LUKE 2

Kisayang Jesus In Tempul

22 Sun pacl fal in oru alu in aknasnas, oana ma simla in Ma Sap lal Moses. Ke ma inge Joseph ac Mary eltal usla tulik sac nu Jerusalem in eisalang nu sin Leum God, 23 oana ke simla in Ma Sap lun Leum God, fahk mu: "Wounse mukul nukewa enenu in kisakinyukyang nu sin Leum God."*2:23 Wounse mukul nukewa ... Leum God: ma sap se inge ma nu ke tulik ac oayapa kosro nutin mwet se.✝2:23 Exo 13:2, 12 24 Eltal oayapa som in tuh kisakin luo wuleoa ku luo wule fusr, oana ke oakwuk lun Ma Sap lun Leum God.

25 In pacl sac oasr mukul se muta in Jerusalem pangpang Simeon. El sie mwet suwoswos su arulana akfulatye God in moul lal, ac el soano moliyukla lun Israel. Ngun Mutal welul, 26 ac akkalemyeang nu sel mu el ac fah tiana misa nwe ke na el liye Messiah, su Leum God El wulela kac. 27 Ngun Mutal el kololla Simeon nu in Tempul. Ke papa ac nina kien tulik Jesus usalak nu in Tempul in oru oana ma oakwuk lun Ma Sap, 28 Simeon el eis tulik sac, kafsalak inpaol, ac kaksakin God ac fahk:

29 "Leum God, wulela lom akpwayeyuk.

Inge kom ku in fuhlela mwet kulansap lom in som in misla.

30 Ke mutuk sifacna nga liye tari molela lom,

31 Su kom akoela ye mutun mwet in mutanfacl nukewa:

32 Sie kalem in fahkak ma lungse lom nu sin mwet pegan,

Ac in ase wolana lom nu sin mwet lom, mwet Israel."

33 Papa ac nina kien tulik sac arulana lut ke ma Simeon el fahk kacl. 34 Simeon el akinsewowoyaltal ac fahk nu sel Mary, nina kial, "Tulik se inge solla sin God nu ke musalla ac musaiyukyak lun mwet puspis in Israel. El ac fah sie akul sin God me, su mwet puspis ac fah kaskas lainul, 35 ac ma inge ac fah fahkak nunak lukma su oan in elos. Ac kom ac fah arulana asor, oana ke sie cutlass kosroh fakisya in ngunum."

36 In pacl sac tuh oasr pac mutan palu se, inel pa Anna, acn natul Phanuel sin sruf lal Asher. El arulana matuoh. El tuh payuk ke el mutan fusr ac muta yurin mukul tumal ah yac itkosr, 37 na el katinmasla, ac mukena muta nwe ke el sun yac oalngoul akosr. El tiana illa liki Tempul, a el mutana we in alu, lalo ac pre ke len ac fong. 38 In pacl sacna el kalukyang nu yoroltal ac sang kulo nu sin God, na el kaskas ke tulik sac nu sin mwet nukewa su tupan molela lun God nu sin Jerusalem.