EXODUS 2

Moses El Isusla

1 Ke pacl se inge sie mukul ke sruf lal Levi el payukyak sin sie mutan in sruf sacna, 2 ac mutan sac el oswela tulik mukul se. Ke el liye lah tulik na wowo se, el okanulla malem tolu.✝2:2 Orek 7:20; Heb 11:23 3 Na ke el tia ku in sifil okanulla, el orala fotoh se ke ah, na el itangla ke mwe fulful in tia wohn. El filiya tulik sac loac ac usla filiya inmasrlon ah sisken infacl uh. 4 Tulik mutan se wien tulik sac el tu loes kutu lukel in liye lah mea ac sikyak nu sel.

5 Na acn se natul tokosra tufoki in yihyih ke infacl soko ah, ac mutan kulansap lal tuelik sisken infacl ah. Na el liyauk fotoh sac inmasrlon ac ah, ac el sap sie mutan kulansap lal in som use. 6 Fisrak sac ikasla ac liyauk tulik mukul srisrik se. Tulik sac tung, na el pakomutal ac fahk, "Tulik srisrik Hebrew se pa nge."

7 Na tulik mutan se wien tulik sac siyuk, "Mea, nga ac tia som konauk sie mutan Hebrew ah in katiti tulik se inge?"

8 El topuk, "Wona." Ouinge tulik mutan sac som solama nina na kien tulik sac. 9 Fisrak sac fahk nu sin nina sac, "Eis tulik se inge ac liyalang, ac nga fah moli nu sum." Ouinge el us tulik sac ac liyalang. 10 Tok, ke tulik sac matula, nina sac el usalla nu yurin acn natul tokosra, su nutella oana ma na natul. El fahk mu, "Nga fah sang inel ‘Moses’*2:10 Moses: fahkyen ine se inge fototo nu ke "olak" in kas Hebrew. mweyen nga ololak liki inkof uh."✝2:10 Orek 7:21