Mark 16:9-20

9 [Tukun Jesus el sifil moulyak liki misa, ke toang na ke len se meet in wik, el sikyang nu sel Mary Magdalene, su Jesus el tuh sisla demon itkosr lukel. 10 Mary el som ac fahkak nu sin mwet ma welul Jesus meet, ke elos srakna tung ac asor. 11 Ke elos lohng ke el fahk mu Jesus el moulyak ac sikyak nu sel, elos tia lulalfongi ma el fahk.

Jesus El Sikyang Nu Sin Luo Mwet Tumal Lutlut

(Luke 24:13–35)

12 Tukun ma inge, Jesus el sikyang nu sin luo pac selos, in sie pacna lumah, ke eltal fahsr inkanek laltal nu likin siti uh. 13 Eltal folokla ac fahkak nu sin mwet lula, a elos tia pac lulalfongeltal.

Jesus El Sikyang Nu Sin Mwet Singoul Sie

(Matthew 28:16–20; Luke 24:36–49; John 20:19–23; Orekma 1:6–8)

14 Oetok, na Jesus el sikyang nu sin mwet tumal lutlut singoul sie ke elos mongo. El kaelos ke selulalfongi lalos, ac ke upaiyen insialos in lulalfongelos su liyal tari tukun el moulyak. 15 Ac el fahk nu selos, "Kowos som nu fin faclu nufon, ac fahkak Pweng Wo nu sin mwet uh nukewa. 16 Kutena mwet su lulalfongi ac baptaisla fah moul; a elos su tia lulalfongi fah lisyukla. 17 Mwet lulalfongi uh ac fah itukyang ku nu selos in oru mwe akul inge: elos fah sisla demon uh inek; elos fah kaskas ke kain in kas sasu; 18 elos fin srukak wet pwasin ku nim ke kutena mwe nim ma ac ku in sang misa nu selos, ma inge ac fah tia ku in akkolukyalos; ac elos ac fah filiya paolos nu fin mwet mas ac elos ac kwela."

Jesus El Utukyak Nu Inkusrao

(Luke 24:50–53; Orekma 1:9–11)

19 Tukun Leum Jesus el kaskas nu selos, utukyak el nu inkusrao ac muta lapo layot sin God. 20 Na mwet tumal lutlut elos som ac luti yen nukewa. Leum Jesus el welulos ke orekma elos oru, ac el akpwayeye luti lalos ke mwe akul ma elos oru.]

[9] Mutan ah som ac fahk nu sel Peter ac elos su oelul, ma nukewa ma fwackyang nu seltal. [10] Tukun ma inge, Jesus el sifacna supwalik mwet tumal lutlut in fahkak kas mutal, kas in loango ke moul ma pahtpat nu fin faclu nufon.]]