18 "Silonga mweye mose, niwajuwa waja waniwasagule. Lakini Maandiko Gang’alile galongile vino galawilile, ‘Munhu ija inidile nayo lujo lwangu konihinduka.’ 19 Nowalongeleni sambi gang’hali haganalawila, muladi gahalawilila, mutogole kamba, ‘Niye ayo Heyo.’ 20 Nowalongeleni ukweli, yoyose yombokela munhu inimtuma konibokela niye, na yoyose yonibokela niye kombokela ija yanhumile."
Yesu kolagula kamba kohindukigwa
Mat 26:20-25; Mlk 14:17-21; Luk 22:21-23
21 Yesu viyamambukize kulonga avo, kona usungu ng’hani muumoyo wake, kalonga fulu ipile, "Nowalongeleni ukweli, imoja wenu konihinduka."
22 Wanahina wailola, kuno wonyawanyawa nani yolongigwa. 23 Mwanahina imoja, ija yanogeligwe ng’hani na Yesu, kakala behi na Yesu. 24 Simoni Petulo kamfunya, kamulongela, "Muuze, komulonga nani."
25 Avo mwanahina ija kamkwesela behi ng’hani Yesu, kamuuza, "Mndewa, komulonga nani?"
26 Yesu kamwidika, "Munhu ija yonda nimgwee kihande cha gate chonda nizanhike mbakuli, ayo munhu mwenyego." Abaho kasola kihande cha gate, kazanhika, kamgwaa Yuda mwanage Simoni Isikaliote. 27 Bahaja Yuda viyasolile digate, Mwenembago kamwingila. Yesu kamulongela, "Tenda himahima kiulonda kutenda!" 28 Kuduhu munhu mna iwaja wakalile muulujo yajuwile habali Yesu yamulongele vivo. 29 Kwavija Yuda kakala yopapa mkoba wa zisente, wanahina wayagwe wagesa Yesu kamulongela yachole kugula kija kilondeke mwiinyimwili nyimwili ya Pasaka, hebu yawagwee kinhu wakiwa.
30 Bahaja Yuda kadibokela gate, kachola kunze. Ikala ikilo.