Isaiah 11:1-10

Tenua noho i di aumaalia

1 Di hagatau o di madawaawa David le e hai be di laagau dela ne hele gi lala. Gei di maa e matilitili aga nia dama i di gili di tono di laagau deelaa, e hai be di King hoou dela ma ga gila aga i lodo di madawaawa David.✝11.1 Hagagida 5.5; 22.16

2 Di Hagataalunga o Dimaadua gaa wanga gi Mee

di iloo mee mo di kabemee,

mo di hangaahai o di dagi ana daangada.

Gei Mee ga iloo Ia di manawa Dimaadua ga hagalaamua a Mee,

3 ga gidee Ia dono manawa tenetene

i dono hagalongo ang gi Mee.

Gei Mee hagalee hagi aga ana mee ala e gidee Ia,

be i ana mee ne longono ai.

4 Mee ga hagi aga digau ala e hagaloale

gi di mee dela e donu,

ge Ia ga hagamaamaa digau ala nadau hagamaamaa ai gii donu.

Gei Mee ga hagaduadua ge ga daaligi digau hai mee huaidu gii mmade gi ana helekai.✝11.4 2 Thessalonians 2.8

5 Gei Mee gaa dagi ana daangada gi di tonu mo di manawa dahi.✝11.5 Ephesians 6.14

6 Nia paana lodo geinga mono siibi gaa noho tenetene i di gowaa e dahi,

nia manu ‘leopard’ ga kiikii dalia nia damaa kuudi,

nia damaa kau mono dama laion ga hahaangai i di gowaa e dahi,

gei nia damagiigi lligi ga benebene digaula.✝11.6 Isaiah 65.25

7 Nia kau mono ‘bear’ ga miami i di gowaa e dahi,

mo nia damaa kau mono dama ‘bear’ gaa kii i di gowaa e dahi i di aumaalia.

Nia laion gaa gai nia geinga ala e gaigai go nia kau.

8 Gei tama dulii la hagalee tale ang gi di haingadaa,

maa mee ga haihai ana dadaagala i baahi o nia gihaa poisin.

9 I hongo Zion, di gonduu haga madagu a God,

deai di mee e hagahuaidu be e daaligi i golo ai,

idimaa, henuailala gaa honu i di kabemee mai baahi Dimaadua,

gadoo be di moana dela e honu i nia wai.✝11.9 Habakkuk 2.14

Nia daangada ga lloomoi gi muli

10 Dahi laangi ga dau mai, di madagoaa di King hoou i di hagadili o David gaa hai di ada hagamodongoohia ang gi nia henua llauehe ala i golo. Digaula ga dagabuli i dono waahale king, ga hagalaamua a Mee.✝11.10 Romans 15.12