Gênesis 6

Moul Koluk Lun Mwet

1 Ke mwet uh fahsrelik nu yen nukewa faclu, ac oasr tulik mutan osweyukla,✝6:1 6:1–4 Job 1:6; 2:1 2 kutu sin mwet lucng liyauk lah tulik mutan inge oasku, ouinge elos payukyak selos su elos lungse. 3 Na LEUM GOD El fahk, "Nga fah tia fuhlela mwet uh in moul nwe tok — elos mano na sukawil. Ingela elos ac fah tia moul loes liki yac siofok longoul." 4 In len ingo, aok finne kutu pacl toko, oasr mwet na lulap pisa fin faclu pangpang Nephilim, su ma nutin mutan faclu nu sin mukul lucng. Elos mwet na pwengpeng ac pulaik in pacl so.✝6:4 Oek 13:33

5 Ke LEUM GOD El liye lupan koluk lun mwet nukewa fin faclu, ac lupan nunak koluk lalos ke pacl nukewa,✝6:5 6:5–8 Mt 24:37; Lk 17:26; 1 Pet 3:20 6 El arulana auli lah el oralosla ac fuhlelosi fin faclu. Yohk oela lal, 7 na El fahk, "Nga fah sukela mwet nukewa nga orala inge, wi ma orakrak ac won nukewa, mweyen yohk toasr luk lah nga oralosla." 8 Tusruktu LEUM GOD El insewowo sel Noah.

Noah

9 Pa inge sramsram kacl Noah ac fwilin tulik natul. Noah el moul in sie sin sie yurin God, ac el mukena moul suwohs ac wangin mwatal inmasrlon mwet nukewa in fwil lal.✝6:9 2 Pet 2:5