Sauli komtogola Yesu
1 Mna ikipindi acho Sauli kagendelela kuwehila na kuwakoma wanahina wa Mndewa. Kachola kwa mulava nhosa mkulu, 2 kapula baluwa ya kujuwika mng’anda ya kumpula Mulungu ako Damesiki, muladi yahamvika munhu yoyose mtwanzi hebu mbigalo kotogola nzila ya Mndewa yamgoge yamgale Yelusalemu.
3 Sauli viyakalile mnzila behi na kuvika Damesiki, bahaja mulenge kulawa kuulanga ummwemwesela banzi zose. 4 Kagwa hasi na kahulika sauti yomulongela, "Sauli, Sauli! Habali konidununza?"
5 Sauli kauza, "Mndewa, gweye kwa nani?"
Kedika, "Niye na Yesu yuunidununza. 6 Lakini inuka uchole kudibuga, ako kolongeligwa cha kusang’hana."
7 Wanhu wakalile mwanza umoja na Sauli wema, hawalongile mbuli, sauti waihulika lakini hawamonile munhu. 8 Sauli kenuka, kabenzula meso gake, lakini hachonile kinhu. Avo wamgoga mkono wamulongoza Damesiki. 9 Kwa siku ndatu hadahile kulola, na kipindi chose acho hadile na hang’wile kinhu chochose.