1 অটঃহঅ আপে অকা যত থুতিপে ইঞকে অল লিৎঞাআ, ইনা বাব্ত্তে ইঞা নিয়া তেলা রুয়াড় তানা, যাহায় কুড়ি হন কুকে কাঃআ জুটেত কড়া হন কু রাঃআ ভালাই;

2 মেন্খান হড়মালটম হাতেৎ বাঁঞ্চা নাতিনাং মিমিৎ কড়া হন কুরাঃআ আপনার এরাবাহুকু তাহীন কা আ, হেৎদ মিমিৎ এরা কু রাঃআ আপনার হেরেল কু তাহীন কা আ,

3 হেরেল আয়া আ এরাকে প্রাপ্য় এমাই কা আয়; এনে ইঙ্কা লেকাগে এরা হঅ হেরেল কে প্রাপ্য় এমাই কা আয়।

4 এরাদ আয়া আ নিজ হড় ম চেতান রে আইদারি বায়া আ না, মেন্খান আয়া হেরেল রাঃআ মেনা আ; এনে ইঙ্কা লেকাগে নিজ হড় ম চেতাং রে হেরেল রাঃআ আইদারি বায়া আ না, মেন্খান আয়া এরা রাঃআ মেনা আ;

5 আবেন আপান আপিন আলবেন ভেগার রে তাহিনোয়া; শুধু বিন্তি নাতিনাং ঝিরা-বসং ঞাম নাতিনাং বার হড় মিশাতে দুপ কাতে থুতি জাগার কাতে বারসিঙ লেকা ভেগার রে বেন তাহি দাড়ি য়া আ; ইনা তায়্ম অটঃহঅগে মিৎ থাংরেবেন তাহিনা, যাতে শয়তান আবেনা আ অসংযমতা রাঃআ নাতিনাং আবেনকে বিডারে আলয় নুর বেন কা আয়।

6 মেন্খান ইঞ দ আবেনকে হুকুম লেকাতেদ ল্হয়, মেন্খান অনুমতি লেকাতে নিয়াকু গামা বেন তানাঞ। 7 হেৎদ ইঞাঃআ ইচ্ছা নিয়া তানা, যত মান্মিকুগে ইঞ লেকা ডাঙ্গুয়া তাহীনঃঅ কাঃআকু; মেন্খান যত মান্মি ঈশ্বর রাঃআ হান্ডে হাতেৎ আপান আপিন দায়া দুলাড় ঞাম তাৎ আ কু, মিমিৎ হড় মিমিৎ লেকানা আ, এটা এটা হড় এটা লেকানা আ।

8 নাহাআ ডাঙ্গুয়া হড়কু রাঃআ হেৎদ রাঁন্ডি হড়কু রাঃআ হান্ডে ইঞাঃআ নিয়া থুতি, ইঙ্কূ যদি ইঞ লেকা তাহি দাড়িইয়াকু, এন্খান আকুয়াআ আ নাতিনাং ইনাগে বেশা আ; 9 মেন্খান ইঙ্কূ যদি আকুয়াআ আ হড় ম কাকু কবজ দাড়িয়া আ, এন্খান গঙ্গঅ দুতামঅ কা আ কু; চিয়া আ চি সিঙ্গেল রে মগদ মগদ জুল হাতেৎ গঙ্গ দুতামঅ গাদা বেশা।

10 অটঃঅ হঅগে গঙ্গঅ দুতাম হড় কুকেঞ হুকুমা পে তানা ইঞ, ইঞ গামাপে তানা ইঞ আঙ্কাদ ল্হয়, মেন্খান প্রভুগেয় গামাপে তানায়, এরা দঅ হেরেল কে বাগী কাতে আলয় সেনঃঅ কাআয়, 11 যদি সেনঃগেয়ায়্য়, এন্খান আলয় গংঅঃ কা আয়, বাংখান হেরেল লঅ মিশাতে কিন তাহীন কা আ, হেৎদ হেরেল হঅ এরা কে আলয় ছাডুই ঈকা আয়। 12 মেন্খান যত হড় কেঞ গামাপে তানা, প্রভু দ ল্হয়; যদি যাহায় পাতিয়ান হাগা রাঃআ অপাতিয়ান এরা মেনা ইয়া, হেৎদ ইনি কুড়ি হন ইনি লঅ তাহি নাতিনাং রাজি মেনাই আ, এন্খান ইনি হানিকে আলয় বাগিই কা আয়; 13 অটঃহঅগে অকয় পাতিয়ান এরা রাঃআ অপাতিয়ান হেরেল মেনা ইয়া, হেৎদ ইনি কড়া হন যদি হানি লঅ তাহীন নাতিনাং রাজি মেনাই আ, এন্খান ইনিদ হেরেল কে আলয় বাগী কা আয়। 14 চিয়া চি অপাতিয়ান হেরেল হানি এরা তে রিলামালা কানায়, অটঃহঅ অপাতিয়ান এরা হানি হেরেল তে রিলামালা কানায়; ইনা কাঃআ হুই লেনখান আপেয়া হন হপন কু অরীলামালা হুই কঃআকু হুনাং, মেন্খান বাস্তবরেদ ইঙ্কূ রীলামালান।

15 তুবু রহঅ অপাতিয়ান হেরেল বাংখান এরা কু সেনঃঅ খানঃঅ কু সেন কা আ কু; নেকানাআরে ইনি পাতিয়ান হাগা দ চি হানি মিসি আকিনা একরার রে আটক বানু কিনা, মেন্খান ঈশ্বর আবুকে সুলুকতে বাঞ্চাকাতে তাহি নাতিনাং গে রাঃআ তাৎ বুয়ায়।

16 কারণ, এ এরা কুড়ি হন, আম চিল্কাতে সারি ঞামেয়াম যে, আমাঃ আ হেরেল কে আম পরিত্রানিয়াম চি ল্হয় ? বাংখান এ কড়া হন, আম চিল্কাতে সারি ঞামেয়াম যে, আমাঃ আ এরাকে আম পরিত্রানিয়াম চি ল্হয়?

17 শুধু প্রভু অক্য়য়কে চিল্কা অংশ এমা তিৎআয়, ঈশ্বর অক্য়য়কে চিল্কা কাতেৎ রাঃআ তিৎ আয়, ইনিদ এঙ্কাগে সেসেন কা আয়। হেৎদ নেএ নেকান হুকুম যত মন্ডলীরে এমে তানাঞ।

18 যাহায় দ চি সুনু চুটি গেত কাতে রাঃআ তুকা কানা পে? এন্খান ইনিদ গেতাকান সুনু চুটি আল্য়য় মেটায় কা আ। যাহায় চি সুনু চুটি কাঃআ গেত লেকাতে রাঃআ তুকা কানা পে? এন্খান ইনিদ সুনু চুটি আল্য়য় গেতে কাঃআয়,

19 চুটি গেত জাহানা আ ল্হয়, চুটি কাঃআ গেত হঅ জাহানা ল্হয়, মেন্খান ঈশ্বর রাঃআ হুকুম গুনান মানানগে সার।

20 যিশু খ্রিষ্ট রে পাতিয়া বাত্রাং অকা হড়কে অকা দশা রে রাঃআ তুকা কানায়, ইনিদ ইঙ্কা দশা রেগে তাহীন কা আয়।

21 আম্ দ্চি মুনিশ লেকাতেম রাঃআ তুকা কানাম? আলম ভাব্নায়া; মেন্খান যদি আল্গা সাল্গা হুই দাড়িয়াম, ইনা আল্গা সাল্গা আলম আড়া গিডিয়াম, বরং ইঙ্কা না আ গে করাম।

22 চিয়া চি প্রভুতে রাঃআ তুকা কানায় অকয় মুনিশ, ইনিদ প্রভু রাঃআ আল্গা সাল্গা হড় তানায়; এন্কাগে আল্গা সাল্গা রারাঃআন অকয় হড়, ইনিদ খ্রীস্ট রাঃআ মুনিশ তানায়।

23 ঈশ্বর, যিশু খ্রিষ্ট রাআ লিয়া বিশেষ মূল্য এমাকাতে আপেদ কিরিং তুকা কানাপে, যাহান মান্মি কু রাঃআ মুনিশ দ আল্পে হুইয়আ।

24 এ ব্কঞ হেৎদ মিশিঞ তুকু, আপে যত হড় অকা অবস্থাতে রাঃআ তুকা কানাপে, ইনি ইনা অবস্থারে গে ঈশ্বর রাঃআ হান্ডে তাহীন কাআয়।

25 হেৎদ ডাংগুয়া কুড়ি হন কু রাঃআ বাব্ত্তে প্রভু রাঃআ জাহান আজ্ঞা ইঞ কাঞ ঞাম তাৎ আ, মেন্খান বিশ্বস্ত হুই নাতিনাং প্রভু রাঃআ দায়াহান মান্মি লেকা ইঞাঃআ মতামত সদরেত্য আঞ।

26 ইনাতে ইঞাঃআ মন গামেৎআয়, বর্তমান সঙ্কট রাআ নাতিনাং নিয়াটা বেশা, অর্থাৎ মান্মিকুকে ইঙ্কা গে তাহীনটা বেশা।

27 এরা লঅ আটকা কানা সম্বন্ধ টাআ আল্গা রাঃআ আলম কুরুমুটু য়া। আম দ চি ছাডুই গেয়াম? বাহু এরা নাম রাঃআ আলম কুরুমুটুয়া।

28 মেন্খান দুতাম অম রেহ কাই কাঃআ হ্যুয়আ; অটঃহঅ ডাঙ্গুয়া কুড়ি হন যদি গঙ্গঅঃ য়াআয়্, হানি রাঃআ হঅ কাই কাআ হ্যুয়আ। এন্খান নেকান হড়কু রাঃআ হড় ম রে গাদা কষ্ট হিজুয়াআ; হেৎদ আপে নাতিনাং ইঞাঃআ মমতা হ্যুইয়তানা।

29 মেন্খান ইঞ নিয়া থুতি গামাপেতানাঞ, ব্কঞ হেৎদ মিশিঞ তুকু, অক্ত বায়ায় না, নাহা আ হাতেৎ অকয় কু রাঃআ এরা মেনা কুয়া, ইঙ্কূ দ নেকাকু সেসেন কা আ, চিল্কা ইঙ্কূয়া আ এরা বানু কুয়া;

30 অটঃহঅ অকয় কু রোদন তানা, ইঙ্কূ কাকু রোদন তানা লেকা; অকয় কু রৌস্কা তানা, ইঙ্কূ কাকু রৌস্কা তানা লেকা; অকয় কু কিরিঞ এৎঃআ, ইঙ্কূ জাহানা আ কাকু দহ রুয়াড় তাৎআ লেকা মনেয় কাঃআকু;

31 অটঃহঅ অকয় কু ঘাঁরজ রাআ বিষয়বাবদ লঅ জড়িত গেয়া কু, এঙ্কা মনেয় কাঃকু, যেন ঘাঁরজ রাআ বিষয় বাবদ লঅ জড়িত বানু কুয়া; চিয়া চি নিয়া ঘাঁরজ রাঃআ অভিনয় মুচাতা কানা।

32 মেন্খান ইঞাঃআ গাম রাঃআ দ নিয়া ইচ্ছা তানা, আপে দ চিন্তারে আল্পে তাহিনা। অকয় ডাঙ্গুয়া গেয়ায়, ইনিদ প্রভু বাব্ত্তে চিন্তা য়াআয়্, চিল্কা লেকাতে প্রভু কে খুশি তুকায়ায়্য়। 33 মেন্খান অকয় গংঅ দুতামা কানায়, ইনিদ ঘাঁরজ বাব্ত্তে চিন্তা য়াআয়্, চিল্কা লেকাতে এরাকে খুশি তুকায়ায়্য়; এন্খান্গে আয়ায়্য় চিন্তা ভাবনা রাঃআ বিভিন্নতা ঘটাআ।

34 হেৎদ কাঃআ গঙ্গঅ হেৎদ ডাঙ্গুয়া কুড়ি হন কু দ প্রভু রাঃআ বাব্ত্তে কু চিন্তায়ায়্য়, যেন হড় ম হেৎদ আত্মাতে রীলামালান লেকা তাহি ন কাআকু; মেন্খান গঙ্গঅ এরা ঘাঁরজ বাব্ত্তে চিন্তা য়াআয়্য়, চিল্কা লেকাতে হেরেল কে খুশি তুকায়ায়্য়।

35 আপেয়া আ হিত রাঃআ নাতিনাং নিয়াঞ জাগারাপে তানাঞ; আপেয়া আ হটঃঅ রে বায়র আটক নাতিনাং দ ল্হয়, মেন্খান আপে যেন ঠিকঠাক পে তাহিন কা আ, হেৎদ মিৎ মনেতে প্রভুরাআ সেবা রে আসক্ত তাহীন কাঃআ পে।

36 মেন্খান যাহায় রাঃআ যদি দিশা হিজু তানা চি, হানি আয়ায়্য় ডাঙ্গুয়া হনেরা তেৎ রাআ বাগদত্তা* রাআ প্রতি সঠিক ব্যবস্থা কাঃআ হাতায় তানায়, যদি গংঅ রাআ উমুর পারমাকানা, হেৎদ ইনিকে গংঅ রাআ উপযুক্ত মেন্তে মনেআয়, এন্খান ইনি কিনা ইচ্ছায়া আয়, ইনাগে করায় কাআয়, ইন্তে ইনিরাআ যাহান কাই কাঃআ হুইয়াআ, ইনি গংঅ কাআয়.

37 মেন্খান অকয় হড় হৃদয় তে স্থীর, অকয় রাঃআ জাহানা প্রয়োজন বায়ায় না, হেৎদ নিজ রাঃআ ইচ্ছা তেগেয় সেসেনায়, ইনি যদি আয়ায়্য় হনেরা তেৎকে অড়া রে ডাঙ্গুয়া তে গে দহ নাতিনাং হৃদয় তে স্থীর দহয়ায়্য়, ইনা হঅ বেশগে তানা। 38 এন্তে অকয় আয়ায়্য় ডাঙ্গুয়া হনেরা তেৎকে গঙ্গিয়ায়, ইনি দ বেশ কামী য়ায়্য়, অটঃহঅগে অকয় কায় গঙ্গি খানঃঅয়, ইনিদ দ অটঃহ বেশ কামী য়ায়্য়।

39 চিমিন মাহা হেরেল জীউত এ তাহিনায়, ইমিন মাহা এরা দ ত্লরে তাহিনায়, মেন্খান হেরেল জাপিত তাড়ম মাড়াং লেন খানেয় ইনিদ আল্গায় নায়, অক্য়য়কে ইচ্ছায়ায়্য় ইনি লঅগেয় গংঙ দাড়িয়ায়, মেন্খান ইনি হেরেল প্রভুরে গে পাতিয়ানিচ হুইঅ কাঃআয়।

40 মেন্খান ইঞাঃআ গাম লেকাতেদ ইনি কায় গঙ্গ লেন্খানয় গাদা সারাও। হেৎদ ইঞাঃআ মনে হুইয়আ, ইঞ হঃঅ ঈশ্বর রাঃআ আত্মা ঞাম তাৎ আঞ।