1 এটা কুকে দুলৌড় নাতিনাং আপে জিউযাপনে পে, হেৎদ আত্মিক বরদান কুরাআ নাতিনাং কুরু মূটুই পে, বিশেষ কাতে যেন ভাবিজাগার গাম দাড়ি কাঃআ পে।

2 চিয়া আ চি অকয় হড় বিশেষ ঠারতে জাগারেয়ায়্য়, ইনিদ মান্মি রাঃআ হান্ডে দ ল্হয়, মেন্খান ঈশ্বর রাঃআ হান্ডে গামে তানায়; কারন যাহায় কাকু বুঝা, বরং ইনি রীলামালা আত্মাতে নিগুড়তত্ব* গামেয়ায়্য়।

3 মেন্খান অকয় মান্মি ভাবিজাগারেয়ায়্য়, ইনিদ মান্মি কু রাঃআ হান্ডে গাথা রাকাপ নাতিনাং হেৎদ আশা হেৎদ সান্তনা রাঃআ থুতিয়ায়্য়।

4 অকয় হড় বিশেষ ঠারতে থুতিয়ায়্য়, ইনিদ আচ্কেগে গাথা রাকাপিয়ায়, মেন্খান অকয় হড় ভাবিজাগারেয়ায়্য় ইনিদ মন্ডলীকে গাথা রাকাপিয়ায়্য়।

5 ইঞাঃআ ইচ্ছাদ নিয়া তানা, আপে যাতে বিশেষ বিশেষ ঠারতে জাগার দাড়িকাঃআ পে, মেন্খান বেশি নঅঞ আসি তানা, যাতে ভাবিজাগার গাম দাড়ি কাপে; চিয়া চি অকয় বিশেষ বিশেষ ঠারতে জাগারায়, মন্ডলী কে গাথা রাকাপ নাতিনাং ইনি যদি অর্থ গাম বুঝা কাঃআ দাড়িয়া কুয়া, তবেখান ভাবিজাগার জাগারিচ হানি হাতেৎ মহান তানায়।

6 নাহাআ, এ হাগাঞ- মিসিঞ তিকু আপেয়া হান্ডে হিচ্ কাতে যদি বিশেষ বিশেষ ঠারতেঞ জাগারা, মেন্খান আপেয়া হান্ডে সার্তি সদর রাঃআ চি আকেল রাঃআ চি ভাবিজাগার রাঃআ চি চেচেদা আ লেকানা উপমা কাঞ গামেয়া, তবেখান ইঞাঃআ হান্ডে হাতেৎ আপে কিনা আ উপ্কার পে নেল্নামেয়া ?

7 রুতু হুয়েন চি বানাম হুয়েন, যদি জীউহীন রুউয়ান জিনিস হঅ তাল মান কাঃআ দহ কাতে সাডিয়ায়্, তবে খান রুতুতে চি বানামতে কিনা আ সাডি তানা মেন্তে, চিল্কাতে সারি নাম আ?

8 রুতু রাঃআ সুর যদি অস্পস্ট হ্যুয়ায়্, এন্খান অকয় লেকানিচ দঅ লাড়াই নাতিনাং স্যাপড়াআয় ?

9 এনে এন্খাগে আপে যদি আলাংতে জাগরাপে, অকা আল্গাতে বুঝা নামআ, ইঙ্কান জাগার কাপে গামেয়া, এন্খান কিনা গাম বুঝাপে তানা, এন্খান ইনা চিল্কাতে সারি নামেয়াপে? আপে গাম কেৎআপে হেৎদ যাহায় কাপে বুঝা দাড়িলাৎআ।

10 হুই দাড়িয়া ধার্তি রে আন্তীত লেকা আড়াং মেনা আ, হেৎদ অর্থহীন জাহানা বায়ায়না।

11 বেশ, ইঞ যদি আড়াং কু রাঃআ অর্থ কাঞ সারিয়া আ, তবেখান অকয় গামেয়ায়্য়, ইনি রাঃআ হান্ডে ইঞদ বর্ব্বর* লেকাইঞ হুইঅআ, হেৎদ ইঞাঃআ হান্ডে হানি জাগারিচ হঅ বর্ব্বর লেকা হুইঅয়ায়্য়্।

12 এন্খান আপে চিন্তং নানা হুনার আত্মিক বরদাড়ি নাম নাতিনাং স্যাপড়া পে, ইন্তং কুরু মূটুইপে, যাতে মন্ডলীকে গাথা রাকাপ নাতিনাং আশিসষ পে।

13 নিয়া নাতিনাং অকয় মান্মি এটা ঠার তে থুতিয়ায়্, হানিদ বিন্তি কা আয়, যাতে অর্থ বুঝা তুকা দাড়িয়া কুকায়।

14 চিয়া চি ইঞ যদি এটা ঠার তেঞ বিন্তিয়া, এন্খান ইঞআ আত্মা বিন্তিয়ায়, মেন্খান ইঞআ বুদ্ধিদ বেকারআ।

15 এন্খান কিনাঞ চিকায়াআ? ইঞ আত্মা তে হঅঞ বিন্তি য়াআ, বুদ্ধি তে হঅঞ বিন্তিয়া; আত্মা তে হঅঞ দুরাং য়েয়া, বুদ্ধি তে হঅঞ দুরাং য়েয়া।

16 বাংখান আম যদি আত্মাতে মানতগুনাৎয়েয়াম, এন্খান আয়ুম হড় অকয় কায় বুঝায়, ইনিদ চিল্কাতে আমাঃ আ সারাওরে 'আমেন (পুরায়না) গামেয়ায়্য়? আম কিনা আ গামে তানাম, ইনা মাত ইনি কায় সারিয়ায়্য়।

17 মেন্খান আম মাত বুগিন লেকাতে সারাও এমাই তানাম ঠিক, মেন্খান আয়ুম হড় কুকে মাত কাঃম গাথা রাকাপকুতানা। 18 ইঞ ঈশ্বর রাঃআ সারাওএ তানাঞ, আপে জ্ত্ হড়কু হাতেৎ ইঞ গাদা লেকা এটা ঠার তেঞ থুতি তানাঞ মেন্তে;

19 মেন্খান মন্ডলী তালারে, এটা ঠারতে দশ হাজার থুতি কুরা জাগার হাতেৎ, বরঞ্চ বুদ্ধিতে মড়েয়া থুতিঞ জাগার বুঝাইঞ তানা, যাতে এটা হড় কুকে হঅ চেচেদাঞ এম দাড়িয়া কুকাইঞ।

20 এ বকঞ হেৎদ মিশিঞ তুকু, আপেদ বুদ্ধিতে আল্পে হুডিং হনঃঅ লেকা হ্যুয়ুআ, বরঞ্চ হিংসাতে হুডিং হন লেকা হ্যুয়ুপে, মেন্খান বুদ্ধি তে পাক্লঅঃ পে।

21 রিলামালা আরিচালিরে অল মেনা আ 'ইঞদ এটা আ ঠার তে থুতিয়ান হড়কু লিয়া হেৎদ এটা দিশুম রিঙ্কূ হড় কুরাঃআ লুটিতে নিকু যাইত কু রাঃআ হান্ডে জাগারাঞ হাঞ আ, মেন্খান ইঙ্কা কাতে রহ অ হাঁঙ্কূ জাগার কাকু আয়ুমেয়া, নিয়া দ প্রভু জাগার কেৎ আ।

22 তবেখান ইঙ্কূ এটা এটা ঠার পাতিয়ান হড় কু নাতিনাং দ ল্হয়, বরংচ কাপাতিয়ান হড় কু রাঃআ নাতিনাং চিন্হা লেকাগে; মেন্খান ভাবিজাগারদ কাপাতিয়ান হড়কু নাতিনাংদ ল্হয়, বরংচ পাতিয়ান হড়কু রাঃআ নাতিনাংগে।

23 এন্খান যত মন্ডলী মিৎ থাংরে গে দুপ হুন্ডি কাতে যদি যত হড়কু এটা এটা ঠার তেকু থুতিয়া, হেৎদ হুডাং লেকা কাআ পাতিয়ান হড়কু তাহিনা, এন্খান ইঙ্কূ দচি কাকু গামেয়া, যে আপেদ পাগলা হড় তানাপে।

24 মেন্খান যত হড় যদি ভাবি জাগারেয়া কু হেৎদ যাহায় কাআ পাতিয়ান হড় চি বাহার রিঙ্কূ হড় কু ভীতির বলনা, তবেখান ইনিদ যত হড় রাঃআ ভাবি জাগার মাধ্যমতে দষী মেন্তে লেখাআয়। ইনিদ যত হড় রাঃআ ভাবি জাগার লিয়া দরবার রে তিঙ্গুনায়,

25 চিন্তং ইঙ্কূ বাহার রিঙ্কূ হড়কু আয়ুমেয়াকু, ইনিরাআ অন্তরে উকুয়া কানা ভাবকু যত সদর য়া; হেৎদ হেঙ এ নেকা লেকা কাতেগে ইনিদ উকুড়ুম কাতে ঈশ্বর রাঃআ ভজনা য়ায়্, গামেয়ায়্, ঈশ্বর সার্তি গে আপেয়া তালারে মেনাইয়া।

26 পাতিয়ান ব্কঞ তিকু হেৎদ মিশিঞ তিকু এন্খান কিনা আ তিঙ্গুইনা? আপে চিন্তং পে দুপ হুন্ডিয়া, ইন্তং অকয় রাঃআ দুরাং, অকয় রাঃআ উপদেশ, অকয় রাঃআ সার্তি সদর রাঃআ বাব্ব্দ, অকয় রাঃআ এটা ঠারতে জাগার, অকয় রাঃআ অর্থ ব্যাখ্যা, যতয়াগে আত্মিক লেকাতে মন্ডলী রাঃআ গাথা রাকাপ নাতিনাং তাহীন কা আ।

27 যাহায় যদি এটা ঠারতে জাগারেয়ায়্য়, তবে খান বার হড়, বাংখান বড়জোর আপি হড় কু গামে কা আ, পালি-পালি কাতেগে কু গামে কা আ, হেৎদ মিৎ হড় অর্থ ভাঙ্গা কাতে গামে কা আয়।

28 মেন্খান অর্থ ভাঙ্গানিইচ্ যদি যাহায় কাঃআ তাহিলেন খান এন্খান এটা ঠারতে জাগারিচ মন্ডলী রে থির থার তাহিনঃঅ কাআয়; একেন আয়ায়া নাতিনাং হেৎদ ঈশ্বর লঅ জাগরে কাআয়।

29 হেৎদ ভাবিজাগারিচ কু বার হড় বাংখান আপি হড় কাতে জাগারে কাআকু। এটা হড় কুদ ইনি কিনা গামকেৎআয় ইনা দরবারে আকু।

30 মেন্খান অটঃহঅ নেকাগে যাহায় রাঃআ হান্ডে যাহানা সদর র আ, অকয় মিশাতে দুপ মেনাইয়া, তবেখান পুইলা অকয় সদরিচ ইনি দ থির তাহিন কা আয়।

31 কারন আপে যত হড় মিমিৎ কাতে ভাবিজাগার গাম দাড়ি কাআপে, যেন যত হড় চেদ কা আ কু, হেৎদ যত হড় আশাবাদী হুয়ুকা আ কু।

32 হেৎদ ভাবিজাগারিচ কু রাঃআ আত্মা ভাবিজাগারকু রাঃআ বশরেকু তাহিনা;

33 চিয়া চি ঈশ্বরদ গন্ডগোল* রেনিচ ঈশ্বর ল্হয়, মেন্খান সুলুক রেনিচ। চিল্কা রীলামালান মান্মি কু রাঃআ মন্ডলী কুরে হুই ভাড়া।

34 মন্ডলী রে এরা হন কু থির কু তাহীন কা আ, চিয়া আ চি এরা হন কুকে জাগার রাঃআ আদেশ কা এম হুয়াকানা, বরংচ চিল্কা রেয়াজ* গামেয়ায়্, ইঙ্কূ অধীন রেকু তাহীন কা আ।

35 হেৎদ জাহানা আ চেদ নানাম তানা কু খানঃঅ, অড়ারে আকুয়াআ হেরেল কুকে কু কুলি কুকাআকু, কারণ মন্ডলীরে এরাহন কু রাঃআ কুক্লি জাগার গিয়ু রাআ বাবদতানা।

36 গামেপে মাহীন, ঈশ্বর রাঃআ জাগার দ চি আপেয়া হান্ডে হাতেৎ গে উডুঙ লেনা? চি শুধু আপেয়া হান্ডেগে হিচ্ লেনা?

37 যদি যাহায় আচ্কেগে ভাবিজাগারিচ বাংখান আত্মিক হড় মেন্তে মনেয়া আ, তবেখান ইনি সারিই কায়ায়্ য়, অকাকু আপেয়া হান্ডে অল কাতেৎ কুলা তাৎ পেয়া, ইনাকু যত প্রভু রাআ হুকুম তানা।

38 মেন্খান যদি যাহায় হড় অকা কু ইঞ অল তাৎঞ ইনাকু কাকু মানাবাতায়া খানঃঅ, এন্খান ইনি হড় রাঃআ জাগার কু আপে হঅঞ আল্পে মানাবাতায়া।

39 এন্খান, এ হাগাঞ হেৎদ মিশিঞ তুকু, আপে ভাবিজাগার গাম নাতিনাং স্যাপড়া তাহিন্ পে, হেৎদ এটা ঠারতে জাগার নাতিনাং আল্পে মানা কুয়া।

40 মেন্খান জ্ত্যাগে সুষ্ট হেৎদ খাটি আরিচালি লেকা হুয়ু কা আ।