1 ଏସୋ ଦିନ୍‌ ସରିଇ ୱେନ୍‌କା ଜିସୁ କପର୍‍ନାହୁମ୍‍ ନାର୍‍ତୁ, ଏମେ ଇଣ୍ତ୍ରତେବାଜି ମାରାଆନ୍‍ ଆୟା ଇଣ୍ତ୍ରମାରିଡ଼େସି ୱାତାନ୍‌ । ଜିସୁ ଆୟା ଇଲ୍‌ତୁ ମାନାନ୍‌ ଇଜି ଲୋକାମାନୁ କାବୁର୍‌ ସର୍‌ଆତ୍‌ । 2 ଆବେ ନିସା ଲୋକୁ ଉଣ୍ତାତାର୍‌ ଜେ, ସେର୍‍ଲା ଲାକ୍‍ତୁବା ଅଡ଼ପ୍‍ ବାଡି ସିଲେତାତ୍‍, ମାରି ଜିସୁ ୱାରିମାନୁ ବାକ୍ୟ ୱେର୍‌ତେଙ୍ଗ୍‌ ଆସ୍‌ତାନ୍‌ । 3 ଇୟାୱାଲେ ଲୋକୁ ଅରେନ୍‍ ପକିୟାଗାତି ରୋଗ୍‌ ଲୋକ୍‌ତିଙ୍ଗ୍‌ ନାଲ୍‍ଏରିଙ୍ଗ୍‍ ପିଣ୍ତିସ୍‍ କିବିସ୍‍ କିତାରୋ ଜିସୁ ଲାକ୍‌ତୁ ଆସ୍‌ତା ୱାତାର୍‌, 4 ମାତର୍‌ ନାଣ୍ତ ଲୋକୁ ମାର୍‍ଆର୍‍ଆକା ଜିସୁ ଲାକ୍‌ତୁ ତାତ୍‍ତେଙ୍ଗ୍‍ ଆଟ୍‍ଏତାର୍‍, ଆଦେଙ୍ଗ୍‌ ଜିସୁ ଏମେ ବାଡିଦୁ ମାର୍‌ଆନ୍‌, ଆୟା ବାଡ଼ିଦି ରେକାମ୍‌ କୁତ୍‍ତା ପକ୍‌ତାର୍‌, ମାରି ଆକା ରୁକ୍‍ତାରୋ, ଆମା କାଟେଲ୍‍ତୁ କିକୁକାଲ୍‌କୁ ୱାର୍‌ତି ରୋଗ୍‌ ଲୋକୁ ଡରିତା ମାର୍‌ଆନ୍‌, ଆୟା ମିସ୍‍ତେ ଜିସୁ ଆଗ୍‌ଡ଼ି ରେପ୍‌ତାର୍‌ । 5 ଆୟା ଲୋକାଦି ବିସ୍‌ବାସ୍‌ ସୁଡ଼୍‌ଜି ଜିସୁ କିକୁକାଲ୍‌କୁ ୱାର୍‌ତି ରୋଗିଦିଙ୍ଗ୍‍ ଇର୍‌ଆନ୍‌, "ଏ ମାରିନ୍‌, ନି ପାପ୍‌ୱିଜୁ କେମା ଆତାମାନାତ୍‌ ।"

6 ମାତର୍‌ ସାସ୍ତ୍ରିର୍‍ ମାଣ୍‌କୁ ଏସଲୋକ୍‌ ଆୟା ବାଡିଦୁ ବାସ୍‍ତାରୋ ୱାରିୱାରି ମନ୍ ଲୋଇ ଇକା ଅଡ଼ବିଜି ମାର୍‌ଆର୍‌, 7 "ଇକାନ୍‌ ଏନ୍ଦା ଇୟାୱାଜା ଇଜିନାନ୍‌ ? ୱାନ୍‌ ମାପୁରୁଙ୍ଗୁଁ ନିଦା କିଜିନାନ୍‌ ! ମାପୁରୁଙ୍ଗୁଁ ଡ଼ିସ୍‌ତିଙ୍ଗ୍‌ ମାରି ଏନ୍‌ ପାପ୍‌କେମା କିଦେଙ୍ଗ୍‌ ଆଟ୍‍ନାନ୍‍ ?"

8 ୱାର୍‌ ୱାରି ମୋନ୍‌ତୁ ଇୟାୱାଜା ୱାର୍‍ଗ୍‍ଜିସାଜିନାର୍‍, ଇଜି ଜିସୁ ଜିବନ୍‌ତୁ ଆୟାଦାପ୍ରେନେ ନେସ୍‌ତାନ୍‌ନୋ ୱାରିଙ୍ଗ୍‌ ଇର୍‌ଆନ୍‌, ମିର୍‌ ନିଜେ ନିଜେଦି ମନ୍‌ତୁ ଏନ୍ଦା ଇୟାୱିଜୁ ମାଟା ୱାର୍‍ଗ୍‍ଜି ସାଜିନିଦେର୍‍ ? 9 ଇୟା କିକୁକାଲ୍‌କୁ ୱାର୍‌ତି ରୋଗିଦିଙ୍ଗ୍‍ "ନି ପାପ୍‌କେମା ଆତାତ୍‌, ଇଜି ଇନିକା ଉସାସ୍‌," ନୋ "ନିଙ୍ଗିଁଆ, ଟାଟି ଆସ୍‌ସି, ସାଙ୍ଗ୍‍ଆ ଇଜି ଇନିକା ଉସାସ୍‌ ?" 10 ମାତର୍‌ ସାରାଦୁନିଆଦୁ ପାପ୍‌କେମା କିଦେଙ୍ଗ୍‌ ମନୁସ୍ୟପୁତ୍ରଦିଙ୍ଗ୍‌ ଜେ ଅଦିକାର୍‌ ମାନାତ୍‌, ଇକା ନାନ୍ କିଦେଙ୍ଗ୍‌ ଆଟ୍‍ନା । ଇୟାଉଣ୍ତିଙ୍ଗ୍‌ ଜିସୁ ଆୟା କିକୁକାଲ୍‌କୁ ୱାର୍‌ତି ରୋଗ୍‌ ଲୋକ୍‌ଦିଙ୍ଗ୍‍ ଇର୍‌ଆନ୍‌, 11 "ନାନ୍ ନିଇଂ ଇଜିନା, ନିଙ୍ଗ୍‍ଆ, ନି ଟାଟି ଆସ୍‌ସି, ମି ଇଣ୍ତ୍ରସାଙ୍ଗ୍‍ଆ ।"

12 ଆବେଟ୍‌ ୱାନ୍‌ ନିଂଇତାନ୍‍, ଆୟାଦାପ୍ରେ କାଟେଲ୍‍ ଆସ୍‌ସି, ୱିଜେରି ଆଗ୍‌ଡ଼ି ସତା ସର୍‌ଆନ୍‌; ଆବେନ୍‌ ୱିଜେରେ କାବାଆତାରୋ ମାପୁରୁଙ୍ଗୁଁ ଦନ୍ୟବାଦ୍‌ କିଜି କିଜି ଇର୍ହାର୍‌, "ମାପ୍‌ ଇୟାୱାଜା ପାଣି ଏସାଙ୍ଗ୍‍ବା ସୁଡ଼ୁଏପ୍‍ ମାର୍ହାପ୍‍ ।"

13 ଜିସୁ ମାରିଡ଼େସି ଗାଲିଲି ସାମ୍‌ଦୁର୍‌ ପାଡ଼ି ସର୍‌ଆନ୍‌, ମାରି ନାଣ୍ଡଲୋକ୍‍ ୱାନି ଲାକ୍‌ତୁ ୱାତାର୍‌ ଆକା, ୱାନ୍‌ ୱାରିଙ୍ଗ୍‌ ଶିକ୍ଷା ସିଦେଙ୍ଗ୍‍ ଆସ୍‌ତାନ୍‌ । 14 ମାରି, ଜିସୁ ସଲ୍‍ପୁ ସଲ୍‍ପୁ ଆଲ୍‍ଫିତି ମାରିନ୍‌ ଲେବିଙ୍ଗ୍‍ ନିଜେଦି ସିସ୍‍ଟୁ ଲସ୍‌ନି ବାଡିଦୁ ବାସ୍‍ତି ମାର୍‌ଇକା ସୁଡ଼ୁତାନ୍‌ । ୱାନ୍‌ ୱାନିଙ୍ଗ୍‌ ଇର୍‌ଆନ୍‌, "ନା ୱେନ୍‌କା ରାଆ ।" ଆବେଟ୍‌ ୱାନ୍‌ ନିଂଇତାନ୍‍ନୋ ଜିସୁ ୱେନ୍‌କା ସର୍‌ଆନ୍‌ ।

15 ଇୟା ୱେନ୍‌କା ଜିସୁ ଲେବି ଇଲ୍‌ତୁ ଉଣ୍ତେଙ୍ଗ୍‌ ବାସ୍‍ନିୱାଲେ ଏସୋ ସିସ୍‍ଟୁ ଲସ୍‌ନି ଲୋକୁ ମାରି ପାପି ଲୋକ୍‌ଡର୍‌ ଜିସୁ ମାରି ୱାନି ସିସୁରିୱାଲେ ଉଣ୍ତେଙ୍ଗ୍‌ ବାସ୍‌ତାର୍‌; ଇରିଙ୍ଗ୍‌ ୱାର୍‌ ନାଣ୍ତ ଲୋକୁ ମାର୍‌ଆର୍‌, ମାରି ୱାର୍‌ ଜିସୁୱାଲେ ବୁଲାଜିମାର୍‍ଆର୍‍ । 16 ଜିସୁ ପାପିଲୋକା ୱାଲେ ମାରି ସିସ୍‍ଟୁ ଲସ୍‌ନି ଲୋକାୱାଲେ ଉଣୁଜି ମାର୍‍ଆନ୍‍, ଇକା ସୁଡ଼ୁତାର୍‌ ପାରୁସି ଦଳତି ଶାସ୍ତ୍ରୀର୍‍ ୱାନି ସିସୁରିଙ୍ଗ୍‌ ଇଣ୍ତ୍ରେଙ୍ଗ୍‌ ଆସ୍‌ତାର୍‌, "ଇକା ଇନିକା ? ୱାନ୍‌ ସିସ୍‍ଟୁ ଲସ୍‌ନି ଲୋକାୱାଲେ ମାରି ପାପିଲୋକା ୱାଲେ ଅର୍‌ସେ ଉଣାନ୍‌ !"

17 ଆୟା ମାଟା ୱେନ୍‌ଜି ଜିସୁ ଇର୍‌ଆନ୍‌, "ନେଗି ଲୋକାଦି ଉଣ୍ତିଙ୍ଗ୍‌ ଡାକ୍‌ତର୍‌ତି ଦର୍‌କାର୍‌ ସିଲେତ୍‌, ମାତର୍‌ ନବ୍ ଲୋକା ଉଣ୍ତିଙ୍ଗ୍‌ ଡାକ୍‌ତର୍‌ତି ଦର୍‌କାର୍‌ ମାନାତ୍‌; ନାନ୍ ଦାର୍ମୁ ଲୋକାଙ୍ଗ୍‌ କୁକ୍‍ତେଙ୍ଗ୍‍ ରେଏ, ମାତର୍‌ ପାପି ଲୋକାଙ୍ଗ୍‌ କୁକ୍‍ତେଙ୍ଗ୍‍ ଇଜି ୱାତାମାନା ।"

18 ଡୁବନ୍‌ ସିନି ଯୋହନତି ସିସୁର୍‍ ମାରି ପାରୁସିର୍‌ ଉପାସ୍‌ କିଜିମାର୍‍ଆର୍‍ । ଆବେଟ୍‌ ଏସ ଲୋକୁ ୱାତାରୋ ଜିସୁଙ୍ଗୁଁ ଇର୍ହାର୍‌, "ଡୁବନ୍‌ ସିନି ଯୋହନତି ସିସୁର୍‍ ମାରି ପାରୁସିର୍‌ ସିସୁର୍‍ ଉପାସ୍‌ କିନାର୍‌, ମାତର୍‌ ମି ସିସୁର୍‍ ଉପାସ୍‌ ଏନ୍ଦା କିଏର୍‌ ?"

19 ଜିସୁ ୱାରିଙ୍ଗ୍‌ ଇର୍‌ଆନ୍‌, "କାନ୍ୟାମୁରୁଲିରି ୱାଲେ ମୁରୁଲୀ ମାନିୱାଲେ ୱାର୍‌ ଉପାସ୍‌ କିନାର୍‌ ନୋ ? ମୁରୁଲି ଆମାସାନ୍ଦି ୱାରିୱାଲେ ମାନାନ୍‌, ଆୟା ସାନ୍ଦି ୱାର୍‌ ଉପାସ୍‌ କିଦେଙ୍ଗ୍‌ ଆଟ୍‍ଏର୍‍ । 20 ମାତର୍‌ ଦିନ୍‌ ୱାନାତ୍‌, ଏସ୍ତିୱାଲେ ୱାରିମାଣାନ୍‌ ମୁରୁଲିଙ୍ଗ୍‍ ଅନାର୍‍, ମାରି ଆୟାୱାଲେ ଆୟାନାଣ୍ତିଙ୍ଗ୍‌ ୱାର୍‌ ଉପାସ୍‌ କିନାର୍‌ ।

21 "ଏନ୍‌ ପୁନି ୱାତିଦି ଇସ୍ରି ଅଟିଦିଙ୍ଗ୍‍ ଅସି ପାଡ଼ିଇ ୱାତିଦୁ ଗୁତ୍‍ଏନ୍‍; ଇରିଙ୍ଗ୍‌ ଗୁତ୍‍ତିଙ୍ଗ୍‍ ଆୟା ପୁନି ୱାତିଦି ଅଟି ପାଡ଼ିଇ ୱାତିଦିଙ୍ଗ୍‌ ନାଣ୍ତ କିଜିସ୍‌କିନାତ୍‌ ମାରି ନାଣ୍ତ ପେରିକା କିଜ୍‍ନାତ୍‍ । 22 ମାରି, ଏନ୍‌ ପୁନି ଅଙ୍ଗୁର୍‍ ରସ୍‌ତିଙ୍ଗ୍‌ ପାଡ଼ିଇ ତଲ୍‍ ମଣିଦୁ ଇଡ୍‌ଏନ୍‌; ଜଦି ଇଟ୍‌ତିଙ୍ଗ୍‌ ଆକା ତଲ୍‍ ମଣିଦିଙ୍ଗ୍‍ ପାଡିସ୍‌ କିନାତ୍‍, ଆବେଟ୍‌ ଅଙ୍ଗୁର୍‍ରସ୍‍ ନି ତଲ୍‍ମଣି ରୁଣ୍ତିବା ସେଏଣ୍ତ୍‍ ଆନେ । ମାତର୍‌ ପୁନି ଅଙ୍ଗୁର୍‍ ରସ୍‌ତିଙ୍ଗ୍‌ ପୁନି ତଲ୍‍ ମଣିଦୁ ଇଡ୍‌ନିକା ମାନାତ୍‌ ।"

23 ଅର୍‍ଲେନ୍‍ ରମ୍‍ନିଦିନ୍‍ତୁ ଜିସୁ ପାସି କିଡ଼ିଇ ନାଡ଼୍‍ମି ସିଜି ସଲ୍‌ସି ମାର୍‌ଆନ୍‌, ମାରି ୱାନି ସିସୁର୍‍ ୱାନିୱାଲେ ସଲ୍‍ପୁ ସଲ୍‍ପୁ ପାସି ସେରେନ୍‍କୁ ତେଉତେଙ୍ଗ୍‍ ଆସ୍‌ତାର୍‌ । 24 ଆବେଟ୍‌ ପାରୁସିର୍‌ ଜିସୁଙ୍ଗୁଁ ଇର୍ହାର୍‌, "ସୁଡୁଆ, ରମ୍‌ନିଦିନ୍‍ତୁ ଆମାକାକି କିଦେଙ୍ଗ୍‌ ନିୟମ୍‌ ସିଲେତ୍‌, ମି ସିସୁର୍‌ ଇନିଦାନିଙ୍ଗ୍‌ ଆକା କିଜିନାର୍‍ ?" 25 ଜିସୁ ୱାରିଙ୍ଗ୍‌ ଇର୍ହାନ୍‌, ଏସ୍ତିୱାଲେ ଦାଉଦଦିଙ୍ଗ୍‍ ଖାଦି ସିଲେତାତ୍‍ ଆୟାୱାଲେ ୱାନ୍‌ ମାରି ୱାନି ତଡ଼୍‍ତି ଲୋକୁ ବାଙ୍ଗାଁ ଆତାର୍‌, ନାସ୍‍ତିୱାଲେ ୱାନ୍‌ ଇନିକା କିତାମାର୍‌ଆନ୍‌, ମିର୍‌ ଆକା ଏସାଙ୍ଗ୍‍ ବା ପଡ଼ାଇଦେର୍‍ ନୋ ? 26 ଅବିୟାଥର ୱିଜେରିଙ୍ଗ୍‍ ପେରି ଜାଜକରି ଦିନ୍‍ତୁ ଦାଉଦ ଏଣ୍ତେସ୍‍ କିଜି ମାପୁରୁତି ଇଲ୍‌ତୁ ଡ଼ୁଗିତାନ୍‍ନୋ, ଆମା ପୁଜାସିତି ରୁଟି ଯାଜକରିଙ୍ଗ୍‌ ଡ଼ିସ୍‌ତିଙ୍ଗ୍‌ ଏନ୍‍ବା ତିଣ୍ତ୍ରେଙ୍ଗ୍‍ ନିୟମ୍‌ ସିଲେତ୍‌, ଆକା ତିରାଆ ମାର୍‌ଆନ୍‌, ମାରି ୱାନି ତଡ଼୍‍ ଲୋକାଙ୍ଗ୍‌ ବା ସିତା ମାର୍‌ଆନ୍‌ ।

27 ଜିସୁ ପାରୁସିରିଙ୍ଗ୍‍ ଇର୍‌ଆନ୍‌, "ରମ୍‍ନିଦିନ୍‍ ଲକା ସାକାକିନି ଉଣ୍ତିଙ୍ଗ୍‌ ତିଆର୍‌ ଆତାମାନାତ୍‌, ମାତର୍‌ ଲୋକ୍‌ତିଙ୍ଗ୍‌ ବଜୁ ଉଣ୍ତିଙ୍ଗ୍‌ ରମ୍‍ନିଦିନ୍‍ ଆଏତ୍‍ । 28 ଆଦେଙ୍ଗ୍‌ ମନୁସ୍ୟପୁତ୍ର ଜେ ନାନ୍, ରମ୍‌ନିଦିନ୍‍ତି ପ୍ରବୁ ଆନା ।"