1 ଆର୍‌ତିଙ୍ଗ୍‌ ମେନ୍ଦଲ୍‌ ଇସାବ୍‌ତାନ୍‌ ମା ପୁର୍ବେଦି ବୁବା ଅବ୍ରାହାମତି ଇନିକା ପୋଇତାମାନାନ୍‌ ଇଜି ଇନିକା ଇନାଟ୍‍ ? 2 ଜଦି ୱାନି ନିଜେଦି ପାଣି ଅବ୍ରାହାମ ୱାନ୍‌ ମାପୁରୁଦି ଆଗ୍‍ଡ଼ି ଦାର୍ମୁଦିକାନ୍‍ ୱେଙ୍ଗିଁତାନ୍‌ମାନ୍ଦି, ଗାର୍ବୁ କିଦେଙ୍ଗ୍ ଇଜି ୱାନି ମାଟା ମାର୍ହାତ୍‌ । ମାତର୍‌ ମାପୁରୁ ଆଗ୍‍ଡ଼ି ଆକା ଆଏତ୍‍ମାର୍ହାତ୍‍ । 3 ✝୪:୩ ଗାଲାତିୟ ୩:୬.ଦାର୍ମୁସାସ୍ତ୍ର ଇସାବ୍‍ତାନ୍‍, "ଅବ୍ରାହାମ ମାପୁରୁମାନୁ ବିସ୍‍ବାସ୍‍ କିତାନ୍‍ ମାରି ଇୟା ବିସ୍‍ବାସ୍‍ ଉଣ୍ତିଙ୍ଗ୍‌ ମାପୁରୁ ୱାନିଙ୍ଗ୍‌ ଦାର୍ମୁଦିକାନ୍‍ ଆସ୍‌ତାନ୍‌ ।" 4 ଏନ୍‌ ପାଣି କିନାନ୍‍, ୱାନି କୁଲି ପଇନାନ୍‌ ଆମାୱାନିମାଣାନ୍‍ ଦାନ୍‍ ୱାଜା ୱାନ୍‌ ଆକା ପୟ୍‍ଏନ୍‍ । 5 ମାତର୍‌ ଏନ୍‌ ନିଜେଦି ମୁସ୍‌କୁ ବିସ୍‍ବାସ୍ ଇଡ୍‍ଏନ୍‍ଣ୍ତା, ମାପୁରୁମାନୁ ବିସ୍‍ବାସ୍‍ କିନାନ୍‍, ୱାନି ବିସ୍‍ବାସ୍‍ ଉଣ୍ତିଙ୍ଗ୍‌ ଦସ୍‍କିତି ୱାନିଙ୍ଗ୍‍ ଦସ୍‍ ଡ଼ିସିସ୍‍ କିଜିମାନି ମାପୁରୁ ୱାନିଙ୍ଗ୍‌ ଦାର୍ମୁତିକାନ୍‍ ୱାଜା ଆସ୍‍ନାନ୍‍ । 6 ଏମେ ଲୋକ୍‍ତି କିତିମାନି ପାଣି ଉଣ୍ତିଙ୍ଗ୍‌ ସୁଡ଼ୁଏନ୍‍ଣ୍ତା ମାପୁରୁ ମାରି ୱାନିଙ୍ଗ୍‌ ଦାର୍ମୁଦିକାନ୍‍ ୱାଜା ଆସ୍‍ନାନ୍‍, ୱାନିଙ୍ଗ୍‌ ପ୍ରସଂସା କିଜି ଦାଉଦ ଇର୍ହାମାନାନ୍‌;

7 "ଆମାୱାନି ଦସ୍‍ କେମା ଆତାମାନାତ୍‌, ୱାନ୍‌ ଦନ୍ୟ,

ଏନ୍‌ ପାପ୍‍ କେମା ପୟ୍‍ତାମାନାନ୍‍, ୱାନ୍‌ ଦନ୍ୟ ।

8 ମାପୁରୁ ଆମାୱାନି ପାପ୍‍ ଲେକିସ୍‍ କିଏନ୍‌, ୱାନ୍‌ ଦନ୍ୟ !"

9 ଇବେ ଦାଉଦ ଏମେୱାରିଙ୍ଗ୍‍ ଆର୍ସିବାଦ୍‍ତିକାର୍‍ ଇଜି ଇଜିନାନ୍‌, ୱାର୍‌ ଇନିକା କେବଲ ସୁନ୍ନତ ଲୋକୁ ମାର୍ହାର୍‌ ? ସିଲେ, ଅସୁନ୍ନତ ଲୋକୁ ବା ଆର୍ସିବାଦ୍‍ତି ଲୋକୁ ଆଦେଙ୍ଗ୍‌ ଆଟ୍‍ନାର୍‍ । ମାଡ୍‌ ଇଜିନିକା ଅବ୍ରାହାମ ବିସ୍‍ବାସ୍‍ ତାନ୍‍ ଦାର୍ମୁତିକାନ୍‍ ଇଜି ୱେଙ୍ଗିଁତାନ୍‍, 10 ଇକା ଆମା ୱେଡ଼ାଦୁ ଗଟାତାମାର୍ହାତ୍‍ ? ଅବ୍ରାହାମ ସୁନ୍ନତ ଆନି ୱେନ୍‌କା ନୋ, ତାନି ଆଗ୍‍ଡ଼ିରାନ୍‍ ? ୱେନ୍‌କା ସିଲେ । 11 ସୁନ୍ନତ ଆନି ଆଗ୍‍ଡ଼ିରାନ୍‍ ଅବ୍ରାହାମ୍‍ତି ବିସ୍‍ବାସ୍‍ ଉଣ୍ତିଙ୍ଗ୍‌ ମାପୁରୁ ୱାନିଙ୍ଗ୍‌ ଦାର୍ମୁଦିକାନ୍‍ ୱାଜା ଆସ୍‍ତାମାର୍ହାନ୍‍ । ଇକା ୱେର୍‍ତେଙ୍ଗ୍‍ ଇଜି ଉନ୍‍ଣ୍ତ୍ରି ସିନା ୱାଜା ଅବ୍ରାହାମ ଇୟା ସୁନ୍ନତ ବିଦି ମାନାତାମାର୍‌ର୍ହାନ୍‌ । ମାରି, ଏମେକାର୍‌ ସୁନ୍ନତ ଆଏନ୍‍ଣ୍ତା ବା ମାପୁରୁ ମାଣାନ୍‌ ଦାର୍ମୁଦିକାର୍‍ ଇଜି ଆତାମାନାର୍‌, ଆତ୍ମିକ୍‍ ଇସାବ୍‍ତାନ୍‍ ଅବ୍ରାହାମ ୱାରି ବୁବାସି । 12 ବୁବା ଅବ୍ରାହାମ ସୁନ୍ନତ ଆନି ଆଗ୍‍ଡ଼ିରାନ୍‍ ଏମେ ବିସ୍‍ବାସ୍‍ତାନ୍ ଜିଜି ମାର୍ହାନ୍‍, ଜଦି ସୁନ୍ନତ ଆଇ ମାନି ଲୋକୁ ନିଜେ ଜିବନ୍‍ତୁ ଆୟାୱାଜା ବିସ୍‍ବାସ୍‍ ତର୍‍ତେଙ୍ଗ୍‍ ଆଟ୍‍ନାର୍‍, ଅବ୍ରାହାମ ୱାରି ବୁବାସି ।

13 ✝ ୪:୧୩ ଗାଲାତିୟ ୩:୨୯. ଅବ୍ରାହାମ ନିୟମ୍‍ ମାନାନି ମାନି ଉଣ୍ତିଙ୍ଗ୍‌ ସିଲେ । କେବଲ ୱାନି ବିସ୍‍ବାସ୍‍ ଉଣ୍ତିଙ୍ଗ୍‌ ମାପୁରୁଦି ମାଣାନ୍‌ ଦାର୍ମୁତିକାନ୍‍ ୱାଜା ୱେଙ୍ଗିଁତାମାର୍ହାନ୍‍ ମାରି ଆୟା ଉଣ୍ତିଙ୍ଗ୍‌ ୱାନ୍‌ ୱାନି କୁଟୁମ୍‌ତିକାର୍‍ ଦୁନିଆଦି ଅଦିକାରି ଆନାର୍‍ ଇଜି ମାପୁରୁ ପାର୍‌ମାଣ୍‌ କିତାମାର୍ହାନ୍ । 14 ✝୪:୧୪ ଗାଲାତିୟ ୩:୧୮.ଏମେକାର୍ ନିୟମ୍‍ ମାନାନାର୍‌, କେବଲ ୱାର୍‌ ଜଦି ମାପୁରୁଦି ଦାନ୍‍ ପୟ୍‍ନାର୍‍, ଆର୍‌ତିଙ୍ଗ୍‌ ଲୋକା ବିସ୍‍ବାସ୍‍ ଆର୍‍ଏ, ମାପୁରୁଦି ପାର୍‍ମାଣ୍‍ତିକା ବା ଇନି ଲାବ୍‌ ସିଲେତ୍‍ । 15 ନିୟମ୍‍ ମାନାଇ ଲୋକୁ ମାପୁରୁଦି ରିସାଦିକାର୍‍ ଆନାର୍‍ । ମାତର୍‌ ଏମେମାନୁ ନିୟମ୍ ସିଲେତ୍‍, ଆବେ ନିୟମ୍‍ ମାନାଇ ମାଟା ନିଙ୍ଗିଁଏ ଜିନାତ୍‍ ।

16 ✝ ୪:୧୬ ଗାଲାତିୟ ୩:୭. ଆଦେଙ୍ଗ୍‌ ମାପୁରୁଦି ପାର୍‍ମାଣ୍‍ ବିସ୍‍ବାସ୍‍ ମୁସ୍‌କୁ ମାନାତ୍‍ । ଏମେକାର୍‌ ନିୟମ୍‍ ମାନାନାର୍‌, କେବଲ ୱାରି ଉଣ୍ତିଙ୍ଗ୍‌ ମାପୁରୁଦି ପାର୍‍ମାଣ୍‍ ରାସାଏତ୍‍ ! ଅବ୍ରାହାମ୍‍ତି ୱାଜା ବିସ୍‍ବାସ୍‍ କିଜିମାନି ୱିଜେରି ଉଣ୍ତିଙ୍ଗ୍‌ ଆକା ନେଗିକା, ଇରିଙ୍ଗ୍‌ ଅବ୍ରାହାମ ୱାରି ଆତ୍ମିକ ବୁବାସି । 17 ଇୟା ବିସୟ୍‌ତାନ୍‌ ସାସ୍ତ୍ରଦୁ ରାସାତାମାନାତ୍‌, "ନିଙ୍ଗିଁ ମାପୁ ନାଣ୍ଡ ଜାତିଦି ବୁବାସି କିତାମାନାପ୍‍ ।" ମାପୁରୁଦି ଆଗ୍‍ଡ଼ି ଇୟା ପାର୍‍ମାଣ୍‍ ଟିକ୍‍ ମାର୍ହାତ୍‌, ଇରିଙ୍ଗ୍‌ ଏମେ ମାପୁରୁଙ୍ଗ୍‍ଁ ଅବ୍ରାହାମ ବିସ୍‍ବାସ୍‍ କିଜିମାର୍ହାନ୍‍, ୱାନି ବାକ୍ୟ ସାତିତାନିଙ୍ଗ୍‍ ଜିପିସ୍‍କିନାତ୍‍ ମାରି ୱାରିମାଣାନ୍‍ ୱିଜୁ ବିସୟ୍‍ ତିଆର୍‍ କିନାତ୍‍ । 18 ଆସା କିଦେଙ୍ଗ୍‌ ଇଜି ଇନି ମାଟା ସିଲେତିଙ୍ଗ୍‍ ବା ଅବ୍ରାହାମ ବିସ୍‍ବାସ୍‍ କିଜି ଆସା କିଜି ଇଟ୍‍ତାନ୍‍ । ଆଦେଙ୍ଗ୍‌ ୱାନ୍‌ ନାଣ୍ତ ଜାତିଦି ବୁବା ଆତାନ୍‌, ଇରିଙ୍ଗ୍‌ ସାସ୍ତ୍ର ଇସାବ୍‍ତାନ୍‍ ୱାନିଙ୍ଗ୍‌ ପାର୍‍ମାଣ୍‍ ପୁଟ୍‍ତାମାର୍ହାତ୍‍, "ନି କୁଟୁମ୍‌ତିକାର୍‍ ବାଦଡ଼୍‍ତି ସୁକେଙ୍ଗାଁ ୱାଜା ନାଣ୍ତଆଦେଙ୍ଗ୍‌ ଆଟ୍‍ନାର୍‍ ।" 19 ୱାନିଙ୍ଗ୍‌ ନାସ୍ତିୱାଲେ ସହେ ବାର୍‍ସେକ୍‍ ଆତାମାର୍ହାତ୍‍ । ମାତର୍‌ ୱାନି ସାତିୱାଜା ମେନ୍ଦଲ୍‌ତି ମାଟା ଅଡ଼୍‍ବିଜି, ମାରି ସାରା ଜେ କଡ଼ ଜନମ୍‍ କିଦେଙ୍ଗ୍‌ ଉପାୟ୍‌ ସିଲେତାତ୍‍, ଇୟା ମାଟା ନେସ୍‍ସି, ତାନିଙ୍କ୍ ବିସ୍‍ବାସ୍‍ ଆଏତ୍‍ମାର୍ହାତ୍‍ । 20 ୱାନ୍‌ ୱାନି ବିସ୍‍ବାସ୍‍ତାନ୍ ୱେର୍‌ଏ ଆଏତାନ୍‍, ନ ମାପୁରୁଦି ପାର୍‍ମାଣ୍‍ତିଙ୍ଗ୍‍ ଅଡ଼୍‌ବିଏତାନ୍‍ । ବିସ୍‍ବାସ୍‍ ୱାନିଙ୍ଗ୍‌ ବପୁଦାନ୍‌ ପୁରା କିତାତ୍‍ ମାରି ୱାନ୍‌ ମାପୁରୁଦି ପ୍ରସଂସା ପାଟା କିତାନ୍‍ । 21 ମାପୁରୁ ଏମେ ପାର୍‍ମାଣ୍‍ କିତାମାର୍ହାନ୍, ୱାନ୍‌ ଆକା ମାନାନାନ୍‍ ଇଜି ୱାନି ଆଟ୍‍ୱା ବିସ୍‍ବାସ୍‍ ମାର୍ହାତ୍‌ । 22 ଆୟା ଉଣ୍ତିଙ୍ଗ୍‌ ୱାନି ବିସ୍‍ବାସ୍‍ ଉଣ୍ତିଙ୍ଗ୍‍ଁ ଅବ୍ରାହାମ ମାପୁରୁଦି ମାଣାନ୍‌ ଦାର୍ମୁଦିକାନ୍‍ ଇଜି ୱେଙ୍ଗିଁତା ମାର୍ହାନ୍‍ । 23 "ଦାର୍ମୁଦିକାନ୍‍ ୱାଜା ଆନିକା" ସାସ୍ତ୍ର ମାଟା କେବଲ ଅବ୍ରାହାମ୍‍ତି ଉଣ୍ତିଙ୍ଗ୍‌ ଜେ ଦର୍‍କାର୍‍, ଆକା ସିଲେ । 24 ଇରିଙ୍ଗ୍‌ ମାଡ୍‌ ବା ମାପୁରୁମାନୁ ବିସ୍‍ବାସ୍‍ କିନି ମାଣାନ୍‌ ଦାର୍ମୁତିକାର୍‍ ୱାଜା ୱେଙ୍ଗିଁନିକା । ମାପୁରୁ ପ୍ରବୁ ଜିସୁଙ୍ଗୁଁ ସାତିମାଣାନ୍‍ ନିକ୍‍ତାମାନାନ୍‍ । 25 ଆୟା ପ୍ରବୁ ଜିସୁ ମା ପାପ୍‍ତି ଉଦାର୍‌ କିନି ଉଣ୍ତିଙ୍ଗ୍‌ ୱାନ୍‌ ସାତାମାର୍ହାନ୍‍ ମାରି ମାପୁରୁଦି ଲାକ୍‍ତୁ ମାଙ୍ଗିଁ ଦାର୍ମୁଦିକାର୍‍ କିବିସ୍‍ କିନି ଉଣ୍ତିଙ୍ଗ୍‌ ମାରିଡ଼େସି ନିଙ୍ଗିଁତାମାନାନ୍‌ ।