Joel 2:28-32

28 "I muli nia mee aanei,

gei Au ga llingi iha dogu Hagataalunga

gi hongo nia daangada huogodoo.

Godou dama daane mono dama ahina

ga hagadele agu helekai.

Godou gau mmaadua gaa hai nadau midi,

ge godou dama daane mo dama ahina

gaa hai nadau moe.✝2.28 Nnegau 2.17-21

29 Di madagoaa hua deelaa,

gei Au ga llingi iha dogu Hagataalunga labelaa

gi hongo digau hai hegau,

nia daane mo nia ahina.

30 "Au gaa hai agu hagailongo haga goboina

i di langi i nua mo i hongo henuailala.

Nia dodo mo di ahi,

mo di huiahi damanaiee

gadoo be nia gololangi ga kila aga.

31 Di laa ga bouli dongoeho,

ge di malama gaa huli gaa mmee be nia dodo

i mua di dau mai o di laangi aamua

ge hagamadagudagu dangada o Dimaadua.✝2.31 Matthew 24.29; Mark 13.24-25; Luke 21.25; Hagagida 6.12-13

32 Gei digau huogodoo ala ma ga tangi anga

i di ingoo o Dimaadua le e haga mouli.

Gii hai be nia helekai a Dimaadua ala ne hai boloo,

‘Hunu gau i hongo di Gonduu Zion

mo i lodo o Jerusalem ga dagaloaha,

go digau ala e hili ko Au le e haga mouli.’"✝2.32 Romans 10.13