Kitabu na Mwanang’hondolo
1 Abaho nyona kinhu kamba kitabu mumkono wa kudila wa ayo yakalile mkigoda cha undewa, kikala chandikigwe banzi zose na kikala kifungigwe kwa nzabi saba za hota. 2 Abaho nimona msenga wa kuulanga yeli na udahi, kakemelela kwa sauti, "Nani yofaya kubandula zinzabi za hota na kukipumbulula ikitabu?" 3 Lakini kukala kuduhu yoyose kuulanga, hebu mwiisi, hebu hasi kowochola wanhu wafile, yodaha kukipumbulula ikitabu acho na kulola mgati yake. 4 Avo, niye nilila ng’hani kwavija kuduhu yofaya kukipumbulula kitabu acho na kulola mgati yake. 5 Abaho, imoja wa waja iwavele kanongela, "Sekeulile. Lola! Simba wa kabila da Yuda, mzukulu wa Daudi, kahuma, na kofaya kuzibandula zinzabi saba za hota na kukipumbulula ikitabu."
6 Abaho nyona hagati ha kigoda cha undewa, kema Mwanang’hondolo kazungulukigwa banzi zose na viumbe vine vili na ugima na waja iwavele. Ayo Imwanang’hondolo koneka kamba kachinjigwa kakala na mhembe saba na meso saba, na zizo azo loho saba za Mulungu zitumigwe kila hanhu mwiisi yose.