Taganoho Hagalabagau
1 "Aanei nia haganoho huogodoo ala ne hagi mai go Dimaadua di godou God bolo au gi agoago ina adu gi goodou. Goodou la gi haga gila ina aga nia maa i lodo tenua dela ga hai mee ginai goodou. 2 Di waalooloo o godou mouli, gei goodou mo godou madawaawa gi hagalaamua ina Dimaadua di godou God, mo di haga gila ina aga ana haganoho huogodoo ala e gowadu ko au gi goodou, gei goodou ga mouli waalooloo i lodo tenua deelaa. 3 Goodou go digau Israel, hagalongo mo di daudalia nia maa, gei goodou ga haadanga lamalia gaa hai tenua maaloo, gaa noho i lodo tenua tomo ge logo ono meegai, be di hagababa a Dimaadua di godou God dela ne hai ang gi godou damana mmaadua.
4 "Goodou go digau Israel, goodou gi langahia di mee deenei! Dimaadua dela go tadau God, go Mee hua dela go God.6.4 Mark 12.29 5 Aloho i Dimaadua go doo God aga i lodo do manawa hagatau, mo do mouli hagatau, mo oo mahi hagatau.6.5 Matthew 22.37; Mark 12.30; Luke 10.27 6 Hudee delangahia nnaganoho aanei, ala e gowadu ko Au gi goodou dangi nei.6.6 Deuteronomy 11.18-20 7 Agoago ina nia maa gi au dama i lodo doo hale, mo do madagoaa dela e heehee iei goe i malaelae, mo do madagoaa ma gaa moe gi lala mo do madagoaa ma ga ala aga. 8 Nnoo ina nia maa gi oo lima mo doo lae gi langalangahia goodou nia maa. 9 Hihia nia maa gi di gili nia duludulu mo di gili di bontai o doo hale.
Domínio Público. Esta tradução bíblica de domínio público é trazida a você por cortesia de eBible.org.