1 ✝ନାନୁ ମାରି ୱେନ୍‍ବାଦେଙ୍ଗ୍‍ ଆଟ୍‍ନା, ଆର୍‌ତିଙ୍ଗ୍‌ ଇନିକା ମାପୁରୁ ୱାନି ନିଜେଦି ଲୋକାଙ୍ଗ୍‍ଁ ଡ଼ିସ୍‍ତାମାନାନ୍‍ ? ଏସାଙ୍ଗ୍‍ଁ ସିଲେ ! ନାନୁ ନିଜେ ଅରେନ୍ ଇସ୍ରାଏଲ୍‌ ଲୋକ୍‍, ଅବ୍ରାହାମତି କୁଟୁମ୍‌ ମାରି ବିନ୍ୟାମିନ୍ ଇଲୁଦାନ୍‍ ଜନମ୍‍ ଆତାମାନା । 2 ମାପୁରୁ ଆଗ୍‍ଡ଼ିରାନ୍‍ ବାସେକିତିମାନି ୱାନି ଲୋକାଙ୍ଗ୍‍ଁ ଏସାଙ୍ଗ୍‍ଁବା ଡ଼ିସ୍‍ଏନ୍ । ମିର୍‌ ଦାର୍ମୁସାସ୍ତ୍ର ପଡ଼ାତିମାନିଦେର୍‍ ଏଣ୍ତେସ୍‌ ଏଲିୟ ମାପୁରୁ ଲାକ୍‍ତୁ ଇସ୍ରାଏଲ୍‌ ଲୋକା ବିରୁଦ୍‍ତାନ୍‍ ଇର୍ହାମାର୍ହାନ୍‍ : 3 "ପ୍ରବୁ ୱାର୍‌ ୱାରି ବାବବାଦିରିଙ୍ଗ୍‍ଁ ଡାକ୍‍ତା ମାନାର୍‌ ମାରି ମି ପୁଜାବେଦିଙ୍ଗ୍‌ଁ ୱିଜୁ ରୁକ୍‍ସି ନାସ୍ଟୁ କିତାମାନାର୍‍ । କେବଲ ନାନୁ ଅରେନ୍‍ ମାତର୍‌ ରକିୟା ପୟ୍‍ତାମାନା; ନାଙ୍ଗିଁ ବା ଡାକ୍‍ସୋ ପକ୍‍ତେଙ୍ଗ୍‍ଁ ୱାର୍‌ ସେସ୍ଟା କିଜିନାର୍‍ ।" 4 ମାପୁରୁ ଇନିକା ଇର୍ହାମାର୍ହାନ୍‍ ଏଲିୟଙ୍ଗ ? "ମିଚ୍‍ ଦିୟାମ୍‍ ବାଲ୍‍ ବମାଦିଙ୍ଗ୍‍ଁ ପୁଜା କିଇ ମାନି ସାତ୍‍ ହାଜାର୍‌ ଲୋକାଙ୍ଗ୍‍ଁ ମା ଉଣ୍ତିଙ୍ଗ୍ଁ ଇଟ୍‍ତାମାନାପ୍‍ ।" 5 ଇଲେଇ ଟିକ୍‍ ଆୟାୱାଜା ଗଟାତାତ୍‌ । ମାପୁରୁ ଦୟା କିଜି ଏମେୱାରିଙ୍ଗ୍ଁ ବାସେକିତା ମାର୍ହାନ୍‌, ୱାରି ଲୋଇ ଏସଲୋକ୍‍ ବାକି ମାନାର୍‌ । 6 ମାପୁରୁ ୱାରିଙ୍ଗ୍‍ଁ ବାସେକିତାମାନାନ୍‍ ନିଜେଦି ଦୟା ଉଣ୍ତିଙ୍ଗ୍‍ଁ । ଜଦି ୱାରି ସତ୍‍ପାଣି ଉଣ୍ତିଙ୍ଗ୍‍ଁ ମାପୁରୁ ୱାରିଙ୍ଗ୍‍ଁ ବାସେ କିତାନ୍‍ମାନ୍ଦି, ୱାନି ଦୟା ସତ୍‌ତାନ୍‌ ଦୟା ଆଏତାତ୍‍ମାନ୍ଦି ।

7 ଆର୍‍ତିଙ୍ଗ୍‍ଁ ଇନିକା ଆତାତ୍‍ ? ଇସ୍ରାଏଲ୍‌ ଲୋକୁ ଆମାକା ପୟ୍‍ଜିମାର୍ହାର୍‍, ଆକା ପୟ୍‍ଏତାର୍‍ । କେବଲ ମାପୁରୁ ବାସେକିତିମାନି ଉନ୍‍ଣ୍ତ୍ରି ନିସ୍ରି ଦଲ୍‌ ୱାନିଙ୍ଗ୍‍ଁ ପୟ୍‍ତାର୍‍ । ଆଇ ଏନ୍‌ ମାପୁରୁଦି କୁକ୍‍ତି ଉଣ୍ତିଙ୍ଗ୍‍ଁ ମନ୍ ସିଏତାର୍‍ । 8 ଏଣ୍ତେସ୍‌ ସାସ୍ତ୍ର ଇନାନ୍‌, "ସତେ ଏଣ୍ତେସ୍‌ ମାପୁରୁ ୱାରି ମନ୍ ନି ଜିବନ୍‍ତିଙ୍ଗ୍‍ଁ ଆଟୁୱା କିତାମାନାନ୍‍ । ଇୟାସାନ୍ଦି ୱାର୍‌ ସୁଡ଼୍‍ଦେଙ୍ଗ୍‍ ଆଟ୍‍ନାର୍‍ ନ ୱେନ୍‍ଡ୍ରେଙ୍ଗ୍‍ଁ ଆଟ୍‍ସିନାର୍‍ ।" 9 ମାରି ଦାଉଦ ଇନାନ୍‌,

"ୱାର୍‌ ବଜି କିନିୱାଲେ ଉରିଦୁ ସେର୍‌ଜି ।

ଆର୍‍ଜି ଦଣ୍ତ୍‍ ବଗାପିର୍‍ ।

10 ୱାର୍‌ କାଣୁକୁ କାଣା ଆଜି ଇନିକା ସୁଡ଼ୁଦେଙ୍ଗ୍‌ ଆଟ୍‍ମାପିର୍‍ ।

ୱିଜୁୱାଲେ ଦୁକ୍ କାସ୍ଟୁ ବଗାଜି ବଗାଜି ୱାରି ଜୁକି କୁବ୍‌ଡ଼ା ଆପିତ୍‌ ।"

11 ନାନୁ ୱେନ୍‍ବାନା, ଜିହୁଦିଲୋକୁ ତାକାନି ମାଣାନ୍‌ ଇନିକା ନାସ୍ଟୁ ଆତାର୍‌ ? ଏସାଙ୍ଗ୍ଁ ସିଲେ । ପାପ୍ କିତାର୍‍ଆକା, ୱାରିଙ୍ଗ୍‍ଁ ରିସା କିଦେଙ୍ଗ୍‍ଁ ଇଜି ଅଣଜିହୁଦି ଲୋକାଙ୍ଗ୍‍ଁ ରକିୟାଦି ଅଦିକାରି କିଆୟ୍‍ ଆତାତ୍‍ । 12 ଜିହୁଦିଲୋକା ପାପ୍‍, ଦୁନିଆଦି ଆଇ ୱିଜେରି ଉଣ୍ତିଙ୍ଗ୍‍ଁ ନାଣ୍ତ ଆର୍ସିବାଦ୍‌ ତାତାମାନାତ୍‌ । ଜିହୁଦିଲୋକା ଆତ୍ମିକ ଜିବନ୍‍ତି କାକୁର୍ତି ଉଣ୍ତିଙ୍ଗ୍‍ଁ ଅଣଜିହୁଦି ଲୋକୁ ଆର୍ସିବାଦ୍‍ତି ନାଣ୍ତ ଲାବ୍‍ କିତାମାନାର୍‍ । ଜଦି ୱିଜେରେ ଜିହୁଦି ଜାତି ରକିୟା ପୟ୍‍ଦେଙ୍ଗ୍‍ଁ ଆଟ୍‍ତାର୍‍ମାନ୍ଦି, ଆତିଙ୍ଗ୍‍ଁ ଆବେଣାନ୍‍ ମାରି ଏସା ନାଣ୍ତ ଆର୍ସିବାଦ୍‌ ପୁଟ୍‌ଏତ୍‌ ନୋ ?

13 ଅଣଜିହୁଦି ଲୋକାଙ୍ଗ୍‌ ନାନୁ ଇଜିନା, ମି ଉଣ୍ତିଙ୍ଗ୍‍ଁ ପେରିତ ସିସୁ ୱାଜା ସେବା ପାଣି କିଦେଙ୍ଗ୍‍ଁ ନାନୁ ଦନ୍ୟବାଦ ଅଡ଼୍‌ବିଜିନା । 14 ଇୟାମାଣାନ୍‍ ଜଦି ନା ନିଜେଦି ଜାତିଦି ଲୋକାଙ୍ଗ୍‍ଁ ରିସା ଆଦେଙ୍ଗ୍‍ଁ ଆଟ୍‍ନା, ଆନାତ୍‌ ୱାରି ଲୋଇ ଏସ ଲୋକାଙ୍ଗ୍‌ ରକିୟା କିଦେଙ୍ଗ୍‍ଁ ଆଟ୍‍ନା । 15 ଇରିଙ୍ଗ୍‍ଁ ୱାର୍‌ ଡ଼ିସାୟ୍‍ ଆନି ମାଣାନ୍‌ ମାପୁରୁଦି ୱାଲେ ସାରାଦୁନିଆ ଜାତିଦି ସଙ୍ଗ୍‌ ଆନିକା । ଆର୍‍ତିଙ୍ଗ୍‍ଁ, ଜଦି ମାପୁରୁ ୱିଜୁ ଜିହୁଦି ଜାତିଦିଙ୍ଗ୍‍ଁ ଆସ୍‍ନାନ୍‍, ତାନି ଦସ୍‍ ଇନିକା ଆନାତ୍‌ ? ଆକା ଆନାତ୍‌ ସାତି ଲୋକ୍‍ ମାରିଡ଼େସି ଜିବନ୍‌ ନିଙ୍ଗ୍‍ଁନି ୱାଜା ।

16 ରୁଟିଦାନ୍‍ କାଣ୍ତେକ୍‍ ମାପୁରୁଦି ଉଦେସ୍‍ତାନ୍‍ ସିତି ମାରିଙ୍ଗ୍‍, ୱିଜୁ ରୁଟି ବା ସିତିକା ଇଜି ଆସାୟ୍‍ଆନାତ୍‍ । ଉନ୍‍ଣ୍ତ୍ରି ମାରାତି ମଦଲ୍‍ ସିତିମାରିଙ୍ଗ୍‍ଁ, ତାନି କମେଙ୍ଗ୍‍ ବା ସିତାମାନାର୍‍ ଇଜି ଅଡ଼୍‍ବିଦେଙ୍ଗ୍‍ଁ ଆନାତ୍‌ । 17 ଡଡିଦୁ ଜାତୁନ୍‍ ଅଆୟ୍‍ଆଜିମାନି ଉନ୍‍ଣ୍ତ୍ରି ଜିତ୍‍ ମାରାତି ଏସ କମେଙ୍ଗ୍‍ ୱେର୍‌ଏ କିଜି, ବନ୍‍ତି ଜିତ୍‍ ମାରାନ୍‌ତି କମା ଆୟା ବାଡିଦୁ ଜଡ଼ିସ୍‍ କିଆୟ୍‍ଆତାମାନାତ୍‍ । ଅଣଜିହୁଦି ଲୋକୁ ଆୟା ବନ୍‍ ଜିତ୍‍ ମାରାନ୍‌ ୱାଜା । ମିର୍‌ ଇଲେଇ ଜିହୁଦିରି ବପୁ ଆତ୍ମିକ ଜିବନ୍‍ତି ବାଗ୍‍ତୁ ମିସାତିମାନିଦେର୍‍ । 18 ଆଦେଙ୍ଗ୍‍ଁ ମିର୍‌ ୱେର୍‌ଏ କିଆୟ୍‍ଆତିମାନି କମେଙ୍ଗାଁ ନିସ୍ରିବୁଦି ଅଡ଼୍‍ବିମାଟ୍‍ । ମିର୍‌ ଏନ୍ଦା ଗାର୍ବୁ କିନିଦେର୍‍ ? ମିର୍‌ କେବଲ କମା ମାରାନ୍‌ ମଦଲ୍‍ତିଙ୍ଗ୍‍ଁ ମିର୍‌ ଜାତୁନ୍‍ କିଇଦେର୍‍, ମାତର୍‌ ମଦଲ୍‍ ମିଙ୍ଗିଁ ସାକା କିଜିନାତ୍‍ ।

19 ଇୟାଉଣ୍ତିଙ୍ଗ୍‌ ମିର୍‌ ଇନ୍‍ଡ୍ରେଙ୍ଗ୍‍ଁ ଆଟ୍‍ନିଦେର୍‍, "ହୁଁ, ମାତର୍‌ ନାଙ୍ଗିଁ ବାଡି ସିଦେଙ୍ଗ୍‌ ଇଜି ଆୟା କମେଙ୍ଗ୍‍ ୱିଜୁ ସିନା କିଆୟ୍‍ ଆତେମାରେଏ ।" 20 ଆକା ସତ୍‍ । ୱାର୍‌ ବିସ୍‍ବାସ୍‍ କିଏତାର୍‍ଆକା ୱେର୍‌ଏ ଆତାର୍‌ । ମିର୍‌ କେବଲ ବିସ୍‍ବାସ୍‍ତାନ୍ ଆୟା ବାଡି ଅଦିକାର୍‍ କିତିମାନିଦେର୍‌ । ମାତର୍‌ ଗାର୍ବୁ କିଏନ୍‍ଣ୍ତା ତିଲାଦୁ । 21 ଜଦି ମାରାନ୍‌ତାନ୍‌ ମିସାଜିସତି କମେଙ୍ଗ୍‍ ୱାଜା ଜିହୁଦି ଲୋକାଙ୍ଗ୍‌ ମାପୁରୁ ଦଣ୍ତ୍‍ ସିଏଜି ଡ଼ିସ୍‍ସି ସିଏତାନ୍‍, ମିଙ୍ଗିଁ ଇନିକା ୱାନ୍‌ ଡ଼ିସ୍‍ନା ସିନାନ୍‍ ? 22 ଇବେ ସୁଣି ମାଟା, ମାପୁରୁ ଏଣ୍ତେସ୍‌ ଦୟାକିନିକାନ୍‍ ନି ଆଟ୍‍ୱା ବା । ଏମେୱାରି ପଦ୍‌ ଆର୍‍ତାମାନାତ୍‍, ୱାରି ଉଣ୍ତିଙ୍ଗ୍‍ଁ ୱାନ୍‌ ଆଟ୍‍ୱା; ମାତର୍‌ ମି ଉଣ୍ତିଙ୍ଗ୍‍ଁ ୱାନ୍‌ ଦୟାକିନିକାନ୍‍ ଆମା ଦିନ୍‌ ସାନ୍ଦି ମିର୍‌ ୱାନି ଦୟାଦି ଲୋକ୍‍ ଆଜି ତେବାନିଦେର୍‍ । ୱାନି ଦୟା ଆରାକିତିଙ୍ଗ୍‍ଁ, ମିର୍‌ ବା ୱେର୍‌ଏ ଆନିଦେର୍‌ । 23 ଜଦି ଜିହୁଦିଲୋକୁ ତାମେ ବିସ୍‍ବାସ୍‍ ଆକ କିଏର୍‌, ଆର୍‍ତିଙ୍ଗ୍‍ଁ ୱାର୍‌ ନିଜେଦି ବାଡିଦୁ ମାରିଡ଼େସି ତିଆର୍‌ ଆନାର୍‍ । ଇକା କିଦେଙ୍ଗ୍‍ଁ ମାପୁରୁ ଇଚ୍ଛା କିନାନ୍‌ । 24 ଅଣଜିହୁଦି ଲୋକୁ ବନ୍‍ ଜିତ୍‍ ମାରାତି କମା ୱାଜା । ଆକା ସିନା ଆଜି ନେଗେନ୍‌ତର୍‌ଇ ଇସାବ୍‍ତାନ୍‍ ଡଡିଦି ଜାତୁନ୍‍ଅତିମାନି ଜିତ ମାରାତି ୱାଲେ ଜଡ଼ିସ୍‍ କିଆୟ୍‍ଆତାମାନାତ୍‍ । ଜିହୁଦି ଜାତି ଡଡିଦି ଜାତୁନ୍‍ଅତିମାନି ଜିତ ମାରାନ୍‌ ୱାଜା । ଇୟା ମାରାତି ୱେର୍‍ଏଆତି କମେଆଙ୍ଗାଁ ମାରିଡ଼େସି ମାରାତି ୱାଲେ ଜଡ଼ିସ୍‍କିନିକା ମାପୁରୁଦି ତରିନ୍‍ ଉସାସ୍‍ ।

25 ତଡ଼ାନ୍‍କୁ ନି ତାଙ୍ଗିଁକି, ଇୟା ବିସୟ୍‌ତାନ୍‌ ଉନ୍‍ଣ୍ତ୍ରି ମାର୍‍ଗିତି ସତ୍‌ ୱେକ୍‍ନାତ୍‍ । ଆକା ୱେରିଙ୍ଗ୍‍ଁ, ମିର୍‌ ନିଜେଦିଙ୍ଗ୍‍ଁ ମାରି ବୁଦିମାନିକାନ୍‍ ଇଜି ଅଡ଼୍‍ବିଦେଙ୍ଗ୍‍ଁ ଆଟ୍‍ଇଦେର୍‍ । ଇସ୍ରାଏଲ୍‌ ଲୋକା ଅମାନ୍ୟ ୱିଜୁଦିନ୍‍ ତେବାଏତ୍‍ । ଅଣଜିହୁଦିର୍‍ ୱିଜେରେ ମାପୁରୁଦି ଲାକ୍‍ତୁ ୱାନି ସାନ୍ଦି ୱାର୍‌ ଆୟାୱାଜା ତେବାନାର୍‍ । 26 ତାନିୱେନ୍‍କା ଇସ୍ରାଏଲ୍‌ ଲୋକୁ ୱିଜେରେ ଶାସ୍ତ୍ର ଇସାବ୍‍ତାନ୍‍ ରକିୟା ପୟ୍‍ନାର୍‍, ଏଣ୍ତେସ୍‌ ସାସ୍ତ୍ର ଇନାତ୍‍ :

"ରକିୟାକିନିକାନ୍‍ ସିୟୋନତାନ୍‍ ୱାନାନ୍,

ଜାକୁବ କୁଡ଼ାଦାନ୍‍ ୱିଜୁ ଅଦାର୍ମୁ ଆକ କିନାନ୍‍ ।

27 ୱାରି ଅଦାର୍ମୁ ଆକ କିନିୱାଲେ

ୱାରି ୱାଲେ ଇୟା ନିୟମ୍‌ କିନାପ୍‍ ।"

28 ମି ନେଗି ଉଣ୍ତିଙ୍ଗ୍‍ଁ ସୁସମାଚାର୍‍ତିଙ୍ଗ୍‍ଁ ଡ଼ିସ୍‍ତିଙ୍ଗ୍‌ ମାପୁରୁଦି ସାତ୍ରୁ ଆତାମାନାର୍‌ । ମାତର୍‌ ମାପୁରୁଦି ଲାଡ୍‍ତାନ୍‍ ବାସେଆନି ମାଣାନ୍‌ ମାରି ୱାରି ଡକ୍ରାଦାଦାରି ଉଣ୍ତିଙ୍ଗ୍‍ଁ ୱାର୍‌ ମାପୁରୁଦି ତଡ଼୍‍ ଆତାମାନାର୍‌ । 29 ମାପୁରୁ ଏମେୱାରିଙ୍ଗ୍‍ଁ ବାସେ କିଜି ଆର୍ସିବାଦ୍‌ କିନାନ୍‍, ୱାନି ଦାନ୍‍ ସିଦେଙ୍ଗ୍‌ ବଦା ୱାନ୍‌ ଡାଟ୍‍ ତେବାନାନ୍‍ । 30 ଅଣଜିହୁଦି ଲୋକୁ ପୁର୍ବେ ମାପୁରୁଦି ମାନାଇକାର୍‍ ମାର୍ହାର୍‌; ମାତର୍‌ ଇଲେଇ ଜିହୁଦିଲୋକା ମାନାଇ ଉଣ୍ତିଙ୍ଗ୍‍ଁ ଅଣଜିହୁଦି ଲୋକୁ ମାପୁରୁଦି ଦୟା ପୟ୍‍ତାମାନାର୍‍ । 31 ଏଣ୍ତେସ୍‌ ଅଣଜିହୁଦି ଲୋକୁ ବା ଦୟା ପୟ୍‍ତାମାନାର୍‍, ଜିହୁଦିଲୋକୁ ଇଲେଇ ମାପୁରୁଦି ମାଣାନ୍‌ ଆକ ସର୍ହିମାରିଙ୍ଗ୍‍ଁ ବା, ଅର୍‍ଲେନ୍‍ ୱାର୍‌ ଡ଼େସି ୱାଜି ରକିୟା ପୟ୍‍ନାର୍‍ । 32 ମାପୁରୁ ୱିଜେରିଙ୍ଗ୍‍ଁ ଅମାନ୍ୟ ଆନି ଉଣ୍ତିଙ୍ଗ୍‍ଁ ଡ଼ିସ୍‍ତା ସିତାମାନାନ୍‌; ଆବେଣାନ୍‍ ୱିଜେରେ ମାପୁରୁଦି ଦୟାଦି ଲୋକୁ ଆଦେଙ୍ଗ୍‍ଁ ଆଟ୍‍ନାର୍‍ ।

33 ମାପୁରୁ । ୱାନି ବୁଦି ନି ଜ୍ଞାନ୍‌ ଏସା ପେରିକା । ୱାନି ବଦାଦି ଟିକ୍‍ ଏନ୍‌ ବୁଜାକିନାନ୍‍ ? ଏନ୍‌ ୱାନି ସାରିଙ୍ଗ୍‌ଁ ନେସ୍‍ତେଙ୍ଗ୍‍ଁ ଆଟ୍‍ନାନ୍‍ ? 34 ସାସ୍ତ୍ର ଇନାତ୍‍ :

"ଏନ୍‌ ମାପୁରୁଦି ମନ୍‍ତିମାଟା ବୁଜାଦେଙ୍ଗ୍‍ଁ ଆଟ୍‍ନାନ୍‍ ?

ଏନ୍‌ ମାରି ୱାନିଙ୍ଗ୍‍ଁ ସିକିୟା ସିଦେଙ୍ଗ୍‌ ଆଟ୍‍ନାନ୍‍ ?

35 ଏନ୍‌ ଇନିକା ମାପୁରୁଙ୍ଗ୍‍ଁ ଇୟାୱାଜା ଇନିକା ସିଦେଙ୍ଗ୍‌ ଆଟ୍‍ତାମାନାନ୍‍,

ଆମାତାନିଙ୍ଗ୍‌ ମାପୁରୁଙ୍ଗ୍‍ଁ ଡ଼େସି ସିଦେଙ୍ଗ୍‌ ପଡ଼ାଜିନାତ୍‍ ?"

36 ✝ୱିଜୁ ବିସୟ୍‍ ମାପୁରୁଦି ମାଣାନ୍‌ ତିଆର୍‌ ଆତାମାନାତ୍‌; ୱିଜୁ ବିସୟ୍‍ ମାନିକା ୱାନି ଉଣ୍ତିଙ୍ଗ୍‍ଁ ମାରି ୱାନିମାଡ଼ାନ୍‌ ଆତାମାନାତ୍‌ । ଜୁଗ୍‌ ଜୁଗ୍‍ ମାପୁରୁ ଗୌରବ୍‍ ପଇନି । ଆମେନ୍‍ ।