ఎల్లన్ సాయుత్‍ సెద్ద పోరక్
11 యేసుంద్ పెనా గిన ఇనంఙ్ ఇడ్‍తెద్. ఒక్కొ మన్కంఙ్ ఇద్దర్ కీకె అండెర్. 12 ఔర్తన సిన్నం బానున్ వెంటా, బబా! ఆస్తి తన అనుంఙ్ వరెకా ఇసా పయుత్ ఇదే సియ్ ఇసా వెలుత్ ఓల్‍తెద్. తే బాంద్ ఔర్ ఇద్దరుంఙ్‍నై ఆ ఆస్తిన్ పైయుత్ సియ్తెంద్. 13 కొన్ని దినాలడ్‍ అముదు సిన్నం తన్నె ఇసన్‍ విరుత్, పైసె సుముత్ దావ్ తా దేసెముంఙ్ సెద్దెంద్. అత్తి సుకమ్తా బత్క బొగిల్సా బాత్కెంఙ్‍, కరాబ్ ఆదతు కరపుత్న, పైసె సిమ్కన తిర్పుత్ వతెంద్.
14 అమ్నె సిమ్కన పైసె తిర్‍ తా వెన్కత్, ఆ దేసుత్ గుల్ దండి కరువ్‍ పట్టిన్. అప్పుడ్ అమ్నత్తీ తినెంఙ్ ఉనెంఙ్ తనయ్ తొత్తిన్. 15 ఆ దేసుత్ ఒక్కొ మన్కనంత్తి సెత్న పని వెలుత్బ ఓల్‍తెద్. అప్పుడ్ ఆ మన్కక్ తన్నె తుర్రె తినెకాద్ ఉనెకాద్నె కయ్యెకదుంఙ్ అమ్నున్ కెన్‍వై పావిట్టెద్.
16 తే అముదు గుల్ కారవ్రుత్‍ అండకాడితుంఙ్‍, తుర్రె తినెకా పొట్టున్ ఎన తిత్న పెట్టెన్ నిడ్పత్ ఇసా ఓల్‍నెద్. గని అమ్నుంఙ్ ఎరి తనయ్ తినెంఙ్ సియెతెర్. 17 అమ్నుంఙ్ బుద్ది వత్తిన్ అప్పుడ్, అన్నె బానె ఎల్లత్ ఎత్తెఓ మంది కుల్కలకెరున్ సుకమ్‍ తా సంది అన్సాద్. గని అన్ ఇత్తి సంది తోసెటా తిక్సనాంసాత్. 18 అన్ ఈ దేసున్ సాయుత్న, అన్నె బానాత్తి సెరత్ అని, బబా అన్ పరలోకముంఙ్ ఉల్ట ఎత్న, ఇన్నె నదురుంఙ్ ముండట్ పాప్ కత్తన్. 19 ఇండి తన ఇన్నె కీకె ఇసా కూగెంఙ్ పని సియెన్. ఇన్నె కుల్కలకెరున్ ఒక్కొద్ ఇసా ఇడ్ ఇందత్ ఇసా విచార్ కత్న, వెంటాయ్ బాన్‍వై సెరెంఙ్ కురియ్‍తెద్.
20 గని అముదు గుల్ దావ్వ అనెంఙ్‍ బాంద్ అమ్నున్ ఓల్తెంద్. తే అమ్నున్ పొయ్ కివ్ వత్తిన్. అప్పుడ్ కీకెన్‍వై తుల్ సెద్దెంద్ అని ముదిడుత్ కలయ్‍తెద్. 21 అప్పుడ్ ఆ కీకె బానున్ వెంటా, బబా! అన్ పరలోకముంఙ్ వెంటా విరోద్ ఎత్న, ఇన్నె నదురుంఙ్ ముండట్ పాప్ కత్తన. ఇత్రనాట్ ఇన్నె కీకె ఇసా కూగెంఙ్ కామ్ సియెన్ ఇసా ఇంతెంద్. 22 గని బాంద్ తన్నె గడియకెరున్ వెంటా, సపాన సెత్న, సిమ్కనంఙ్ ఎనా సోయ్త జుఙ్ఙే కొత్న తొడుపుర్. అమ్నె వెందెంఙ్ ఒంఙెరం తొడుపుర్, గెట్టలుంఙ్ కెర్రిక్ తొడుపుర్. 23 అని సోయ్‍ కొరువ్ తా పడ్డన్ కొత్న తర్గుర్. నేండ్‍ సిమ్కన కుసినడ్ జెవున్ కాన్నర్. 24 తికుత్ పానం ఎదెత్తి అని దవ్డిలుత్ సెత్న రొంబట్టెతి, ఇమ్‌ద అన్నె కీకె ఎన్నెంద్ ఇసా ఇడ్‍తెద్. అప్పుడ్ ఔర్ కుసినడ్ జెవుంనె పని సురు కత్తెర్.