23 Jesus e hana laa lodo di waa laagau meegai ‘wheat’ i di Laangi Sabad. Ana dama agoago e hula madalia a Mee, e hagihagi nia huwa o nia laagau ‘wheat’.2.23 Deuteronomy 23.25 24 Gei nia Pharisee ga helekai gi Jesus, "Mmada gi au dama agoago ala e hai nia mee ala e bule go tadau haganoho bolo hagalee hai i di Laangi Sabad."
25 Jesus ga helekai gi digaula, "Goodou digi daulia di mee a David ne hai i di madagoaa mee mo ono ehoo ne hiigai?2.25 1 Samuel 21.1-6 26 Digaula ne ulu gi lodo di hale o God, gaa gai nia palaawaa dabu ala ne hagadabu ang gi God, i di madagoaa tagi aamua hai mee dabu go Abiathar. Tadau haganoho le e hai bolo go digau hai mee dabu hua ala e mee di gai nia palaawaa aalaa, gei David guu gai nia maa, guu wanga labelaa gi ono ehoo gi geina."2.26 Leviticus 24.9
27 Jesus ga helekai, "Di Laangi Sabad la ne hai belee hagahumalia ai tangada, gei tangada la hagalee ne hai ang gi di Laangi Sabad. 28 Malaa, Tama Tangada le e dagi labelaa di Laangi Sabad."
Domínio Público. Esta tradução bíblica de domínio público é trazida a você por cortesia de eBible.org.