Mateus 4

Di hagamada o Jesus

1 Nomuli, gei di Hagataalunga gaa lahi a Jesus gi di anggowaa belee hagamada go Setan.✝4.1 Hebrews 2.18; 4.15 2 I muli nia laangi madahaa ge madahaa boo, gei Mee digi miami, gu hiigai. 3 Gei Setan ga hanimoi gi Mee, ga helekai, "Maa goe di Tama a God, helekai gi nia hadu aanei gii hai nia palaawaa."

4 Jesus ga helekai, "Ma guu lawa di hihi i lodo di Beebaa Dabu boloo:

‘Tangada la hagalee mouli hua mai di palaawaa,

gei e mouli i nia helekai huogodoo

ala e lloomoi i baahi o God.’"✝4.4 Deuteronomy 8.3

5 Setan gaa lahi Jesus gi Jerusalem, go di Waahale Hagamadagu, gaa dugu a Mee gi di ulu di Hale Daumaha, 6 ga helekai gi Mee, "Maa goe di Tama a God, hobo ia gi daha, gii hai be nnelekai di Beebaa Dabu boloo:

‘God ga helekai gi ana gau di langi i di Goe,

digaula ga daahi Goe gi dee tugi oo wae gi nia hadu.’"✝4.6 Pisalem 91.11-12

7 Jesus ga helekai, "Ma guu lawa di hihi labelaa i lodo di Beebaa Dabu boloo:

‘Gi hudee haga mada ina Dimaadua go doo God.’"✝4.7 Deuteronomy 6.16

8 Setan gaa lahi labelaa a Mee gi tomo di gonduu duuduu i nua ga hagi anga gi Mee nia henua huogodoo o henuailala mo nadau madamada, 9 ga helekai, "Au ga gowadu gi di Goe nia mee huogodoo aanei, maa Goe ga dogoduli, ga daumaha mai gi di au."

10 Jesus ga helekai, "Tuu i daha mo Au, Setan! Di Beebaa Dabu e helekai boloo:

‘Daumaha ang gi Dimaadua go doo God,

gei deelaa hua go Mee gi hai hegau ginai goe!’"✝4.10 Deuteronomy 6.13

11 Setan guu hana gi daha mo Jesus. Gei digau di langi ga lloomoi, ga hagamaamaa a Mee.