1 କେଙ୍କ୍ରେୟାଦୁମାନି ମଣ୍ତଲିଦି ଅରେତ୍‍ ସେବାକିନିକାତ୍‍ ତାଙ୍ଗିଁ ପିବେଙ୍ଗ୍‍ ମି ଲାକ୍‌ତୁ ପକସିନା । 2 ପ୍ରବୁଦି ଦର୍‍ତାନ୍‍ ତାନିଙ୍ଗ୍‍ ଆସ୍‌ସି ମାପୁରୁଦି ଲୋକା ୱାଜା ସାଲାବୁଲା ଆଦୁ । ତାନି ଦର୍‍କାର୍‍ ଇସାବ୍‍ତାନ୍‍ ସାକା କିଦୁ । ନାଙ୍ଗିଁ ନି ନାଣ୍ତ ଲୋକାରି ୱାଦ୍ ଅରେତ୍‍ ନେଗି ସଙ୍ଗ୍‍ଁ ।

3 ✝କ୍ରିସ୍ତ ଜିସୁଦି ସେବାଦୁ ନା ଅର୍‍ସେପାଣିକିନି ପ୍ରିସ୍କିଲା ନି ଆକିଲାଦି ନା ନମସ୍କାର୍‌ ଜାଣେକିଦୁ । 4 ୱାର୍‌ ନା ଉଣ୍ତିଙ୍ଗ୍‍ଁ ନିଜେଦି ଜିବନ୍‍ତିଙ୍ଗ୍‍ଁ କାସ୍ଟୁଦି କିତାମାନାର୍‍ । ମାତର୍‌ ନାନୁ ସିଲେ, ୱିଜୁ ଅଣଜିହୁଦି ମଣ୍ତଲି ୱାନିଙ୍ଗ୍‍ଁ ଧନ୍ୟବାଦ କିଜିନାର୍‍ । 5 ୱାରି ଇଲ୍‍ତୁ ଉଣ୍ତାଜି ମାନି ପାର୍‌ତନା ମଣ୍ତଲିଦିଙ୍ଗ୍‍ଁ ବା ମାଡ଼ିସ୍‍ କିଜିନା । ନା ଲାଡ୍‍ତି ତଡ଼୍‍ ଏପାଇନେତଦିଙ୍ଗ୍‍ଁ ନା ନମସ୍କାର୍‌ ୱେର୍‍ନିଦେର୍‍ । ଆସିଆ ରାଜିଦୁ ୱାନ୍‌ ଆଜିନାନ୍‍ ପାର୍‍ତୁମ୍‍ କ୍ରିସ୍ତ ବିସ୍‍ବାସି । 6 ମି ନେଗି ଉଣ୍ତିଙ୍ଗ୍‍ଁ ନାଣ୍ତ ପାଣି କିତିମାନି ମରିୟମ୍‍ତିଙ୍ଗ୍‍ଁ ନା ନମସ୍କାର୍‌ କିଦୁ । 7 ଆନ୍ଦ୍ରନିକ ନି ୟୁନିୟାଦିଙ୍ଗ୍‌ଁ ନମସ୍କାର୍‌ ଆପିତ୍‌ । ଇୟା ରିଏର୍‌ ଜିହୁଦିର୍‍ ନା ୱାଲେ ଜଇଲ୍‍ତୁ ମାର୍ହାର୍‌ । ନା ଆଗ୍‍ଡ଼ିରାନ୍‍ ୱାର୍‌ କ୍ରିସ୍ତଦର୍ମ ମାନାତା ମାର୍ହାର୍‌ ମାରି ପେରିତ ସିସୁରି ଲୋଇ ୱାର୍‌ ନେସ୍‌ତାମାର୍ହାର୍‍ ।

8 ନା ୱାଲେ ପ୍ରବୁଦି ମିସାନିକା ୱେଡ଼ିକା ଇତିମାନି ନା ଲାଡ୍‍ତି ତଡ଼୍‍ ଆମ୍ପ୍ଲିୟାତଦିଙ୍ଗ୍‍ଁ ନା ନମସ୍କାର୍‌ ଆପିତ୍‌ । 9 କ୍ରିସ୍ତଦି ସେବାଦୁ ନା ୱାଲେ ଅର୍‍ସେପାଣିକିନି ଉର୍ବୋନ ନି ନା ଲାଡ୍‍ତି ତଡ଼୍‍ ସ୍ତାକିୟଦିଙ୍ଗ୍‍ଁ ବା ନା ନମସ୍କାର୍‌ ଆପିତ୍‌ । 10 କ୍ରିସ୍ତଦି ବିସ୍‍ବାସ୍‍ତାନ୍ ମାନି ସେବକ ଆପେଲ ନି ଆରିସ୍ତବୁଲଦି ଇଲ୍‍ତି ୱିଜେରିଙ୍ଗ୍‍ଁ ନା ନମସ୍କାର୍‌ ୱେର୍‍ନିଦେର୍‍ । 11 ନା ଜାତିଦି ହେରୋଦିୟନ୍‍ ନି ନାରକିସତି ଇଲ୍‍ତି କ୍ରିସ୍ତଦି ତଡ଼ାନ୍‍କାଙ୍ଗ୍‍ଁ ବା ନା ନମସ୍କାର୍‌ ୱେର୍‍ନିଦେର୍‍ ।

12 ପ୍ରବୁଦି ସେବାଦୁ ପାଣିକିଜିମାନି କ୍ରୁଫେଣା ନି କ୍ରୁପସୋତିଙ୍ଗ୍‍ଁ ମାରି ପ୍ରବୁଦି ଉଣ୍ତିଙ୍ଗ୍‍ଁ ନାଣ୍ତ ପାଣିକିତିମାନି ନା ତଡ଼୍‍ ପର୍ସିସତିଙ୍ଗ୍‍ଁ ନା ନମସ୍କାର୍‌ ଆପିତ୍‌ । 13 ✝ପ୍ରବୁଦି ବାସେଆତିମାନି ଦାସ୍‍ ରୁପସ ନି ନା ୟାୟା ୱାଜା ୱାନି ଆଇସିଙ୍ଗ୍‍ଁ ବା ନା ନମସ୍କାର୍‌ ଆପିତ୍‌ । 14 ଆସୁଙ୍କ୍ରିତ, ପ୍ଲେଗୋନ୍‍, ହର୍ମିସ୍‍, ପାତ୍ରବା, ହରମାସ୍‍ ନି ୱାରି ୱାଲେ ମାନି କ୍ରିସ୍ଟିୟାନ୍‍ ତଡ଼ାନ୍‍କାଙ୍ଗ୍‍ ନି ତାଙ୍ଗିଁକାଙ୍ଗ୍‍ଁ ନମସ୍କାର୍‌ ୱେର୍‍ତୁ । 15 ପିଲଲୋଗ ନି ଯୁଲିୟା, ନିରୁସ୍‍ ନି ୱାନି ତାଙ୍ଗିଁ ମାରି ଅଲୁମ୍ପା ନି ୱାରିୱାଲେ ମାନି ୱିଜୁ ଦାର୍ମୁଲୋକାଙ୍ଗ୍‍ଁ ନା ନମସ୍କାର୍‌ ୱେର୍‍ତୁ ।

16 ନିଜେନିଜେଦିଙ୍ଗ୍‍ଁ ନେଗେନ୍‌ତାନ୍‍ ନଣ୍ତ୍‍ଜି ନମସ୍କାର୍‌ କିଦୁ । କ୍ରିସ୍ତଦି ୱିଜୁ ମଣ୍ତଲି ମିଙ୍ଗିଁ ନମସ୍କାର୍‌ କିଜିନାତ୍‍ ।

17 ତଡ଼ାନ୍‍କୁ ନି ତାଙ୍ଗିଁକ୍‍, ବାତିଙ୍ଗ୍‌ ମାଲ୍‌ଜିନା, ମିର୍‌ ଆସ୍‍ତିମାନି ସିକିୟାଦି ବିରଦ୍‍ କିଜି ଏମେକାର୍‌ ମି ଲୋଇ ବାଗ୍‍ କିଦେଙ୍ଗ୍‍ଁ ଇଜି ବଦା କିନାର୍‌, ୱାରିମାଣାନ୍‍ ଆକତେବାଦୁ । 18 ଏମେକାର୍‌ ଇୟାୱାଜା ପାଣିଦୁ ତେବାନାର୍‍, ୱାର୍‌ ପ୍ରବୁ କ୍ରିସ୍ତ ସେବା କିଏଜିନାର୍‍, ୱାର୍‌ କେବଲ ନିଜେଦି ପଟା ପସା କିଦେଙ୍ଗ୍‍ଁ ଆଗ୍‍ଡ଼ି । ବାସାଦି ସାଲାକି ନି ସୁରି ମାଟାଦାନ୍‌ ୱାର୍‌ ସିଲିସାତି ଲୋକା ଜିବନ୍‌ତିଙ୍ଗ୍‌ ବାଣ୍ତିସ୍‍ କିନାର୍‌ । 19 ସୁସମାଚାର୍‌ ଉଣ୍ତିଙ୍ଗ୍‍ଁ ମି ବିସ୍‍ବାସ୍‍ ୱିଜେରେ ୱେର୍‌ଆମାନାର୍‌, ଇୟାଉଣ୍ତିଙ୍ଗ୍‍ଁ ନାନୁ ୱେଡ଼ିକା । ନାନୁ ବଦାକିନା, ମିର୍‌ ନେଗି ବିସୟ୍‍ତୁ ବୁଦିମାନିକାର୍‍ ଆଦୁ ମାରି ଅସତ୍‍ ବିସୟ୍‍ତୁ ମିସାମାଟ୍‍ । 20 ଆକାଆତିଙ୍ଗ୍‍ଁ ସାନ୍ତି ସିନି ମାପୁରୁ ବେଗି ସୟତାନ୍‍ତିଙ୍ଗ୍‍ଁ ମି ପାଦାମ୍‍କା ଆଡ୍‍ଗି କିନାନ୍‍ । ପ୍ରବୁ ଜିସୁଦି ଦୟା ମି ୱାଲେ ମାନିତ୍‍ ।

21 ✝ନା ୱାଲେ ଅର୍‍ସେପାଣିକିନି ତିମତି ମା ଜିହୁଦି ତଡ଼ାନ୍‍କୁ ଲୁକିୟ, ଜେସନ୍‍ ମାରି ସୋସିପାତ୍ର ମିଙ୍ଗିଁ ନମସ୍କାର୍‌ କିଜିନାର୍‍ ।

22 ଇୟା ଆକୁଦି ରାସ୍‍ତିକାନ୍‍ ତର୍ତ୍ତୀୟ ପ୍ରବୁଦି ଦର୍‍ତାନ୍‍ ମିଙ୍ଗିଁ ନମସ୍କାର୍‌ କିଜିନାନ୍‍ ।

23 ✝ନା ସେବାକିନି ଗାୟ, ଆମାୱାନି ଇଲ୍‍ତୁ ପାର୍‍ତନା କିନି ମଣ୍ତଲି ଉଣ୍ତାନାର୍‍ ମାରି ଇୟା ଗାଡ଼୍‍ତି ପେରିକାନ୍‌ ଏରାସ୍ଟ ନି ତଡ଼ାନ୍‍ କ୍ୱାର୍ତ୍ତ ବା ମିଙ୍ଗିଁ ମାଡ଼ିସ୍‍ କିଜିନାନ୍‍ । 24 ପ୍ରବୁ ଜିସୁ କ୍ରିସ୍ତଦି ଦୟା ମି ୱିଜେରିଙ୍ଗ୍‍ଁ ଆପିତ୍‌ ।

25 ରାଦୁ, ମାପୁରୁଦି ଗୌରବ୍‌ କିନାଟ୍‍ । ନାନୁ ପ୍ରଚାର୍‌ କିଜିମାନି ଜିସୁ କ୍ରିସ୍ତଦି ବିସୟ୍‍ତାନ୍‍ ସୁସମାଚାର୍ ନି ଜୁଗ୍‍ ଜୁଗ୍‍ ଆସ୍‌ସି ମାର୍‍ଗିଜିମାନି ମାଟା ସତ୍‍ ଇସାବ୍‍ତାନ୍‍ ମି ବିସ୍‍ବାସ୍‍ତିଙ୍ଗ୍‍ଁ ଆଟ୍‍ୱା ଇଡ୍‍ଦେଙ୍ଗ୍‍ଁ ଇଜି ମାପୁରୁ ଆଟ୍‌ନାନ୍‌ । 26 ଆୟା ମାର୍‍ଗିତି ମାଟାଦି ସତ୍‍ୱିଜୁ ବାବବାଦିରି ଦାର୍ମୁସାସ୍ତ୍ରଦୁ ତରାୟ୍‍ ଆତାମାନାତ୍‌ ମାରି ଆକା ଇଲେଇ ୱିଜୁଦିନ୍‍ତି ପ୍ରବୁ ମାପୁରୁଦି ମାଣାନ୍‌ ୱିଜୁ ଲୋକା ଲୋଇ ପ୍ରଚାର୍‍ ଆଜିନାତ୍‍ । ତେନି ମାଣାନ୍‌ ୱିଜେରେ ବିସ୍‍ବାସ୍‍ କିଜି ମାପୁରୁଦି ମାଟା ମାନାଦେଙ୍ଗ୍‍ଁ ଆଟ୍‍ନାର୍‍ ।

27 ପ୍ରବୁ ଜିସୁ କ୍ରିସ୍ତଦି ମାଣାନ୍‌ ୱିଜୁନେସ୍‍ନି ଅରେନ୍‌ ମାପୁରୁଦି ଜୁଗ୍‌ ଜୁଗ୍‍ ଗୌରବ୍‍ ଆପିନ୍‌ । ଆମେନ୍‍ ।