Atos 8

32 Di gowaa dela nogo dau go mee i lodo di Beebaa Dabu la deenei:

"Mee e hai gadoo be siibi dela ma gaa dagi,

e daaligi gii made,

ge hagalee dangi i dono madagoaa ma gaa dahi ono ngaahulu,

gei mee e noho hua dee muu.

33 Gei mee ne haga langaadia,

gei digau hai gabunga ne haga de iloo ginaadou a Mee.

Deai tangada e mee di helekai i dono madahaanau ai,

idimaa, dono mouli i henuailala nei la gu hagalawa."✝8.33 Isaiah 53.7-8

34 Taane deelaa ga heeu gi Philip, "Hagia mai, ma koai dela e helekai ai soukohp? Mee e helekai i deia, be tangada i golo?" 35 Philip ga daamada ga helekai mai i nia gubu aanei i lodo di Beebaa Dabu, ga hagi anga gi mee di Longo Humalia o Jesus.