌ ସଲ୍‌ସି ମାର୍ହାନ୍‌ । 23 ମାରି, ଅରେନ୍‍ ୱାନିଙ୍ଗ୍‌ ଇର୍‌ଆନ୍‌, "ପ୍ରବୁ, ରକିୟା ପଇନି ଲୋକାଦି ସଂକିୟା ଇନିକା ଉଣା ?" ଆବେଟ୍‌ ୱାନ୍‌ ୱାରିଙ୍ଗ୍‌ ଇର୍ହାନ୍‌, 24 ସିପଡ଼ି ସେର୍‍ଲା ସିଜି ଡ଼ୁଗୁଦେଙ୍ଗ୍‍ ତେରେପେତେ ଆଦୁ, ଇରିଙ୍ଗ୍‌ ନାନ୍ ମିଙ୍ଗିଁ ଇଜିନା, ୱିଜେରେ ଡ଼ୁଗୁଦେଙ୍ଗ୍‍ ଇଜି ବଦା କିନାର୍‌, ମାତର୍‌ ଆଟ୍‍ଏର୍‍ । 25 ଇଲୁଦି ମାଲିକ୍‌ ନିଙ୍ଗ୍‍ଜି ସେର୍‍ଲା କେର୍‍ତି ୱେନ୍‌କା ଏସ୍ତିୱାଲେ ମିର୍‌ ଆତ୍ରେ ନିନି ତେବାନିଦେର୍‍ ମାରି ଏ ପ୍ରବୁ, ମା ଉଣ୍ତିଙ୍ଗ୍‌ ସେର୍‍ଲା ରେଆ, ଇକା ଇଜି ସେର୍‍ଲା ଡାକ୍‌ତେଙ୍ଗ୍‍ଁ ଆସ୍‌ନିଦେର୍‌, ନାସ୍ତିୱାଲେ ୱାନ୍‌ ମିଙ୍ଗିଁ ଇନାନ୍‌, ମିର୍‌ ଏମେ ବାଡ଼ିଦି ଲୋକୁ, ଆକା ନାନ୍ ନେସେଏ । 26 ଆୟାୱାଲେ ମିର୍‌ ଇନ୍‌ଡ୍ରେଙ୍ଗ୍‌ ଆସ୍‌ନିଦେର୍‌, ମାପ୍‌ ମି ଆଗ୍‌ଡ଼ି ଉଟାପ୍ ତିର୍‍ଆପ୍‍, ମାରି ନିନ୍‌ ମା ଦୁଆର୍‍କାଙ୍ଗ୍‍ ସିକିୟା ସିତି; 27 ମାରି, ୱାନ୍‌ ମିଙ୍ଗିଁ ଇନାନ୍‌, ମିର୍‌ ଏମେ ବାଡ଼ିଦି ଲୋକୁ, ଆକା ନାନ୍ ନେସେଏ; ଏ ତାଗ୍‍ଇ ପାଣିକିନି ୱିଜେରେ ନା ଲାକ୍‌ତୁରାନ୍‌ ଆକ ଆଦୁ । 28 ✝୧୩:୨୮ ମାତିଉ ୨୨:୧୩; ୨୫:୩୦.✝୧୩:୨୮ ମାତିଉ ୮:୧୧,୧୨.ଏସ୍ତିୱାଲେ ମିର୍‌ ଅବ୍ରାହାମ, ଇସ୍‌ହାକ୍‌, ଜାକୁବ, ମାରି ୱିଜେରେ ବାବବାଦିରିଙ୍ଗ୍ ମାପୁରୁଦି ରାଜିଦୁ ମାନିକା ମାରି ନିଜେ ନିଜେଦିଙ୍ଗ୍‍ ଆତ୍ରେ ପୋକ୍‌ନିକା ସୁଡ଼୍‍ନିଦେର୍‍, ନାସ୍ତିୱାଲେ ଆବେ ଆଡ଼୍‌ବାନିଦେର୍‌ ମାରି ପାଲ୍‍କୁ କାତ୍ରେ କିନିଦେର୍‍ । 29 ମାରି, ୱେଡ଼ାସନି ତରିଟାନ୍‍ ମାରି ୱେଡ଼ାଆର୍‌ନି ତରିଟାନ୍‍, ଡେବିରି ତରିଟାନ୍‍ ମାରି ଉଣେରି ତରିଟାନ୍‍ ଲୋକୁ ୱାଜି ମାପୁରୁଦି ରାଜିଦୁ ଉଣ୍ତେଙ୍ଗ୍‌ ବାସ୍‍ନାର୍‍ । 30 ✝୧୩:୩୦ ମାତିଉ ୧୯:୩୦; ୨୦:୧୬; ମାର୍କ ୧୦:୩୧.ମାରି ସୁଡ଼ୁଦୁ, ଏର୍‌ ଇଲେଇ ୱେନ୍‍କା ମାନାର୍‍ ୱାର୍‌ ଆଗ୍‌ଡ଼ି ଆନାର୍‌ ମାରି ଆଗ୍‌ଡ଼ି ମାନି ଏସୋ ଲୋକୁ ୱେନ୍‌କା ଆନାର୍‌ ।

31 ନାସ୍ତିୱାଲେ ଏସୋ ପାରୁସିର୍‌ ଜିସୁ ଲାକ୍‌ତୁ ୱାଜି ଇର୍ହାର୍‌, "ଇୟା ବାଡି ଡ଼ିସ୍‌ସି ସହସୋ ସାଙ୍ଗ୍‍ଆ, ଇରିଙ୍ଗ୍‌ ହେରୋଦ ନିଙ୍ଗିଁ କାତ୍‍ତେଙ୍ଗ୍‍ ବଦା କିଜିନାନ୍‍ ।"

32 ଆବେଟ୍‌ ଜିସୁ ୱାରିଙ୍ଗ୍‌ ଇର୍‌ଆନ୍‌, "ମିର୍‌ ସଲ୍‍ସୋ ଆୟା ଗଲୁଦିଙ୍ଗ୍‍ ଇନ୍‍ଡ୍ରୁ, ସୁଡ଼ୁଦୁ, ନାନ୍ ନେର୍‌ ମାରି ୱିଗେରିଙ୍ଗ୍‌ ଲୋକାମାଣ୍‌କୁ ଦୁବେଙ୍ଗ୍‍ ପେର୍‍ଜିନା ମାରି ଲୋକାଙ୍ଗ୍‌ ନେଗେନ୍‌ କିଜିନା, ମିଏରିଙ୍ଗ୍‍ ନା ପାଣି ୱିଜ୍‌ନାତ୍‌ । 33 ମାତର୍‌ ନାନ୍ ଇୟାୱିଜୁ ପାଣି ନେର୍‌, ୱିଗେରିଙ୍ଗ୍‌ ମାରି ମିଏରିଙ୍ଗ୍‍ ନାଙ୍ଗିଁ ସନ୍‌ଡ଼୍ରେଙ୍ଗ୍‌ ଆନାତ୍‌, ଇରିଙ୍ଗ୍‌ ଜିରୁସାଲାମ୍‍ତି ଆତ୍ରେ ବାବବାଦିର୍ ସାନିକା ଟିକ୍‌ ସିଲେ ।

34 "ଏ ଜିରୁସାଲାମ୍‍, ଏ ଜିରୁସାଲାମ୍‍, ନିନ୍‌ ବାବବାଦିରିଙ୍ଗ୍ କାତ୍‍ତିମାନି । ଏମେ ଲୋକାଙ୍ଗ୍‌ ମାପୁରୁ ନି ଲାକ୍‌ତୁ ପୋକ୍‍ତାମାର୍‍ଆନ୍‍, ନିନ୍‌ ୱାନିଙ୍ଗ୍‌ କାଲ୍‍କାଣ୍‍ ଡାକ୍‍ତିମାନି । ନାନ୍ ଏସୋ ଦେବେଙ୍ଗ୍‌ ମି ଲୋକାଙ୍ଗ୍‌ ସାକା କିଦେଙ୍ଗ୍‌ ବଦା କିଜିନା । ଉଣ୍ତ୍ରି ତାଡ଼ି କର୍‍ରୁ ତାନି ରେକା ଆଡ୍‍ଗି କରୁ ପିଲେକାଙ୍ଗ୍‌ ଅର୍‌ସେ ଉଣ୍ତାକିନିୱାଜା ନାନ୍ ମି ଲୋକାଙ୍ଗ୍‌ ଉଣ୍ତା କିଦେଙ୍ଗ୍‌ ବଦାକିତାମାର୍‍ଆ । ମାତର୍‌ ଆକା କିଦେଙ୍ଗ୍‌ ବଦା କିଇତି । 35 ସୁଡ଼ୁଦୁ, ମି ମନ୍ଦିର୍‌ତିଙ୍ଗ୍‌ ଲୋକୁ ଡ଼ିସ୍‍ତାମାନାର୍‍; ମାରି, ନାନ୍ ମିଙ୍ଗିଁ ଇଜିନା, ପ୍ରବୁଦି ଦର୍‌ତାନ୍‌ ଆମାକାନ୍‍ ୱାଜିନାନ୍‍, ୱାନ୍‌ ଦନ୍ୟ, ମିର୍‌ ଆମା ନାଣ୍ଡିଙ୍ଗ୍ ଇୟା ମାଟା ଇନିଦେର୍‌, ଆୟା ଦିନ୍‌ ୱାନି ସାନ୍ଦି ନାଙ୍ଗିଁ ମାରି ସୁଡ଼ୁଦେଙ୍ଗ୍‌ ଆଟ୍‍ଇଦେର୍‍ ।"