1 ଏ ତଡ଼ାନ୍‍କୁ ନି ତାଙ୍ଗିକ୍, ମିର୍‌ ଇନିକା ଆଇୱାରି ବିଚାର୍‌ କିଜିନିଦେର୍‍ ? ମିର୍‌ ଜେ ଏମେ ଲୋକ୍‍ ଆତିଙ୍ଗ୍‌ବା, ଇକା କିନିକା ମି ଇସାବ୍‍ତାନ୍‍ ଟିକ୍‍ ସିଲେ । ଆଇୱାରି ଦୋସ୍‍ ଆସ୍‌ସି ମିର୍‌ ଜଦି ନିଜେ ଆକା କିଜିମାନିଦେର୍‍, ଆବେଣାନ୍‍ ମିର୍‌ ନିଜେଦିଙ୍ଗ୍‍ ଦସି କିଜିନିଦେର୍‍ । 2 ମାପ୍‌ ନେସ୍‍ନାପ୍‍, ମାପୁରୁ ଇୟାୱାଜା କିଜିମାନି ଲୋକ୍‍ତି ଟିକ୍‍ ବିଚାର୍‍ କିନାନ୍‍ । 3 ଏ ତଡ଼ାନ୍‍କୁ ନି ତାଙ୍ଗିକ୍, ଆମା ତାଗ୍‌ଇ ପାଣି ଉଣ୍ତିଙ୍ଗ୍‌ ମିର୍‌ ଆଇୱାରିଙ୍ଗ୍‌ ବିଚାର୍‌ କିଜିନିଦେର୍‍, ଆକା ଜଦି ମିର୍‌ ନିଜେ କିଜିମାନିଦେର୍‍, ମିର୍‌ ମାପୁରୁଦି ବିଚାର୍‍ତି ଆଏପ୍‍ ଇଜି ଇନିକା ଅଡ଼ବିଜିନିଦେର୍‍ ନ ? 4 ଆନାତ୍‌, ମିର୍‌ ମାପୁରୁଦି ୱିଜ୍‍ଇ ଦୟା, ସାସ୍‌, ମାରି ଉଦାର୍‌କିନିତାନିଙ୍ଗ୍‍ ମାନାଇଜିନିଦେର୍‍ । ମିର୍‌ ଜଦିବା ନେସ୍‍ତିମାନିଦେର୍‍ ଜେ, ମି ମନ୍‍ତୁ ଅନୁତାପ୍‍ ତାତେଙ୍ଗ୍‍ ଇଜି ମାପୁରୁ ନିସା ଦୟା କିଜିନାନ୍‍ । 5 ମାତର୍‌ ମିର୍‌ ଗର୍ବ ନି ଆଟ୍‍ୱା ମୋନ୍‌ । ଆଦେଙ୍ଗ୍‌ ସେସ୍‍ ଦିନ୍‍ତି ବିଚାର୍‍ତିୱାଲେ ମିର୍‌ ମାପୁରୁଦି ଦଣ୍ତ୍‍ତି ଲୋକ୍‍ ଆଜି ନାଣ୍ତ କାସ୍ଟୁ ଦଣ୍ତ୍‍ ପୟ୍‍ନିଦେର୍‍ । 6 ଇରିଙ୍ଗ୍‌ ମାପୁରୁ ୱିଜେରିଙ୍ଗ୍‌ ୱାନି ପାଣି ଇସାବ୍‍ତାନ୍‍ ପଲ୍‍ ସିନାନ୍‍ । 7 ଏସୋଲୋକ୍‍ ଗୌରବ୍‍, ସନ୍‌ମାନ୍‌ ନି ୱିଜୁଦିନ୍‌ ତେବାନି ଆସାଦାନ୍‍ ସାସ୍‌ତାନ୍‍ ସତ୍‍ ପାଣି କିନା ସନାନ୍‍, ୱାରିଙ୍ଗ୍ ମାପୁରୁ ଏସ୍‌କାଙ୍ଗ୍‌ୱିଜ୍‍ଇ ଜିବନ୍‌ ସିନାନ୍‍ । 8 ଆଇକାର୍‌ ନିଜେଦିଙ୍ଗ୍‍ ସୁଣାର୍‍, ସତ୍‍ ସାରି ଡ଼ିସ୍‍ସି, ତାଗ୍‍ଇ ସାରି ସନାର୍‍ । ୱାରି ମୁସ୍‌କୁ ମାପୁରୁଦି ନାଣ୍ତ ରିସା ଆନାନ୍‍ । 9 ଏମେକାର୍‌ ତାଗ୍‍ଇ ପାଣିଦୁ ମିସାନାର୍‍, ୱାରି ଉଣ୍ତିଙ୍ଗ୍‌ ଦୁକୁ ନି କାସ୍ଟୁଦି ଦିନ୍‍ ୱାଜିନାତ୍‍ । ପାର୍‌ତୁମ୍‍ ଜିହୁଦି ଲୋକା ମୁସ୍‌କୁ ମାରି ତାନେୱେନ୍‌କା ଗ୍ରିକ୍‌ ଲୋକା ଉଣ୍ତିଙ୍ଗ୍‌ । 10 ମାତର୍‌ ଏମେକାର୍‌ ନେଗିପାଣି କିଜିମାନାର୍‍, ୱାର୍‌ ଜିହୁଦି ଲୋକୁ ଆପିର୍‍, ଅଣଜିହୁଦି ଲୋକୁ ଆପିର୍‍, ୱାରିଙ୍ଗ୍ ମାପୁରୁ ସମ୍ମାନ୍‍, ଗୌରବ୍‍ ନି ସାନ୍ତି ସିନାନ୍‍ । 11 ଇରିଙ୍ଗ୍‌ ମାପୁରୁ ଉନ୍‍ଣ୍ତ୍ରି ସାମାନ୍‌ଇସାବ୍‍ତାନ୍‌ ବିଚାର୍‍ କିନାନ୍‍ । 12 ଅଣଜିହୁଦି ଲୋକୁ ମସା ରାସ୍‍ତି ନିୟମ୍‍ ପୟ୍‍ଏର୍‍ । ନିୟମ୍‍ ପୟ୍‍ଏନ୍‍ଣ୍ତା ପାପ୍‍ କିତାର୍‌, ୱାର୍‌ ନିୟମ୍‍ ସିଲେଣ୍‌ଗା ସାନାର୍‍ । ଆଇ ଇସାବ୍‍ତାନ୍‍ ଜିହୁଦିଲୋକୁ ନିୟମ୍‍ ନେସ୍‍ତାମାନାର୍‍ ଆକା, ୱାର୍‌ ପାପ୍‍ କିତାର୍‌, ଆୟା ନିୟମ୍‍ ଇସାବ୍‍ତାନ୍‍ ବିଚାର୍‌ ଆନାର୍‍ । 13 ଇରିଙ୍ଗ୍‌ କେବଲ ନିୟମ୍‍ ୱେନି ମାଣାନ୍‌ ଲୋକୁ ମାପୁରୁଦି ଆଗ୍‍ଡ଼ି ଦାର୍ମୁ ଇଜି ୱେଙ୍ଗ୍‍ଦେଙ୍ଗ୍‍ଁ ଆଟ୍‍ଏର୍‍, ମାତର୍‌ ନିୟମ୍‍ ମାନାନି ମାଣାନ୍‌ ଦାର୍ମିକ ଇଜି ଗଣେଆନାର୍ । 14 ଅଣଜିହୁଦି ଲୋକା ନିୟମ୍‍ ସିଲେତ୍‍, ମାତର୍‌ ଜଦି ୱାର୍‌ ସାମାନ୍‍ତାନ୍‌ ନିୟମ୍‍ତି ବିସୟ୍‍କୁ ମାନାନାର୍‌, ଆକାନେ ୱାରି ନିୟମ୍‍ତି ୱାଜା । 15 ୱାରି ପାଣିଦାନ୍‍ ଇକା ଟିକ୍‍ ଆନାତ୍‌ ଜେ, ନିୟମ୍‍ତି ରାସାତିକା ୱାରି ଜିବନ୍‍ତୁ ରାସାତା ମାନାତ୍‌ । ଇୟା ମାଟାଦି ସତ୍‍ ୱାରି ମନ୍‍ତାନ୍‍ ବା ପାର୍‍ମାଣ୍‍ ଆନାତ୍‌ ସତ୍‍ସିନ୍ତା କିନିୱାଲେ ମନ୍ ୱାରିଙ୍ଗ୍ ସାକା କିନାତ୍‍, ତାଗ୍‍ଇସିନ୍ତା ୱାଲେ ଦସି କିନାତ୍‍ । 16 ଆମା ନାଣ୍ତିଙ୍ଗ୍‍ ମାପୁରୁ ଜିସୁ କ୍ରିସ୍ତଦି ମାଣାନ୍‌ ଲୋକା ମାର୍‍ଗିତି ବିସୟ୍‍ୱିଜୁ ବିଚାର୍‌ କିନାନ୍‍, ଆୟା ନାଣ୍ତିଙ୍ଗ୍‍ ନାନୁ ପ୍ରଚାର୍‍ କିତିମାନି ସୁସମାଚାର୍‌ ଇସାବ୍‍ତାନ୍‍ ଇୟାୱିଜୁ ଗଟାନାତ୍‌ ।

17 ମିର୍‌ ନିଜେଦିଙ୍ଗ୍‍ ଜିହୁଦି ଲୋକୁ ଇଜିନିଦେର୍‌, ମୋସାଦି ନିୟମ୍‍ ମୁସ୍‌କୁ ଆସା ଇଡ୍‍ଜି ମାରି ମାପୁରୁଦି ୱାଲେ ନିଜେ ମିସାନିକା ଅସି ଗର୍ବ କିଜିନିଦେର୍‍; 18 ମି ଉଣ୍ତିଙ୍ଗ୍‌ ମାପୁରୁଦି ବଦା ନେସ୍‍ତି ମାନିଦେର୍‍ ମାରି ନିୟମ୍‍ତି ସତ୍‍ ନି ଅସତ୍‍ ବୁଦି ପୟ୍‍ତିମାନିଦେର୍‍; 19 ସତେନେ ନେସ୍‍ତିମାନିଦେର୍‍, ଜେ ମିର୍‌ କାଣାଦିଙ୍ଗ୍‌ ସାରିତର୍‌ନିଲୋକୁ, ସିକାଟିଦୁ ମାନି ଲୋକା ଉଣ୍ତିଙ୍ଗ୍‌ ଜାୟ୍‌ ୱାଜା, 20 ବୁଦିସିଲି ଲୋକାଙ୍ଗ୍‍ ବୁଦିୱେର୍‍ନିକା, ନେସ୍‌ଇ ଲୋକାରି ଗୁରୁ । ମି ବିସ୍‍ବାସ୍‍ ଜେ, ନିୟମ୍‍ତାନ୍‍ ମିର୍‌ ପୁରା ସତ୍‍ ନି ବୁଦି ପୟ୍‍ତିମାନିଦେର୍‍ । 21 ମିର୍‌ ଆଇୱାରିଙ୍ଗ୍‌ ଅଜା କିଜିନିଦେର୍‍, ମାତର୍‌ ନିଜେ ଏନ୍ଦା ଅଜାଇଜିନିଦେର୍‍ ? "ଡଙ୍ଗାଁ କିମାଟ୍‌" ଇଜି ଅଜା କିଜି ନିଜେ ଡଙ୍ଗାଁ କିଜିନିଦେର୍‍ ? 22 "ଦାରିପାଣି କିମାଟ୍‌" ଇଜି ୱେର୍‍ସି ନିଜେ ଦାରିପାଣି କିଜିନିଦେର୍‍ନୋ ? ମିର୍‌ ବମା ପୁଜାଦି କାଡ଼୍‍ଜି ମନ୍ଦିର୍‌ତିଙ୍ଗ୍‌ ଡଙ୍ଗାଁ କିଇଜିନିଦେର୍‍ ? 23 ମିର୍‌ ମାପୁରୁଦି ନିୟମ୍‍ ପୟ୍‍ତାମାନାପ୍‍ ଇଜି ଗର୍ବ କିଜିନିଦେର୍‍, ମାତର୍‌ ତାନିଙ୍ଗ୍‍ ମାନାଇଜି ମାପୁରୁଙ୍ଗୁଁ ଅପମାନ୍‍ କିଜିନିଦେର୍‍ନୋ ? 24 ସାସ୍ତ୍ରଦୁ ରାସାତା ମାନାତ୍‌, "ମି ଉଣ୍ତିଙ୍ଗ୍‍ଁ ଅଣଜିହୁଦି ଲୋକା ଲୋଇ ମାପୁରୁ ନିଦା ପାଏ ଆଜିନାନ୍‍ ।"

25 ଜଦି ନିୟମ୍‍ ମାନାଜିମାନିଦେର୍‍; ମି ସୁନ୍ନତ ମାଟାଦି ଇସାବ୍‌ ମାନାତ୍‌ । ମାତର୍‌ ଜଦି ନିୟମ୍‍ ଅମାନ୍ୟ କିନିଦେର୍‍, ମିର୍‌ ସୁନ୍ନତ ଆଇ ମାନି ଲୋକା ୱାଲେ ସାମାନ୍‍ । 26 ଜଦି ସୁନ୍ନତ ଆଇ ମାନି ଅରେନ୍‍ ଅଣଜିହୁଦି ଲୋକୁ ନିୟମ୍‍ତି ବିଦି ୱିଜୁ ମାନାଜିମାନାନ୍‍, ମାପୁରୁ ୱାନିଙ୍ଗ୍‌ ସୁନ୍ନତ ୱାଜା ଆସ୍‍ଏନ୍‍ ନୋ ? 27 ଆଦେଙ୍ଗ୍‌ ମେନ୍ଦଲ୍‌ତୁ ସୁନ୍ନତ ଆଇ ମାନି ଏମେ ଅଣଜିହୁଦି ଲୋକୁ ନିୟମ୍‍ ମାନାନାର୍‌, ୱାର୍‌ ମି ବିଚାର୍‌ କିନାର୍‌, ଇରିଙ୍ଗ୍‌ ମିର୍‌ ମେନ୍ଦଲ୍‌ତୁ ସୁନ୍ନତ ଆଜି ନିୟମ୍‍ ପୟ୍‍ତି ମାରିଙ୍ଗ୍‍ଁ ବା, ଆକା ଅମାନ୍ୟ କିଜିନିଦେର୍‍, 28 କେବଲ ମେନ୍ଧଲ୍‍ ଇସାବ୍‍ତାନ୍‍ ସୁନ୍ନତ ଆଜି ମୁସ୍‌କୁ ଜିହୁଦିଲୋକୁ ଇଜି ତର୍‍ଆୟ୍‍ ଆଜିମାନି ଲୋକୁ ସତ୍‌ତାନ୍‌ ଜିହୁଦି ଲୋକୁ ସିଲେ । 29 ଏନ୍‌ ଜିବନ୍‍ତୁ ଜିହୁଦି, ୱାନ୍‌ ଆଜିନାନ୍‍ ସତ୍‌ତାନ୍‌ ଜିହୁଦି । ସତ୍‍ ସୁନ୍ନତ ଜିବନ୍‍ତି ବିସୟ୍‍; ଆକା ଆତ୍ମିକ, ରାସାତିକା ଆଏତ୍‍ । ଇୟାୱାଜା ଲୋକୁ ମାଣାନ୍‌ ୱେଡ଼ିକା ପୟ୍‍ଦେଙ୍ଗ୍‌ ଆଟ୍‌ଏନ୍‍; ୱାନ୍‌ ଆକା ପୟ୍‍ନାନ୍‍ ମାପୁରୁଦିମାଣାନ୍‌ ।