1 হেৎদ রিলামালা হড় কু রাঃআ নাতিনাং দান হাতা রাঃআ বাব্ত্তে গালাথিয়া টলা কু রাঃআ মন্ডলী কুকে অকা আজ্ঞাঞ এমাৎ কুয়াঞ, আপে হঅ ইনাকু পান্তি ইদিপে।

2 সপ্তা রাঃআ পুইলা হুলাং আপে যত হড় আপেয়া আয় রাঃআ সম্বল লেকাতে হুডাং কাউডি ভেগার রে দহ তায়াপে, হিচ্ লেনখানিঞ ইঞ কে দান রাকাপ আল হুয়ু কা আ।

3 মেন্খান ইঞ চিন্তং আপেয়া হান্ডেঞ হিজুয়া, ইন্তং কথক হড় কে জেরুশালেম তেঞ কুল কুয়া, যাতে ইঙ্কূ আপেয়া উদার দান হাতা আগু দাড়ি কা আ কু। আপে আপেয়া অলরে অকয় কুকে পে উদু কুয়া, ইঙ্কূ কেগেঞ কুল কুয়াঞ।

4 তবে, ইঞাঃহঅ এন্ডে সেন রাঃআ জরুর মেনা আ মনেঞ খান, এন্খান ইঙ্কূ লঅ এন্ডেঞ সেনঃআঞ।

5 মেন্খান, ম্যাসিডোনিয়া টলা দর হাতেৎ ঘুরা হিচ্ কাতে আপেয়া হান্ডেঞ হিজুয়া চিয়া চি ম্যাসিডোনিয়া টলা হরকাতেগেঞ হিজুয়া;

6 ইঞ আপে লঅ কিছু মাহা তাহি দাড়িয়াঞ বাংখান রাবাং কাল আপে লঅঞ তাহিনা। ইনা তায়্ম ইঞ জাহাদর গেঞ সেনঃআ, এন্তে সেনঃঅ হুলাং হরা দর কয়ঃঅ কুলিঞ পে।

7 চিয়াচি নাহাঃআ সেনঃঅ হরারে আপে লঃঅ কাঞ নাপামা, নিয়াদ ইঞাঃআ ইচ্ছা, যদি ঈশ্বর রাঃআ ইচ্ছা তাহিনা এন্খান আপে লঃঅ হুডাং ঘাড়ি তাহি দাড়িআঞ।

8 মেন্খান, বিরিৎ পারম*16:8 পঞ্চাশত্তমী পরব অব্দি ইফিসেরে তাহিনাঞ, 9 কারন প্রভু রাঃআ কামী নাতিনাং ইঞাঃআ সামাং রে গাদা মারাং দুয়ার নিচ্চা কানা। অব্শ্য নিয়া কামিরে গাদা বিরোধ মাত মেনাঃআ।

10 তিম্থিয় যদি আপেয়া হান্ডে হিজু য়ায়্, এন্খান নিয়া ব্যাপার রে খেয়াল ধহয়পে, যেন আপে লঃঅ তাহি কালীন জাহানাঃআ জিনিষ কুতে আল্য়য় বরয় কাঃআয়, চিয়া চি ইনিদ ঈশ্বর রাঃআ কামিই তানায়, চিল্কা ইঞিঞ কামী তানা,

11 এন্তে যাহায় যেন ইনিকে টেরা মেত্তে আলকু নেলি কাঃআ, মেন্খান ইনিকে সুলুকতে আধাধুরা হরাকু উদুঃয়াই পে, যাতে ইনি ইঞাঃআ হান্ডে সেটের দাড়িঃ কাঃআয় চিয়া চি ইঞ হেৎদ হাগাকুলে আয়ায়া নাতিনাং তাঙ্গিরেলে মেনাঃলেয়া।

12 অটঃহঅগে ইঞ আবুয়া হাগা আ আপৌল্লো রাঃআ বাব্ত্তেঞ গামেতঃআ। ইঞ ইনিকে হাগা কু লঅ সেন নাতিনাং বিন্তি লিয়াঞ। মেন্খান নাহাঃআ আপেয়া হান্ডে সেন রাঃআ মন বাআয়না ইনি রাঃআ, মেন্খান অক্ত নাম লেখানে সেন্যায়।

13 চির্গাল তাহীন পে, পাতিয়ারে কেটেচ তাহিন্পে, সাহসঃঅ পে, দাড়িয়ান নঃঅপে।

14 আপে জাহানাগেপে কামিয়া দুলাড় লঅ কামিইপে।

15 আপে সারিই গেয়াপে, আখায়া টলা রে স্তিফান রাঃআ অড়া রেন্কু হড় কুদ মাড়াঙতে খ্রীস্ট রাঃআ অনুগামী হুই লেনাকু হেৎদ ইনা তায়ম রিলামালা হড় কুকে সেবা নাতিনাং নিজেকে কু সম্পা লেনা। ইনাতে এ ব্কঞ হেৎদ মিশিঞ তেকু, আপেয়া হান্ডেঞ বিন্তি তানাঞ;

16 আপে হঅ এনে এনকান হড় কুরাআ হেৎদ অক্যয় দেঙ্গাকু এমেয়া হেৎদ প্রভু রাঃআ নাতিনাং কুঠিন খাটাকু, ইঙ্কূয়া বাগতরে তাহিন্পে।

17 মেন্খান স্তিফান, ফর্তুনাত হেৎদ আখায়িক নেডেকু হিচ্লেনা মেন্তে ইঞ খুব কুশি, চিয়া চি আপে চিন্তং কাপে তাহিলেনা ইন্তং ইঙ্কূ ইঞকে গাদা কু দেঙ্গা তিইঞা।

18 ইঙ্কূ ইঞকে হেৎদ আপেয়া আত্মাকে গাদা আগ্রহী তাৎবুয়াকু। ইনাতে আপে নেকান হড়কুকে ঠাহর কাতে মান্ন্তা কূপে

19 এশিয়া মুলুক রিঙ্কূ মন্ডলী তরফ হাতেৎ আপেকে মানত জহারকু এমাপে তানা, আক্কিলা হেৎদ প্রিস্কা হেৎদ ইঙ্কূয়া জাহের মন্ডলী রিঙ্কূ যত হড় আপেকে ঢের গাদা আত্মাগুন জহার কু এমাপে তানা।

20 হেতৎদ যত পাতিয়ান হাগা মিশি কু হঅ আপেকে গড় জহার কু এমাপে তানা। আপে হঅ আপন আপিন কুকে রিলামালান দুলাড়তে সুলুকজহার এমা কূপে।

21 ইঞদ পৌল তানাঞ, ইঞ নাহাঃআ নিজ তিহিতে আপেকে গুন জহার এমাপে তানাঞ।

22 প্রভু রাঃআ নাতিনাং যদি যাহায় রাঃআ দুলাড় কা আ তাহিনা, ইন্খান ইনিদ শাপগ্রস্ত হুয়ু কাঃআয়। এ আলেয়া প্রভু দেলা হিজুম।

23 প্রভু যীশু রাঃআ মারাংদায়া আপে লঅ তাহীন কাঃআ।

24 যীশু খ্রীস্ট রে ইঞাঃআ দুলাড় আপে জ্ত্চকু লঅ তাহীন কাঃআ। আমেন ।