Apocalipse 5

Di beebaa wini mo Tama siibi

1 Au gaa mmada gi di beebaa wini i lodo di lima gau donu o tangada dela e noho i hongo di lohongo king. Di beebaa wini deenei la guu buni di hihi ginai nia mee i nia baahi e lua, gei guu nnoo gi nia noo e hidu.✝5.1 Ezekiel 2.9-10; Isaiah 29.11 2 Gei au gaa mmada gi tangada di langi maaloo, e hai dana haga iloo gi nua, "Ma koai dela e tau di wwede nia noo, gaa huge di beebaa wini?" 3 Deai tangada i di langi, be i henuailala, be i bahi i lala henuailala, e mee di huge di beebaa wini, be e mmada gi lodo di maa. 4 Gei au guu dangi huoloo giibeni, idimaa, tangada ne gida bolo e mee di huge di beebaa wini, be e mmada gi lodo ai. 5 Tangada e dahi i digau mmaadua aamua, ga helekai mai, "Hudee dangi. Mmada! Di Laion mai di madawaawa o Judah, go di hagadili aamua o David, go Mee gu aali, e mee di wwede nia noo e hidu, mo di huge di beebaa wini deelaa."✝5.5 Genesis 49.9; Isaiah 11.1,10

6 Gei au gaa mmada gi Tama siibi, e duu i tungaalodo di lohongo king, e haganiga go nia manu mouli e haa, mo digau mmaadua aamua. Tama siibi le e hai be siibi ne daaligi gii made. Mee ono madaagoo e hidu, ge e hidu ono golomada, ala go nia hagataalunga e hidu a God ala ne hagau gi lodo henuailala hagatau.✝5.6 Isaiah 53.7; Zechariah 4.10 7 Tama siibi gaa hana, gaa kae di beebaa wini i di lima gau donu o Tangada dela e noho i hongo di lohongo king. 8 Dono kae di beebaa deelaa, nia manu mouli e haa, mo digau mmaadua aamua e madalua maa haa gaa pala gi lala i mua Tama siibi. Digaula huogodoo e dagidahi mee hai daahili ‘harp’ mono boolo goolo e honu i nia mee haga kala ‘incense’, ala go nia dalodalo o nia daangada a God.✝5.8 Pisalem 141.2 9 Digaula gaa huwa di nadau daahili hoou,

"Goe e tau anga bolo e kae

di beebaa wini, gaa wwede ono noo.

Idimaa, Goe dela gu daaligi, guu made,

gei mai i oo dodo Goe gu hui gi God

nnagadilinga daangada mai

nia madawaawa huogodoo,

hagadilinga helekai, nnenua llauehe,

mo nia hagadilinga daangada

henua huogodoo.✝5.9 Pisalem 33.3; 98.1; Isaiah 42.10

10 Goe guu hai digaula

gii hai tenua hai mee dabu

e hai nnegau tadau God,

gei digaula e dagi i henuailala."✝5.10 Exodus 19.6; Hagagida 1.6

11 Au gaa mmada labelaa, ga longono digau di langi, digau e dogologowaahee! Digaula e tuu e haganiga di lohongo king, nia manu mouli e haa, mo digau mmaadua aamua.✝5.11 Daniel 7.10 12 Digaula e huwa di nadau daahili boloo,

"Tama siibi ne daaligi gii made,

le e tau anga bolo e wanga ginai

di mogobuna, maluagina, iloo mee,

mo nia mahi, aamua, madamada

mo di hagaamu!"

13 Gei au ga longono nia mee huogodoo i di langi, henuailala, bahi i lala henuailala, mo i lodo di moana, ala go nia mee mouli huogodoo i henuailala mo lala di langi. Digaula e dadaahili boloo,

"Di hagaamu, di hagalaamua,

di madamada, mo di maaloo

gii wanga ina gi Mee

dela e noho i hongo di lohongo king

mo ang gi Tama siibi,

gaa hana hua beelaa!"

14 Nia manu mouli e haa ga helekai, "Amen!" Gei digau mmaadua aamua gaa pala gi lala, ga daumaha.