1 ସାସନ୍‍କିନି ମାରି ଅଦିକାର୍‌ ପୟ୍‌ତି ଲୋକା ଆଡ୍‍ଗି ମାନ୍‍ଜି ୱାରି ଆଦେସ୍‌ ମାନାଦେଙ୍ଗ୍‌ ମାରି ୱିଜୁ ସତ୍‍ପାଣିଦୁ ସାକା କିନି ଉଣ୍ତିଙ୍ଗ୍‌ ତିଆର୍‌ ଆଦେଙ୍ଗ୍‌ ମଣ୍ତ୍‌ଲିଦି ପେରିୱାରିଙ୍ଗ୍‌ ଏତ୍‌ କିବିସ୍‌କିଦୁ । 2 ଏ ନିଦା ମାଟା ୱାର୍‌ଗିଏଣ୍‌ଗା ସାନ୍ତି ମାରି ସଙ୍ଗ୍‌ତି ୱାଜା ସାଲାଦେଙ୍ଗ୍‌ ମାରି ୱିଜୁ ଲୋକା ଉଣ୍ତିଙ୍ଗ୍‌ ନେଗି ପାଣି କିଦେଙ୍ଗ୍‌ ୱାରିଙ୍ଗ୍ ଆଦେସ୍‌ ସିଦୁ । 3 ମାପ୍‌ ନିଜେ ଅର୍‍ଲେନ୍‍ ବୁଦିସିଲିକା, ମାନାଏଜି ମାରି ବାୟା ମାର୍ହାପ୍‌, ୱିଜୁ ରକମ୍‍ତି ସୁକ୍‌ବୋଗ୍‌ ମାରି ତାଗ୍‍ଇ ବିସୟ୍‌କାଙ୍ଗ୍‌ ୱିଜୁ ତେବାତା ମାର୍ହାପ୍‌; ଆକାର୍‍ ମାରି ରିସାଦାନ୍‌ ଦିନ୍‌କାଟେକିଜି ମାର୍ହାପ୍‌; ଆଇକାର୍‌ ମାଙ୍ଗିଁ କାଡ଼୍‌ଜି ମାର୍ହାର୍‌, ମାପ୍‌ ବା ୱାରିଙ୍ଗ୍ କାଡ଼୍‌ଜି ମାର୍ହାପ୍‌ । 4 ମାତର୍‌ ଏସ୍ତିୱାଲେ ମାଙ୍ଗିଁ ରକିୟାକିତି ମାପୁରୁଦି ଦୟା ମାରି ଲୋକା ଉଣ୍ତିଙ୍ଗ୍‌ ୱାନି ଜିବନ୍‌ନୋନିକା ୱେଙ୍ଗିଁତାତ୍‌ । 5 ମା ସତ୍‍ପାଣିଦି ପଲ୍‌ ୱାଜା ଇକା ଆଏତ୍‍ । କେବଲ ୱାନି ଦୟାଦାନ୍‌ ପବିତ୍ର ଆତ୍ମାଦି ମୁଟ୍‌ନିମାଣାନ୍‌ ମା ପାପ୍‌ ୱିଜୁ ନରାଇ ଆତାମାନାତ୍‌ ମାରି ମାପ୍‌ ପୁନି ଜନମ୍‍ ପୟ୍‌ଜି ରକିୟା ପୟ୍‌ତାମାନାପ୍‌ । 6 ମାଙ୍ଗିଁ ରକିୟାକିତି ପ୍ରବୁ ଜିସୁ କ୍ରିସ୍ତଦି ମାଣାନ୍‌ ଇୟାୱିଜୁ ପୁରା ଆତାମାନାତ୍‌ । ୱାନି ଉଣ୍ତିଙ୍ଗ୍‌ ମାପୁରୁ ମାଙ୍ଗିଁ ନାଣ୍ତ୍‌ଦାନ୍‌ ପବିତ୍ରଆତ୍ମା ସିତାମାନାନ୍‌ । 7 ୱାନି ଦୟାଦାନ୍‌ ମାପ୍‌ ମାପୁରୁଦି ଆଗ୍‌ଡ଼ି ଦାର୍ମୁଦୁ ମିସାଜି, ମା ଆସା ଇସାବ୍‌ତାନ୍‌ ଏସ୍‌କାଙ୍ଗ୍‌ୱିଜ୍‌ଇ ଜିବନ୍‌ତୁ ସନ୍‍ଡ୍ରେଙ୍ଗ୍‍ ସାରି ପୟ୍‌ତାମାନାପ୍‌ । 8 ଇୟା ମାଟା ପୁରା ସତ୍‍ ।

ଇୟାୱିଜୁ ବିସୟ୍‌ ମୁସ୍‌କୁ ମିର୍‌ ନାଣ୍ତ୍‌ ଦିୟାନ୍‌ ସିଜି ବୁଜାକିନିଦେର୍‌, ଆମାକାର୍‌ ମାପୁରୁମାନୁ ବିସ୍‌ବାସ୍‌ କିନାର୍‌, ୱାର୍‌ ସତ୍‌ପାଣି କିଜି ଦିନ୍‌ କାଟେକିନିକା ମାନାତ୍‌; ୱିଜେରି ଉଣ୍ତିଙ୍ଗ୍‌ ଆମାକା ନେଗିକା, ଆୟାୱିଜୁ ପାଣିଦୁ ତେବାନିକା ମାନାତ୍‌ । 9 ମାତର୍‌ ଆର୍‌ଏ ଲାଗାଜିସାନିକା, ପୁର୍ବେଦି ଡକ୍ରାଦାଦାରି ନିର୍‌ଇ ଦର୍‌କା ଦାଡ଼ି ମାରି ସାସ୍ତ୍ର ଅସି ଆର୍‍ଏ ଜାଟି, ଆଉଲି ମାରି ଆସ୍‌ସିସାନିକା ୱିଜୁ ଡ଼ିସ୍‌ତୁ । ଇକା ଇନିକାସିଲିକା ନି ବେକାର୍‌ । 10 ଜାଟି କିଜିମାନି ଲୋକ୍‌ତିଙ୍ଗ୍‌ ରୁଣ୍ତି ଦେବେଙ୍ଗ୍‌ ଜାଗ୍‌ରାତା ମାଟା ୱେର୍‍ତୁ, ଆର୍‌ତିଙ୍ଗ୍‌ ୱାନ୍‌ ଜଦି ୱେନ୍‌ଏନ୍‌ ୱାନି ୱାଲେ ମିସାବିଡ଼୍‍ ଡ଼ିସ୍‌ସୋ ସିଦୁ । 11 ମିର୍‌ ନେସ୍‌ତିମାନିଦେର୍‌, ଇୟାୱାଜା ଲୋକ୍‌ ଏଣ୍ତେସ୍‌ ସାରିବାଣାତାମାନାନ୍‌, ୱାନି ପାଣି ମାଣାନ୍‌ ୱାନ୍‌ ନିଜେଦିଙ୍ଗ୍‌ ପାପ୍‌ ଇଜି ନିଜେ ପାର୍‌ମାଣ୍‍ କିନାନ୍‍ ।

12 ✝ ୩:୧୨ ପ୍ରେରିତ ୨୦:୪; ଏପିସିୟ ୬:୨୧,୨୨; କଲସିୟ ୪:୭,୮; ୨ ତିମତି ୪:୧୨. ନାନ୍‌ ଏସ୍ତିୱାଲେ ମି ଲାକ୍‌ତୁ ଆର୍ତ୍ତେମା ନି ତୁକିକଦିଙ୍ଗ୍‍ ପୋକ୍‌ତାନା, ନାସ୍ତିୱାଲେ ମିର୍‌ ନିକପଲିଦୁ ୱାଦେଙ୍ଗ୍ ଇଜି ସେସ୍ଟା କିଦୁ, ଇରିଙ୍ଗ୍‌ ଆବେନ୍‌ ନାନ୍‌ ପିନିକାଡ଼ା କାଟେକିଦେଙ୍ଗ୍‍ଁ ବଦା କିତାମାନା । 13 ✝୩:୧୩ ପ୍ରେରିତ ୧୮:୨୪; ୧ କରିନ୍ତିୟ ୧୬:୧୨.ସାସ୍ତ୍ରଗୁରୁ ଜିନା ମାରି ଆପୋଲୋଦି ବୁଲାନି ଉଣ୍ତିଙ୍ଗ୍‌ ଆମା ଆମାକା ଦର୍‌କାର୍‌, ୱିଜୁ ଉଣ୍ତା କିଜି ସିଜି, ସନିସାରିଦୁ ୱାରିଙ୍ଗ୍ ସାହାଜ୍ୟ କିଦୁ । 14 ସତ୍‌ପାଣିଦାନ୍‌ ଦିନ୍‌ କାଟେକିଜି ନିଜେ ନିଜେଦି ଆସା ପୁରା କିନି ଉଣ୍ତିଙ୍ଗ୍‌ ସିଲିସାତି ଲୋକାଙ୍ଗ୍‌ ସିକ୍‌ୟା ସିଦୁ । ୱାର୍‌ ଆର୍‍ଏ ବାସ୍‌ସୋ ମାନ୍‌ମାକିର୍‌ ।

15 ଇବେନୁ ନା ୱାଲେ ମାନି ୱିଜୁ ଲୋକ୍‌ ମିଙ୍ଗିଁ ନମସ୍କାର୍‌ ଜାଣେକିଜିନାର୍‌ । ୱିଜୁ ବିସ୍‌ବାସ୍‌ସିର୍‌ ବନ୍ଦୁରିଙ୍ଗ୍‌ ମା ନମସ୍କାର୍‌ ଜଣେକିଦୁ ।

ମାପୁରୁଦି ଦୟା ମି ୱିଜେରି ଉଣ୍ତିଙ୍ଗ୍‌ ଆପିତ୍‌ ।