1 దొడనాన్ అన్ నివ్డిప్త అమ్మన్, అద్నే సినపరున్, సత్తెం ఇమ్మున్ ప్రేమ్ కల్స, వాయ్సనండత్. అన్ మాత్రమి తోద్ సత్తెమున్ ఒర్కిల్‍తర్ సదర్ మంది ఇమ్మున్ కరెయ్ ప్రేమ్ కల్సర్. 2 తనుంఙ్ ఇంతే నెడత్తి సత్తెం ఇలుత్ అండద్ అద్ ఎప్పుడి ఇలుత్ అన్సద్. 3 బాంద్ ఎద్ద దెయ్యం తన, పోరక్ యేసు క్రీస్తు తన సత్తెం, ప్రేమ్ ముత్ నేడున్ కృప, దయ, సాంతి సంఙ్ అనేంఙ్ గాక.

4 బాంద్ నంతన నేండ్ సుమ్మతా ఆగ్య ప్రకార్ ఇమ్మె సినపరత్తి కొన్సెం మంది సత్తెం పావుత్ అడ్గనెర్ ఇసా ఒర్కి అన్ గుల్ కుసీంఙ్ వర్సత్. 5 అమ్మ, కొన్సెం ఆగ్య ఇమున్ వాయ్తేతి తోద్, ఒక్కొనుఙ్ ఒక్కొద్ ప్రేమ్ కలేంఙ్ ఇసా ఆగ్య పేలె తన నేడున్ అనెకదునీ సుమ్ముత్ ఇమ్ముఙ్ వింతి కల్సత్.

6 అమ్‍నె ఆగ్యన్ వినేకద్ వగిపేంకాది ప్రేమ్. ఆరంబ తాన నీర్ వింత ఆగ్య కయిదనడ్ అడ్గనెర్. 7 యేసు క్రీస్తునె మేనాడ్ వత్తేంద్ ఇసా ఒప్పుత్న పసిపేకార్ గుల్ మంది ఈ దున్యత్ కురియ్తేర్. అనాటద్ పసిపెకద్, క్రీస్తు విరొది. 8 నేండె సదర్ మంది పని ఇదర్తదున్ వరేకావున్ సయ్సేటా, పురా ప్రతిపలం సమ్మెకాద్లఙ్ ఓలేంఙ్.

9 క్రీస్తునే ఇడ్డేకతీ ఇలుత్ అన్సేట దున్ సయుత్న ముదర్వై సేరేకా ప్రతి ఒక్కొద్ దెయ్యమున్ ఒప్సెటద్ ఈ ఇడ్డేకద్ ఇలుత్ అనెకరున్ బాంద్, కీకె గిన ఒప్పెకద్. 10 ఈ ఉపదేసం ఎర్సెటయ్ మరొక్కొ ఉపదేసం ఎదేనా ఇమున్ మెరా వత్తే, అమ్నున్ సోయ్‍వాయిట్ ప్రస్న తప్పుర్. ఇమ్మె ఎల్లంఙ్ కుగ్నేడ్. 11 అమ్నున్ ముడ్గాతద్ అమ్మనే కరాబ్ పనికున్ కలైతెతి.

12 ఇంకా ఎన్నిగొ సంగతిక్ ఇమ్మున్ వాయేంఙ్ ఇసా కుసి అండద్. గని కాగుద్, ఇరియేకద్ అనుంఙ్ పసాన్ తోద్. నేండ్ సదర్ మంది పురా ఎన్నానంఙ్ ఇమ్మె మెరా వత్నా ఇమ్మడ్ మేక ముండట్ ముడెంఙ్ ఇసా ఆస అండద్. 13 నివ్డిప్త ఇమ్మె తోర్దా నే పిల్లక్ ఇమ్మున్ దన్యావద్ ఇడ్సనండాతున్.