ଅଙ୍ଗୁର୍ କିଡ଼ିଇ ମାରି ବାଗ୍ତୁ ପାଣିକିନି ଲୋକା କାତା
1 ଇୟା ୱେନ୍କା ଜିସୁ ୱାରିଙ୍ଗ୍ କାତାଦାନ୍ ଇର୍ଆନ୍, ଅରେନ୍ ଲୋକ୍ ଉଣ୍ତ୍ରି ଅଙ୍ଗୁର୍ କିଡ଼ିଇ ଆରାମ୍ କିଜି ଆୟା କିଡ଼ିଇଦି ସାରିବେଡ଼୍ତି କୋଅଟି ତିଆର୍ କିତାନ୍, ମାରି ଅଙ୍ଗୁର୍ରସ୍ ଇଡ୍ଦେଙ୍ଗ୍ ଗୁଟା କାରିତାନ୍ ମାରି କାପ୍କିନି ଗୁଡ଼ା ତିଆର୍ କିତାନ୍, ଆୟାୱେନ୍କା ୱାନ୍ ବାଗ୍ତୁ ପାଣିକିନିୱାରିଙ୍ଗ୍ ଆୟା ଡଡି ବାଗ୍ତାନ୍ ସିତାନ୍ନୋ ଆଇଦେସ୍ତୁ ସୋର୍ହାନ୍ । 2 ତାନେ ୱେନ୍କା ବାଗ୍ତୁପାଣିକିନି ୱାରି ମାଣ୍କୁ ଅଙ୍ଗୁର୍ କିଡ଼ିଇଦାନ୍ ଫଳ୍ ନିଜେତି ବାଗ୍ ଲୋସ୍ନି ତାନି ଉଣ୍ତିଙ୍ଗ୍ ୱାନ୍ ଅରେନ୍ ଗତିମୁରୁଲିଙ୍ଗ୍ ନାସ୍ତିୱାଲେ ପାଣିକିନିୱାରି ଲାକ୍ତୁ ପକ୍ତାନ୍ । 3 ମାତର୍ ୱାର୍ ଆୟା ଗତିମୁରୁଲିଙ୍ଗ୍ ଆସ୍ତାରୋ ଡାକ୍ତାର୍ନୋ ୱାର୍ଇ କିୟୁଦୁ ପକ୍ତାର୍ । 4 ଆୟାୱେନ୍କା ସାଉକାର୍ ମାରି ଅର୍ସୁ ମାରି ଅରେନ୍ ପାଣିକିନି ଗତିମୁରୁଲିଙ୍ଗ୍ ପୋକ୍ତାନ୍; ୱାର୍ ଆୟାୱାନିଙ୍ଗ୍ ବା ୱାନି ତାଲା ପାଟ୍ତାର୍ ମାରି ୱାନିଙ୍ଗ୍ ନିସାର୍ କିତାର୍ । 5 ଇୟା ୱେନ୍କା ମାରି ଅରେନ୍ ୱାନିଙ୍ଗ୍ ପକ୍ତାନ୍, ୱାର୍ ଆୟାୱାନିଙ୍ଗ୍ ବା ସାୟାମାର୍ଗା ଡାକ୍ତାର୍ । ସାଉକାର୍ ମାରିଡ଼େସି ମାରି ଏସ ଲୋକାଙ୍ଗ୍ ପକ୍ତାନ୍; ୱାରି ଲୋଇ ଏସୋ ଲୋକାଙ୍ଗ୍ ଡାକ୍ତାର୍ ମାରି ଏସ ଲୋକାଙ୍ଗ୍ ସାୟାମାର୍ଗା କାତ୍ତାର୍ । 6 ସାଉକାର୍ତି ଲାକ୍ତୁ ଅରେନ୍ନେ ବାକି ମାନାନ୍, ୱାଣ୍ତ୍ରୁ ୱାନି ନିଜେଦି ଲାଡ୍ତି ମାରିନ୍ । ନା ମାରିନ୍ତିଙ୍ଗ୍ ୱାର୍ ଏଣ୍ତେସ୍ବା ମାନାନାର୍, ଇୟାୱାଜା ଅଡ଼୍ବିଜି ସାରାସାରି ୱେନ୍କା ଆୟାୱାରି ଲାକ୍ତୁ ନିଜେଦି ମାରିନ୍ତିଙ୍ଗ୍ ପୋକ୍ତାନ୍ । 7 ମାତର୍ ଆୟା ବାଗ୍ତୁ ପାଣିକିନି ଲୋକୁ ୱାରି ୱାରି ଲୋଇ ୱାର୍ଗିତାର୍, ଇକାନ୍ ସାଉକାର୍ତି ମାରିନ୍, ରାଦୁ, ୱାନିଙ୍ଗ୍ ସାୟାମାର୍ଗା ଡାକ୍ନାଟ୍; ଆବେଟ୍ ସାଉକାର୍ତି ଦନ୍ ୱିଜୁ ମା କିୟୁଦୁ ୱାନାତ୍ । 8 ଆବେଟ୍ ୱାର୍ ସାଉକାର୍ତି ମାରିନ୍ତିଙ୍ଗ୍ ଆସ୍ତାର୍ନୋ ସାୟାମାର୍ଗା ଡାକ୍ତାର୍ ମାରି ମାଡ଼ାଦିଙ୍ଗ୍ ଅଙ୍ଗୁର୍ କିଡ଼ିଇ ଡ଼ିସ୍ସି ଆଇ ବାଡିଦୁ ପେର୍ତା ପକ୍ତାର୍ ।
9 ଜିସୁ ୱେନ୍ବାତାନ୍, "ଇୟା ୱେନ୍କା ଆୟା ଅଙ୍ଗୁର୍ କିଡ଼ିଇଦି ସାଉକାର୍ ଇନିକା କିନାନ୍ ?" ଆୟା ସାଉକାର୍ ୱାଜି ଏଣ୍ତେସ୍ବା ଆୟାୱାରିଙ୍ଗ୍ ସାୟାମାର୍ଗା ଡାକ୍ନାନ୍ ମାରି ଆୟା ଅଙ୍ଗୁର୍ କିଡ଼ିଇଦିଙ୍ଗ୍ ଆଇ ଲୋକାଙ୍ଗ୍ ବାଗ୍ତୁ ପାଣିକିନି ଉଣ୍ତିଙ୍ଗ୍ ସିନାନ୍ । 10 ମିର୍ ଦାର୍ମୁସାସ୍ତ୍ରଦୁ ଇୟା ମାଟା ବା ପଡ଼ାଇଦେର୍,
ଇଲୁ ତର୍ନି ମିସ୍ତ୍ରିର୍ ଏମେ କାଲୁଦିଙ୍ଗ୍ ଦର୍କାର୍ ଆଏତ୍ ଇର୍ହାର୍,
ଆକାନେ କନାଦି ମୁଲ୍ କାଲୁ ଆତାତ୍;
11 ପ୍ରବୁ ମାଣ୍କୁ ଇକା ଆତାତ୍,
ମାରି ଆକା ମା ଉଣ୍ତିଙ୍ଗ୍ ଏସା କାବାଦି ମାଟା !
12 ଆବେନ୍ ଜିହୁଦି ନେତାର୍ ୱାନିଙ୍ଗ୍ ଆସ୍ତେଙ୍ଗ୍ ଇଜି ବଦାକିତାର୍, ମାତର୍ ୱାର୍ ଲୋକାଙ୍ଗ୍ ତିଲାତାର୍; ମାତର୍ ଜିସୁ ଇୟା ମାଟା ୱାରିଙ୍ଗ୍ ସୁଡ଼୍ଜି ଇନ୍ଜିନାନ୍ ଇଜି ୱାର୍ ନେସ୍ତେଙ୍ଗ୍ ଆଟ୍ତାର୍, ମାରି ୱାର୍ ତିଲାଜି ଜିସୁଙ୍ଗୁଁ ଡ଼ିସ୍ସି ସରଆର୍ ।
ସିସ୍ଟୁ ସିନି ବିସୟ୍ତୁ ମାଟା
13 ୱେନ୍କା ଏସ ପାରୁସିର୍ ମାରି ହେରୋଦ ରାଜା ଦଲତି ମାଣ୍କୁ ଏସ ଲୋକାଙ୍ଗ୍ ଜିସୁଦି ମାଟାଦି ଭୁଲ୍ତିଙ୍ଗ୍ ଆସ୍ସି ଗୁଟାଦୁ ପକ୍ତେଙ୍ଗ୍ ଇଜି ୱାର୍ ପକ୍ତା ମାର୍ଆର୍ । 14 ୱାର୍ ୱାତା ରୋ ଜିସୁଙ୍ଗୁଁ ଇର୍ହାର୍, "ଏ ଗୁରୁ, ମାପ୍ ନେସ୍ନାପ୍, ନିନ୍ ସତ୍ ମାରି ଏମେ ଲୋକାଙ୍ଗ୍ ବା ତିଲାଇ; ଇରିଙ୍ଗ୍ ନିନ୍ ଏମେ ଲୋକାଙ୍ଗ୍ ବା ମକମ୍ ସୁଡ଼ୁଏଣ୍ଗା କିନି, ମାତର୍ ସତ୍ତାନ୍ ମାପୁରୁତି ସାରିଦି ବିସୟ୍ ଶିକ୍ଷା ସିନି । ମାଙ୍ଗିଁ ୱେର୍ଆ କାଇସର୍ ରାଜାଏଙ୍ଗ୍ ସିସୁଟୁ ସିଦେଙ୍ଗ୍ ନିୟମ୍ନୋ ସିଲେତ୍ ?"
15 ମାଡୁ ସିନା ଡୋ ସିଲେ ? ମାତର୍ ଜିସୁ ୱାରି ସାଲାକି ନେସ୍ତାନ୍ନୋ ୱାରିଙ୍ଗ୍ ଇର୍ଆନ୍, "ଏନ୍ଦା ନାଂଇ ଉରିଦୁ ପକ୍ତେଙ୍ଗ୍ ବଦାକିଜିନିଦେର୍ ? ଉଣ୍ତ୍ରି ଟାକା ଅଦ୍ଲି ଡାବୁଙ୍ଗ୍ ନା ଲାକ୍ତୁ ତାଗାଟ୍, ନାନ୍ ଆକା ସୁଣା ।"
16 ଆବେଟ୍ ୱାର୍ ଉଣ୍ତ୍ରି ଟାକା ଅଦ୍ଲି ତାତାର୍ । ଜିସୁ ୱାରିଙ୍ଗ୍ ୱେନ୍ବାତାନ୍, "ଇୟା ଟାକା ମୁସ୍କୁ ଏ ଦର୍ ମାନାତ୍ ମାରି ଏ ବମା ମାନାତ୍ ?" ୱାର୍ ଜିସୁଙ୍ଗୁଁ ଇର୍ହାର୍, "କାଇସର୍ ରାଜାଦି ।"
17 ଜିସୁ ୱାରିଙ୍ଗ୍ ଇର୍ଆନ୍, "କାଇସର୍ ରାଜାଦି ଆମାକା, ଆକା କାଇସର୍ ରାଜାଦିଙ୍ଗ୍ ସିଦୁ, ମାରି, ମାପୁରୁଦି ଏମେକା, ଆୟାକା ମାପୁରୁଦିଙ୍ଗ୍ ସିଦୁ ।" ନାସ୍ତିୱାଲେ ୱାର୍ ଜିସୁ ମାଟାଦାନ୍ ନାଣ୍ଡ କାବାଆତାର୍ ।
ଡ଼େସିଜିବନ୍ଆନି ବିସୟ୍ତୁ ୱାର୍ଗିଜିସାନିକା
18 ତାନି ୱେନ୍କା ସାତି ସର୍ଇ ଲୋକୁ ମାରିଡ଼େସି ଜିବନ୍ଆଜି ନିଙ୍ଗ୍ନାର୍ ଇଜି ବିସ୍ବାସ୍ କିଇ ସାଦୁକିର୍ ୱାନି ଲାକ୍ତୁ ୱାଜି ଇୟା ମାଟା ଆସ୍ସି ୱେନ୍ବାଦେଙ୍ଗ୍ ଆସ୍ତାର୍, 19 "ଏ ଗୁରୁ, ମୋସା ମା ଉଣ୍ତିଙ୍ଗ୍ ଇୟା ନିୟମ୍ ୱାଟା ମାନାନ୍ ଯେ, ଜଦି ଏମେ ଲୋକା ତଡ଼ାନ୍ ସାନାନ୍, ମାରି ୱାନି ଆଡ଼ିସ୍ ଜିବନ୍ ମାନାତ୍, ମାରି ଆୟା ରାଣ୍ତି ଆଇମା ମାନୁ କଡ଼କକ୍ରା ସିଲେର୍, ଆଦେଙ୍ଗ୍ ଆୟା ୱାନି ତଡ଼ାନ୍ ୱାନି ଆଡ଼ିସ୍ ଇଡ୍ନାନ୍ ମାରି ୱାନିଙ୍ଗ୍ ଏମେ କଡ଼କକ୍ରା ଜନମ୍ ଆନାର୍, ନିଜେଦି ତଡ଼ାନ୍ ଉଣ୍ତିଙ୍ଗ୍ କୁଟୁମ୍ କିଦେଙ୍ଗ୍ ଆନାତ୍ । 20 ସୁଡ଼୍ଦୁ, ସାତ୍ଲୋକ୍ ତଡ଼ାନ୍କୁ ମାର୍ହାର୍; ୱିଜେରିଙ୍ଗ୍ ପେରି ତଡ଼ାନ୍ ପେଡ଼ି ଆତାନ୍ନୋ କଡ଼କକ୍ରା ଜନମ୍ ଆଏଣ୍ତା ସାତା ସର୍ହାନ୍; 21 ୱେନ୍କା ୱାନି ୱେନ୍କାରି ତଡ଼ାନ୍ ତାନିଙ୍ଗ୍ ପେଡ଼ି ଆତାନ୍ନୋ କଡ଼କକ୍ରା ଜନମ୍ ଆଏଣ୍ତା ସାତା ସର୍ଆନ୍ । ଆୟାୱାଜା ମାରି ଅରେନ୍ବା ପେଡ଼ି ଆତାନ୍, 22 ମାରି ଆୟାୱାଜା ସାତ୍ ଲୋକୁ ତଡ଼ାନ୍କୁ ୱିଜେରେ ତାନିଙ୍ଗ୍ ପେଡ଼ି ଆଜି କଡ଼କକ୍ରା ଜନମ୍ ଆଏଣ୍ତା ସାତାସର୍ଆର୍; ୱିଜେରି ସାରା ସାରି ଆୟା ଆଇମା ବା ସାତା ସର୍ହାତ୍ । 23 ମାରିଡ଼େସି ଜିବନ୍ ଆନି ଦିନ୍ତୁ ଏସିୱାଲେ ସାତିସରି ଲୋକ୍ୱିଜୁ ମାରି ଅର୍ସୁ ଜିବନ୍ଆଜି ନିଙ୍ଗ୍ନାର୍, ନାସ୍ତିୱାଲେ ଆୟା ଆଇମା ଏମେ ଲୋକ୍ତି ଆଡ଼ିସ୍ ଆନାତ୍ ? ସାତ୍ ଲୋକୁ ତଡ଼ାନ୍କୁ ୱିଜେରେତୋ ଆୟା ଆଇମାଦିଙ୍ଗ୍ ପେଡ଼ି ଆତାମାର୍ହାର୍ ।"
24 ଜିସୁ ୱାରିଙ୍ଗ୍ ଇର୍ହାନ୍, "ମିର୍ ମାପୁରୁଦି ଦାର୍ମୁସାସ୍ତ୍ର, ମାରି ମାପୁରୁଦି ସାକ୍ତି ନେସ୍ଏଣ୍ତା ଭୁଲ୍ କିତିମାନିଦେର୍ । 25 ଆଦେଙ୍ଗ୍ ସାତି ଲୋକାମାଣ୍କୁ ଡ଼େସିଜିବନ୍ଆଜି ନିଙ୍ଗ୍ତି ୱେନ୍କା ଲୋକୁ ପେଡ଼ି ଆଏର୍ କି ପେଡ଼ି ବା କିବିସ୍ କିଏର୍, ମାତର୍ ୱାର୍ ୱିଜେରେ ମୁସ୍କୁପୁର୍ତି ଦୁତ୍କା ୱାଜା ତେବାନାର୍ । 26 ମାତର୍ ସାତିକାର୍ ଜେ ମାରିଡ଼େସିଜିବନ୍ ଆଜି ନିଙ୍ଗ୍ନାର୍, ମିର୍ ଆୟା ବିସୟ୍ତୁ ମୋଶାଦି ବଇଦୁ ଦୁପା କାସ୍ନି ବିସୟ୍ ପଡ଼ାଇଦେର୍ ନୋ ? ମାପୁରୁ ୱାନିଙ୍ଗ୍ ଏଣ୍ତେସ୍ ଇର୍ଆନ୍, ମାପ୍ ଅବ୍ରାହାମତି ମାପୁରୁ, ଇସ୍ହାକ୍ତି ମାପୁରୁ ମାରି ଜାକୁବଦି ମାପୁରୁ । 27 ୱାଣ୍ତ୍ରୁ ସାତିଲୋକ୍ତି ମାପୁରୁ ଆଏନ୍, ମାତର୍ ଜିବନ୍ମାନି ଲୋକା ମାପୁରୁ । ମିର୍ ବେସି ବାମା ଆଜିନିଦେର୍ ।"
ଆମାକା ପେରି ଆଦେସ୍
28 ନାସ୍ତିୱାଲେ ସାସ୍ତ୍ରିରି ମାଣ୍କୁ ଅରେନ୍ ଲାକ୍ତୁ ୱାତାନ୍ ନୋ ୱାରି ୱିଜୁ ମାଟା ୱେନ୍ଜି ମାର୍ଆନ୍ ମାରି ସାଦ୍ଦୁକୀରିଙ୍ଗ୍ ଜିସୁ ଟିକ୍ ଉତର୍ ସିତାମାନାନ୍, ଇକା ନେସ୍ତେଙ୍ଗ୍ ଆଟ୍ତାନ୍ନୋ ୱାଣ୍ତ୍ରୁ ଜିସୁଙ୍ଗୁଁ ୱେନ୍ବାତାନ୍, "ୱିଜୁ ଆଦେସ୍ ଲୋଇରାନ୍ ଆମାକା ପେରି ଆଦେସ୍ ?"
29 ଜିସୁ ଇର୍ଆନ୍, "ପେରି ଆଦେସ୍ ଇକା, ଏ ଇସ୍ରାଏଲ୍, ୱେଣ୍ତ୍ରୁ; ପ୍ରବୁ ମା ମାପୁରୁ ଅରେନ୍ନେ ପ୍ରବୁ ମାନାନ୍; 30 ମାରି, ମିର୍ ମି ପୁରା ମେନ୍ଧଲ୍, ପୁରା ଜିବନ୍, ପୁରା ମନ୍ ମାରି ପୁରା ବପୁ ସିଜି ପ୍ରବୁ ମି ମାପୁରୁଙ୍ଗୁଁ ଲାଡ୍କିଦୁ । 31 ମାରି ଉଣ୍ତ୍ରି ପେରି ଆଦେସ୍ ଆଜିନାତ୍, ମିର୍ ଲାକ୍ତୁରି ଲୋକାଙ୍ଗ୍ ନିଜେଦିଙ୍ଗ୍ ଜିବନ୍ନୋତିୱାଜା ଜିବନ୍ନୋଦୁ । ଇୟା ରୁଣ୍ତି ଆଦେସ୍ ଡ଼ିସ୍ତିଙ୍ଗ୍ ଆଇ ମାରି ପେରି ଆଦେସ୍ ଇନିକା ସିଲେତ୍ ।"
32 ଆବେଟ୍ ଆୟା ସାସ୍ତ୍ରି ଜିସୁଙ୍ଗୁଁ ଇର୍ଆନ୍, "ଏ ଗୁରୁ, ଆକା ସତ୍, ୱାଣ୍ତ୍ରୁ ନେ ଅରେନ୍ ମାରି ୱାନିଙ୍ଗ୍ ଡ଼ିସ୍ତିଙ୍ଗ୍ ଏନ୍ବା ସିଲେନ୍, ଇକା ନିନ୍ ସତ୍ ୱେର୍ତିମାନି । 33 ମାରି, ଅରେନ୍ ଲୋକ୍ତିଙ୍ଗ୍ ପୁରା ମେନ୍ଧଲ୍, ପୁରା ବୁଦି ମାରି ପୁରା ବପୁ ସିଜି ମାପୁରୁଦିଙ୍ଗ୍ ଲାଡ୍ କିନିକା ମାରି ଲାକ୍ତୁରି ଲୋକାଙ୍ଗ୍ ଲାଡ୍ କିନିକା ଇୟାୱିଜୁ ଦୁପ୍ଣି ଆଡ଼ିକ୍ନିକା ନି ପୁଜା ସିନି ମାଣ୍କୁ ନାଣ୍ତ ପେରିକା ।"
34 ୧୨:୩୪ ଲୁକ ୧୦:୨୫-୨୮. ସାସ୍ତ୍ରି ବୁଦିଦାନ୍ ଇର୍ଆମାନାନ୍ ଇଜି ନେସ୍ସି ଜିସୁ ୱାନିଙ୍ଗ୍ ଇର୍ଆନ୍, "ନିନ୍ ମାପୁରୁଦି ରାଜିଦାନ୍ ଆକ ସିଲି ।" ଆବେଟ୍କୁ ଜିସୁଙ୍ଗୁଁ ଏନ୍ବା ଇନି ପ୍ରସ୍ନ ୱେନ୍ବାଦେଙ୍ଗ୍ ସାସ୍ କିଏତାର୍ ।
କ୍ରିସ୍ତ ଦାଉଦତି ମାରିନ୍
35 ମାତର୍ ଜିସୁ ମନ୍ଦିର୍ତୁ ସିକିୟା ସିନିୱାଲେ ୱେନ୍ବାତାନ୍, କ୍ରିସ୍ତ ଜେ ଦାଉଦତି ମାରିନ୍ ଇଜି, ସାସ୍ତ୍ରିର୍ ଏଣ୍ତେସ୍ ଇଜିନାର୍ ? 36 ଦାଉଦ ନିଜେ ପବିତ୍ର ଆତ୍ମାଦି ବପୁ ପଇଜି ଇର୍ଆମାର୍ଆନ୍,
ପ୍ରବୁ ନା ପ୍ରବୁଙ୍ଗ୍ ଇର୍ଆନ୍,
ମାପ୍ ଆମାସାନ୍ଦି ନି ୱିଜୁ ସାତ୍ରୁରିଙ୍ଗ୍ ନି ପାଦାମ୍କାଙ୍ଗ୍ ଆଡ୍ଗି ଇଡ୍ଏପ୍,
ଆୟା ସାନ୍ଦି ମା ଉଣେରି କିୟୁ ତରିଣ୍ତ୍ ବାସ୍ସ ମାନ୍ଆ ।
37 ଦାଉଦ ନିଜେ କ୍ରିସ୍ତଙ୍ଗ୍ ପ୍ରବୁ ଇଜି ଇନାନ୍, ମାପୁରୁଦି ବାସ୍ସିକିତି ରକିୟା କିନି କ୍ରିସ୍ତ ଏଣ୍ତେସ୍ ୱାନି ମାରିନ୍ ଆନାନ୍ ? ୱିଜେରେ ଲୋକ୍ ୱେଡ଼ିକାଦାନ୍ ୱାନି ମାଟା ୱେନ୍ଜିମାର୍ଆର୍ ।
ସାସ୍ତ୍ରିରି ମାଣ୍କୁ ଜାଗାର୍ତା
38 ମାରିଡ଼େସି, ୱାନ୍ ୱାନି ସିକିୟାଦାନ୍ ଇର୍ଆନ୍, "ସାସ୍ତ୍ରିରି ମାଣ୍କୁ ଜାଗାର୍ତା ! ୱାରୁ ନିର୍ଇ ଆଙ୍ଗିଁ ଆରାଜି ବୁଲାଦେଙ୍ଗ୍, ମାରି ସାତାସାଉକାଦୁ ମାଡ଼ିସ୍ କିପିର୍ ଇଜି ବଦାକିନାର୍ । 39 ପାର୍ତନା କିନି ଇଲୁଦୁ ପେରି ଗଦିଦି ବାଡି ମାରି ବୋଜିଦୁ ପେରି ବାଡି ପଇଦେଙ୍ଗ୍ ୱାର୍ ବଦାକିନାର୍; 40 ୱାର୍ ରାଣ୍ତି ଆଇମେକା ଇଲ୍କାଙ୍ଗ୍ ୱିଜୁ ନାସ୍ଟୁ କିନାର୍ ମାରି ବାଣ୍ତିସ୍କିଜି ନିର୍ଇ ପାର୍ତନା କିନାର୍; ୱାର୍ ନାଣ୍ତ ଦଣ୍ତ୍ ପଇନାର୍ ।"
ଅରେତ୍ ରାଣ୍ତି ଆଇମା ଦାନ୍ ସିନିକା
41 ଅର୍ଲେନ୍ ଜିସୁ ମନ୍ଦିର୍ତୁ ଦାନ୍ ସିନି ପେଡ଼ା ଲାକ୍ତୁ ବାସ୍ତାନ୍ନୋ ଲୋକୁ ୱିଜେରେ ଏଣ୍ତେସ୍ ପେଡ଼ାଦୁ ଦାନ୍ ସିଜିନାର୍, ଆକା ସୁଡ଼୍ଜିମାର୍ଆନ୍, ନାସ୍ତିୱାଲେ ଆବେ ମାର୍ଇ ମାଜନ୍ ଲୋକୁ ନାଣ୍ତ ଡାବୁଙ୍ଗୁଁ ପକ୍ତାର୍; 42 ମାରି, ଅରେତ୍ କାକୁର୍ତି ରାଣ୍ତି ଆଇମା ୱାତା ଦୋ ରୁଣ୍ତି ଟାକାଦି ଅଦ୍ଲିଙ୍ଗ୍ ଉଣ୍ତ୍ରିଟାକାଦି ଅଦିଲିଦାନ୍ ବା ଉଣା ଆକା ଆବେ ନିର୍ତାତ୍ । 43 ଆବେନୁ ଜିସୁ ୱାନି ସିସୁରିଙ୍ଗ୍ କୁକ୍ତାନ୍ନୋ ଇର୍ଆନ୍, "ନାନ୍ ମିଙ୍ଗିଁ ସତ୍ ଇଜିନା, ଇୟା ପେଡ଼ା ଲୋଇ ଡାବୁଙ୍ଗୁଁ ସିତିମାନି ଲୋକା ଭିତ୍ରେ ଇୟା କାକୁର୍ତି ରାଣ୍ତି ଆଇମା ନାଣ୍ତ ସିତାମାନାତ୍ । 44 ଇରିଙ୍ଗ୍ ୱିଜେରେ ମାଜନ୍ ଲୋକୁ ତାମେ ଡାବୁଙ୍ଗୁଁ ବିତ୍ରେ ଅଡ଼ପ୍ ଅଡ଼ପ୍ ସିତାର୍, ମାତର୍ ଇୟା ରାଣ୍ତି ଆଇମା ତାନି ଜିବନ୍ ଜିନି ଉଣ୍ତିଙ୍ଗ୍ ଏସ ତାନି ମାନୁ ମାର୍ଆତ୍, ଆକା ୱିଜୁ ସିତାମାନାତ୍ ।"
/images/a/Tcg2NiV7ce24OT6kCIQGR)
/images/a/a0208299-6f37-40a0-66e1-2576b9435f00)