1 ଆୟାୱାଲେ ରୋମିୟ ଦେସ୍‍ତି ପେରିରାଜା ଅଗସ୍ଟ କାଇସର୍‍ ମାଣ୍‌କୁ ଦେସ୍‍ତି ୱିଜୁ ଲୋକା ଦର୍‌କୁ ରାସାନି ଉଣ୍ତିଙ୍ଗ୍‌ ମାଟା ୱେର୍‌ତାର୍‌ । 2 ସିରିଆଦି ସାସନ୍‌କିନି କୁରିଣିୟଦି ସମୟତୁ ପାର୍‍ତୁମ୍‍ତୁ ଇୟା ଲୋକୁ ଲେକିସ୍‌କିନିକା ଆତାମାର୍‌ଆତ୍‌ । 3 ଆୟା ଉଣ୍ତିଙ୍ଗ୍‌ ୱିଜେରେ ଦର୍‌ ରାସ୍‌ନି ଉଣ୍ତିଙ୍ଗ୍‌ ନିଜେ ନିଜେଦି ଗାଡ଼୍‌କାଙ୍ଗ୍‌ ସର୍‌ଆର୍‌ ।

4 ମାରି, ଜୋସେପ ବା ଦର୍‌ ରାସ୍‌ନି ଉଣ୍ତିଙ୍ଗ୍‌ ମରିୟମତି ୱାଲେ ଗାଲିଲିଦି ନାଜରିତ ଗାଡ଼୍‌ତାନ୍‍ ଜିହୁଦା ଦେସ୍‍ତି ବେତଲିହିମ୍‍ ଦର୍‌ଦି ଦାଉଦତି ଗାଡ଼୍‌ତୁ ସର୍‌ଆର୍‌, ଇରିଙ୍ଗ୍‌ ୱାନ୍‌ ଦାଉଦତି କୁଟ୍‌ମୁ ମାରି କୁଦାଦି ଲୋକୁ ମାର୍‌ଆର୍‌; 5 ଜୋସେପ ପେଡ଼ି ଆଦେଙ୍ଗ୍‌ ଲସ୍‌ସାୟ୍‌ଆତି ମରିୟମତି ୱାଲେ ଦର୍‍ ରାସ୍‌ତେଙ୍ଗ୍‍ ସର୍ହାନ୍‌ । ମାରି ମରିୟମ୍‌ ପଟାଦୁ ମାର୍‌ଆତ୍‌ । 6 ଜୋସେପ ମାରି ମରିୟମ୍‌ ବେତଲିହିମତୁ ମାର୍‌ଇ ୱାଲେ ମରିୟମତି ଜନମ୍‌କିନି ବେଡ଼ା ଇଗା ୱାତାତ୍‍, 7 ୱାଦ୍‌ ନିଜେ ପର୍‌ତୁମ୍‌ କଡ଼ଦିଙ୍ଗ୍‌ ଜନମ୍‌ କିତାତ୍‌ କଡ଼ଦିଙ୍ଗ୍‌ ୱାତିଦୁ ତେର୍‌ପ୍‌ସି ଡ଼ାକ୍‍ ଏର୍‌ଉଣି ଟଙ୍ଗାଁଦୁ ତେର୍‌ପ୍‍ତାତ୍‍, ଇରିଙ୍ଗ୍‌ ତେବାନି ଇନ୍‌ଡ୍ର ୱାରି ଉଣ୍ତିଙ୍ଗ୍‌ ବାଡି ସିଲେତାତ୍‍ ।

8 ଆୟା ରାଜିଦି ଏସ ଗୋଡ଼ୁଙ୍ଗୁଁ ଆତ୍ରେ ମାନ୍‌ଞ୍ଜି ନାଡ଼ା ୱାରି ମେଣ୍ତେଙ୍ଗ୍‌ କାପ୍‌କିଜିମାର୍‌ଆର୍‌ । 9 ପ୍ରବୁଦି ଉଣ୍ତ୍ରି ଦୁତ୍‌ ୱାରି ଲାକ୍‌ତୁ ୱାତାତ୍‍, ମାରି ପ୍ରବୁଦି ଗୌରବ୍‍ତି ଜାୟ୍‌ ୱାରି ସାର୍‌ବେଡ଼୍‌ତି ତରିତାତ୍‌, ମାରି ୱାର୍‌ ନାଣ୍ତ ତିଲାତାର୍‌ । 10 ଆବେଟ୍‌ ଦୁତ୍‌ ୱାରିଙ୍ଗ୍‌ ୱେର୍‌ତାତ୍‌, "ତିଲାମାଟ୍‌, ସୁଡ଼ୁଦୁ, ନାନ୍ ୱିଜୁ ଲୋକା ନାଣ୍ତ ୱେଡ଼ିକାଦି ନେଗି କାବୁର୍‌ ମିଙ୍ଗିଁ ୱେର୍‌ସିନା, 11 ଇରିଙ୍ଗ୍‌ ନେର୍‌ ଦାଉଦତି ଗାଡ଼୍‌ତୁ ମି ଉଣ୍ତିଙ୍ଗ୍‌ ରକିୟାକିନିକାନ୍‌ ଜନମ୍‌ ଆତାମାନାନ୍‌, ୱାନ୍‌ କ୍ରିସ୍ତ ପ୍ରବୁ । 12 ମାରି, ମି ଉଣ୍ତିଙ୍ଗ୍‌ ଇକା ସିନାଦି ୱାଜା ଆନାତ୍‌, ମିର୍‌ ଅରେନ୍‍ କଡ଼ଦିଙ୍ଗ୍‌ ୱାତିଦାନ୍‌ ତେରେପ୍‌ସି ସାଡ଼ାଦି ଟଙ୍ଗାଁଦୁ ଡର୍‌ନିମାନିକା ସୁଣିଦେର୍‌ ।"

13 ମାରି, ଆୟାଦାପ୍ରେ ଆୟା ଦୁତ୍‌ତି ୱାଲେ ମୁସ୍‌କୁପୁର୍‌ତାନ୍‌ ଉଣ୍ତ୍ରି ଦୁତ୍‍କା ଦଲ୍‌ ଇଗାୱାତେନୋ ମାପୁରୁଦିଙ୍ଗ୍‌ ପ୍ରସଂସା କିବୁ କିବୁ ଇରେଏ,

14 "ମୁସ୍‌କୁପୁର୍‌ତୁ ମାପୁରୁଦିଙ୍ଗ୍‌ ମହିମା ଆପିତ୍‌,

ମାରି ଇୟାୱିଜୁ ଦୁନିଆଦି ଏମେ ଲୋକା ମୁସ୍‌କୁ ମାପୁରୁ ୱେଡ଼ିକା ମାନାନ୍‌ ଆୟା ଲୋକାମାନୁ ସାନ୍ତି ରାପ୍‌ତି ।"

15 ଦୁତ୍‌କୁ ୱାରିମାଣାନ୍‌ ମୁସ୍‌କୁପୁର୍‌ତୁ ସର୍‌ଇ ୱେନ୍‌କା ମେଣ୍ଡେଙ୍ଗ୍‌ ସାରାକିନିକାର୍‌ ନିଜେ ନିଜେଦି ମାନୁ ୱାର୍‍ଗିଦେଙ୍ଗ୍‍ ଆସ୍‌ତାର୍‌, "ରାଦୁ, ମାଡ୍‌ ବେତଲିହିମ୍‍ ସାନ୍ଧି ସନାଟ୍‌ ମାରି ପ୍ରବୁ ମାଙ୍ଗିଁ ଇୟା ଏମେ ଗଟନା ବିସୟ୍‌ ୱେର୍‌ତାନ୍‌, ଆକା ସୁଡ଼ୁନାଟ୍‌ ।"

16 ଆବେଟ୍‌ ୱାର୍‌ ଦାପ୍ରେ ସଲ୍‌ସି ପଇଜି ଅସି ମରିୟମ୍‌ ମାରି ଜୋସେପତିଙ୍ଗ୍‌ ପ‍ଇତାର୍‌, ମାରି ସାଡ଼ାଦି ଟଙ୍ଗାଁଦୁ କଡ଼ଦିଙ୍ଗ୍‌ ଡରିତିମାର୍‌ଇକା ସୁଡ଼ୁତାର୍‌ । 17 ୱାର୍‌ ୱାନିଙ୍ଗ୍‌ ସୁଡ଼ୁଜି ଆୟା କଡ଼ଦି ବିସୟ୍‌ତାନ୍‌ ଦୁତ୍‍ ଏମେ ମାଟା ଇର୍ହାମାର୍‌ଆତ୍‌, ଆକା ୱାରିଙ୍ଗ୍‌ ୱେର୍‌ତାର୍‌, 18 ମାରି ଏମେ ଲୋକୁ ମେଣ୍ତେଙ୍ଗ୍‌ସାରାକିନିୱାରି ମାଣାନ୍‌ ଆୟାୱିଜୁ ମାଟା ୱେର୍‌ଆର୍‌, ୱାର୍‌ ୱିଜେରେ କାବା ଆତାର୍‌ । 19 ମାତର୍‌ ମରିୟମ୍‌ ଇୟାୱିଜୁ ମାଟା ମନ୍‍ତୁ ଇଡ୍‌ଜି ନାଣ୍ତ ଏତ୍‍କିଦେଙ୍ଗ୍‍ ଆସ୍‌ତାତ୍‌ । 20 ମାରି, ମେଣ୍ତେଙ୍ଗ୍‌ସାରା କିନିୱାରିଙ୍ଗ୍‌ ଦୁତ୍‍ ଏଣ୍ତେସ୍‌ ଇର୍ହାମାର୍ହାତ୍‌, ଆୟାୱାଜା ୱାର୍‌ ଏମେ ଏମେକା ୱେର୍‌ଆର୍‌ ମାରି ସୁଡ଼ୁତାର୍‌, ଆୟାୱିଜୁ ଉଣ୍ତିଙ୍ଗ୍‌ ମାପ୍‌ରୁଦି ଗୌରବ୍‍ ମାରି ଦନ୍ ଦନ୍ୟବାଦ୍‌ କିବୁ କିବୁ ଡ଼େସିୱାତାର୍‍ ।

21 ✝ଆଟ୍‍ଦିନ୍‍ ୱେନ୍‌କା ସୁନ୍ନତ କିଦେଙ୍ଗ୍‌ ଜିସୁଙ୍ଗୁଁ ମନ୍ଦିର୍‌ତୁ ଅତାର୍‍, ୱାନି ଦର୍‌ ଜିସୁ ଇଟ୍‌ତାର୍‌, ଇୟା ଦର୍‌ ୱାଦ୍‌ ଗାର୍ବୁଦୁ ତେବାଇ ଆଗ୍‍ଡ଼ିରାନ୍‍ନେ ମୁସ୍‌କୁପୁର୍‌ତି ଦୁତ୍‌ ଇୟା ଦର୍‌ ସିତାମାର୍ହାତ୍‌ ।

22 ୱେନ୍‌କା ଏସ୍ତିୱାଲେ ମୋସାଦି ନିୟମତାନ୍‌ ତାନି ଶୁଚି ଆନି ସମୟ ପୁରା ଆତାତ୍‌, ନାସ୍ତିୱାଲେ ୱାର୍‌ କଡ଼ଦିଙ୍ଗ୍‍ ମାପୁରୁମାନୁ ସିଦେଙ୍ଗ୍‍ ଜିରୁସାଲାମ୍‍ ମନ୍ଦିରତୁ ଅତାର୍‍ 23 ନାସ୍ତିୱାଲେ ୱିଜେରେ ପାର୍‍ତୁମ୍ ଜନମ୍‌ ଆତି କଡ଼ର୍‌ ପ୍ରବୁଦି ନିୟମତାନ୍‌ ପବିତ୍ର ଇଜି ୱେଙ୍ଗ୍‌ଁନାର୍‌, 24 ପ୍ରବୁଦି ନିୟମତାନ୍‌ ରାସ୍‍ତିମାନି ଇୟା ମାଟାଦାନ୍‌ ୱାର୍‌ ୱାନିଙ୍ଗ୍‌ ପ୍ରବୁଦି ନିୟମତାନ୍‌ ସର୍ପେକିନି ଉଣ୍ତିଙ୍ଗ୍‌ ମାରି ପ୍ରବୁଦି ନିୟମ୍‌ତି ସାସ୍ତ୍ରଦାନ୍‌ ରାସ୍‍ତିମାନି ନିୟମତାନ୍‌ ରୁଣ୍ତି ପାରୁୱାପିଲେକାଙ୍ଗ୍‌ ପୁଜା କିନି ଉଣ୍ତିଙ୍ଗ୍‌ ୱାନିଙ୍ଗ୍‌ ଜିରୁସାଲମତୁ ଅତାର୍‍ ।

25 ମାରି ସୁଡ଼ୁଦୁ, ଜିରୁସାଲମତୁ ସିମିୟୋନ ଦର୍‌ତି ଅରେନ୍‍ ଦାର୍ମୁ ମାରି ସାଦୁ ଲୋକୁ ମାର୍‌ଆନ୍‌; ୱାନ୍‌ ଇସ୍ରାଏଲ୍‌ତି ରକିୟାକିନିୱାନିଙ୍ଗ୍‍ ସୁଡ଼୍‍ଦେଙ୍ଗ୍‍ କାପ୍‌କିଜି ମାର୍‌ଆନ୍‌, ମାରି ପବିତ୍ର ଆତ୍ମା ୱାନିୱାଲେ ମାର୍ହାତ୍‌ । 26 ପ୍ରବୁ କ୍ରିସ୍ତଙ୍ଗ୍‍ ସୁଡ଼ିଇତିଙ୍ଗ୍‌ ୱାନ୍‌ ଜେ ସାଏନ୍‌, ପବିତ୍ର ଆତ୍ମା ୱାନିଙ୍ଗ୍‌ ଇୟା ମାଟା ୱେର୍‌ତା ମାର୍ହାତ୍‌ । 27 ୱାନ୍‌ ପବିତ୍ର ଆତ୍ମା ୱେର୍‌ତି ଇସାବ୍‌ତାନ୍‌ ମନ୍ଦିରତୁ ୱାତାନ୍‌, ମାରି କଡ଼ ଜିସୁଦି ବୁବାୟାୟା ଏସ୍ତିୱାଲେ ୱାନି ବିସୟ୍‌ତାନ୍‌ ଜିହୁଦିରି ନିୟମ୍‌ ଇସାବ୍‌ତାନ୍‌ ପାଣି କିନି ଉଣ୍ତିଙ୍ଗ୍‌ ୱାନିଙ୍ଗ୍‌ ମନ୍ଦିର୍‌ ଲୋଇ ତାତାର୍‌, 28 ନାସ୍ତିୱାଲେ ସିମିୟୋନ କଡ଼ଦିଙ୍ଗ୍‌ ଗାତୁ ଆସ୍‌ସି ମାପୁରୁଦିଙ୍ଗ୍‌ ଦନ୍ୟବାଦ୍‌ କିଜି ଇର୍ହାନ୍‌,

29 "ଏ ପ୍ରବୁ, ଇଲେଇ ନିନୁ ନିଜେଦି ବାକ୍ୟଦାନ୍‌

ନିଜେଦି ଗତିମୁରୁଲିଙ୍ଗ୍‌ ସାନ୍ତିଦାନ୍‌ ସଣ୍ଡ୍ରେଙ୍ଗ୍‌ ସିଜିନି;

30 ଇରିଙ୍ଗ୍‌ ନା କାଣୁକୁ ନି ରକିୟା ସୁଡ଼ୁତା ମାନାତ୍‌,

31 ଆମାକା ନିନୁ ୱିଜେରି ଲୋକା ଆଗ୍‌ଡ଼ି ତିଆର୍‌ କିତିମାନି ।

32 ମାରି ଅଣଜିହୁଦି ଲୋକା ଉଣ୍ତିଙ୍ଗ୍‌ ସତ୍‌ ସାରି ତର୍‌ନି ଜାୟ୍‌ ଆନାନ୍‌,

ମାରି ମି ଲୋକା ଇସ୍ରାଏଲ୍‌ତି ଗୌରବ୍‍ ୱାଜା କିତିମାନି ।"

33 ଇସ୍ରି କଡ଼ଦି ବିସୟ୍‌ତାନ୍‌ ୱେର୍‍ତିମାନି ୱିଜୁ ମାଟା ୱେନ୍‌ଜି ୱାନି ବୁବାସିଆଇସି କାବାଆତା ସର୍ହାର୍‌ । 34 ମାରି, ସିମିୟୋନ ୱାରିଙ୍ଗ୍‌ ଆସିର୍ବାଦ୍‌ କିଜି ୱାନି ଆଇସି ମରିୟମ୍‌ତିଙ୍ଗ୍‌ ୱେର୍‌ତାନ୍‌, "ଇୟା କଡ଼ ଇସ୍ରାଏଲ୍‌ତି ଲୋଇ ନାଣ୍ଡ୍ ଲୋକା ନାସ୍ଟୁ ମାରି ନାଣ୍ତ ଲୋକା ରକିୟା ଉଣ୍ତିଙ୍ଗ୍‌ ମାପୁରୁ ମାଣାନ୍‌ ବାସେଆତା ମାନାନ୍‌ । ୱାନ୍‌ ମାପୁରୁମାଣାନ୍‌ ସିନାଦି ୱାଜା ଆନାନ୍‌ । 35 ଏସୋ ଲୋକୁ ୱାନିଙ୍ଗ୍‌ ବିରଦ୍‌ କିଜି ନିଜେଦି ଜିବନ୍‍ତୁ ଆଡ଼ାକ୍‍ନିମାନି ମାଟେଙ୍ଗ୍‌ ୱିଜୁ ୱେର୍‌ନାନ୍‌ । ଦୁଃକ୍‌ ନାନି ଉଣ୍ତ୍ରି ଦାରାଦି କୁଡ଼ାମ୍‍ ମି ନିଜେଦି ଜିବନ୍‍ତିଙ୍ଗ୍‍ ଗୁତ୍‍ନାତ୍‍ ।"

36 ମାରି, ୱାଦ୍‌ ଆସେର୍‌ କୁଟୁମ୍‌ତି ପିନୁୟେଲଦି ଗାଡ଼୍‌ସି । ହାନା ଦର୍‍ତି ଅରେତ୍‌ ଅସେ ନାଲ୍‍ଗି ବାର୍ସେକ୍‍ତି ଡକ୍ରି ମାର୍‌ଆତ୍‌, ୱାଦ୍‌ ଅରେତ୍‌ ବାବବାଦିନି ମାର୍‌ଆତ୍‌ । ପେଡ଼ି ଆତାଦ ସାତ୍‌ବାର୍ସୁ କନ୍‍ଲି ୱାଲେ ମାର୍‍ଇ ୱେନ୍‌କା ରାଣ୍ତି ଆତାତ୍‌ । 37 ୱାଦ୍‌ ମନ୍ଦିର୍‌ତିଙ୍ଗ୍‌ ଡ଼ିସ୍‌ସି ସଲ୍‍ଏଜି ମାର୍‌ଆତ୍‌, ଉପାସ୍‌ କିଜି ମାରି ୱେଡ଼େନାଡ଼ା ମାପୁରୁମାନୁ ପାର୍‍ତନା କିଜିମାର୍‌ଆତ୍‌ । 38 କଡ଼ ଜିସୁ ମନ୍ଦିର୍‌ତୁ ସିଆଇ ଆନିୱାଲେ ହାନା ଆବେନ୍‌ ଇଜି ମାପ୍‌ରୁଙ୍ଗ୍‌ ଦନ୍ୟବାଦ୍‌ ସିତାତ୍‌ ମାରି ମାପୁରୁ ଜିରୁସାଲମ୍‍ତିଙ୍ଗ୍‌ ରକିୟା କିନାନ୍‍ ଇଜି ଏମେକାର୍‌ ବିସ୍‌ବାସ୍‌ କିଜି କାପ୍‌କିଜି ମାର୍‌ଆର୍‌ ଆୟା ୱିଜେରିଙ୍ଗ୍‌ କଡ଼ଦି ବିସୟ୍‌ତାନ୍‌ ୱେର୍‌ତାତ୍‌ ।

39 ✝ୱେନ୍‌କା ଜୋସେପ୍‍ ମାରି ମରିୟମ୍‌ ପ୍ରବୁଦି ନିୟମତାନ୍‌ ୱିଜୁ ପାଣି ୱିସ୍‌ତାର୍‌ ଗାଲିଲିଦୁ, ୱାର୍‌ ନିଜେଦି ଗାଡ଼୍‍ତି ନାଜରିତଦୁ ଡ଼େସି ସର୍ହାର୍‌ । 40 ମାରି, କଡ଼ ଦିରେ ଦିରେ ପିର୍‌ଦେଙ୍ଗ୍‌ ଆସ୍‌ତାନ୍‌ ମାରି ବୁଦିଦାନ୍‌ବା ପିର୍‌ଜି ସାକ୍ତି ଆତାନ୍‌, ମାରି ମାପ୍‌ରୁଦି ଆସିର୍ବାଦ୍‌ ୱାନି ମୁସ୍‌କୁ ମାର୍ହାତ୍‌ ।

41 ଜିସୁଦି ବୁବାୟାୟା ୱିଜୁ ବାର୍‌ର୍ସେକ୍‌ ନିସ୍ତାର୍‌ ପଣ୍ତୟ୍‌ ସମୟତୁ ଜିରୁସାଲମ୍‍ତୁ ସଲ୍‌ସି ମାର୍‌ଆର୍‌ । 42 ଜିସୁଙ୍ଗୁଁ ବାର ବାର୍ସେକ୍‍ ଆତିୱାଲେ ୱାର୍‌ ୱାରି ରିତିଦାନ୍‌ ଜିରୁସାଲାମ୍‍ତୁ ପଣ୍ତୟ୍‍କିଦେଙ୍ଗ୍‍ ସର୍‌ଆର୍‌ । 43 ମାରି ପଣ୍ତୟ୍‌ତି ଦିନ୍‌ ୱିସ୍‌ତାର୍‌ରୋ ଏସ୍ତିୱାଲେ ୱାର୍‌ ଡ଼େସିସଲ୍‍ସିମାର୍‍ଆର୍‍, ନାସ୍ତିୱାଲେ କଡ଼ ଜିସୁ ଜିରୁସାଲମ୍‍ତୁ ତେବାତାନ୍‌, ମାରି ୱାନି ବୁବାୟାୟା ଆକା ନେସ୍‌ତେଙ୍ଗ୍‌ ଆଟ୍‍ଏତାର୍‍ । 44 ମାତର୍‌ ଜିସୁ ସଙ୍ଗ୍‍ ଲୋକାୱାଲେ ଅର୍‌ସେ ମାନାନ୍‌ ଇଜି ଅଡ଼୍‌ବିତାର୍‌ ୱାର୍‌ ଅର୍‌ନେଟି ସାରି ସର୍‌ଆର୍‌, ମାରି ଇଣ୍ତ୍ରଣି ଲୋକାମାନୁ ମାରି ନେସ୍‌ତି ଲୋକାମାନୁ ଜିସୁଙ୍ଗୁଁ ପଇଜି ଅତାର୍‍, 45 ମାରି ଜିସୁଙ୍ଗୁଁ ପଏତାର୍‌ନୋ ପଇଜି ପଇଜି ଜିରୁସାଲମତୁ ମାରିଡ଼େସି ସର୍‌ଆର୍‌ । 46 ମୁନେଟି ୱେନ୍‌କା ୱାର୍‌ ଜିସୁଙ୍ଗୁଁ ମନ୍ଦିରତୁ ପ‍ଇତାର୍‌; ୱାନ୍‌ ଦାର୍ମୁଗୁରୁରି ୱାଲେ ବାସ୍‌ତାନ୍‌ନୋ ୱାରି ମାଟା ୱେନ୍‌ଜି ମାର୍‌ଆନ୍‌ ମାରି ୱାରିଙ୍ଗ୍‌ ପ୍ରସ୍ନ ୱେନ୍‌ବାଜି ମାର୍‌ଆନ୍‌ । 47 ମାରି ଏସଲୋକ୍‌ ୱାନି ମାଟା ୱେନ୍‌ଜି ମାର୍‌ଆର୍‌, ୱିଜେରେ ୱାନି ବୁଦିଦିଙ୍ଗ୍‌ ମାରି ମାଟାଦିଙ୍ଗ୍‌ କାବାଆଜି ମାର୍‌ଆର୍‌ । 48 ଜୋସେପ ମାରି ମରିୟମ୍‌ ଜିସୁଙ୍ଗୁଁ ସୁଡ଼ୁଜି କାବା ଆତାର୍‌, ମାରି ୱାନି ଆଇସି ୱାନିଙ୍ଗ୍‌ ଇର୍ହାତ୍‌, "ଏ କଡ଼, ମା ଉଣ୍ତିଙ୍ଗ୍‌ ଏନ୍ଧା ଇୟାୱାଜା କିତି ? ସୁଡ଼ୁଆ, ମି ବୁବା ମାରି ନାନ୍ ନାଣ୍ଡ୍ ସିନ୍ତା କିଜି ନିଙ୍ଗିଁ ପଇଜିନାପ୍‌ ।" ଜିରୁସାଲାମ୍‌ ମନ୍ଦିର୍‌

49 ଆବେନ୍‌ ଜିସୁ ୱାରିଙ୍ଗ୍‌ ଇର୍ହାନ୍‌, "ଏନ୍ଧା ମିର୍‌ ନାଙ୍ଗିଁ ପଇଜି ମାର୍ହିଦେର୍‌ ? ନା ବୁବାଦି ଇଣ୍ତ୍ର ମାଣ୍ତ୍ରେଙ୍ଗ୍‌ ଯେ ନାଙ୍ଗିଁ ଅଦିକାର୍‌ ମାନାତ୍‌, ଇକା ଇନିକା ମିର୍‌ ନେସ୍‌ଇ ମାର୍ହିଦେର୍‌ ?" 50 ମାତର୍‌ ୱାନ୍‌ ୱାରିଙ୍ଗ୍‌ ଏମେ ମାଟା ୱେର୍‌ତାନ୍‌, ଆକା ୱାର୍‌ ବୁଜାଦେଙ୍ଗ୍‌ ଆଟ୍‍ଏତାର୍‍ ।

51 ୱେନ୍‌କା ଜିସୁ ୱାରିୱାଲେ ଡ଼େସି ନାଜରିତଦୁ ୱାତାନ୍‌ ମାରି ୱାନ୍‌ ୱାରି ୱିଜୁ ମାଟା ମାନାତାନ୍‌; ମାରି, ୱାନି ଆଇସି ଇୟାୱିଜୁ ମାଟା ନିଜେଦି ମାନ୍‌ ଲୋଇ ଇଡ୍‌ଜି ସିନ୍ତା କିତାତ୍‌ । 52 ମାରି, ଜିସୁ ବୁଦିଦୁ ମାରି ମେନ୍ଦଲ୍‌ତୁ, ମାରି ମାପୁରୁମାନୁ ମାରି ଲୋକା ଦୟାଦାନ୍‌ ପିର୍‌ଦେଙ୍ଗ୍‌ ଆସ୍‌ତାନ୍‌ ।