Marcos 4

Jesus e haga kila di madangi gono

35 Hiahi hua di laangi deelaa, gei Jesus ga helekai gi ana dama agoago, "Gidaadou gaa hula gi di baahi i golo o tai." 36 Gei digaula ga hagatanga gi daha mo tagabuulinga dangada deelaa, gei nia dama agoago gaa kaga gi di boodi dela e noho Jesus nonua, gaa hula ginaadou. Nia boodi labelaa nogo i golo. 37 Gei di madangi guu gono huoloo, di moana gu bagibagia huoloo, di boodi gu hahaawa, gu hoohoo ga abulu. 38 Jesus e kii i muli waga di boodi, e ulungi i di ulungi. Nia dama agoago ga hangahanga a Mee, ga helekai, "Tangada Agoago, Goe e de hei e Goe bolo gidaadou gaa mmade?"

39 Jesus ga duu i nua, ga helekai gi di madangi, "Kila!" ga helekai labelaa gi nia beau, "Bapaba!" Gei di madangi guu kila, di moana gu bapaba.

40 Gei Jesus ga helekai gi ana dama agoago, "Goodou e mmaadagu di aha? Goodou digi hagadonu hegau?"

41 Digaula gu mmaadagu huoloo, ga leelee i nadau mehanga, "Taane deenei la koai, dela e hagalongo ginai di madangi mo nia beau?"