Lucas 7

31 — Каса дэчи Манги тэ ушатэрдияв э манушэн адалэ вахытескерэн? — пхэнэлас о Исус. — Каски он ушадиен? 32 Он сар пуя, савэ бэшлэ ко майдани тай дэн бэбэря екх аврэски:

«Амэ марасас тумэнги опэр дурули,

ай тумэ на кхелэнас.

Амэ дасас паромаски гиля,

ай тумэ на ровэнас».

33 Дикхен, аки ало о Иоанн о Болдимари, на хал манро тай на пиел винас, тай тумэ пхэнэн: «Андэ лэстэ шэйтани» 34 Ало о Чяво о Манушыкано, хал тай пиел, тай тумэ пхэнэн: «Аки о хавджяло тай о матимари, о амал э кидимаренго э налогенгерэнго тай э бэзялэнго». 35 Алаи о пуя э годявэримаски сикавэн, кай о годявэрипэ си чячё.

О макхипэ э Исусеско э багалыс духыдэнца

36 Екх андар фарисея диняс икос э Исусес пэстэ тэ хал. О Исус ало лэстэ андэ кхер тай лиляс тхан пал конас. 37 Адава вахыти екх джювли андар адалэ дизатэ, савя джянэнас, сар бэзяля, галили, кай о Исус хал андэ кхер ко фарисеи, андяс алебастрови кхоро, андэ савэстэ сас бут багалыс духыс.