1 ଜିସୁ ଆୟା ବାଡିଦାନ୍‌ ସର୍‌ଆନ୍‌ ନୋ ଜିହୁଦା ଇତିରାଜିଦୁ ସର୍‌ଆନ୍‌ ମାରି ଜର୍ଦନ ଗାଡା ନାଆଜି ୱାତାନ୍‌; ମାରି ନାଣ୍ତ ଲୋକୁ ମାରିଡ଼େସି ଜିସୁ ଲାକ୍‌ତୁ ଉଣ୍ତାତାର୍‍, ଜିସୁ ଆଗ୍‍ଡ଼ିରି ୱାଜାନେ ୱାରିଙ୍ଗ୍‌ ସିକିୟା ସିଦେଙ୍ଗ୍‍ ଆସ୍‌ତାନ୍‌ ।

2 ଏସୋ ଲୋକୁ ପାରୁସିର୍‌ ଜିସୁ ଲାକ୍‌ତୁ ୱାଜି ୱାନିଙ୍ଗ୍‌ ପରିକା କିଜି ୱେନ୍‌ବାତାର୍‌, "ନିଜେଦି ଆଡ଼ିଦିଙ୍ଗ୍‍ ଡ଼ିସ୍‍ତେଙ୍ଗ୍‍ଁ ଇନିକା ମେମାରି ତରଟାନ୍‍ ମା ନିୟମ୍‌ ମାନାତ୍‌ ନୋ ?"

3 ଜିସୁ ୱାରିଙ୍ଗ୍‌ ଉତର୍‌ ସିତାନ୍‌, "ମୋସା ମିଙ୍ଗିଁ ଇନି ମାଟା ୱେର୍‍ତା ମାନାନ୍‌ ?"

4 ✝ ୧୦:୪ ମାତିଉ ୫:୩୧. ୱାର୍‌ ୱେର୍‌ତାର୍‌, "ଡ଼ିସ୍‌ନି ଆକୁ ରାସ୍‌ସି ଆଇମାଦିଙ୍ଗ୍‍ ଡ଼ିସ୍‍ତେଙ୍ଗ୍‍ଁ ମୋସା, ୱେର୍‍ତା ମାନାନ୍‌ ।"

5 ଜିସୁ ୱାରିଙ୍ଗ୍‌ ଇର୍ହାନ୍‌, "ମି ଜିବନ୍‍ତି ଆଟୁୱାଦିଙ୍ଗ୍‍ ସୁଡ଼୍‌ଜି ମୋସା ମିଙ୍ଗିଁ ଇୟାୱାଜା ବିଦି ରାସ୍ତା ଇଟ୍‌ଟା ମାନାନ୍‌ । 6 ମାତର୍‌ ଏଣ୍ତେସ୍‌ ସାସ୍ତ୍ର ଇନାତ୍‍, ଆୟାୱାଜା ତିଆର୍‌ ଆନି ଆଗ୍‍ଡ଼ିରାନ୍‍ ମାପୁରୁ ୱାରିଙ୍ଗ୍‌ ମେମାରି ନି ଆଇମା କିଜି ତିଆର୍‌ କିତାନ୍‌ । 7 ଆଦେଙ୍ଗ୍‌ ଅରେନ୍‍ ଇୟାଉଣ୍ତିଙ୍ଗ୍‌ ମେମାର୍‌ଏନ୍‌ ନିଜେଦି ବୁବାୟାୟେଙ୍ଗ୍‌ ଡ଼ିସ୍‌ସି ନିଜେଦି ଆଡ଼୍‌ସି ୱାଲେ ତେବାନାନ୍‌ ମାରି ଆୟା ରିଏର୍‌ ଅରେନ୍‌ଆନାର୍‍, 8 ୱାର୍‌ ରିଏର୍‌ ଉଣ୍ତ୍ରେନେ ଆନାର୍‌ । ମାରି ୱାର୍‌ ରିଏର୍‌ ଆଏର୍‌, ମାତର୍‌ ଉଣ୍ତ୍ରେନେ ଆନାର୍‌ । 9 ମାପୁରୁ ଆମାକା ମିସାକିତା ମାନାନ୍‌, ଆକା ଲୋକୁ ୱାରିଙ୍ଗ୍‌ ୱେର୍‌ଏ କିମାକିର୍‍ ।"

10 ୱେନ୍‌କା ସିସୁର୍‍ ଇନ୍‌ଡ୍ର ଡ଼େସି ୱାତି ୱେନ୍‌କା ଜିସୁଙ୍ଗୁଁ ଇୟା ବିସୟ୍‌ତୁ ମାରିଡ଼େସି ୱେନ୍‌ବାତାର୍‌ । 11 ✝୧୦:୧୧ ମାତିଉ ୫:୩୨; ୧ କରିନ୍ତିୟ ୭:୧୦,୧୧.ଆବେନ୍‌ ଜିସୁ ୱାରିଙ୍ଗ୍‌ ଇର୍‌ଆନ୍‌, "ଏନ୍‌ଆପିନ୍‌ ନିଜେଦି ଆଡ଼ିଦିଙ୍ଗ୍‍ ଡ଼ିସ୍‍ନାନ୍‍ ନୋ ମାରି ଉନ୍‍ଣ୍ତ୍ରିତାନିଙ୍ଗ୍‍ ପେଡ଼ି ଆନାନ୍‌, ଆୟା ମେମାରି ଆଡ଼ିସ୍‍ ବିରଦ୍‌ତାନ୍‌ ଦାରିପାଣି କିନାନ୍‍; 12 ମାରି, ଜଦି ଏମେ ଆଇମା ନିଜେତି କନ୍‍ଲିଙ୍ଗ୍‍ ଡ଼ିସ୍‍ସି ମାରି ଅରେନ୍‌ ମେମାର୍‌ଏନ୍‌ତିଙ୍ଗ୍‍ ପେଡ଼ି ଆନାତ୍‌, ଆୟା ଆଇମା ବା ଦାରି ପାପ୍‌ତୁ ଦସ୍‌ ଆନାତ୍‌ ।"

13 ଜିସୁ ଏଣ୍ତେସ୍‌ ଇସ୍ରି କଡ଼ରିଙ୍ଗ୍‌ କିୟୁ ଇଡ୍‌ଜି ଆର୍ସିବାଦ୍‌ କିନି ଉଣ୍ତିଙ୍ଗ୍‌, ଲୋକୁ ଇସ୍ରି କଡ଼ରିଙ୍ଗ୍‌ ଜିସୁ ଲାକ୍‌ତୁ ତାତାର୍; ମାତର୍‌ ସିସୁର୍‍ ଆୟା ଲୋକାଙ୍ଗ୍‌ ଆଦ୍‌ରିସ୍‌ତେଙ୍ଗ୍‍ ଆସ୍‌ତାର୍‌ । 14 ସିସୁର୍‍ ଲୋକାଙ୍ଗ୍‌ ଲାଗାନିକା ସୁଡ଼୍‍ଜି, ଜିସୁ ସିସୁରି ମୁସ୍‌କୁ ରିସା ଆତାନ୍‌ନୋ ଇର୍ହାନ୍‌, "ଇସ୍ରି କଡ଼ରିଙ୍ଗ୍‌ ନା ଲାକ୍‌ତୁ ୱାଦେଙ୍ଗ୍‌ ସିଦୁ, ୱାରିଙ୍ଗ୍‌ ମାନା କିମାଟ୍‌; ଏନ୍ଧା ଇରିଙ୍ଗ୍‌ ମାପୁରୁତି ରାଜି ଇୟାୱାଜା ଇସ୍ରି କଡ଼ରିଦି । 15 ✝୧୦:୧୫ ମାତିଉ ୧୮:୩.ନାନ୍ ମିଙ୍ଗିଁ ସତ୍‌ ଇଜିନା, ଏନ୍‌ ଜଦି ଇସ୍ରିକଡ଼ୱାଜା ମାପୁରୁଦି ରାଜିଦିଙ୍ଗ୍‍ ଆସ୍‍ଏନ୍‍, ୱାଣ୍ତ୍ରୁ ଏଣ୍ତେସ୍‌ କିଜିବା ଆବେନ୍‌ ଡ଼ୁଗୁଦେଙ୍ଗ୍‍ ଆଟ୍‍ଏନ୍‍ ।" 16 ଇୟା ୱେନ୍‌କା ଜିସୁ ୱାରିଙ୍ଗ୍‌ ଗାତୁ ଆସ୍‌ତାନ୍‌ନୋ କଡ଼ରି ମୁସ୍‌କୁ କିୟୁ ଇଡ୍‌ଜି କଡ଼ରିଙ୍ଗ୍‌ ଆର୍ସିବାଦ୍‌ କିତାନ୍‍ ।

17 ଜିସୁ ମାରିଡ଼େସି ସନିୱାଲେ ଅରେନ୍‍ ଲୋକୁ ଉରୁକ୍‍ସି ୱାଜି ଜିସୁଦି ଆଗ୍‌ଡ଼ି ମେଣ୍ତେଙ୍ଗ୍‌ ଗଟ୍‍କିଜି ୱାନିଙ୍ଗ୍‌ ୱେନ୍‌ବାତାନ୍‌, "ଏ ସତ୍‍ ଗୁରୁ, ଏସ୍‌କାଙ୍ଗ୍‌ୱିଜିଇ ଜିବନ୍‌ ପୟ୍‌ନି ଉଣ୍ତିଙ୍ଗ୍‌ ନାନ୍ ଇନିକା କିଦେଙ୍ଗ୍‌ ଆନାତ୍‌ ?"

18 ଆବେନୁ ଜିସୁ ୱାନିଙ୍ଗ୍‌ ଇର୍ହାନ୍‌, "ନାଙ୍ଗିଁ ନେଗିକାନ୍‍ ଇଜି ଇନିଦାନିଙ୍ଗ୍‌ ଇଜିନି ?" ମାରି ମାପୁରୁଙ୍ଗୁଁ ଡ଼ିସ୍‍ତିଙ୍ଗ୍, "ମାରି ଆଇକାନ୍‍ ଏନ୍‌ବା ସତ୍‌ ସିଲେ । 19 ନିନ୍‌ ସାସ୍ତ୍ରଦି ନିୟମ୍‌କୁ ୱିଜୁ ନେସ୍ତିମାନି, ଲୋକାଙ୍ଗ୍‌ ସାୟାମାର୍‌ଗା ଡାକ୍‌ମାଟ୍‌, ଦାରିପାଣି କିମାଟ୍‌, ଡଙ୍ଗାଁ କିମାଟ୍‌, ଏ ବିରଦ୍‌ତାନ୍‌ ମିସ୍‌ ମାଟା ଇନ୍‌ଡ୍ରେଙ୍ଗ୍‌ ଆଏତ୍‍, ଲୋକାଙ୍ଗ୍‌ ଆସା କିମାଟ୍‌, ନିଜେଦି ବୁବା ୟାୟାଏଙ୍ଗ୍‍ ମାନାଦୁ ।"

20 ଆୟା ମାଜନ୍‌ ଲୋକୁ ଇର୍‌ଆନ୍‌, "ଏ ଗୁରୁ, ଇୟାୱିଜୁ ନାନ୍ ମୁରୁଲିୱାଲେରାନ୍‍ ଇୟାୱିଜୁ ନିୟମ୍‌ ମାନାଜି ୱାଜିନା ।"

21 ଜିସୁ ୱାନି ତରିଣ୍ତ୍‍ ସୁଡ଼୍‌ଜି ୱାନିଙ୍ଗ୍‌ ଲାଡ୍‍କିଜି ଇର୍‌ଆନ୍‌, "ନି ଉଣ୍ତ୍ରିବିସୟ ଉଣାମାନାତ୍‌, ସାଙ୍ଗ୍‍ଆ ନି ୱିଜୁ ଦନ୍‌ ସମ୍ପତ୍ତି ପର୍‍ସୋ କାକୁର୍ତି ଲୋକାଙ୍ଗ୍‌ ଡାବୁଙ୍ଗୁଁ ବାଟାକିଜି ସିଆ, ଆବେଟ୍‌ ନିନ୍‌ ମୁସ୍‌କୁପୁର୍‌ତି ଦନ୍‍ ପଇନି; ମାରି, ୱାଜି ନା ୱେନ୍‌କା ବୁଲାଆ ।" 22 ଜିସୁଦି ଇୟା ମାଟା ୱେର୍‌ଆନ୍‌ ନୋ ଆୟା ଲୋକ୍‌ତି ମକମ୍‌ ୱାର୍‌ତା ସର୍‌ଆତ୍‌ ମାରି ୱାନ୍‌ ଦୁଃକ୍‍ ଆଜି ଇନ୍‌ଡ୍ର ସର୍‌ଆନ୍‌, ଇରିଙ୍ଗ୍‌ ୱାନିଙ୍ଗ୍‌ ନାଣ୍ତ ଦନ୍‍ ସମ୍ପତ୍ତି ମାର୍‌ଆତ୍‌ ।

23 ଜିସୁ ସାରିବେଡ଼୍‍ତି ସୁଡ଼ୁତାନ୍‌ ନୋ ନିଜେଦି ସିସୁରିଙ୍ଗ୍‌ ଇର୍ହାନ୍‌, "ଏମେ ଲୋକାଙ୍ଗ୍‌ ନାଣ୍ତ ଦନ୍‍ ମାନାତ୍‌, ୱାରୁ ବେସି କାସ୍ଟୁଦାନ୍‍ ମାପୁରୁତି ରାଜିଦୁ ସନ୍‌ଡ଼୍ରେଙ୍ଗ୍‌ ଆଟ୍‍ନାର୍‍ ।"

24 ଜିସୁଦି ମାଟା ୱେନ୍‌ଜି ସିସୁର୍‍ କାବାଆତା ସର୍‌ଆର୍‌ । ମାତର୍‌ ଜିସୁ ମାରିଡ଼େସି ୱାରିଙ୍ଗ୍‌ ଇର୍‌ଆନ୍‌, "ଏ ନା କଡ଼ର୍‌, ମାପୁରୁଦି ରାଜିଦୁ ସନ୍‌ଡ଼୍ରେଙ୍ଗ୍‌ ସତେନେ କାସ୍ଟୁ ! 25 ଉଣ୍ତ୍ରି ସୁଜିଦି ବର୍‌ ସିଜି ଉଟ୍‌ ଡ଼ୁଗୁନିକା ଉସାସ୍‌, ମାତର୍‌ ଅରେନ୍‍ ମାଜନ୍‌ ଲୋକୁ ମାପୁରୁଦି ରାଜିଦୁ ସନିକା କାସ୍ଟୁ ।"

26 ଇୟା ମାଟା ୱେନ୍‌ଜି ସିସୁର୍‍ ନାଣ୍ତ କାବା ଆତାର୍‌ ନୋ ୱାରିୱାରି ଲୋଇ ୱାର୍‌ଗିଜି ସାତାର୍‌, "ଆର୍‌ତିଙ୍ଗ୍‌ ଏନ୍‌ ରକିୟା ପଇଦେଙ୍ଗ୍‍ ଆଟ୍‍ନାନ୍‍ ?"

27 ଜିସୁ ସିସୁରିଙ୍ଗ୍‌ ସାଡ଼୍‌କୁ ସାଡ଼୍‌କୁ ସୁଡ଼୍‍ଜି ଇର୍ହାନ୍‌, "ଇକା ଲୋକାଦି ଉଣ୍ତିଙ୍ଗ୍‌ ଆଟ୍‌ୱା, ମାତର୍‌ ମାପୁରୁଦିଙ୍ଗ୍‌ ଉଣ୍ତିଙ୍ଗ୍‌ ଉସାସ୍‌, ଇରିଙ୍ଗ୍‌ ମାପୁରୁ ୱିଜୁ କିଦେଙ୍ଗ୍‍ ଆଟ୍‍ନାନ୍‍ ।"

28 ଇୟା ମାଟା ୱେନ୍‌ଜି ପିତର୍‌ ଜିସୁଙ୍ଗୁଁ ଇର୍ହାନ୍‌, "ସୁଡ଼୍‌ଆ, ମାପ୍‌ ୱିଜୁ ଡ଼ିସ୍‍ସି ନି ୱେନ୍‍କା ୱାତା ମାନାପ୍‌ ।"

29 ଜିସୁ ଇର୍ହାନ୍‌, "ନାନ୍ ମିଙ୍ଗିଁ ସତ୍‌ ଇଜିନା," ଏମେ ଲୋକୁ ନା ୱେନ୍‌କା ୱାନି ଉଣ୍ତିଙ୍ଗ୍‌ "ମାରି ନା ସୁସମାଚାର୍‌ ୱେର୍‍ନି ଉଣ୍ତିଙ୍ଗ୍‌ ଏନ୍‍ବା ଇଲୁ, ତଡ଼ାନ୍‌ତିଙ୍ଗ୍‌ ନି ତାଙ୍ଗିଁ, ବୁବା ନି ୟାୟେଙ୍ଗ୍‌, କଡ଼କକ୍ରାରିଙ୍ଗ୍‌ ମାରି ବୁମିବାଡ଼ା ଡ଼ିସ୍‌ତାମାନାନ୍‌, 30 ମାରି ଇଲେଇ ଇୟା ଜଗ୍‌ତୁ ଦାପେ ଦାପେନେ ଶହେ ଗୁଣୁତାନ୍‍ ଇଲୁ, ତଡ଼ାନ୍‍, ତାଙ୍ଗିଁ, ୟାୟା, ମାରିନ୍‌, ଗାଡ଼ି, ମାରି ଭୁମିବାଡ଼ିଦି ୱାଲେ କାସ୍ଟୁ ବା ପଇନାନ୍‍ । ମାରି ୱାନି ଦିନ୍‌ତୁ ଏସ୍‌କାଙ୍ଗ୍‌ୱିଜ୍‍ଇ ଜିବନ୍‌ ପଇନାନ୍‍ । 31 ✝୧୦:୩୧ ମାତିଉ ୨୦:୧୬; ଲୁକ ୧୩:୩୦.ମାତର୍‌ ଇଲେଇ ଏମେ ଲୋକ୍‌ଡର୍‌ ଆଗ୍‌ଡ଼ି ମାନାର୍‌, ୱାର୍‌ ୱେନ୍‌କା ଆନାର୍‌, ମାରି ୱେନ୍‌କା ମାନି ଲୋକ୍‌ଡର୍‌ ଆଗ୍‌ଡ଼ି ଆନାର୍‌ ।"

32 ଇୟା ୱେନ୍‌କା ୱାର୍‌ ଜିରୁସାଲାମ୍‍ତୁ ସନିୱାଲେ ସାରିଦୁ ମାରାଆନ୍‍ ମାରି ଜିସୁ ସିସୁରି ଆଗ୍‌ଡ଼ି ଆଗ୍‌ଡ଼ି ସଲ୍‍ସି ମାର୍‌ଆନ୍‌, ମାରି ଶିଶୁର୍‌ କାବାଆତା ସର୍‍ଆର୍‍, ମାରି ୱାନି ୱେନ୍‌କା ବୁଲାଜି ମାର୍‍ଇ ଲୋକ୍‌ଡର୍‌ ତିଲାତାସର୍‍ଆର୍‍ । ଜିସୁ ମାରିଡ଼େସି ବାର ଲୋକାଙ୍ଗ୍‌ କୁକ୍‍ସି, ୱାନି ଉଣ୍ତିଙ୍ଗ୍‌ ଇନିକା ଇନିକା ୱିଜୁ ଗଟେଆଦେଙ୍ଗ୍‍ ସଲ୍‍ସିନାତ୍‍, ଆୟା ବିସୟ୍‌ତାନ୍ ୱିଜୁ ସିସୁରିଙ୍ଗ୍‌ ଇନ୍‌ଡ୍ରେଙ୍ଗ୍‌ ଆସ୍‌ତାନ୍‌ । 33 ଜିସୁ ଇର୍ହାନ୍‌, "ୱେନ୍‌ଡ୍ରୁ, ମାପ୍‌ ଜିରୁସାଲମ୍‌ତୁ ସଲ୍‍ସିନାପ୍‍; ଆବେ ମନୁଷ୍ୟପୁତ୍ର ଜେ ନାନ୍ ପେରି ପେରି ଜାଜକ ମାରି ସାସ୍ତ୍ରିରି କିୟୁଦୁ ସେର୍‍ପାନା, ମାରି ୱାରୁ ନାଂଇ ସାନି ଦଣ୍ଡ୍‌ ସିନି ଉଣ୍ତିଙ୍ଗ୍‌ ଆଇ ଅଣଜିହୁଦି ଲୋକ୍‌ତି କିୟୁଦୁ ସର୍ପେ କିଜି ସିନାର୍‍, ନାଂଇ ବିଚାର୍‍ କିଜି ଡାକ୍‌ନାର୍‌ । 34 ମନୁଷ୍ୟପୁତ୍ରଦିଙ୍ଗ୍‍ ଜେ ନାନ୍ ୱାର୍‌ ନାଂଇ ସେମାର୍‌ କିନାର୍‍, ନା ମୁସ୍‌କୁ ପୁସ୍‍ନାର୍‍, ନାଂଇ କୋର୍‌ଡାଦାଣ୍ତ୍‍ ଡାକ୍‌ନାର୍‌ ମାରି ନାଂଇ ସାପିସ୍‌ କିନାର୍‍, ମାରି ମୁନେଟି ୱେନ୍‌କା ୱାନ୍‌ ମାରିଡ଼େସି ଜିବନ୍‌ଆଜି ନିଙ୍ଗିଁନାନ୍‌ ।"

35 ଜେବଦଦି ମାରିସିର୍‌ ଯାକୁବ ନି ଯୋହନ ଜିସୁ ଲାକ୍‌ତୁ ୱାତା ରୋ ଇର୍ହାର୍‌, "ଏ ଗୁରୁ," ମା ଉଣ୍ତିଙ୍ଗ୍‌ ଇନିକା ବା କିଆ, "ମାପ୍‌ ନିବାନୁ ଇନିକା ଲସ୍‍ନାପ୍‍, ଆୟାକା ମା ଉଣ୍ତିଙ୍ଗ୍‌ କିଆ ।"

36 ଜିସୁ ୱାରିଙ୍ଗ୍‌ ୱେନ୍‌ବାତାନ୍‌, "ନାନ୍, ମି ଉଣ୍ତିଙ୍ଗ୍‌ ଇନିକା କିନା ଇଜି ମିର୍‌ ଇନିକା ବଦା କିଜିନିଦେର୍‍ ?"

37 ୱାରୁ ଜିସୁଙ୍ଗୁଁ ଇର୍ହାର୍‌, "ମାପୁରୁତି ରାଜିଦୁ ଏସିୱାଲେ ନିନ୍‌ ମହିମାଦି ରାଜାଗଦିଦୁ ବାସ୍‌ନି ମା ମାଣ୍‌କୁ ଅରେନ୍‍ ଲୋକ୍‌ତିଙ୍ଗ୍‌ ନି ଉଣେରି କିୟୁ ତରିନ୍‍ ମାରି ଅରେନ୍‍ ଲୋକ୍‌ତିଙ୍ଗ୍‌ ନି ଡେବ୍‍ରିକିୟୁ ତରିନ୍‍ ବାସ୍ତେଙ୍ଗ୍‍, ମାଙ୍ଗିଁ ଇୟା ବର୍‌ ସିଦା ।"

38 ✝ ୧୦:୩୮ ଲୁକ ୧୨:୫୦. ମାତର୍‌ ଜିସୁ ୱାରିଙ୍ଗ୍‌ ଇର୍‌ଆନ୍‌, "ମିର୍‌ ଇନିକା ଲସ୍‌ସିନିଦେର୍‌, ଆୟାକା ମିର୍‌ ନେସ୍‌ତେଙ୍ଗ୍‌ କି ବୁଝାଦେଙ୍ଗ୍‍ ଆଟ୍‍ଏଜିନିଦେର୍‍ । ନାନ୍ ଏମେ ଦୁଃକୁ ବୋଗାଜି ଉଣ୍ତେଙ୍ଗ୍‌ ସନା, ଆୟା ଦୁଃକୁତିଙ୍ଗ୍‌ ବୋଗାଜି ଉଣ୍ତେଙ୍ଗ୍‌ ଆଟ୍‌ନିଦେର୍‌ ନୋ ? ନାନ୍ ଏମେ ସାନି ଡୁବନ୍‌ତୁ ଡୁବନ୍‌ ଅନା ମିର୍‌ ଇନିକା ଆୟା ଡୁବନ୍‌ତୁ ଅତେଙ୍ଗ୍‌ ଆଟ୍‌ନିଦେର୍‌ ନୋ ?"

39 ୱାର୍‌ ଜିସୁଙ୍ଗୁଁ ଇର୍ହାର୍‌, "ହୁଁ ମାପ୍‌ କିଦେଙ୍ଗ୍‌ ଆଟ୍‍ନାପ୍‍ ।" ଜିସୁ ୱାରିଙ୍ଗ୍‌ ଇର୍‌ଆନ୍‌, ନାନ୍ ଏମେ ଦୁଃକୁ ବୋଗାନା, "ମିର୍‌ ଆବେନୁ ଭୋଗାନିଦେର୍‍, ମାରି ନାନ୍ ଏମେ ସାନି ଡୁବନ୍‌ତୁ ଡୁବନ୍‌ ଅସିନା, ମିର୍‌ ନା ୱାଜା ଆବେନୁ ଡୁବନ୍‌ ଅତେଙ୍ଗ୍‌ ଆଟ୍‌ନିଦେର୍‌; 40 ମାତର୍‌ ନା ଉଣେରି କିୟୁ ତରିଣ୍ତ୍‍ ନି ଡେବିରି କିୟୁ ତରିଣ୍ତ୍‍ ବାସିସ୍‍ କିଦେଙ୍ଗ୍‌ ନା ଅଦିକାର୍ ବିସୟ୍‌ ସିଲେତ୍‌; ମାତର୍‌ ଏମେ ଲୋକ୍‌ତି ଉଣ୍ତିଙ୍ଗ୍‌ ମା ବୁବା ଆୟା ବାଡି ତିଆର୍‌ କିତା ଇଟ୍‌ତାମାନାନ୍‌, ଆୟା ବାଡିଦୁ ୱାର୍‌ ବାସ୍‍ନାର୍‍ ।"

41 ଇୟା ମାଟା ୱେର୍‌ଆର୍‌ ନୋ ଆଇ ଦାସ୍‌ଲୋକ୍‌ ସିସୁର୍‌ ଜାକୁବ ନି ଯୋହନତି ମୁସ୍‌କୁ ରିସା ଆତାର୍‌ । 42 ✝୧୦:୪୨ ଲୁକ ୨୨:୨୫,୨୬.ଜିସୁ ୱାରିଙ୍ଗ୍‌ ଲାକ୍‌ତୁ କୁକ୍‍ତାନ୍‍ନୋ ଇର୍‌ଆନ୍‌, "ଏମେ ଲୋକୁ ଅଣଜିହୁଦି ମାଣ୍‌କୁ ଶାସନ କିନି ଲୋକାୱାଜା ୱେଙ୍ଗ୍‌ଁନାର୍‌, ୱାର୍‌ ୱାରି ମୁସ୍‌କୁ ଶାସନ୍‍ କିଜିନାର୍‍ ମାରି ୱାରି ରାଜାର୍‌ ୱାରି ମୁସ୍‌କୁ ଶାସନ୍‍ କିଜିନାର୍‍, ମିର୍‌ ଇୟାକା ନେସ୍‌ତିମାନିଦେର୍‌ । 43 ✝୧୦:୪୩ ମାତିଉ ୨୩:୧୧; ମାର୍କ ୯:୩୫; ଲୁକ ୨୨:୨୬.ମାତର୍‌ ମି ମାନୁ ଆୟାୱାଜା ସିଲେତ୍‌; ମାତର୍‌ ମି ମାଣ୍‌କୁ ଏନ୍‌ ଜଦି ପେରିକାନ୍‌ ଆଦେଙ୍ଗ୍‌ ବଦା କିନାନ୍‍, ୱାଣ୍ତ୍‌ରୁ ମି ସେବାକିନିକାନ୍‍ ଆପିନ୍‌ । 44 ମାରି ମି ମାଣ୍‌କୁ ଏନ୍‌ଆପିନ୍‌ ପେରିକାନ୍‌ ଆଦେଙ୍ଗ୍‌ ବଦାକିନାନ୍‌, ୱାଣ୍ତ୍‍ରୁ ୱିଜେରି ଗତିମୁରୁଲି ଆପିନ୍‌ । 45 ଇରିଙ୍ଗ୍‌ ମନୁସ୍ୟପୁତ୍ର ଜେ ନାନ୍ ସେବା ପ‍ଇଦେଙ୍ଗ୍‌ ରେଏ, ମାତର୍‌ ସେବା କିଦେଙ୍ଗ୍‌ ୱାତାମାନା ମାରି ୱିଜୁ ଲୋକାଙ୍ଗ୍‌ ରକିୟା କିିଜି ନିଜେଦି ଜିବନ୍‌ ସିଦେଙ୍ଗ୍‍ ଇଜି ୱାତାମାନା ।"

46 ଜିସୁ ମାରି ୱାନି ସିସୁର୍‍ ଜିରିହୋ ଗାଡ଼୍‌ତୁ ୱାତାର୍‌, ମାରି ୱାର୍‌ ନାଣ୍ତଲୋକୁ ୱାଲେ ସଲ୍‍ସି ମାର୍‌ଆର୍‌, ଯିରିହୋତି ଆୟା ଗାଡ଼୍‌ ଡ଼ିସ୍‍ସି ସନିୱାଲେ, ଟିମାୟଦି ମାରିନ୍‌ ବାର୍ଟୀମୟ ଦରତିକାନ୍‍ ଅରେନ୍‍ କାଣା ଭିକାରି ସାରି ଲାକ୍‌ତୁ ବାସ୍ତା ମାର୍‌ଆନ୍‌ । 47 ୱାନ୍‌ ଜେ ନାଜରିତିୟ ଜିସୁ, ଆୟା ସାରିଦୁ ସଲ୍‌ସିନାନ୍‌ ଇଜି ୱେନ୍‌ଜି ଆୟା କାଣା ବିକାରି ନାଣ୍ତ୍‍ ଆଉଲି ଆଜି ଇର୍‌ଆନ୍‌, "ଏ ଦାଉଦତି ମାରିନ୍‌ ଜିସୁ, ନାଙ୍ଗିଁ ଦୟା କିଆ ।"

48 ଆବେନୁ ଏସଲୋକ୍‌ ୱାନିଙ୍ଗ୍‌ ଆଲେଜ ମାନ୍‌ଡ଼୍ରେଙ୍ଗ୍‌ ଇଜି ଆଦିରିସ୍‌ତେଙ୍ଗ୍‍ ଆସ୍‌ତାର୍‌, ମାତର୍‌ ୱାଣ୍ତ୍ରୁ ମାରି ନାଣ୍ତଦାଣ୍ତ୍‍ ଆଉଲି ଆଜି ଇର୍‌ଆନ୍‌, "ଏ ଦାଉଦତି ମାରିନ୍‌, ନାଙ୍ଗିଁ ଅଡ଼ପ୍‍ ଦୟା କିଆ !"

49 ଆବେନୁ ଜିସୁ ତେବାତାନ୍‍ ନୋ ଇର୍‌ଆନ୍‌, "ୱାନିଙ୍ଗ୍‌ କୁକ୍‍ତୁ ।" ୱାର୍‌ ଆୟା କାଣା ଭିକାରିତିଙ୍ଗ୍‍ କୁକ୍‍ସି ଇର୍ହାର୍‌, "ସାସ୍‌ ଆସ୍‌ଆ, ନିଂଆ, ଜିସୁ ନିଂଇ କୁକ୍‍ସିନାନ୍‍ ।"

50 ଆବେଟ୍‌ ୱାଣ୍ତ୍ରୁ ନିଜେଦି ସାଦର୍‌ ପୋକ୍‌ତାନ୍‌ ନୋ ନିଂଇଜି ଜିସୁ ଲାକ୍‌ତୁ ୱାତାନ୍‌ ।

51 ଜିସୁ ୱାନିଙ୍ଗ୍‌ ୱେନ୍‌ବାତାନ୍‌, "ନାନ୍ ନି ଉଣ୍ତିଙ୍ଗ୍‌ ଇନିକା କିନା ଇଜି ନିନୁ ବଦା କିଜିନି ?" ଆୟା କାଣା ଲୋକୁ ଜିସୁଙ୍ଗୁଁ ଇର୍‌ଆନ୍‌, "ଏ ଗୁରୁ, ନାନ୍ ଏଣ୍ତେସ୍‌ ସୁଡ଼ୁଦେଙ୍ଗ୍‌ ଆଟ୍‍ନା ।"

52 ଜିସୁ ୱାନିଙ୍ଗ୍‌ ଇର୍‌ଆନ୍‌, "ସାଙ୍ଗ୍‍ଆ, ନି ବିସ୍‌ବାସ୍‌ ନିଙ୍ଗିଁ ନେଗେନ୍‍ କିତାମାନାତ୍‌ ।" ଆୟା ଦାପ୍ରେନେ କାଣା ୱାନି ସୁଡ଼ୁନି ସାକ୍ତି ପ‍ଇତାନ୍‌ ନୋ ସାରିଦୁ ଜିସୁ ୱେନ୍‌କା ୱେନ୍‌କା ବୁଲାଦେଙ୍ଗ୍‌ ଆସ୍‌ତାନ୍‌ ।